DIG ਭੁੱਲਰ ਰਿਸ਼ਵਤ ਕਾਂਡ ! ਚੰਡੀਗੜ੍ਹ ਬਣਾਇਆ 'ਰਿਸ਼ਵਤ ਦਾ ਅੱਡਾ', ਸੀਨੀਅਰ ਅਫਸਰਾਂ ਤੇ ਵਿਚੋਲਿਆਂ ਦੀ ਸੀ ਮਿਲੀਭੁਗਤ, CBI ਜਾਂਚ 'ਚ ਖੁਲਾਸਾ

ਜਾਗਰਣ ਸੰਵਾਦਦਾਤਾ, ਚੰਡੀਗੜ੍ਹ: ਪੰਜਾਬ ਦੇ ਮੁਅੱਤਲ ਡੀਆਈਜੀ (DIG) ਹਰਚਰਨ ਸਿੰਘ ਭੁੱਲਰ ਨਾਲ ਜੁੜੇ ਰਿਸ਼ਵਤ ਮਾਮਲੇ ਵਿੱਚ ਸੀਬੀਆਈ (CBI) ਨੂੰ ਕਈ ਅਹਿਮ ਜਾਣਕਾਰੀਆਂ ਮਿਲੀਆਂ ਹਨ। ਸੀਬੀਆਈ ਨੂੰ ਜਾਂਚ ਦੌਰਾਨ ਪਤਾ ਲੱਗਿਆ ਹੈ ਕਿ ਸਾਬਕਾ ਡੀਆਈਜੀ ਨੇ ਆਪਣੇ ਵਿਚੋਲਿਆਂ ਅਤੇ ਪੰਜਾਬ ਦੇ ਸੀਨੀਅਰ ਅਧਿਕਾਰੀਆਂ ਦਾ ਇੱਕ ਸੰਗਠਿਤ ਨੈੱਟਵਰਕ ਬਣਾ ਰੱਖਿਆ ਸੀ।

ਰਿਸ਼ਵਤ ਦੇ ਇਸ ਨੈੱਟਵਰਕ ਦੀਆਂ ਜ਼ਿਆਦਾਤਰ ਮੀਟਿੰਗਾਂ ਚੰਡੀਗੜ੍ਹ 'ਚ ਹੁੰਦੀਆਂ ਸਨ। ਚੰਡੀਗੜ੍ਹ ਨੂੰ ਇਨ੍ਹਾਂ ਨੇ ਰਿਸ਼ਵਤ ਦੇ ਲੈਣ-ਦੇਣ, ਸੌਦੇਬਾਜ਼ੀ ਤੇ ਰਕਮ ਦੀ ਡਿਲੀਵਰੀ ਲਈ ਸੁਰੱਖਿਅਤ ਥਾਂ (Safe Place) ਵਜੋਂ ਚੁਣਿਆ ਹੋਇਆ ਸੀ। ਚੰਡੀਗੜ੍ਹ ਨੂੰ ਰਿਸ਼ਵਤ ਦਾ ਅੱਡਾ ਬਣਾਇਆ ਹੋਇਆ ਸੀ। ਚੰਡੀਗੜ੍ਹ ਵਿੱਚ ਕਈ ਟਿਕਾਣਿਆਂ 'ਤੇ ਗੁਪਤ ਮੀਟਿੰਗਾਂ ਹੁੰਦੀਆਂ ਸਨ ਜਿਨ੍ਹਾਂ ਵਿੱਚ ਪੰਜਾਬ ਦੇ ਕਈ ਸੀਨੀਅਰ ਅਧਿਕਾਰੀ ਅਤੇ ਨਿੱਜੀ ਵਿਅਕਤੀ ਵੀ ਸ਼ਾਮਲ ਹੁੰਦੇ ਸਨ।

CBI ਨੇ ਹੁਣ ਪੰਜਾਬ ਦੇ ਅਣਪਛਾਤੇ ਅਧਿਕਾਰੀਆਂ ਅਤੇ ਨਿੱਜੀ ਵਿਅਕਤੀਆਂ ਵਿਰੁੱਧ ਮੁੱਢਲੀ ਜਾਂਚ (PE) ਦਰਜ ਕਰ ਲਈ ਹੈ। ਜੇਕਰ ਜਾਂਚ ਵਿਚ ਅਫਸਰਾਂ ਦੀ ਭੂਮਿਕਾ ਦੀ ਪੁਸ਼ਟੀ ਹੋਈ ਤਾਂ CBI ਉਹਨਾਂ ਵਿਰੁੱਧ FIR ਵੀ ਦਰਜ ਕਰ ਸਕਦੀ ਹੈ।

CBI ਨੇ ਇਨ੍ਹਾਂ ਅਫਸਰਾਂ ਦੇ ਨਾਂ ਜਨਤਕ ਨਹੀਂ ਕੀਤੇ ਹਨ, ਪਰ ਜਾਂਚ ਵਿੱਚ ਪਤਾ ਲੱਗਿਆ ਹੈ ਕਿ ਡੀਆਈਜੀ (DIG) ਭੁੱਲਰ ਆਪਣੇ ਵਿਚੋਲਿਆਂ ਦੀ ਮਦਦ ਨਾਲ ਨਿੱਜੀ ਵਿਅਕਤੀਆਂ ਦੇ ਸਰਕਾਰੀ ਕੰਮ ਕਰਵਾਉਂਦੇ ਸਨ। ਜਿਸ ਦੇ ਬਦਲੇ ਵਿੱਚ ਸਰਕਾਰੀ ਅਧਿਕਾਰੀਆਂ ਤੱਕ ਰਿਸ਼ਵਤ ਦੀ ਮੋਟੀ ਰਕਮ ਪਹੁੰਚਾਈ ਜਾਂਦੀ ਸੀ।

ਮੋਬਾਈਲ-ਲੈਪਟਾਪ ਤੋਂ ਖੁੱਲ੍ਹਣਗੇ ਕਈ ਰਾਜ਼

CBI ਨੇ ਪਿਛਲੇ ਸਾਲ ਭੁੱਲਰ ਅਤੇ ਉਹਨਾਂ ਦੇ ਵਿਚੋਲੇ, ਨਾਭਾ ਨਿਵਾਸੀ ਕ੍ਰਿਸ਼ਨੂ ਸ਼ਾਰਦਾ ਨੂੰ ਗ੍ਰਿਫਤਾਰ ਕੀਤਾ ਸੀ। ਉਸ ਕੇਸ ਵਿੱਚ CBI ਨੇ ਭੁੱਲਰ ਦੇ ਘਰੋਂ ਕੁਝ ਮੋਬਾਈਲ ਫੋਨ ਅਤੇ ਲੈਪਟਾਪ ਜ਼ਬਤ ਕੀਤੇ ਸਨ। ਇਸ ਤੋਂ ਇਲਾਵਾ ਕ੍ਰਿਸ਼ਨੂ ਦੇ ਘਰੋਂ ਸਲੇਟੀ (Grey) ਰੰਗ ਦੀ ਇੱਕ ਡਾਇਰੀ ਵੀ ਮਿਲੀ ਸੀ। ਇਸ ਡਾਇਰੀ ਅਤੇ ਮੋਬਾਈਲ-ਲੈਪਟਾਪ ਵਿੱਚ ਕਈ ਅਜਿਹੇ ਰਾਜ਼ ਹਨ, ਜਿਨ੍ਹਾਂ ਦੇ ਸਾਹਮਣੇ ਆਉਣ 'ਤੇ ਕਈ ਵੱਡੇ ਅਧਿਕਾਰੀ ਫਸ ਸਕਦੇ ਹਨ।

CBI ਨੇ ਭੁੱਲਰ ਦੀ ਗ੍ਰਿਫਤਾਰੀ ਵੇਲੇ ਮੋਬਾਈਲ-ਲੈਪਟਾਪ ਅਤੇ ਡਾਇਰੀ ਨੂੰ ਸੀਲ ਕਰ ਦਿੱਤਾ ਸੀ। ਹੁਣ CBI ਨੇ ਅਦਾਲਤ ਵਿੱਚ ਅਰਜ਼ੀ ਲਗਾ ਕੇ ਇਹਨਾਂ ਇਲੈਕਟ੍ਰਾਨਿਕ ਡਿਵਾਈਸਾਂ ਅਤੇ ਡਾਇਰੀ ਨੂੰ ਦੁਬਾਰਾ ਕਬਜ਼ੇ ਵਿੱਚ ਲੈਣ ਦੀ ਮਨਜ਼ੂਰੀ ਹਾਸਲ ਕਰ ਲਈ ਹੈ।