IDFC ਫਸਟ ਬੈਂਕ 590 ਕਰੋੜ ਦਾ ਮਹਾਂਘੁਟਾਲਾ: ਮੁੱਖ ਮੁਲਜ਼ਮ ਵਿਕਰਮ ਵਾਧਵਾ ਗ੍ਰਿਫ਼ਤਾਰ, ਰੇਂਜ ਰੋਵਰ ਗੱਡੀ ਵੀ ਬਰਾਮਦ

ਜਾਗਰਣ ਸੰਵਾਦਦਾਤਾ, ਚੰਡੀਗੜ੍ਹ: ਹਰਿਆਣਾ ਦੇ ਵੱਖ-ਵੱਖ ਸਰਕਾਰੀ ਵਿਭਾਗਾਂ ਦੇ ਖਾਤਿਆਂ ਨਾਲ ਜੁੜੇ 590 ਕਰੋੜ ਰੁਪਏ ਦੇ ਕਥਿਤ ਘੁਟਾਲੇ ਅਤੇ ਚੰਡੀਗੜ੍ਹ ਨਗਰ ਨਿਗਮ ਤੇ ਕ੍ਰੈਸਟ (CREST) ਨਾਲ ਜੁੜੀਆਂ ਲਗਪਗ 190 ਕਰੋੜ ਰੁਪਏ ਦੀਆਂ ਵਿੱਤੀ ਬੇਨਿਯਮੀਆਂ ਦੇ ਮਾਮਲੇ ਵਿੱਚ ਮੁੱਖ ਸਾਜ਼ਿਸ਼ਕਰਤਾ ਮੰਨੇ ਜਾ ਰਹੇ ਚੰਡੀਗੜ੍ਹ ਦੇ ਕਾਰੋਬਾਰੀ ਵਿਕਰਮ ਵਾਧਵਾ ਨੂੰ ਚੰਡੀਗੜ੍ਹ ਪੁਲਿਸ ਦੀ ਕ੍ਰਾਈਮ ਬ੍ਰਾਂਚ ਨੇ ਸ਼ਨੀਵਾਰ ਨੂੰ ਖਰੜ ਤੋਂ ਗ੍ਰਿਫ਼ਤਾਰ ਕਰ ਲਿਆ ਹੈ।

ਪੁਲਿਸ ਅਨੁਸਾਰ ਵਾਧਵਾ ਲੰਬੇ ਸਮੇਂ ਤੋਂ ਜਾਂਚ ਏਜੰਸੀਆਂ ਤੋਂ ਬਚਦਾ ਫਿਰ ਰਿਹਾ ਸੀ। ਕ੍ਰਾਈਮ ਬ੍ਰਾਂਚ ਦੇ ਇੰਸਪੈਕਟਰ ਸਤਵਿੰਦਰ ਸਿੰਘ ਦੀ ਅਗਵਾਈ ਹੇਠ ਪੁਲਿਸ ਟੀਮ ਨੇ ਉਸ ਦੀਆਂ ਗਤੀਵਿਧੀਆਂ 'ਤੇ ਨਜ਼ਰ ਰੱਖਦੇ ਹੋਏ ਖਰੜ ਸਥਿਤ ਇਕ ਟਿਕਾਣੇ ਤੋਂ ਉਸ ਨੂੰ ਗ੍ਰਿਫ਼ਤਾਰ ਕੀਤਾ।

ਨਗਰ ਨਿਗਮ ਅਤੇ ਕ੍ਰੈਸਟ ਖਾਤਿਆਂ ਵਿੱਚ ਸਾਹਮਣੇ ਆਈ ਸੀ ਗੜਬੜੀ

ਚੰਡੀਗੜ੍ਹ ਵਿੱਚ ਇਹ ਘੁਟਾਲਾ ਦੋ ਵੱਖ-ਵੱਖ ਵਿੱਤੀ ਬੇਨਿਯਮੀਆਂ ਦੇ ਰੂਪ ਵਿੱਚ ਸਾਹਮਣੇ ਆਇਆ ਸੀ, ਜੋ ਨਗਰ ਨਿਗਮ ਚੰਡੀਗੜ੍ਹ ਅਤੇ ਚੰਡੀਗੜ੍ਹ ਰੀਨਿਊਏਬਲ ਐਨਰਜੀ ਐਂਡ ਸਾਇੰਸ ਐਂਡ ਟੈਕਨਾਲੋਜੀ ਪ੍ਰੋਮੋਸ਼ਨ ਸੁਸਾਇਟੀ (CREST) ਦੇ IDFC ਫਸਟ ਬੈਂਕ ਨਾਲ ਜੁੜੇ ਖਾਤਿਆਂ ਵਿੱਚ ਪਾਈਆਂ ਗਈਆਂ।

ਪਹਿਲਾ ਮਾਮਲਾ ਉਦੋਂ ਸਾਹਮਣੇ ਆਇਆ ਜਦੋਂ 2026 ਦੀ ਸ਼ੁਰੂਆਤ ਵਿੱਚ ਚੰਡੀਗੜ੍ਹ ਸਮਾਰਟ ਸਿਟੀ ਲਿਮਟਿਡ (CSL) ਪ੍ਰੋਜੈਕਟ ਬੰਦ ਹੋਣ ਤੋਂ ਬਾਅਦ ਉਸ ਦੇ ਫੰਡ ਨਗਰ ਨਿਗਮ ਨੂੰ ਟ੍ਰਾਂਸਫਰ ਕੀਤੇ ਜਾ ਰਹੇ ਸਨ। ਇਸ ਦੌਰਾਨ ਜਾਂਚ ਵਿੱਚ ਪਾਇਆ ਗਿਆ ਕਿ ਰਿਕਾਰਡ ਵਿੱਚ ਦਰਜ ਕਰੀਬ 116.84 ਕਰੋੜ ਰੁਪਏ ਦੀਆਂ ਫਿਕਸਡ ਡਿਪਾਜ਼ਿਟ ਰਸੀਦਾਂ (FDR) ਬੈਂਕ ਦੇ ਸਿਸਟਮ ਵਿੱਚ ਮੌਜੂਦ ਹੀ ਨਹੀਂ ਹਨ। ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਕਰੀਬ 11 FDR ਕਥਿਤ ਤੌਰ 'ਤੇ ਫ਼ਰਜ਼ੀ ਬਣਾ ਕੇ ਨਿਵੇਸ਼ ਦੇ ਸਬੂਤ ਵਜੋਂ ਜਮ੍ਹਾ ਕੀਤੀਆਂ ਗਈਆਂ ਸਨ।

ਇਸੇ ਦੌਰਾਨ ਕ੍ਰੈਸਟ (CREST) ਦੇ ਖਾਤਿਆਂ ਵਿੱਚ ਵੀ ਗੜਬੜੀ ਸਾਹਮਣੇ ਆਈ। ਵਿੱਤੀ ਰਿਕਾਰਡ ਦੇ ਮਿਲਾਨ ਦੌਰਾਨ ਅਧਿਕਾਰੀਆਂ ਨੂੰ 303 ਅਣਅਧਿਕਾਰਤ ਜਮ੍ਹਾ ਅਤੇ ਨਿਕਾਸੀ ਦੀਆਂ ਐਂਟਰੀਆਂ ਮਿਲੀਆਂ, ਜਿਸ ਨਾਲ ਲਗਪਗ 75 ਕਰੋੜ ਰੁਪਏ ਦੀ ਕਮੀ ਪਾਈ ਗਈ।

ਸ਼ੈੱਲ ਕੰਪਨੀਆਂ ਰਾਹੀਂ ਫੰਡ ਘੁਮਾਉਣ ਦਾ ਦੋਸ਼

ਜਾਂਚ ਏਜੰਸੀਆਂ ਅਨੁਸਾਰ ਵਾਧਵਾ ਨੇ IDFC ਫਸਟ ਬੈਂਕ ਵਿੱਚ ਜਮ੍ਹਾ ਸਰਕਾਰੀ ਫੰਡ ਨੂੰ ਕਥਿਤ ਤੌਰ 'ਤੇ ਸ਼ੈੱਲ ਕੰਪਨੀਆਂ, ਜਵੈਲਰਾਂ ਅਤੇ ਹੋਰ ਕਾਰੋਬਾਰੀ ਸੰਸਥਾਵਾਂ ਰਾਹੀਂ ਡਾਇਵਰਟ ਕਰਨ ਵਿੱਚ ਅਹਿਮ ਭੂਮਿਕਾ ਨਿਭਾਈ। ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ 'ਸਵਾਸਤਿਕ ਦੇਸ਼ ਪ੍ਰੋਜੈਕਟਸ ਪ੍ਰਾਈਵੇਟ ਲਿਮਟਿਡ' ਨਾਮਕ ਕੰਪਨੀ ਦੀ ਵਰਤੋਂ ਵੱਡੀ ਰਕਮ ਟ੍ਰਾਂਸਫਰ ਕਰਨ ਲਈ ਕੀਤੀ ਗਈ। ਜਾਂਚ ਏਜੰਸੀਆਂ ਦਾ ਅਨੁਮਾਨ ਹੈ ਕਿ ਕਰੀਬ 100 ਕਰੋੜ ਰੁਪਏ ਜਵੈਲਰੀ ਕਾਰੋਬਾਰੀਆਂ ਨੂੰ ਟ੍ਰਾਂਸਫਰ ਕੀਤੇ ਗਏ।

ਰੀਅਲ ਅਸਟੇਟ ਕੰਪਨੀਆਂ ਵਿੱਚ ਲਗਾਇਆ ਗਿਆ ਪੈਸਾ

ਜਾਂਚ ਵਿੱਚ ਇਹ ਵੀ ਸਾਹਮਣੇ ਆਇਆ ਹੈ ਕਿ ਘੁਟਾਲੇ ਦੀ ਰਕਮ ਦਾ ਵੱਡਾ ਹਿੱਸਾ ਵਿਕਰਮ ਵਾਧਵਾ ਨਾਲ ਜੁੜੇ ਬੈਂਕ ਖਾਤਿਆਂ ਤੱਕ ਪਹੁੰਚਿਆ। ਬਾਅਦ ਵਿੱਚ ਇਸ ਪੈਸੇ ਨੂੰ ਉਸਦੀਆਂ ਰੀਅਲ ਅਸਟੇਟ ਕੰਪਨੀਆਂ ਪ੍ਰਿਜ਼ਮਾ ਰੈਜ਼ੀਡੈਂਸੀ LLP, ਕਿਨਸਪਾਇਰ ਰਿਐਲਟੀ LLP ਅਤੇ ਮਾਰਟੇਲ ਬਿਲਡਵੈੱਲ LLP ਵਿੱਚ ਨਿਵੇਸ਼ ਵਜੋਂ ਲਗਾਇਆ ਗਿਆ।

ED ਵੀ ਕਰ ਰਹੀ ਹੈ ਜਾਂਚ

ਪ੍ਰਵਰਤਨ ਨਿਰਦੇਸ਼ਾਲਾ (ED) ਵੀ ਇਸ ਮਾਮਲੇ ਦੀ ਜਾਂਚ ਮਨੀ ਲਾਂਡਰਿੰਗ ਰੋਕੂ ਐਕਟ ਦੇ ਤਹਿਤ ਕਰ ਰਿਹਾ ਹੈ। ਏਜੰਸੀ ਨੇ ਚੰਡੀਗੜ੍ਹ, ਮੋਹਾਲੀ, ਪੰਚਕੂਲਾ, ਗੁਰੂਗ੍ਰਾਮ ਅਤੇ ਬੈਂਗਲੁਰੂ ਵਿੱਚ 19 ਥਾਵਾਂ 'ਤੇ ਛਾਪੇਮਾਰੀ ਕੀਤੀ ਹੈ।

1500 ਰੁਪਏ ਦੀ ਨੌਕਰੀ ਤੋਂ ਕਰੋੜਾਂ ਦੀ ਜਾਇਦਾਦ ਤੱਕ

ਪੰਜਾਬ ਦੇ ਮਲੋਟ ਦੇ ਰਹਿਣ ਵਾਲੇ ਵਿਕਰਮ ਵਾਧਵਾ 1990 ਦੇ ਦਹਾਕੇ ਵਿੱਚ ਚੰਡੀਗੜ੍ਹ ਆਏ ਸਨ। ਸ਼ੁਰੂਆਤੀ ਦੌਰ ਵਿੱਚ ਉਹ ਰਿਸ਼ਤੇਦਾਰਾਂ ਦੇ ਗੈਸਟ ਹਾਊਸ ਵਿੱਚ ਕੇਅਰਟੇਕਰ ਵਜੋਂ ਕਰੀਬ 1500 ਰੁਪਏ ਮਹੀਨਾਵਾਰ ਤਨਖਾਹ 'ਤੇ ਕੰਮ ਕਰਦੇ ਸਨ। ਬਾਅਦ ਵਿੱਚ ਉਨ੍ਹਾਂ ਨੇ ਰੀਅਲ ਅਸਟੇਟ ਕਾਰੋਬਾਰ ਵਿੱਚ ਕਦਮ ਰੱਖਿਆ ਅਤੇ ਹੌਲੀ-ਹੌਲੀ ਵੱਡੀ ਜਾਇਦਾਦ ਬਣਾ ਲਈ।