ਬੁੜੈਲ ਮਾਡਲ ਜੇਲ੍ਹ 'ਚ ਕੈਦੀਆਂ ਵਿਚਾਲੇ ਖੂਨੀ ਝੜਪ, ਇੱਕ ਗੰਭੀਰ ਜ਼ਖ਼ਮੀ

ਤਰੁਣ ਭਜਨੀ, ਪੰਜਾਬੀ ਜਾਗਰਣ, ਚੰਡੀਗੜ੍ਹ: ਬੁੜੈਲ ਮਾਡਲ ਜੇਲ੍ਹ ਵਿੱਚ ਬੀਤੇ ਮੰਗਲਵਾਰ ਨੂੰ ਤਿੰਨ ਕੈਦੀਆਂ ਦਰਮਿਆਨ ਭਿਆਨਕ ਝੜਪ ਹੋ ਗਈ। ਜੇਲ੍ਹ ਦੇ ਫੈਕਟਰੀ ਏਰੀਏ ਵਿੱਚ ਲੋਹੇ ਦੀ ਰਾਡ ਨਾਲ ਹੋਏ ਹਮਲੇ ਦੌਰਾਨ ਇੱਕ ਕੈਦੀ ਗੰਭੀਰ ਤੌਰ ’ਤੇ ਜ਼ਖ਼ਮੀ ਹੋ ਗਿਆ, ਜਿਸਨੂੰ ਇਲਾਜ ਲਈ ਸੈਕਟਰ 32 ਦੇ ਸਰਕਾਰੀ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਗਿਆ ਹੈ।

ਜੇਲ੍ਹ ਵਾਰਡਨ ਤਰੁਣ ਵੱਲੋਂ ਦਿੱਤੀ ਗਈ ਸ਼ਿਕਾਇਤ ਦੇ ਆਧਾਰ ’ਤੇ ਸੈਕਟਰ-49 ਥਾਣਾ ਪੁਲਿਸ ਨੇ ਤਿੰਨਾਂ ਕੈਦੀਆਂ ਖ਼ਿਲਾਫ਼ ਮਾਮਲਾ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਵਾਰਡਨ ਤਰੁਣ ਨੇ ਪੁਲਿਸ ਨੂੰ ਦੱਸਿਆ ਕਿ 7 ਜਨਵਰੀ 2026 ਨੂੰ ਉਹ ਫੈਕਟਰੀ ਏਰੀਏ ਵਿੱਚ ਡਿਊਟੀ ’ਤੇ ਸੀ। ਸਵੇਰੇ ਕਰੀਬ 11.30 ਵਜੇ ਤਿੰਨ ਕੈਦੀ ਅਚਾਨਕ ਫੈਕਟਰੀ ਏਰੀਏ ਵੱਲ ਦੌੜੇ ਅਤੇ ਉੱਥੇ ਪਈ ਲੋਹੇ ਦੀ ਐਂਗਲ ਚੁੱਕ ਕੇ ਆਪਸ ਵਿੱਚ ਲੜ ਪਏ।

ਵਾਰਡਨ ਤਰੁਣ ਨੇ ਆਪਣੇ ਸਾਥੀਆਂ ਨਾਲ ਮਿਲ ਕੇ ਕੈਦੀਆਂ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ, ਪਰ ਕੈਦੀਆਂ ਨੇ ਡਿਊਟੀ ’ਤੇ ਤਾਇਨਾਤ ਵਾਰਡਨਾਂ ਨਾਲ ਧੱਕਾ-ਮੁੱਕੀ ਵੀ ਕੀਤੀ।

ਕੈਦੀਆਂ ਦੀ ਪਛਾਣ ਕੈਲਾਸ਼ ਚੌਹਾਨ (ਨਿਵਾਸੀ ਸੈਕਟਰ-89, ਫਰੀਦਾਬਾਦ—ਹਰਿਆਣਾ), ਅਮ੍ਰਿਤਪਾਲ ਸਿੰਘ ਉਰਫ਼ ਗੁੱਜਰ (ਨਿਵਾਸੀ ਮੋਹਾਲੀ) ਅਤੇ ਮਨਜੀਤ ਉਰਫ਼ ਮੋਟਾ ਉਰਫ਼ ਰਾਹੁਲ ਉਰਫ਼ ਪਰਵਾ (ਨਿਵਾਸੀ ਸੋਨੀਪਤ—ਹਰਿਆਣਾ) ਵਜੋਂ ਹੋਈ ਹੈ। ਤਿੰਨੇ ਇੱਕੋ ਬੈਰਕ ਵਿੱਚ ਬੰਦ ਸਨ ਅਤੇ ਇਨ੍ਹਾਂ ਖ਼ਿਲਾਫ਼ ਪਹਿਲਾਂ ਤੋਂ ਹੀ ਕਈ ਅਪਰਾਧਿਕ ਮਾਮਲੇ ਦਰਜ ਹਨ। ਝੜਪ ਦੌਰਾਨ ਕੈਲਾਸ਼ ਚੌਹਾਨ ਗੰਭੀਰ ਜ਼ਖ਼ਮੀ ਹੋ ਗਿਆ, ਜਿਸਨੂੰ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਗਿਆ ਹੈ, ਜਦਕਿ ਅਮ੍ਰਿਤਪਾਲ ਅਤੇ ਮਨਜੀਤ ਨੂੰ ਮਾਮੂਲੀ ਚੋਟਾਂ ਆਈਆਂ, ਜਿਨ੍ਹਾਂ ਦਾ ਇਲਾਜ ਜੇਲ੍ਹ ਹਸਪਤਾਲ ਵਿੱਚ ਕੀਤਾ ਗਿਆ।

ਪੁਲਿਸ ਮੁਤਾਬਕ ਤਿੰਨਾਂ ਕੈਦੀਆਂ ਨੇ ਜੇਲ੍ਹ ਦੇ ਸ਼ਾਂਤਮਈ ਮਾਹੌਲ ਨੂੰ ਭੰਗ ਕੀਤਾ ਅਤੇ ਸਰਕਾਰੀ ਕਰਮਚਾਰੀਆਂ ਨੂੰ ਡਿਊਟੀ ਨਿਭਾਉਣ ਤੋਂ ਰੋਕਿਆ। ਸੈਕਟਰ-49 ਥਾਣਾ ਪੁਲਿਸ ਨੇ ਤਿੰਨਾਂ ਖ਼ਿਲਾਫ਼ ਕੇਸ ਦਰਜ ਕਰਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।