Mohali News : ਰੇਲ ਕੋਚ ਫੈਕਟਰੀ ਕਪੂਰਥਲਾ ਬਣੀ ਆਲ ਇੰਡੀਆ ਹਾਕੀ ਗੋਲਡ ਕੱਪ ਚੈਂਪੀਅਨ, ਪੰਚਾਇਤ ਮੰਤਰੀ ਤਰੁਣਪ੍ਰੀਤ ਸਿੰਘ ਸੌਂਦ ਨੇ ਜੇਤੂ ਟੀਮਾਂ ਨੂੰ ਵੰਡੇ ਇਨਾਮ

ਰਣਜੀਤ ਸਿੰਘ ਰਾਣਾ, ਐੱਸਏਐੱਸ ਨਗਰ : ਮੁਹਾਲੀ ਦੇ ਸੈਕਟਰ 63 ਦੇ ਬਲਬੀਰ ਸਿੰਘ ਸੀਨੀਅਰ ਅੰਤਰਰਾਸ਼ਟਰੀ ਹਾਕੀ ਸਟੇਡੀਅਮ ਵਿਖੇ ਚੱਲ ਰਹੇ ਆਲ ਇੰਡੀਆ ਮੁਹਾਲੀ ਗੋਲਡ ਕੱਪ ਹਾਕੀ ਟੂਰਨਾਮੈਂਟ-2025 ਦੇ ਫਾਈਨਲ ਮੁਕਾਬਲੇ ਵਿਚ ਰੇਲ ਕੋਚ ਫੈਕਟਰੀ ਕਪੂਰਥਲਾ ਨੇ ਐੱਫ਼ਸੀਆਈ ਦਿੱਲੀ ਦੀ ਟੀਮ ਨੂੰ 5-3 ਗੋਲਾਂ ਨਾਲ ਹਰਾ ਕੇ ਗੋਲਡ ਕੱਪ ਉੱਤੇ ਕਬਜ਼ਾ ਕਰ ਲਿਆ।

ਹਾਕੀ ਮੁਹਾਲੀ, ਜ਼ਿਲ੍ਹਾ ਹਾਕੀ ਐਸੋਸੀਏਸ਼ਨ ਵੱਲੋਂ ਕਰਾਏ ਗਏ ਇਸ ਟੂਰਨਾਮੈਂਟ ਦੇ ਜੇਤੂਆਂ ਨੂੰ ਇਨਾਮਾਂ ਦੀ ਵੰਡ ਪੰਚਾਇਤ ਮੰਤਰੀ ਤਰੁਣਪ੍ਰੀਤ ਸਿੰਘ ਸੌਂਦ ਨੇ ਕੀਤੀ।

ਉਨ੍ਹਾਂ ਪ੍ਰਬੰਧਕਾਂ ਦੇ ਉਪਰਾਲੇ ਦੀ ਸ਼ਲਾਘਾ ਕਰਦਿਆਂ ਹਾਕੀ ਨੂੰ ਪ੍ਰਫ਼ੁੱਲਿਤ ਕਰਨ ਲਈ ਕੀਤੇ ਯਤਨਾਂ ਦੀ ਸਰਾਹਨਾ ਕੀਤੀ ਅਤੇ ਪੰਜਾਬ ਸਰਕਾਰ ਵੱਲੋਂ ਹਰ ਤਰਾਂ ਦੀ ਸਹਾਇਤਾ ਦਾ ਭਰੋਸਾ ਦਿਵਾਇਆ। ਇਸ ਸਮਾਗਮ ਵਿਚ ਓਲੰਪੀਅਨ ਸੁਖਵੀਰ ਸਿੰਘ ਗਰੇਵਾਲ ਅਤੇ ਕਰਨਲ ਗੁਰਵੀਰ ਸਿੰਘ ਗਿੱਲ ਨੇ ਵੀ ਸ਼ਮੂਲੀਅਤ ਕਰਦਿਆਂ ਜੇਤੂਆਂ ਨੂੰ ਵਧਾਈ ਦਿੱਤੀ।

ਸਮਾਪਤੀ ਸਮਾਰੋਹ ਮੌਕੇ ਚੰਡੀਗੜ੍ਹ ਪੁਲਿਸ ਦੇ ਬੈਂਡ ਨੇ ਆਪਣੀਆਂ ਧੁਨਾਂ ਰਾਹੀਂ ਦਰਸ਼ਕ ਨਿਹਾਲ ਕੀਤੇ। ਇਸ ਮੌਕੇ ਲੜਕੀਆਂ ਦੀ ਹਾਕੀ ਦਾ ਸ਼ੋਅ ਮੈਚ ਵੀ ਹੋਇਆ। ਫ਼ਾਈਨਲ ਮੈਚ ਵਿਚ ਰੇਲ ਕੋਚ ਫੈਕਟਰੀ ਦੇ ਲਵਪ੍ਰੀਤ ਸਿੰਘ ਨੂੰ ਪਲੇਅਰ ਆਫ਼ ਦਾ ਮੈਚ ਐਵਾਰਡ ਨਾਲ ਸਨਮਾਨਿਤ ਕੀਤਾ ਗਿਆ। ਇਸੇ ਤਰਾਂ ਟੂਰਨਾਮੈਂਟ ਦੇ ਬੈਸਟ ਫ਼ਾਰਵਰਡ ਦਾ ਖ਼ਿਤਾਬ ਆਰਮੀ ਇਲੈਵਨ ਦੇ ਰੋਬਿਨ ਸਿੰਘ ਨੂੰ, ਬਿਹਤਰੀਨ ਡਿਫੈਂਡਰ ਦਾ ਖ਼ਿਤਾਬ ਐੱਫ਼ ਸੀ ਆਈ ਦੇ ਪਰਮਵੀਰ ਸਿੰਘ ਨੂੰ, ਹੋਣਹਾਰ ਖ਼ਿਡਾਰੀ ਦਾ ਖ਼ਿਤਾਬ ਪੰਜਾਬ ਸਿੰਧ ਬੈਂਕ ਦੇ ਵਿਕਰਮਜੀਤ ਸਿੰਘ ਨੂੰ ਅਤੇ ਟੂਰਨਾਮੈਂਟ ਦੇ ਬਿਹਤਰੀਨ ਗੋਲਕੀਪਰ ਦਾ ਖ਼ਿਤਾਬ ਰੇਲ ਕੋਚ ਫੈਕਟਰੀ ਦੇ ਅੰਮ੍ਰਿਤਪਾਲ ਸਿੰਘ ਨੂੰ ਦਿੱਤਾ ਗਿਆ।