ਚੰਡੀਗੜ੍ਹ ਦੇ ਆਸਮਾਨ ‘ਚ ਹਵਾਈ ਫੌਜ ਦੇ ਜਹਾਜ਼ਾਂ ਨੇ ਵਿਖਾਏ ਕਰਤਬ, ਸੁਖਨਾ ਝੀਲ ‘ਤੇ ਦਿੱਖਿਆ ਅਦਭੁਤ ਨਜ਼ਾਰਾ

ਤਰੁਣ ਭਜਨੀ, ਚੰਡੀਗੜ੍ਹ। ਦੇਸ਼ਭਗਤੀ ਤੇ ਹਵਾਈ ਹੁਨਰ ਦੇ ਅਦਭੁਤ ਮਿਲਾਪ ਦਾ ਪ੍ਰਤੀਕ ਭਾਰਤੀ ਹਵਾਈ ਫੌਜ ਦੀ ਪ੍ਰਸਿੱਧ ‘ਸੂਰਿਆਕਿਰਣ ਏਅਰੋਬੈਟਿਕ ਡਿਸਪਲੇਅ’ ਨੇ ਅੱਜ ਸੁਖਨਾ ਝੀਲ, ਚੰਡੀਗੜ੍ਹ ‘ਤੇ ਹਜ਼ਾਰਾਂ ਦਰਸ਼ਕਾਂ ਨੂੰ ਮੋਹ ਲਿਆ। ਆਸਮਾਨ ਵਿੱਚ ਏਅਰ ਫੋਰਸ ਦੇ ਏਅਰਕ੍ਰਾਫਟਸ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। ਜਹਾਜ਼ਾਂ ਦੇ ਕਰਤਬਾਂ ਅਤੇ ਰੰਗ-ਬਿਰੰਗੇ ਧੂੰਏਂ ਦੀਆਂ ਲਕੀਰਾਂ ਨੇ ਅਜਿਹਾ ਦ੍ਰਿਸ਼ ਪੈਦਾ ਕੀਤਾ ਜਿਸ ਨਾਲ ਦਰਸ਼ਕ ਰੋਮਾਂਚਿਤ ਹੋ ਗਏ ਅਤੇ ਉਨ੍ਹਾਂ ਵਿੱਚ ਦੇਸ਼ਭਗਤੀ ਦੀ ਭਾਵਨਾ ਜਾਗ ਉੱਠੀ।

ਸਮਾਗਮ ਦੇ ਮੁੱਖ ਮਹਿਮਾਨ ਮੁੱਖ ਸਕੱਤਰ ਐਚ. ਰਾਜੇਸ਼ ਪ੍ਰਸਾਦ ਚੰਡੀਗੜ੍ਹ ਨੇ ਭਾਰਤੀ ਹਵਾਈ ਫੌਜ ਦੀ ਸ਼ਾਨਦਾਰ ਸਮਰੱਥਾ, ਅਨੁਸ਼ਾਸਨ ਅਤੇ ਸਮਰਪਣ ਦੀ ਸ਼ਲਾਘਾ ਕੀਤੀ। ਉਨ੍ਹਾਂ ਇਸ ਭਵਿਆ ਆਯੋਜਨ ਵਿੱਚ ਯੋਗਦਾਨ ਪਾਉਣ ਵਾਲੇ ਸਾਰੇ ਵਿਭਾਗਾਂ ਦੇ ਯਤਨਾਂ ਦੀ ਵੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਇਸ ਤਰ੍ਹਾਂ ਦੇ ਪ੍ਰੋਗਰਾਮ ਨੌਜਵਾਨਾਂ ਨੂੰ ਪ੍ਰੇਰਿਤ ਕਰਨ ਅਤੇ ਦੇਸ਼ਭਗਤੀ ਦੀ ਭਾਵਨਾ ਮਜ਼ਬੂਤ ਕਰਨ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਉਂਦੇ ਹਨ।

ਸੂਰਿਆਕਿਰਣ ਏਅਰੋਬੈਟਿਕ ਟੀਮ ਨੇ ਤੇਜਸ ਅਤੇ ਯੁਵਾ ਫਾਰਮੇਸ਼ਨ, ਬੈਰਲ ਰੋਲ, ਹਾਈ ਸਪੀਡ ਕਰਾਸ, ਡੀਐਨਏ, ਹਾਰਟ ਅਤੇ ਲੂਪ ਵਰਗੇ ਹੈਰਾਨੀਜਨਕ ਹਵਾਈ ਕਰਤਬਾਂ ਦਾ ਪ੍ਰਦਰਸ਼ਨ ਕੀਤਾ, ਜੋ ਉਨ੍ਹਾਂ ਦੇ ਬੇਮਿਸਾਲ ਤਾਲਮੇਲ ਅਤੇ ਉਡਾਣ ਕੌਸ਼ਲ ਦਾ ਪ੍ਰਤੀਕ ਸਨ। ਤਿਰੰਗੇ ਰੰਗਾਂ ਨਾਲ ਸਜੀਆਂ ਧੂੰਏਂ ਦੀਆਂ ਲਹਿਰਾਂ ਨੇ ਚੰਡੀਗੜ੍ਹ ਦੇ ਆਸਮਾਨ ਨੂੰ ਦੇਸ਼ਭਗਤੀ ਦੇ ਰੰਗਾਂ ਨਾਲ ਰੰਗ ਦਿੱਤਾ ਅਤੇ ਦਰਸ਼ਕਾਂ ਵੱਲੋਂ ਜ਼ੋਰਦਾਰ ਤਾੜੀਆਂ ਮਿਲੀਆਂ। ਫਾਰਮੇਸ਼ਨ ਲੀਡਰ ਨੇ ਰੇਡੀਓ ਰਾਹੀਂ ਟ੍ਰਾਈਸਿਟੀ ਦੇ ਦਰਸ਼ਕਾਂ ਲਈ “ਬਲੂ ਸਕਾਈ ਅਤੇ ਹੈਪੀ ਲੈਂਡਿੰਗਜ਼” ਦਾ ਸੁਨੇਹਾ ਵੀ ਦਿੱਤਾ।

ਇਸ ਏਅਰ ਸ਼ੋ ਨੂੰ ਦੇਖਣ ਲਈ ਸਥਾਨਕ ਵਸਨੀਕਾਂ, ਸੈਲਾਨੀਆਂ ਅਤੇ ਹਵਾਈ ਯਾਨ ਪ੍ਰੇਮੀਆਂ ਦੀ ਭਾਰੀ ਭੀੜ ਇਕੱਠੀ ਹੋਈ, ਜਿਸ ਨਾਲ ਸੁਖਨਾ ਝੀਲ ਖੁਸ਼ੀ ਅਤੇ ਉਤਸ਼ਾਹ ਦਾ ਕੇਂਦਰ ਬਣ ਗਈ। ਚੰਡੀਗੜ੍ਹ ਪ੍ਰਸ਼ਾਸਨ, ਭਾਰਤੀ ਵਾਯੂ ਸੈਨਾ ਅਤੇ ਸੁਰੱਖਿਆ ਏਜੰਸੀਆਂ ਦੇ ਮਿਲਜੁਲ ਕੇ ਕੀਤੇ ਯਤਨਾਂ ਨਾਲ ਪ੍ਰੋਗਰਾਮ ਦਾ ਸਫਲ ਅਤੇ ਸੁਚਾਰੂ ਆਯੋਜਨ ਯਕੀਨੀ ਬਣਾਇਆ ਗਿਆ।

ਉਤਸਵ ਦਾ ਇਹ ਸਿਲਸਿਲਾ ਕੱਲ੍ਹ, 28 ਮਾਰਚ 2026 ਨੂੰ ਵੀ ਜਾਰੀ ਰਹੇਗਾ, ਜਦੋਂ ਇਸ ਹਵਾਈ ਪ੍ਰਦਰਸ਼ਨ ਵਿੱਚ ਪੰਜਾਬ ਦੇ ਰਾਜਪਾਲ ਅਤੇ ਯੂਟੀ ਚੰਡੀਗੜ੍ਹ ਦੇ ਪ੍ਰਸ਼ਾਸਕ ਗੁਲਾਬ ਚੰਦ ਕਟਾਰੀਆ ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ ਕਰਨਗੇ, ਜਿਸ ਨਾਲ ਇਸ ਸਮਾਗਮ ਦੀ ਸ਼ਾਨ ਹੋਰ ਵੱਧੇਗੀ। ਨਾਗਰਿਕਾਂ ਨੂੰ ਦੁਬਾਰਾ ਇਸ ਸ਼ਾਨਦਾਰ ਹਵਾਈ ਪ੍ਰਦਰਸ਼ਨ ਦੇ ਗਵਾਹ ਬਣਨ ਲਈ ਸੱਦਾ ਦਿੱਤਾ ਜਾਂਦਾ ਹੈ।