ਕਿਰਾਏਦਾਰਾਂ ਨੂੰ ਰੱਖਣ ਤੋਂ ਪਹਿਲਾਂ ਪੁਲਿਸ ਤਸਦੀਕ ਲਾਜ਼ਮੀ : ਏਐੱਸਪੀ

ਕਿਹਾ- ਕਿਰਾਏਦਾਰਾਂ ਦੀ ਤਸਦੀਕ ਨਾ ਕਰਵਾਉਣ ਵਾਲੇ ਮਕਾਨ ਮਾਲਕਾਂ ਖ਼ਿਲਾਫ਼ ਹੋਵੇਗੀ ਸਖ਼ਤ ਕਾਰਵਾਈ ਟੀਪੀਐੱਸ ਗਿੱਲ, ਪੰਜਾਬੀ ਜਾਗਰਣ, ਜ਼ੀਰਕਪੁਰ : ਜ਼ੀਰਕਪੁਰ ਪੁਲਿਸ ਨੇ ਕਿਰਾਏਦਾਰਾਂ ਦੀ ਤਸਦੀਕ ਨੂੰ ਸਖ਼ਤ ਕਰ ਦਿੱਤਾ ਹੈ। ਜ਼ੀਰਕਪੁਰ ਦੀ ਏਐੱਸਪੀ ਨੇ ਸਪੱਸ਼ਟ ਤੌਰ ’ਤੇ ਕਿਹਾ ਹੈ ਕਿ ਕਿਰਾਏਦਾਰਾਂ ਨੂੰ ਰੱਖਣ ਤੋਂ ਪਹਿਲਾਂ ਪੁਲਿਸ ਤਸਦੀਕ ਹੁਣ ਲਾਜ਼ਮੀ ਹੈ ਤੇ ਅਜਿਹਾ ਕਰਨ ’ਚ ਅਸਫਲ ਰਹਿਣ ਵਾਲੇ ਮਕਾਨ ਮਾਲਕਾਂ ਨੂੰ ਤੁਰੰਤ ਕਾਰਵਾਈ ਦਾ ਸਾਹਮਣਾ ਕਰਨਾ ਪਵੇਗਾ। ਪੁਲਿਸ ਅਨੁਸਾਰ ਇਹ ਕਈ ਮਾਮਲਿਆਂ ’ਚ ਦੇਖਿਆ ਗਿਆ ਹੈ ਕਿ ਸ਼ਰਾਰਤੀ ਅਨਸਰ ਕਿਰਾਏਦਾਰਾਂ ਦੇ ਰੂਪ ’ਚ ਸ਼ਹਿਰ ’ਚ ਦਾਖ਼ਲ ਹੁੰਦੇ ਹਨ। ਮਹੀਨਿਆਂ ਤੱਕ ਬਿਨਾਂ ਕਿਸੇ ਪਛਾਣ ਜਾਂ ਦਸਤਾਵੇਜ਼ਾਂ ਦੇ ਰਹਿੰਦੇ ਹਨ ਤੇ ਫਿਰ ਅਪਰਾਧ ਕਰਦੇ ਹਨ। ਗ਼ੈਰ-ਤਸਦੀਕਸ਼ੁਦਾ ਕਿਰਾਏਦਾਰ ਨਾ ਸਿਰਫ਼ ਪੁਲਿਸ ਜਾਂਚ ਨੂੰ ਗੁੰਝਲਦਾਰ ਬਣਾਉਂਦੇ ਹਨ ਬਲਕਿ ਸਥਾਨਕ ਸੁਰੱਖਿਆ ਨੂੰ ਵੀ ਪ੍ਰਭਾਵਿਤ ਕਰਦੇ ਹਨ। ਜ਼ੀਰਕਪੁਰ ਦੇ ਏਐੱਸਪੀ ਨੇ ਮਕਾਨ ਮਾਲਕਾਂ ਨੂੰ ਇਕ ਸਖ਼ਤ ਚੇਤਾਵਨੀ ਜਾਰੀ ਕੀਤੀ ਹੈ, ਜਿਸ ’ਚ ਕਿਹਾ ਗਿਆ ਹੈ ਕਿ ਪਾਲਣਾ ਨਾ ਕਰਨ ਵਾਲਿਆਂ ਵਿਰੁੱਧ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ। ਹਰ ਮਹੀਨੇ ਸੈਂਕੜੇ ਨਵੇਂ ਨਿਵਾਸੀ ਰੁਜ਼ਗਾਰ, ਕਾਰੋਬਾਰ ਜਾਂ ਸਿੱਖਿਆ ਲਈ ਜ਼ੀਰਕਪੁਰ ’ਚ ਵਸ ਰਹੇ ਹਨ। ਸ਼ਹਿਰ ’ਚ ਵੱਡੀ ਗਿਣਤੀ ’ਚ ਫਲੈਟ, ਪੀਜੀ ਤੇ ਕਿਰਾਏ ਦੇ ਘਰ ਉਪਲੱਬਧ ਹਨ ਪਰ ਕਿਰਾਏਦਾਰਾਂ ਲਈ ਪੁਲਿਸ ਤਸਦੀਕ ਦੇ ਅੰਕੜੇ ਚਿੰਤਾਜਨਕ ਹਨ। ਪਿਛਲੇ 10 ਮਹੀਨਿਆਂ ’ਚ ਸ਼ਹਿਰ ’ਚ ਸਿਰਫ਼ 5,000 ਦੇ ਕਰੀਬ ਕਿਰਾਏਦਾਰਾਂ ਦੀ ਪੁਲਿਸ ਤਸਦੀਕ ਕੀਤੀ ਗਈ ਹੈ। ਬਾਕਸ : ਮਕਾਨ ਮਾਲਕ ਵੀ ਕਰਦੇ ਹਨ ਸਾਰੇ ਨਿਯਮਾਂ ਦੀ ਉਲੰਘਣਾ ਮਕਾਨ ਮਾਲਕ ਵੀ ਸਾਰੇ ਨਿਯਮਾਂ ਦੀ ਉਲੰਘਣਾ ਕਰਦੇ ਹਨ। ਅਣਜਾਣ ਵਿਅਕਤੀਆਂ ਨੂੰ ਕਮਰੇ ਕਿਰਾਏ ’ਤੇ ਦਿੰਦੇ ਹਨ। ਕੋਈ ਨਹੀਂ ਜਾਣਦਾ ਕਿ ਕਿਸ ਘਰ ’ਚ ਕੌਣ ਸ਼ੱਕੀ ਹੈ, ਜਦੋਂ ਵੀ ਕੋਈ ਅਪਰਾਧਿਕ ਗਤੀਵਿਧੀਆਂ ’ਚ ਸ਼ਾਮਲ ਪਾਇਆ ਜਾਂਦਾ ਹੈ ਤਾਂ ਪੁਲਿਸ ਕਿਰਾਏਦਾਰਾਂ ਦੀ ਤਸਦੀਕ ਕਰਨਾ ਯਾਦ ਰੱਖਦੀ ਹੈ। ਪੁਲਿਸ ਹੁਣ ਉਨ੍ਹਾਂ ਮਕਾਨ ਮਾਲਕਾਂ ਵਿਰੁੱਧ ਕਾਰਵਾਈ ਕਰ ਰਹੀ ਹੈ, ਜੋ ਆਪਣੇ ਕਿਰਾਏਦਾਰਾਂ ਦੀ ਤਸਦੀਕ ਕਰਨ ’ਚ ਅਸਫ਼ਲ ਰਹਿੰਦੇ ਹਨ। ਨਗਰ ਕੌਂਸਲ ਖੇਤਰ ’ਚ ਕੁੱਲ 31 ਵਾਰਡ ਹਨ। ਇਨ੍ਹਾਂ ’ਚੋਂ ਪੇਂਡੂ ਖੇਤਰਾਂ ’ਚ ਕਿਰਾਏਦਾਰਾਂ ਦੀ ਗਿਣਤੀ ਜ਼ਿਆਦਾ ਹੈ, ਜਿੱਥੇ ਬਿਨਾਂ ਕਿਸੇ ਸਵਾਲ ਦੇ 3,000 ਤੋਂ 4,000 ਰੁਪਏ ’ਚ ਕਿਸੇ ਨੂੰ ਵੀ ਕਮਰੇ ਕਿਰਾਏ ’ਤੇ ਦਿੱਤੇ ਜਾਂਦੇ ਹਨ। ਛੱਤ, ਲੋਹਗੜ੍ਹ, ਦਿਆਲਪੁਰਾ, ਭਬਾਤ, ਢਕੌਲੀ ਤੇ ਬਲਟਾਣਾ ਵਰਗੇ ਪਿੰਡ ਉਨ੍ਹਾਂ ਬਹੁਤ ਸਾਰੇ ਪਿੰਡਾਂ ’ਚੋਂ ਹਨ, ਜਿੱਥੇ ਕਿਰਾਏਦਾਰਾਂ ਦੀ ਗਿਣਤੀ ਜ਼ਿਆਦਾ ਹੈ। ਬਾਕਸ-- ਤਸਦੀਕ ਕਿਉਂ ਜ਼ਰੂਰੀ ਹੈ? ਹਾਲ ਹੀ ’ਚ ਜ਼ੀਰਕਪੁਰ ’ਚ ਕਈ ਘਟਨਾਵਾਂ ਵਾਪਰੀਆਂ ਹਨ। ਪੁਲਿਸ ਦਾ ਕਹਿਣਾ ਹੈ ਕਿ ਜ਼ੀਰਕਪੁਰ ਤੇ ਇਸ ਦੇ ਆਸ-ਪਾਸ ਦੇ ਇਲਾਕਿਆਂ ’ਚ ਵੱਡੀ ਗਿਣਤੀ ’ਚ ਬਾਹਰੋਂ ਲੋਕ ਕਿਰਾਏ ’ਤੇ ਰਹਿ ਰਹੇ ਹਨ, ਜਿਨ੍ਹਾਂ ’ਚ ਵਿਦਿਆਰਥੀ, ਕੰਮਕਾਜੀ ਪੇਸ਼ੇਵਰ ਤੇ ਪ੍ਰਵਾਸੀ ਮਜ਼ਦੂਰ ਸ਼ਾਮਲ ਹਨ। ਹਾਲ ਹੀ ’ਚ ਇਹ ਦੇਖਿਆ ਗਿਆ ਹੈ ਕਿ ਅਪਰਾਧਿਕ ਪ੍ਰਵਿਰਤੀ ਵਾਲੇ ਵਿਅਕਤੀ ਕਿਰਾਏ ਦੇ ਘਰਾਂ ’ਚ ਵੀ ਪਨਾਹ ਲੈਂਦੇ ਹਨ। ਸਮੇਂ ਸਿਰ ਤੇ ਸਹੀ ਤਸਦੀਕ ਦੀ ਘਾਟ ਕਾਰਨ ਪੁਲਿਸ ਲਈ ਅਜਿਹੇ ਵਿਅਕਤੀਆਂ ਦੀ ਪਛਾਣ ਕਰਨਾ ਮੁਸ਼ਕਲ ਹੋ ਜਾਂਦਾ ਹੈ। ਏਐੱਸਪੀ ਗਜ਼ਲਪ੍ਰੀਤ ਕੌਰ ਨੇ ਸਪੱਸ਼ਟ ਕੀਤਾ ਕਿ ਇਹ ਹਰੇਕ ਮਕਾਨ ਮਾਲਕ ਦੀ ਜ਼ਿੰਮੇਵਾਰੀ ਹੈ ਕਿ ਉਹ ਕਿਰਾਏਦਾਰ ਨੂੰ ਰੱਖਣ ਤੋਂ ਪਹਿਲਾਂ ਉਨ੍ਹਾਂ ਦੇ ਸਥਾਈ ਪਤੇ ਤੇ ਪਛਾਣ ਪੱਤਰ (ਜਿਵੇਂ ਕਿ ਆਧਾਰ ਕਾਰਡ) ਬਾਰੇ ਪੂਰੀ ਜਾਣਕਾਰੀ ਪ੍ਰਾਪਤ ਕਰੇ ਤੇ ਇਸ ਨੂੰ ਪੁਲਿਸ ਸਟੇਸ਼ਨ ਜਾਂ ਸਾਂਝ ਕੇਂਦਰ ’ਚ ਜਮ੍ਹਾ ਕਰਵਾਏ। ਉਨ੍ਹਾਂ ਦੱਸਿਆ ਕਿ ਮੁਹਾਲੀ ਜ਼ਿਲ੍ਹੇ ਦੀ ਪੁਲਿਸ ਨੇ ਇਸ ਪ੍ਰਕਿਰਿਆ ਨੂੰ ਸਰਲ ਬਣਾਉਣ ਲਈ ਇਕ ਮੋਬਾਈਲ ਐੱਪ ਵੀ ਲਾਂਚ ਕੀਤੀ ਹੈ। ਹੁਣ ਮਕਾਨ ਮਾਲਕ ਆਪਣੇ ਕਿਰਾਏਦਾਰਾਂ ਬਾਰੇ ਪੂਰੀ ਜਾਣਕਾਰੀ ਐੱਪ ਰਾਹੀਂ ਪੁਲਿਸ ਨੂੰ ਭੇਜ ਸਕਦੇ ਹਨ। ਇਸ ਲਈ ਪੁਲਿਸ ਸਟੇਸ਼ਨ ਜਾਂ ਸਾਂਝ ਕੇਂਦਰ ਜਾਣ ਦੀ ਵੀ ਲੋੜ ਨਹੀਂ ਪੈਂਦੀ। ਇਸ ਲਈ ਕਿਰਾਏਦਾਰ ਦੇ ਪਛਾਣ-ਪੱਤਰ ਤੇ ਆਧਾਰ ਕਾਰਡ ਦੇ ਵੇਰਵੇ ਦਰਜ ਕਰਨ ਦੀ ਲੋੜ ਹੈ। ਬਾਕਸ-- ਕਾਰਵਾਈ ਲਈ ਰਹੋ ਤਿਆਰ : ਨਿਯਮਾਂ ਦੀ ਉਲੰਘਣਾ ਕਰਨ ਵਾਲਿਆਂ ਵਿਰੁੱਧ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ ਤੇ ਜੁਰਮਾਨਾ ਵੀ ਲਾਇਆ ਜਾ ਸਕਦਾ ਹੈ। ਤਸਦੀਕ ਪੂਰੀ ਕਰਨ ’ਚ ਅਸਫ਼ਲ ਰਹਿਣ ਵਾਲੇ ਮਕਾਨ ਮਾਲਕਾਂ ਵਿਰੁੱਧ ਜਲਦੀ ਹੀ ਇਕ ਵਿਸ਼ੇਸ਼ ਮੁਹਿੰਮ ਚਲਾਈ ਜਾਵੇਗੀ। ਇਸ ਲਈ ਸਾਰੇ ਮਕਾਨ ਮਾਲਕਾਂ ਨੂੰ ਸਲਾਹ ਦਿੱਤੀ ਜਾਂਦੀ ਹੈ ਕਿ ਉਹ ਆਪਣੇ ਸਾਰੇ ਕਿਰਾਏਦਾਰਾਂ ਲਈ ਤਸਦੀਕ ਪ੍ਰਕਿਰਿਆ ਨੂੰ ਤੁਰੰਤ ਪੂਰਾ ਕਰਨ। ਗਜ਼ਲਪ੍ਰੀਤ ਕੌਰ, ਏਐੱਸਪੀ (ਆਈਪੀਐੱਸ), ਜ਼ੀਰਕਪੁਰ