'ਲਾਰੈਂਸ ਦੀਆਂ ਚੱਪਲਾਂ ਸਾਫ਼ ਕਰਦਾ ਸੀ ਗੋਲਡੀ ਬਰਾੜ...' ਕਿਸ ਨੇ ਕੀਤਾ ਇਹ ਦਾਅਵਾ; ਵਾਇਰਲ ਹੋ ਰਹੀ ਆਡੀਓ

ਤਰੁਣ ਭਜਨੀ, ਪੰਜਾਬੀ ਜਾਗਰਣ, ਚੰਡੀਗੜ੍ਹ : ਗੋਲਡੀ ਬਰਾੜ ਵੱਲੋਂ ਲਾਰੈਂਸ ਬਿਸ਼ਨੋਈ 'ਤੇ ਲਗਾਏ ਗਏ ਗੰਭੀਰ ਦੋਸ਼ਾਂ ਤੋਂ ਇੱਕ ਦਿਨ ਬਾਅਦ ਗੈਂਗਵਾਰ ਦੀ ਤਣਾਵਪੂਰਨ ਕਹਾਣੀ ਹੋਰ ਗਹਿਰੀ ਹੋ ਗਈ ਹੈ। ਬੁੱਧਵਾਰ ਨੂੰ ਸੋਸ਼ਲ ਮੀਡੀਆ ‘ਤੇ ਇੱਕ ਹੋਰ ਆਡੀਓ ਕਲਿੱਪ ਵਾਇਰਲ ਹੋਈ, ਜਿਸ ਵਿੱਚ ਗੈਂਗ ਬਿਸ਼ਨੋਈ ਦੇ ਕਰੀਬੀ ਮੰਨੇ ਜਾਂਦੇ ਹਰੀ ਬਾਕਸਰ ਨੇ ਲਾਰੈਂਸ ਦੀ ਰੱਖਿਆ ਕਰਦੇ ਹੋਏ ਗੋਲਡੀ ਬਰਾਰ ਨੂੰ “ਗੱਦਾਰ” ਕਰਾਰ ਦਿੱਤਾ ਹੈ।

35 ਸਾਲਾ ਇੰਦਰਪ੍ਰੀਤ ਸਿੰਘ ਉਰਫ਼ ਪੈਰੀ ਦੀ ਸੋਮਵਾਰ ਸ਼ਾਮ ਚੰਡੀਗੜ੍ਹ ਦੇ ਸੈਕਟਰ-26 ਟਿੰਬਰ ਮਾਰਕਿਟ ਵਿੱਚ ਅਣਪਛਾਤੇ ਹਮਲਾਵਰਾਂ ਵੱਲੋਂ ਗੋਲ਼ੀਆਂ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ ਸੀ। ਇਸ ਘਟਨਾ ਤੋਂ ਬਾਅਦ ਗੈਂਗਾਂ ਵਿਚਕਾਰ ਦੋਸ਼-ਪ੍ਰਤਿਦੋਸ਼ ਦਾ ਸਿਲਸਿਲਾ ਲਗਾਤਾਰ ਤੇਜ਼ ਹੋ ਰਿਹਾ ਹੈ।

ਤਾਜ਼ਾ ਆਡੀਓ ਵਿੱਚ ਬਾਕਸਰ ਮੰਨੇ ਜਾ ਰਹੇ ਵਿਅਕਤੀ ਨੇ ਗੋਲਡੀ ਬਰਾੜ ਨੂੰ ਕਾਇਰ ਦੱਸਦਿਆਂ ਉਸ ਉੱਤੇ ਧੋਖੇਬਾਜ਼ੀ ਦੇ ਗੰਭੀਰ ਦੋਸ਼ ਲਗਾਏ ਹਨ। ਆਡੀਓ ਵਿੱਚ ਉਹ ਦਾਅਵਾ ਕਰਦਾ ਹੈ ਕਿ ਬਰਾੜ ਕਦੇ ਲਾਰੈਂਸ ਦੇ ਅਧੀਨ ਕੰਮ ਕਰਦਾ ਸੀ, ਇੱਥੋਂ ਤੱਕ ਕਿ “ਲਾਰੈਂਸ ਦੀਆਂ ਚੱਪਲਾਂ ਸਾਫ਼ ਕਰਦਾ ਸੀ ਅਤੇ ਟਰੱਕ ਚਲਾਉਂਦਾ ਸੀ। ਬਾਕਸਰ ਨੇ ਦਾਅਵਾ ਕੀਤਾ ਕਿ ਬਿਸ਼ਨੋਈ ਵੱਲੋਂ ਬਰਾੜ ਦੇ ਭਰਾ ਦੀ ਮੌਤ ਦਾ ਬਦਲਾ ਲੈਣ ਤੋਂ ਬਾਅਦ ਬਰਾੜ ਕੈਨੇਡਾ ਭੱਜ ਗਿਆ ਅਤੇ ਹੁਣ ਉਹ ਉਨ੍ਹਾਂ ਲੋਕਾਂ ਨਾਲ ਮਿਲ ਰਿਹਾ ਹੈ ਜਿਨ੍ਹਾਂ ਨੇ ਉਸਦੇ ਭਰਾ ਦੀ ਹੱਤਿਆ ਕਰਵਾਈ ਸੀ।

ਆਡੀਓ ਵਿੱਚ ਬਰਾੜ ਨੂੰ ਖੁੱਲ੍ਹਾ ਚੈਲੈਂਜ ਦਿੰਦਿਆਂ ਕਿਹਾ ਗਿਆ ਹੈ ਕਿ ਬਿਸ਼ਨੋਈ ਗਰੁੱਪ ਫੋਨ ‘ਤੇ ਧਮਕੀਆਂ ਨਹੀਂ ਦਿੰਦਾ , ਬਲਕਿ ਮੈਦਾਨ ਵਿੱਚ ਲੜਦਾ ਹੈ। ਇਸ ਵਿੱਚ ਚਿਤਾਵਨੀ ਦਿੱਤੀ ਗਈ ਹੈ ਕਿ ਬਰਾੜ ਦੇ ਸਮਰਥਕਾਂ ਨੂੰ ਆਪਣੀ ਆਖ਼ਰੀ ਇੱਛਾ ਪੂਰੀ ਕਰ ਲੈਣੀ ਚਾਹੀਦੀ ਹੈ।

ਆਡੀਓ ਦੇ ਅੰਤ ਵਿੱਚ ਬਾਕਸਰ ਨੇ ਬਰਾੜ ਨੂੰ ਚਿਤਾਵਨੀ ਦਿਤੀ ਹੈ ਕਿ ਉਹ ਕਿੱਥੇ ਵੀ ਲੁਕੇ, ਲੱਭਿਆ ਜਾਵੇਗਾ ਅਤੇ “ਮਰਨ ਤੋਂ ਪਹਿਲਾਂ ਉਸ ਨਾਲ ਚੱਪਲਾਂ ਚਟਾਈਆਂ ਜਾਣਗੀਆਂ।

ਇੱਕ ਪੁਲਿਸ ਅਧਿਕਾਰੀ ਨੇ ਪੁਸ਼ਟੀ ਕੀਤੀ ਕਿ ਦੋਵੇਂ ਰਿਕਾਰਡਿੰਗਾਂ ਦੀ ਪ੍ਰਮਾਣਿਕਤਾ ਦੀ ਜਾਂਚ ਕੀਤੀ ਜਾਵੇਗੀ ਅਤੇ ਇਹ ਵੀ ਦੇਖਿਆ ਜਾਵੇਗਾ ਕਿ ਕੀ ਉਨ੍ਹਾਂ ਦਾ ਪੈਰੀ ਦੀ ਹੱਤਿਆ ਨਾਲ ਕੋਈ ਸਬੰਧ ਹੈ।

ਦੂਜੇ ਪਾਸੇ, ਚੰਡੀਗੜ੍ਹ ਪੁਲਿਸ ਨੇ ਹਾਲਾਂਕਿ ਕਈ ਯੂਨਿਟਾਂ—ਓਪਰੇਸ਼ਨ ਸੈੱਲ, ਕਰਾਈਮ ਬ੍ਰਾਂਚ ਅਤੇ ਡਿਸਟ੍ਰਿਕਟ ਕਰਾਈਮ ਸੈੱਲ—ਨੂੰ ਤੈਨਾਤ ਕੀਤਾ ਹੈ, ਪਰ ਅਜੇ ਤੱਕ ਕਿਸੇ ਵੀ ਹਮਲਾਵਰ ਦੀ ਗ੍ਰਿਫ਼ਤਾਰੀ ਨਹੀਂ ਹੋਈ। ਪੁਲਿਸ ਦੀਆਂ ਟੀਮਾਂ ਇਸ ਵੇਲੇ ਪੰਜਾਬ, ਹਰਿਆਣਾ ਅਤੇ ਹਿਮਾਚਲ ਦੇ ਕਈ ਥਾਵਾਂ ‘ਤੇ ਛਾਪੇਮਾਰੀ ਕਰ ਰਹੀਆਂ ਹਨ ਅਤੇ ਨੇੜਲੇ ਰਾਜਾਂ ਦੀ ਪੁਲਿਸ ਨਾਲ ਸਾਂਝੇ ਤੌਰ ‘ਤੇ ਕੰਮ ਕਰ ਰਹੀਆਂ ਹਨ।

ਇੰਦਰਪ੍ਰੀਤ ਸਿੰਘ ਉਰਫ਼ ਪੈਰੀ ਦਾ ਅੰਤਿਮ ਸੰਸਕਾਰ ਬੁੱਧਵਾਰ ਨੂੰ ਕੀਤਾ ਗਿਆ। ਪੋਸਟਮਾਰਟਮ ਰਿਪੋਰਟ ਵਿੱਚ ਪੁਸ਼ਟੀ ਹੋਈ ਕਿ ਉਸਨੂੰ ਸੱਤ ਗੋਲ਼ੀਆਂ ਲੱਗੀਆਂ ਸਨ। ਪੁਲਿਸ ਨੇ ਦੱਸਿਆ ਕਿ ਹਮਲਾਵਰਾਂ ਨੇ ਨੇੜੇ ਤੋਂ ਫਾਇਰ ਕੀਤਾ ਸੀ।

ਚੰਡੀਗੜ੍ਹ ਸਾਈਬਰ ਕਰਾਈਮ ਸੈੱਲ ਨੇ ਪੈਰੀ ਦਾ ਮੋਬਾਈਲ ਫ਼ੋਨ ਜਾਂਚ ਚੁੱਕਾ ਹੈ ਅਤੇ ਹੁਣ ਉਸਦੇ ਕਾਲ ਰਿਕਾਰਡ, ਵਾਇਸ ਨੋਟ ਅਤੇ ਹਾਲੀਆ ਸੰਪਰਕਾਂ ਦੀ ਵਿਸਥਾਰ ਨਾਲ ਜਾਂਚ ਕੀਤੀ ਜਾ ਰਹੀ ਹੈ, ਤਾਂ ਜੋ ਇਹ ਪਤਾ ਲੱਗ ਸਕੇ ਕਿ ਹੱਤਿਆ ਤੋਂ ਪਹਿਲਾਂ ਉਹ ਕਿਸ ਨਾਲ ਸੰਪਰਕ ਵਿੱਚ ਸੀ।

ਪੁਲਿਸ ਜਾਂਚ ਹਾਲੇ ਸ਼ੁਰੂਆਤੀ ਪੜਾਅ ‘ਤੇ ਹੈ ਅਤੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਜਲਦੀ ਹੀ ਹਮਲਾਵਰਾਂ ਤੱਕ ਪਹੁੰਚਣ ਦੀ ਉਮੀਦ ਹੈ।