ਗਮਾਡਾ ਦੇ ਮਾਸਟਰ ਪਲਾਨ ਦੀ ਕਾਗ਼ਜ਼ੀ ਚਮਕ: 15-20 ਸਾਲ ਬਾਅਦ ਵੀ ਸੜਕਾਂ ਅਧੂਰੀਆਂ

ਜੀਐੱਸ ਸੰਧੂ, ਪੰਜਾਬੀ ਜਾਗਰਣ, ਐੱਸਏਐੱਸ ਨਗਰ : ਗਰੇਟਰ ਮੁਹਾਲੀ ਏਰੀਆ ਡਿਵੈਲਪਮੈਂਟ ਅਥਾਰਟੀ (ਗਮਾਡਾ) ਦੇ ਮਾਸਟਰ ਪਲਾਨ ਦੀ ਝੂਠੀ ਚਮਕ ਵਿਚ ਲੋਕਾਂ ਨੇ ਘਰ ਬਣਾਏ, ਦੁਕਾਨਾਂ ਖੋਲ੍ਹੀਆਂ ਅਤੇ ਸੁਪਨੇ ਸੰਜੋਏ ਪਰ ਅੱਜ ਉਹੀ ਲੋਕ ਉਸੇ ਮਾਸਟਰ ਪਲਾਨ ਦੀਆਂ ਸੜਕਾਂ ਦੇ ਨਾਂ ਤੇ ਬਣੀਆਂ ਟੁੱਟੀਆਂ-ਫੁੱਟੀਆਂ, ਕੱਚੀਆਂ-ਪੱਕੀਆਂ ਗਲੀਆਂ ਵਿਚ ਧੂੜ ਫੱਕਣ ਲਈ ਮਜਬੂਰ ਹਨ। 15 ਤੋਂ 20 ਸਾਲ ਬੀਤ ਗਏ ਹਨ, ਪਰ ਵਿਕਾਸ ਦਾ ਇੰਤਜ਼ਾਰ ਅੱਜ ਵੀ ਖ਼ਤਮ ਨਹੀਂ ਹੋਇਆ ਹੈ। ਬਾਕਸ-- 57 ਵਿਚੋਂ ਕਈ ਸੜਕਾਂ ਅੱਜ ਵੀ ਸਿਰਫ਼ ਕਾਗ਼ਜ਼ਾਂ ਤੇ : ਗਮਾਡਾ ਦੇ ਮਾਸਟਰ ਪਲਾਨ ਵਿਚ ਸ਼ਾਮਲ ਕੁੱਲ 57 ਸੜਕਾਂ ਵਿਚੋਂ ਕਈ ਸੜਕਾਂ ਅਜੇ ਵੀ ਅਜਿਹੀਆਂ ਹਨ, ਜਿਨ੍ਹਾਂ ਤੇ ਜ਼ਮੀਨ ਤੇ ਇਕ ਇੱਟ ਤੱਕ ਨਹੀਂ ਲੱਗੀ, ਜਦਕਿ ਸਾਲ 2025 ਆ ਗਿਆ ਹੈ, ਪਰ ਇਹ ਸੜਕਾਂ ਅੱਜ ਵੀ ਸਿਰਫ਼ ਕਾਗ਼ਜ਼ਾਂ ਤੇ ਹੀ ਸਾਹ ਲੈ ਰਹੀਆਂ ਹਨ। ਬਾਕਸ : ਇਨ੍ਹਾਂ ਅਧੂਰੀਆਂ ਸੜਕਾਂ ’ਚ ਇਹ ਸ਼ਾਮਲ ਹਨ: ਮਲੋਆ ਰੋਡ ਖਰੜ-ਲਾਂਡਰਾਂ-ਮੁੰਡੀ ਖਰੜ-ਬਲੌਂਗੀ ਰੋਡ ਮੁਹਾਲੀ ਤੋਂ ਸੈਕਟਰ 120 ਅਤੇ 125 ਤੱਕ ਦੀ ਰੋਡ ਸੈਕਟਰ 74/92 ਤੋਂ ਚੌਕ ਤੱਕ ਦਾ ਹਿੱਸਾ ਸੈਕਟਰ 114-115 ਤੋਂ ਹੁੰਦੇ ਹੋਏ 110-111 ਤੱਕ ਦਾ ਰਸਤਾ ਰੇਲਵੇ ਲਾਈਨ ਤੋਂ ਸੈਕਟਰ 82-83 ਤੱਕ ਰੇਲਵੇ ਲਾਈਨ ਦੇ ਨਾਲ ਸੈਕਟਰ 81-84 ਤੋਂ 100-104 ਤੱਕ ਸੈਕਟਰ 119/73 ਤੋਂ 91/92 ਤੱਕ ਦਾ ਚੱਕਰ ਰੋਡ ਸੈਕਟਰ 93 ਅਤੇ 94 ਰੋਡ ਦਾ ਚੱਕਰ ਸੈਕਟਰ 94 ਅਤੇ 95 ਰੋਡ ਦਾ ਚੱਕਰ ਸੈਕਟਰ 88-89 ਚੌਕ ਤੋਂ 110-111 ਚੌਕ ਤੱਕ ਸੈਕਟਰ 87-88 ਚੌਕ ਤੋਂ 109-110 ਚੌਕ ਤੱਕ ਸੈਕਟਰ 100-104 ਚੌਕ ਤੋਂ ਲਾਂਡਰਾਂ-ਮੁੰਡੀ ਰੋਡ ਤੇ 104-108 ਚੌਕ ਤੱਕ ਲੋਕਾਂ ਦਾ ਭਰੋਸਾ ਟੁੱਟਿਆ, ਰੋਜ਼ ਹਾਦਸੇ : ਸ਼ਹਿਰ ਦੇ ਸੈਕਟਰ 99, 100 ਅਤੇ 104 ਦੇ ਲੋਕਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੇ ਗਮਾਡਾ ਦਾ ਮਾਸਟਰ ਪਲਾਨ ਦੇਖ ਕੇ ਹੀ ਪਲਾਟ ਲਏ ਸਨ। ਕਈ ਸੈਕਟਰਾਂ ਵਿਚ ਲੋਕਾਂ ਨੇ ਮਾਸਟਰ ਪਲਾਨ ਦੀ ਡਰਾਇੰਗ ਦੇਖ ਕੇ ਘਰ ਅਤੇ ਦੁਕਾਨਾਂ ਬਣਾ ਲਈਆਂ ਸਨ। ਉਨ੍ਹਾਂ ਨੂੰ ਭਰੋਸਾ ਸੀ ਕਿ ਜਦੋਂ ਗਮਾਡਾ ਸੜਕ ਤਿਆਰ ਕਰੇਗਾ ਤਾਂ ਉਨ੍ਹਾਂ ਦੀ ਪ੍ਰਾਪਰਟੀ ਦੀ ਕੀਮਤ ਵਧੇਗੀ ਅਤੇ ਕਨੈਕਟੀਵਿਟੀ ਵੀ ਸੁਧਰੇਗੀ ਪਰ 15-20 ਸਾਲ ਬਾਅਦ ਵੀ ਉਹੀ ਸੜਕਾਂ ਸਿਰਫ਼ ਨਕਸ਼ੇ ਵਿਚ ਹੀ ਮੌਜੂਦ ਹਨ। ਕਈ ਲੋਕਾਂ ਨੇ ਦੱਸਿਆ ਕਿ ਜਦੋਂ ਉਨ੍ਹਾਂ ਨੇ ਘਰ ਖ਼ਰੀਦਿਆ ਤਾਂ ਉਨ੍ਹਾਂ ਨੂੰ ਦੱਸਿਆ ਗਿਆ ਸੀ ਕਿ ਉਨ੍ਹਾਂ ਦੇ ਪਿੱਛੋਂ 100 ਜਾਂ 200 ਫੁੱਟ ਸੜਕ ਨਿਕਲੇਗੀ, ਪਰ ਅੱਜ ਉੱਥੇ ਦੂਜੇ ਲੋਕਾਂ ਦੀਆਂ ਬਾਊਂਡਰੀ ਦੀਵਾਰਾਂ ਹਨ। ਕੁਝ ਥਾਵਾਂ ਤੇ ਤਾਂ ਟੋਏ ਇੰਨੇ ਡੂੰਘੇ ਹੋ ਗਏ ਹਨ, ਜਿਸ ਕਾਰਨ ਉੱਥੇ ਹਾਦਸੇ ਵੀ ਹੁੰਦੇ ਰਹਿੰਦੇ ਹਨ। ਕੋਰਟ ਦੀ ਝਾੜ-ਫਟਕਾਰ ਦੇ ਬਾਵਜੂਦ ਕੰਮ ਨਾ ਵਧਣ ਨਾਲ ਲੋਕਾਂ ਦਾ ਭਰੋਸਾ ਕਮਜ਼ੋਰ ਹੋਇਆ ਹੈ। ਬਾਕਸ-- ਗਮਾਡਾ ਦੇ ਮੁੱਖ ਪ੍ਰਸ਼ਾਸਕ ਦਾ ਬਿਆਨ : ਮੁਹਾਲੀ ਸਥਿਤ ਗਮਾਡਾ ਦਫ਼ਤਰ ਤੋਂ ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਗਮਾਡਾ ਦੀ ਮੁੱਖ ਪ੍ਰਸ਼ਾਸਕ ਸਾਕਸ਼ੀ ਸਾਹਨੀ ਨੇ ਕਿਹਾ ਅਸੀਂ ਉਨ੍ਹਾਂ ਸਾਰੇ ਮਾਸਟਰ ਪਲਾਨ ਸੜਕਾਂ ਤੇ ਕੰਮ ਕਰਨ ਜਾ ਰਹੇ ਹਾਂ ਜੋ ਕਨੈਕਟੀਵਿਟੀ ਲਈ ਅਹਿਮ ਹਨ ਅਤੇ ਕਈ ਸਾਲਾਂ ਤੋਂ ਨਹੀਂ ਬਣਾਈਆਂ ਗਈਆਂ। ਪ੍ਰਵਾਨਗੀ ਲਈ ਇਨ੍ਹਾਂ ਨੂੰ ਅਥਾਰਟੀ ਦੀ ਬੈਠਕ ਵਿਚ ਰੱਖਿਆ ਜਾਵੇਗਾ।