ਹਰ ਮਰੀਜ਼ 'ਤੇ ਫਿਕਸ ਸੀ ਕਮਿਸ਼ਨ, CBI ਨੂੰ ਮਿਲੀ ਲੱਖਾਂ ਰੁਪਏ ਦੀ ਟ੍ਰਾਂਜੈਕਸ਼ਨ; ECHS ਘੁਟਾਲੇ 'ਚ ਖੁੱਲ੍ਹਿਆ ਰਾਜ਼

ਜਾਗਰਣ ਸੰਵਾਦਦਾਤਾ, ਚੰਡੀਗੜ੍ਹ: ਨਿੱਜੀ ਹਸਪਤਾਲਾਂ 'ਚ ਐਕਸ-ਸਰਵਿਸਮੈਨ ਕੰਟਰੀਬਿਊਟਰੀ ਹੈਲਥ ਸਕੀਮ (ECHS) ਤਹਿਤ ਇਲਾਜ ਦੇ ਨਾਮ 'ਤੇ ਭ੍ਰਿਸ਼ਟਾਚਾਰ ਦੀ ਵੱਡੀ ਖੇਡ ਚੱਲ ਰਹੀ ਸੀ। ਸੀਬੀਆਈ (CBI) ਜਾਂਚ 'ਚ ਸਾਹਮਣੇ ਆਇਆ ਹੈ ਕਿ ਹਰ ਇਕ ਮਰੀਜ਼ 'ਤੇ ਕਮਿਸ਼ਨ ਫਿਕਸ ਸੀ ਤੇ ਲੱਖਾਂ ਰੁਪਏ ਦੀ ਟ੍ਰਾਂਜੈਕਸ਼ਨ ਦਾ ਖੁਲਾਸਾ ਹੋਇਆ ਹੈ।

ਸੀਬੀਆਈ ਨੇ ਕੁਝ ਨਿੱਜੀ ਹਸਪਤਾਲਾਂ, ਉਨ੍ਹਾਂ ਦੇ ਨਿਰਦੇਸ਼ਕਾਂ ਅਤੇ ਸਟਾਫ ਖਿਲਾਫ ਐਫਆਈਆਰ ਦਰਜ ਕੀਤੀ ਹੈ। ਮਰੀਜ਼ਾਂ ਨੂੰ ਜ਼ਬਰਦਸਤੀ ਅਤੇ ਬਿਨਾਂ ਕਿਸੇ ਕਾਰਨ ਹਸਪਤਾਲ ਵਿੱਚ ਦਾਖਲ ਕੀਤਾ ਜਾਂਦਾ ਸੀ। ਮਰੀਜ਼ਾਂ ਨੂੰ ਜ਼ਬਰਦਸਤੀ ਅਤੇ ਬਿਨਾਂ ਕਿਸੇ ਕਾਰਨ ਦੇ ਹਸਪਤਾਲ 'ਚ ਦਾਖਲ ਕੀਤਾ ਜਾਂਦਾ ਸੀ। ਫਿਰ ਉਨ੍ਹਾਂ ਦਾ ਫਰਜ਼ੀ ਇਲਾਜ ਰਿਕਾਰਡ ਤਿਆਰ ਕੀਤਾ ਜਾਂਦਾ ਸੀ, ਫਰਜ਼ੀ ਟੈਸਟ ਹੁੰਦੇ ਸਨ ਤੇ ਦਵਾਈਆਂ ਦੇ ਵਧਾ-ਚੜ੍ਹਾ ਕੇ ਬਿੱਲ ਬਣਾਏ ਜਾਂਦੇ ਸਨ। ਫਿਰ ਉਨ੍ਹਾਂ ਦੇ ਨਾਮ 'ਤੇ ਸਰਕਾਰ ਤੋਂ ਮੋਟਾ ਕਲੇਮ ਲਿਆ ਜਾਂਦਾ ਸੀ।

ਇਸ ਖੇਡ 'ਚ ਜੋ ਵੀ ਰਕਮ ਇਕੱਠੀ ਹੁੰਦੀ ਸੀ, ਉਸ ਨੂੰ ਅੱਧਾ-ਅੱਧਾ ਵੰਡ ਲਿਆ ਜਾਂਦਾ ਸੀ। ਸੀਬੀਆਈ ਨੂੰ ਜਾਂਚ ਦੌਰਾਨ 'ਮੰਥਨ ਹੈਲਥਕੇਅਰ' ਅਤੇ 'ਧਰਮ ਹਸਪਤਾਲ' ਦੇ ਵਿਚਕਾਰ ਲੱਖਾਂ ਦੇ ਲੈਣ-ਦੇਣ ਦਾ ਪਤਾ ਲੱਗਿਆ ਹੈ। ਇੱਕ ਸਮਝੌਤਾ (ਐਗਰੀਮੈਂਟ) ਵੀ ਮਿਲਿਆ ਹੈ ਜਿਸ ਵਿੱਚ ਅੱਧੀ-ਅੱਧੀ ਕਮਿਸ਼ਨ ਦਾ ਜ਼ਿਕਰ ਹੈ।

ਸੀਬੀਆਈ ਹੁਣ ਇਸ ਲੈਣ-ਦੇਣ ਦੀਆਂ ਕੜੀਆਂ ਨੂੰ ਆਪਸ ਵਿੱਚ ਜੋੜ ਰਹੀ ਹੈ। ਜਿਨ੍ਹਾਂ-ਜਿਨ੍ਹਾਂ ਹਸਪਤਾਲਾਂ ਦੇ ਖਾਤਿਆਂ 'ਚ ਰਕਮ ਟ੍ਰਾਂਸਫਰ ਕੀਤੀ ਜਾਂਦੀ ਸੀ, ਉਨ੍ਹਾਂ ਦਾ ਰਿਕਾਰਡ ਇਕੱਠਾ ਕੀਤਾ ਜਾ ਰਿਹਾ ਹੈ। ਸੀਬੀਆਈ 'ਮਨੀ ਟ੍ਰੇਲ' ਵੀ ਬਣਾ ਰਹੀ ਹੈ ਤਾਂ ਜੋ ਪਤਾ ਲੱਗ ਸਕੇ ਕਿ ਕਿਸੇ ਮਰੀਜ਼ ਦੇ ਨਾਮ 'ਤੇ ਪੈਸਾ ਕਿਹੜੇ-ਕਿਹੜੇ ਖਾਤਿਆਂ ਵਿੱਚ ਜਾਂਦਾ ਸੀ। ਇਸ ਦੇ ਨਾਲ ਹੀ, ਇਸ ਮਾਮਲੇ ਵਿੱਚ 'ਮਨੀ ਲਾਂਡਰਿੰਗ' ਦੀ ਜਾਂਚ ਵੀ ਸ਼ੁਰੂ ਹੋ ਸਕਦੀ ਹੈ।

ਸਰਕਾਰੀ ਅਧਿਕਾਰੀਆਂ ਤੋਂ ਬਿਨਾਂ ਘੁਟਾਲਾ ਸੰਭਵ ਨਹੀਂ

ਸੀਬੀਆਈ ਮੁਤਾਬਕ ਇਸ ਘੁਟਾਲੇ 'ਚ ECHS ਦੇ ਅਧਿਕਾਰੀਆਂ ਦੀ ਮਿਲੀਭੁਗਤ ਵੀ ਸਾਹਮਣੇ ਆਈ ਹੈ, ਹਾਲਾਂਕਿ ਕਿਸੇ ਦਾ ਨਾਂ ਅਜੇ ਤਕ ਐੱਫਆਈਆਰ 'ਚ ਸ਼ਾਮਲ ਨਹੀਂ ਕੀਤਾ ਗਿਆ ਹੈ। ਜਾਂਚ ਦੌਰਾਨ ਜ਼ਰੂਰੀ ਦਸਤਾਵੇਜ਼ਾਂ ਦੀ ਜਾਲਸਾਜ਼ੀ, ਡਿਜੀਟਲ ਸਿਸਟਮ ਨਾਲ ਛੇੜਛਾੜ ਤੇ ਡਿਜੀਟਲ ਸਿਗਨੇਚਰ ਦੀ ਦੁਰਵਰਤੋਂ ਵਰਗੀਆਂ ਗੰਭੀਰ ਬੇਨਿਯਮੀਆਂ ਮਿਲੀਆਂ ਹਨ। ਮਰੀਜ਼ਾਂ ਨੂੰ ਵਾਰ-ਵਾਰ ਹਸਪਤਾਲਾਂ 'ਚ ਰੈਫਰ ਕਰਨਾ ਅਤੇ ਫਿਰ ਕਲੇਮ ਪਾਸ ਕਰਵਾਉਣਾ ਬਿਨਾਂ ਅਧਿਕਾਰੀਆਂ ਦੀ ਮਦਦ ਦੇ ਸੰਭਵ ਨਹੀਂ ਸੀ। ਇਸ ਲਈ ਸੀਬੀਆਈ ਨੇ ਆਪਣੀ ਜਾਂਚ ਦਾ ਘੇਰਾ ਵਧਾ ਦਿੱਤਾ ਹੈ ਤੇ ਮਿਲੀਭੁਗਤ ਕਰਨ ਵਾਲੇ ਅਧਿਕਾਰੀਆਂ ਦਾ ਵੀ ਪਤਾ ਲਾਉਣਾ ਸ਼ੁਰੂ ਕਰ ਦਿੱਤਾ ਹੈ।

ਇਹ ਡਾਕਟਰ ਚਲਾ ਰਹੇ ਸਨ ਫਰਜ਼ੀਵਾੜੇ ਦੀ ਖੇਡ

ਨਿੱਜੀ ਹਸਪਤਾਲਾਂ 'ਚ ਇਸ ਖੇਡ ਦੇ ਮਾਸਟਰਮਾਈਂਡ 'ਮੰਥਨ ਹੈਲਥ ਕੇਅਰ' ਦੀ ਨਿਰਦੇਸ਼ਕ ਡਾ. ਰਿੰਪਲ ਗੁਪਤਾ ਅਤੇ ਡਾ. ਵਿਕਾਸ ਸ਼ਰਮਾ ਸਨ। ਉਨ੍ਹਾਂ ਨੇ ਇਸ ਘੁਟਾਲੇ ਨੂੰ ਅੰਜਾਮ ਦੇਣ ਲਈ ਹੋਰ ਹਸਪਤਾਲਾਂ ਨੂੰ ਆਪਣੇ ਨਾਲ ਜੋੜਿਆ ਹੋਇਆ ਸੀ। ਧਰਮ ਹਸਪਤਾਲ ਦੇ ਮਾਲਕ ਡਾ. ਅਜੇ ਕੁਮਾਰ ਅਗਰਵਾਲ ਦੀ ਭੂਮਿਕਾ ਦੀ ਵੀ ਜਾਂਚ ਕੀਤੀ ਜਾ ਰਹੀ ਹੈ।

ਧਰਮ ਹਸਪਤਾਲ ਦੇ ਮਾਲਕ ਡਾ. ਅਜੇ ਕੁਮਾਰ ਅਗਰਵਾਲ ਦੀ ਭੂਮਿਕਾ ਵੀ ਸਾਹਮਣੇ ਆਈ ਹੈ, ਹਾਲਾਂਕਿ ਸੀਬੀਆਈ (CBI) ਨੇ ਅਜੇ ਤਕ ਉਨ੍ਹਾਂ ਨੂੰ ਮੁਲਜ਼ਮ ਨਹੀਂ ਬਣਾਇਆ ਹੈ ਪਰ ਉਨ੍ਹਾਂ ਦੀ ਭੂਮਿਕਾ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਸੀਬੀਆਈ ਮੁਤਾਬਕ ਡਾ. ਅਗਰਵਾਲ ਨੇ ਤਾਂ ਆਪਣਾ ਪੂਰਾ ਸਿਸਟਮ ਹੀ ਮੰਥਨ ਹੈਲਥ ਕੇਅਰ ਨੂੰ ਸੌਂਪਿਆ ਹੋਇਆ ਸੀ। ਇੰਨਾ ਹੀ ਨਹੀਂ ਮੰਥਨ ਹੈਲਥ ਕੇਅਰ ਦੇ ਫਰਜ਼ੀ ਕਲੇਮ ਵੀ ਧਰਮ ਹਸਪਤਾਲ ਦੇ ਈਸੀਐਚਐਸ (ECHS) ਡੈਸਕ ਤੋਂ ਭਰੇ ਜਾ ਰਹੇ ਸਨ।

ਇਨ੍ਹਾਂ ਖਿਲਾਫ ਕੇਸ ਦਰਜ:

• ਮੰਥਨ ਹੈਲਥ ਕੇਅਰ, ਸੈਕਟਰ-38
• ਧਰਮ ਹਸਪਤਾਲ, ਸੈਕਟਰ-15
• ਕੇਅਰ ਪਾਰਟਨਰ ਹਾਰਟ ਸੈਂਟਰ, ਸੈਕਟਰ-19
• ਬਿੱਲ ਕਲਰਕ ਮਨਜੀਤ ਸਿੰਘ ਤੇ ਪ੍ਰਵੀਨ ਕੁਮਾਰ
• ECHS ਪਾਲੀ ਕਲੀਨਿਕ ਤੇ ਰੀਜਨਲ ਸੈਂਟਰ ਦੇ ਅਧਿਕਾਰੀ