ਹਾਕੀ ਦਾ ਰੋਮਾਂਚ ਸਿਖ਼ਰ 'ਤੇ : ਮੁਹਾਲੀ ਗੋਲਡ ਕੱਪ ਵਿਚ ਆਰਸੀਐੱਫ ਅਤੇ ਆਰਮੀ ਇਲੈਵਨ ਨੇ ਮਾਰੀਆਂ ਬਾਜ਼ੀਆਂ

ਜੀਐੱਸ ਸੰਧੂ, ਪੰਜਾਬੀ ਜਾਗਰਣ, ਐੱਸਏਐੱਸ ਨਗਰ : ਮੁਹਾਲੀ ਵਿਚ ਚੱਲ ਰਹੇ ਪਹਿਲੇ ਆਲ ਇੰਡੀਆ ਮੁਹਾਲੀ ਗੋਲਡ ਕੱਪ ਪੁਰਸ਼ ਹਾਕੀ ਟੂਰਨਾਮੈਂਟ 2025 ਦਾ ਰੋਮਾਂਚ ਤੀਜੇ ਦਿਨ ਵੀ ਜਾਰੀ ਰਿਹਾ, ਜਿਸ ਨੂੰ ਦੇਖਣ ਲਈ ਵੱਡੀ ਗਿਣਤੀ ਵਿਚ ਦਰਸ਼ਕ ਪਹੁੰਚੇ। ਦਿਨ ਭਰ ਚੱਲੇ ਦਿਲਚਸਪ ਮੁਕਾਬਲਿਆਂ ਨੂੰ ਦੇਖਣ ਲਈ ਕਈ ਪ੍ਰਮੁੱਖ ਹਸਤੀਆਂ ਵੀ ਵਿਸ਼ੇਸ਼ ਤੌਰ ਤੇ ਹਾਜ਼ਰ ਹੋਈਆਂ। ਟੂਰਨਾਮੈਂਟ ਨੂੰ ਚਾਰ ਚੰਨ ਲਾਉਣ ਲਈ, ਐੱਸਏਐੱਸ ਨਗਰ, ਮੁਹਾਲੀ ਦੇ ਮੇਅਰ ਅਮਰਜੀਤ ਸਿੰਘ ਸਿੱਧੂ ਅਤੇ ਵਾਰਡ ਨੰ. 22 ਦੇ ਕੌਂਸਲਰ ਜਸਬੀਰ ਸਿੰਘ ਮਾਂਕੂ ਨੇ ਖੇਡ ਮੈਦਾਨ ਵਿਚ ਸ਼ਿਰਕਤ ਕੀਤੀ ਅਤੇ ਖਿਡਾਰੀਆਂ ਦੀ ਹੌਸਲਾ ਅਫ਼ਜ਼ਾਈ ਕੀਤੀ। ਉਨ੍ਹਾਂ ਨੇ ਸਾਰੀਆਂ ਟੀਮਾਂ ਨੂੰ ਸ਼ਾਨਦਾਰ ਪ੍ਰਦਰਸ਼ਨ ਲਈ ਸ਼ੁਭਕਾਮਨਾਵਾਂ ਦਿੱਤੀਆਂ। ਇਹ ਟੂਰਨਾਮੈਂਟ ਸਿਰਫ਼ ਮੈਚਾਂ ਦਾ ਮੇਲਾ ਨਹੀਂ, ਸਗੋਂ ਖਿਡਾਰੀਆਂ ਦੇ ਬਹਾਦਰੀ ਅਤੇ ਰਣਨੀਤੀ ਨਾਲ ਭਰਪੂਰ ਇਕ ਰੰਗੀਨ ਕਹਾਣੀ ਹੈ। ਅਮਰਜੀਤ ਸਿੰਘ ਸਿੱਧੂ, ਮੇਅਰ-ਐੱਸਏਐੱਸ ਨਗਰ, ਮੁਹਾਲੀ ਨੇ ਕਿਹਾ, ਕਿ ਹਾਕੀ ਸਾਡੇ ਖ਼ੂਨ ਵਿਚ ਵੱਸਦੀ ਹੈ।ਅੱਜ ਦੇ ਖਿਡਾਰੀ ਭਵਿੱਖ ਦੇ ਸਿਤਾਰੇ ਹਨ। ਇਹ ਟੂਰਨਾਮੈਂਟ ਮੁਹਾਲੀ ਨੂੰ ਹਾਕੀ ਦੀ ਰਾਜਧਾਨੀ ਬਣਾਉਣ ਵਾਲਾ ਹੈ। ਚੰਡੀਗੜ੍ਹ ਐੱਕਸਆਈ, ਚੰਡੀਗੜ੍ਹ ਵਰਜਸ ਆਰਸੀਐੱਫ, ਕਪੂਰਥਲਾ – ਇਹ ਮੈਚ ਬਿਲਕੁਲ ਫਿਲਮ ਵਰਗਾ ਸੀ! ਆਰਸੀਐੱਫ ਨੇ ਅੰਤ ਤੱਕ ਨਿਰੰਤਰ ਹਮਲੇ ਨਾਲ 7-4 ਨਾਲ ਜਿੱਤ ਹਾਸਲ ਕੀਤੀ। ਖਿਡਾਰੀਆਂ ਨੇ ਹਰ ਗੋਲ ਨਾਲ ਦਰਸ਼ਕਾਂ ਨੂੰ ਖੜ੍ਹੇ ਹੋ ਕੇ ਤਾੜੀਆਂ ਵਜਾਉਣ ਲਈ ਮਜ਼ਬੂਰ ਕਰ ਦਿੱਤਾ। ਆਖ਼ਰ ਵਿਚ ਆਰਸੀਐੱਫ, ਕਪੂਰਥਲਾ ਨੇ ਜਿੱਤ ਪ੍ਰਾਪਤ ਕੀਤੀ। ਵੈਸਟਰਨ ਰੇਲਵੇਜ਼, ਮੁੰਬਈ ਵਰਜਸ ਆਰਮੀ ਐੱਕਸਆਈ, ਜਲੰਧਰ ਇੱਥੇ ਫ਼ੌਜੀਆਂ ਨੇ ਆਪਣੀ ਅਨੁਸ਼ਾਸਨ ਅਤੇ ਤੇਜ਼ੀ ਨਾਲ 3-1 ਨਾਲ ਫਤਹਿ ਹਾਸਲ ਕੀਤੀ। ਪਹਿਲੇ ਹਾਫ਼ ਵਿਚ ਬਰਾਬਰੀ ਰਹੀ, ਪਰ ਦੂਜੇ ਹਾਫ਼ ਵਿਚ ਆਰਮੀ ਨੇ ਗੋਲਾਂ ਦਾ ਬੰਬ ਫੋਡ਼ ਦਿੱਤਾ! ਜਿਸ ਵਿਚ ਆਰਮੀ ਐੱਕਸਆਈ, ਜਲੰਧਰ ਜਿੱਤ ਹਾਸਲ ਕੀਤੀ ‘‘‘‘‘‘‘‘‘‘‘ ਡੱਬੀ ਕੱਲ੍ਹ ਦੇ ਮੈਚ : ਪੂਲ-ਏ ਵਿਚ ਪਹਿਲਾ ਧਮਾਕਾ: ਸਵੇਰ 11:30 ਵਜੇ – ਆਰਸੀਐੱਫ, ਕਪੂਰਥਲਾ ਵਰਜਸ ਆਈਟੀਬੀਪੀ, ਜਲੰਧਰ। ਕੀ ਆਰਸੀਐੱਫ ਆਪਣੀ ਜਿੱਤ ਦੀ ਹੈਟਟ੍ਰਿਕ ਬਣਾਏਗਾ? ਪੂਲ-ਬੀ ਵਿਚ ਦੂਜੀ ਟੱਕਰ: ਦੁਪਹਿਰ 1:30 ਵਜੇ – ਆਰਮੀ ਐੱਕਸਆਈ, ਜਲੰਧਰ ਵਰਜਸ ਏਜੀ-ਐੱਕਸਆਈ, ਚੰਡੀਗੜ੍ਹ। ਫ਼ੌਜੀ ਜੋਸ਼ ਵਿਰੁੱਧ ਘਰੇਲੂ ਟੀਮ ਦੀ ਚਾਲਾਕੀ – ਕੌਣ ਜਿੱਤੇਗਾ? ਤੀਜਾ ਮੈਚ: ਸ਼ਾਮ 3:00 ਵਜੇ – ਪੀਐੱਸਬੀ, ਜਲੰਧਰ ਵਰਜਸ ਵੈਸਟਰਨ ਰੇਲਵੇਜ਼, ਮੁੰਬਈ। ਇਹ ਟੱਕਰ ਬਿਲਕੁਲ ਅਗਨੀ ਪਰੀਖਣ ਵਰਗੀ ਹੋਵੇਗੀ! ਇਹ ਟੂਰਨਾਮੈਂਟ ਹਾਕੀ ਪ੍ਰੇਮੀਆਂ ਦੇ ਦਿਲਾਂ ਵਿਚ ਅੱਗ ਲਗਾ ਰਿਹਾ ਹੈ, ਅਤੇ ਅੱਗੇ ਵਧੇਰੇ ਰੋਮਾਂਚਕ ਪਲਾਂ ਦੀ ਉਮੀਦ ਹੈ।