ਯਾਤਰੀਆਂ ਨੂੰ ਮਿਲੇਗੀ ਰਾਹਤ : ਹਵਾਈ ਅੱਡੇ ‘ਤੇ ਕੋਹਰਾ ਬਣਿਆ ਰੁਕਾਵਟ, ਉਡਾਣਾਂ ਦੀ ਦੇਰੀ ਦੀ ਸਮੱਸਿਆ ਜਲਦ ਹੋਵੇਗੀ ਦੂਰ
ਚੰਡੀਗੜ੍ਹ ਅੰਤਰਰਾਸ਼ਟਰੀ ਹਵਾਈ ਅੱਡੇ ‘ਤੇ ਖ਼ਰਾਬ ਮੌਸਮ ਅਤੇ ਭਾਰੀ ਕੋਹਰੇ ਦੌਰਾਨ ਉਡਾਣਾਂ ਦੀ ਦੇਰੀ ਅਤੇ ਟੇਕਆਫ਼ ਨਾਲ ਜੁੜੀਆਂ ਮੁਸ਼ਕਲਾਂ ਜਲਦ ਹੀ ਦੂਰ ਹੋਣ ਜਾ ਰਹੀਆਂ ਹਨ। ਯਾਤਰੀਆਂ ਨੂੰ ਰਾਹਤ ਦਿੰਦਿਆਂ ਏਅਰਪੋਰਟ ਅਥਾਰਟੀ ਆਫ਼ ਇੰਡੀਆ ਵੱਲੋਂ ਰਨਵੇ-11 ’ਤੇ ਸਥਾਪਿਤ ਇੰਸਟਰੂਮੈਂਟ ਲੈਂਡਿੰਗ ਸਿਸਟਮ (ਆਈਐੱਲਐੱਸ) ਨੂੰ ਇਕ ਨਵੇਂ ਅਤੇ ਅਧੁਨਿਕ ਸਿਸਟਮ ਨਾਲ ਅੱਪਗ੍ਰੇਡ ਕਰਨ ਦਾ ਫ਼ੈਸਲਾ ਕੀਤਾ ਗਿਆ ਹੈ। ਹਵਾਈ ਅੱਡੇ ’ਤੇ ਪਹਿਲਾਂ ਹੀ ਆਈਐੱਲਐੱਸ, ਵੀਓਆਰ ਨੇਵੀਗੇਸ਼ਨ ਸਿਸਟਮ ਅਤੇ ਡੀਐੱਮਈ (ਡਿਸਟੈਂਸ ਮੇਜ਼ਰਿੰਗ ਇਕੁਇਪਮੈਂਟ) ਉਪਲਬਧ ਹਨ, ਪਰ ਭਾਰੀ ਕੋਹਰੇ ਦੌਰਾਨ ਟੇਕਆਫ਼ ਦੀ ਸਮਰਥਾ ਸੀਮਿਤ ਰਹਿੰਦੀ ਸੀ।
Posted By Anuradha Bains
Publish Date: Sat, 03 Jan 2026 11:52 AM (IST)
Updated Date: Sat, 03 Jan 2026 11:55 AM (IST)
ਜੀਐੱਸ ਸੰਧੂ, ਪੰਜਾਬੀ ਜਾਗਰਣ, ਐੱਸਏਐੱਸ ਨਗਰ। ਚੰਡੀਗੜ੍ਹ ਅੰਤਰਰਾਸ਼ਟਰੀ ਹਵਾਈ ਅੱਡੇ ‘ਤੇ ਖ਼ਰਾਬ ਮੌਸਮ ਅਤੇ ਭਾਰੀ ਕੋਹਰੇ ਦੌਰਾਨ ਉਡਾਣਾਂ ਦੀ ਦੇਰੀ ਅਤੇ ਟੇਕਆਫ਼ ਨਾਲ ਜੁੜੀਆਂ ਮੁਸ਼ਕਲਾਂ ਜਲਦ ਹੀ ਦੂਰ ਹੋਣ ਜਾ ਰਹੀਆਂ ਹਨ। ਯਾਤਰੀਆਂ ਨੂੰ ਰਾਹਤ ਦਿੰਦਿਆਂ ਏਅਰਪੋਰਟ ਅਥਾਰਟੀ ਆਫ਼ ਇੰਡੀਆ ਵੱਲੋਂ ਰਨਵੇ-11 ’ਤੇ ਸਥਾਪਿਤ ਇੰਸਟਰੂਮੈਂਟ ਲੈਂਡਿੰਗ ਸਿਸਟਮ (ਆਈਐੱਲਐੱਸ) ਨੂੰ ਇਕ ਨਵੇਂ ਅਤੇ ਅਧੁਨਿਕ ਸਿਸਟਮ ਨਾਲ ਅੱਪਗ੍ਰੇਡ ਕਰਨ ਦਾ ਫ਼ੈਸਲਾ ਕੀਤਾ ਗਿਆ ਹੈ।
ਹਵਾਈ ਅੱਡੇ ’ਤੇ ਪਹਿਲਾਂ ਹੀ ਆਈਐੱਲਐੱਸ, ਵੀਓਆਰ ਨੇਵੀਗੇਸ਼ਨ ਸਿਸਟਮ ਅਤੇ ਡੀਐੱਮਈ (ਡਿਸਟੈਂਸ ਮੇਜ਼ਰਿੰਗ ਇਕੁਇਪਮੈਂਟ) ਉਪਲਬਧ ਹਨ, ਪਰ ਭਾਰੀ ਕੋਹਰੇ ਦੌਰਾਨ ਟੇਕਆਫ਼ ਦੀ ਸਮਰਥਾ ਸੀਮਿਤ ਰਹਿੰਦੀ ਸੀ। ਇਸ ਚੁਣੌਤੀ ਨੂੰ ਧਿਆਨ ਵਿਚ ਰੱਖਦੇ ਹੋਏ ਹੁਣ ਨਵਾਂ ਆਈਐੱਲਐੱਸ ਸਿਸਟਮ ਲਗਾਇਆ ਜਾ ਰਿਹਾ ਹੈ, ਜੋ ਕਿ ਕੈਟਾਗਰੀ-1 ਵਜੋਂ ਡਿਕਲੇਅਰ ਹੋਵੇਗਾ ਪਰ ਕੈਟਾਗਰੀ-2 ਦੀਆਂ ਸੁਵਿਧਾਵਾਂ ਵੀ ਪ੍ਰਦਾਨ ਕਰੇਗਾ। ਇਸ ਨਾਲ ਲੈਂਡਿੰਗ ਅਤੇ ਟੇਕਆਫ਼ ਲਈ ਲੋੜੀਂਦੀ ਵਿਜ਼ੀਬਿਲਟੀ ਵਿਚ ਵੱਡਾ ਸੁਧਾਰ ਹੋਵੇਗਾ।
ਹਵਾਈ ਅੱਡਾ ਅਧਿਕਾਰੀਆਂ ਅਨੁਸਾਰ ਆਈਐੱਲਐੱਸ ਅੱਪਗ੍ਰੇਡੇਸ਼ਨ ਲਈ ਲੋੜੀਂਦਾ ਸਾਰਾ ਇੰਸਟਰੂਮੈਂਟ ਕੋਰੀਆ ਤੋਂ ਮੰਗਵਾਇਆ ਜਾ ਚੁੱਕਾ ਹੈ ਅਤੇ ਸਿਸਟਮ ਪੂਰੀ ਤਰ੍ਹਾਂ ਤਿਆਰ ਹੈ। ਅੱਪਗ੍ਰੇਡੇਸ਼ਨ ਸ਼ੁਰੂ ਕਰਨ ਲਈ ਕੇਵਲ ਭਾਰਤੀ ਏਅਰਫੋਰਸ ਤੋਂ ਐੱਨਓਸੀ ਲੈਣਾ ਆਖ਼ਰੀ ਕਾਰਵਾਈ ਬਾਕੀ ਹੈ।
ਏਅਰਫੋਰਸ ਵੱਲੋਂ ਇਹ ਸਲਾਹ ਦਿੱਤੀ ਗਈ ਸੀ ਕਿ ਦਸੰਬਰ ਅਤੇ ਜਨਵਰੀ ਮਹੀਨਿਆਂ ਦੌਰਾਨ ਕੋਹਰਾ ਜ਼ਿਆਦਾ ਰਹਿੰਦਾ ਹੈ ਅਤੇ ਰਨਵੇ ’ਤੇ ਗਤੀਵਿਧੀਆਂ ਚਰਮ ’ਤੇ ਹੁੰਦੀਆਂ ਹਨ, ਇਸ ਲਈ ਅੱਪਗ੍ਰੇਡੇਸ਼ਨ ਦਾ ਕੰਮ ਫਰਵਰੀ ਵਿਚ ਸ਼ੁਰੂ ਕੀਤਾ ਜਾਵੇ।
ਫਰਵਰੀ ਦੇ ਦੂਜੇ ਹਫ਼ਤੇ ਤੋਂ ਕੰਮ ਸ਼ੁਰੂ ਹੋਣ ਦੀ ਸੰਭਾਵਨਾ
ਏਅਰਫੋਰਸ ਤੋਂ ਐੱਨਓਸੀ ਮਿਲਦੇ ਹੀ ਫਰਵਰੀ ਦੇ ਦੂਜੇ ਹਫ਼ਤੇ ਵਿਚ ਆਈਐੱਲਐੱਸ ਅੱਪਗ੍ਰੇਡੇਸ਼ਨ ਦਾ ਕੰਮ ਸ਼ੁਰੂ ਕਰਵਾ ਦਿੱਤਾ ਜਾਵੇਗਾ। ਏਜੰਸੀ ਆਪਣੀ ਤਕਨੀਕੀ ਟੀਮ ਅਤੇ ਉਪਕਰਣਾਂ ਸਮੇਤ ਸਾਈਟ ’ਤੇ ਕੰਮ ਸ਼ੁਰੂ ਕਰੇਗੀ। ਉਮੀਦ ਹੈ ਕਿ ਇਹ ਪ੍ਰੋਜੈਕਟ ਮਾਰਚ ਦੇ ਅੰਤ ਜਾਂ ਅਪ੍ਰੈਲ ਤੱਕ ਪੂਰਾ ਕਰ ਲਿਆ ਜਾਵੇਗਾ।
ਚੰਡੀਗੜ੍ਹ ਏਅਰਪੋਰਟ ਦੇ ਸੀਈਓ ਅਜੈ ਵਰਮਾ ਨੇ ਦੱਸਿਆ ਕਿ ਆਈਐੱਲਐੱਸ ਅੱਪਗ੍ਰੇਡੇਸ਼ਨ ਦੌਰਾਨ ਹਵਾਈ ਅੱਡੇ ਨੂੰ ਬੰਦ ਨਹੀਂ ਕੀਤਾ ਜਾਵੇਗਾ, ਜਿਸ ਨਾਲ ਯਾਤਰੀਆਂ ਨੂੰ ਕਿਸੇ ਤਰ੍ਹਾਂ ਦੀ ਅਸੁਵਿਧਾ ਨਹੀਂ ਆਏਗੀ। ਅਗਲੇ ਸਰਦੀ ਦੇ ਮੌਸਮ ਤੋਂ ਪਹਿਲਾਂ ਇਹ ਸਿਸਟਮ ਪੂਰੀ ਤਰ੍ਹਾਂ ਸਰਗਰਮ ਹੋ ਜਾਵੇਗਾ, ਜਿਸ ਨਾਲ ਕੋਹਰੇ ਦੌਰਾਨ ਉਡਾਣਾਂ ਦੀ ਰੱਦਗੀ ਅਤੇ ਦੇਰੀ ਦੀ ਸਮੱਸਿਆ ਕਾਫ਼ੀ ਹੱਦ ਤੱਕ ਖ਼ਤਮ ਹੋ ਜਾਵੇਗੀ।