Mohali News : ਰਿਸ਼ਵਤ ਮਾਮਲੇ ’ਚ ਮੌਕੇ ਦਾ ਏਐੱਸਆਈ ਦੋਸ਼ੀ ਕਰਾਰ, ਦੋ ਮੁਲਜ਼ਮ ਬਰੀ

ਜੀਐੱਸ ਸੰਧੂ, ਪੰਜਾਬੀ ਜਾਗਰਣ, ਐੱਸਏਐੱਸ ਨਗਰ : ਮੋਹਾਲੀ ਦੀ ਵਿਸ਼ੇਸ਼ ਅਦਾਲਤ ਨੇ ਸ੍ਰੀ ਮੁਕਤਸਰ ਸਾਹਿਬ ਦੇ ਥਾਣਾ ਕੋਟਭਾਈ ਵਿਚ ਤਾਇਨਾਤ ਰਹੇ ਏਐੱਸਆਈ ਜਸਵਿੰਦਰ ਸਿੰਘ ਨੂੰ ਕਤਲ ਮਾਮਲੇ ਵਿਚ ਹਿਰਾਸਤ ਵਿਚ ਲਏ ਵਿਅਕਤੀ ਨੂੰ ਰਿਹਾਅ ਕਰਨ ਬਦਲੇ ਰਿਸ਼ਵਤ ਮੰਗਣ ਅਤੇ ਪ੍ਰਾਪਤ ਕਰਨ ਦੇ ਦੋਸ਼ ਵਿਚ ਦੋਸ਼ੀ ਕਰਾਰ ਦਿੰਦਿਆਂ ਸਜ਼ਾ ਸੁਣਾਈ ਹੈ। ਅਦਾਲਤ ਨੇ ਸਹਿ-ਮੁਲਜ਼ਮਾਂ ਐੱਚਸੀ ਕੁਲਦੀਪ ਸਿੰਘ ਤੇ ਐੱਚਸੀ ਰਾਮ ਸਰੂਪ ਨੂੰ ਬਰੀ ਕਰ ਦਿੱਤਾ ਹੈ।

ਦੋਸ਼ੀ ਜਸਵਿੰਦਰ ਸਿੰਘ ਨੂੰ ਭ੍ਰਿਸ਼ਟਾਚਾਰ ਰੋਕੂ ਕਾਨੂੰਨ, 1988 ਦੀ ਧਾਰਾ 7 ਤਹਿਤ 3 ਸਾਲ ਦੀ ਸਖ਼ਤ ਕੈਦ ਅਤੇ 25,000 ਰੁਪਏ ਜੁਰਮਾਨਾ ਤੇ ਧਾਰਾ 13(2) ਤਹਿਤ 4 ਸਾਲ ਦੀ ਸਖ਼ਤ ਕੈਦ ਅਤੇ 50,000 ਰੁਪਏ ਜੁਰਮਾਨਾ ਕੀਤਾ ਗਿਆ ਹੈ। ਦੋਵੇਂ ਸਜ਼ਾਵਾਂ ਨਾਲ-ਨਾਲ ਚੱਲਣਗੀਆਂ, ਏਐੱਸਆਈ ਨੂੰ ਕੁੱਲ 7 ਸਾਲ ਦੀ ਕੈਦ ਹੋਈ ਹੈ।

ਰਿਸ਼ਵਤ ਦੀ ਮੰਗ ਅਤੇ ਟਰੈਪ : ਇਹ ਮਾਮਲਾ ਉਦੋਂ ਸ਼ੁਰੂ ਹੋਇਆ ਜਦੋਂ ਸ਼ਿਕਾਇਤਕਰਤਾ ਜੱਗਾ ਸਿੰਘ ਨੇ ਦੱਸਿਆ ਕਿ ਉਸ ਦੇ ਪੁੱਤਰ ਕੁਲਦੀਪ ਸਿੰਘ ਨੂੰ 12 ਮਈ 2016 ਦੀ ਐੱਫਆਈਆਰ ਵਿਚ ਸੁਖਪਾਲ ਕੌਰ ਦੀ ਮੌਤ ਦੇ ਸਬੰਧ ਵਿਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਪੁੱਤਰ ਦੀ ਰਿਹਾਈ ਲਈ ਜੱਗਾ ਸਿੰਘ ਨੇ ਏਐੱਸਆਈ ਜਸਵਿੰਦਰ ਸਿੰਘ ਨਾਲ ਸੰਪਰਕ ਕੀਤਾ, ਜਿਸ ਨੇ ਪਹਿਲਾਂ 2.50 ਲੱਖ ਰੁਪਏ ਦੀ ਮੰਗ ਕੀਤੀ ਪਰ ਬਾਅਦ ਵਿਚ ਗ਼ੈਰ-ਕਾਨੂੰਨੀ ਪੁਲਿਸ ਹਿਰਾਸਤ ਤੋਂ ਜੁਡੀਸ਼ੀਅਲ ਹਿਰਾਸਤ ਵਿਚ ਭੇਜਣ ਬਦਲੇ 50,000 ਰੁਪਏ ਲੈਣ ਲਈ ਸਹਿਮਤੀ ਦੇ ਦਿੱਤੀ।

ਸਮਝੌਤੇ 'ਤੇ ਕਾਰਵਾਈ ਕਰਦਿਆਂ, ਵਿਜੀਲੈਂਸ ਬਿਊਰੋ ਨੇ 12 ਅਗਸਤ 2016 ਨੂੰ ਇਕ ਟਰੈਪ ਲਗਾਇਆ। ਫਿਨੋਲਫਥਾਲੀਨ ਨਾਲ ਸੋਧੇ ਗਏ 50-50 ਹਜ਼ਾਰ ਰੁਪਏ ਦੇ ਨੋਟ ਜੱਗਾ ਸਿੰਘ ਨੂੰ ਦਿੱਤੇ ਗਏ। ਜੱਗਾ ਸਿੰਘ ਨੇ ਜਸਵਿੰਦਰ ਸਿੰਘ ਦੇ ਦਫ਼ਤਰ ਅੰਦਰ ਉਸਨੂੰ ਪੈਸੇ ਫੜਾਏ। ਅਫ਼ਸਰ ਨੇ ਇਹ ਨੋਟ ਪਰਦੇ ਪਿੱਛੇ ਰੱਖ ਦਿੱਤੇ, ਜਿੱਥੋਂ ਵਿਜੀਲੈਂਸ ਬਿਊਰੋ ਨੇ ਉਨ੍ਹਾਂ ਨੂੰ ਬਰਾਮਦ ਕਰ ਲਿਆ।

ਅਦਾਲਤ ਦਾ ਫ਼ੈਸਲਾ : ਬਚਾਅ ਪੱਖ ਨੇ ਦੋਸ਼ਾਂ ਤੋਂ ਇਨਕਾਰ ਕਰਦਿਆਂ ਦਲੀਲ ਦਿੱਤੀ ਕਿ ਪੈਸੇ ਫਸਾਉਣ ਲਈ ਰੱਖੇ ਗਏ ਸਨ ਅਤੇ ਦਸਤਾਵੇਜ਼ ਜਾਅਲੀ ਸਨ। ਹਾਲਾਂਕਿ, ਅਦਾਲਤ ਨੇ ਦੋਵਾਂ ਧਿਰਾਂ ਦੀਆਂ ਦਲੀਲਾਂ ਸੁਣਨ ਤੋਂ ਬਾਅਦ ਇਹ ਫ਼ੈਸਲਾ ਦਿੱਤਾ ਕਿ ਪ੍ਰਾਸੀਕਿਊਸ਼ਨ ਰਿਸ਼ਵਤ ਦੀ ਮੰਗ, ਸਵੀਕਾਰ ਤੇ ਦੂਸ਼ਿਤ ਪੈਸੇ ਦੀ ਬਰਾਮਦਗੀ ਨੂੰ ਸ਼ੱਕ ਤੋਂ ਪਰੇ ਸਾਬਤ ਕਰਨ ਵਿਚ ਕਾਮਯਾਬ ਰਿਹਾ।