ਵਿਧਾਇਕ ਰੰਧਾਵਾ ਨੇ 36 ਪੰਚਾਇਤਾਂ ਨੂੰ 87.93 ਲੱਖ ਰੁਪਏ ਤੋਂ ਵੱਧ ਦੀਆਂ ਗਰਾਂਟਾਂ ਵੰਡੀਆਂ

ਸੁਨੀਲ ਕੁਮਾਰ ਭੱਟੀ, ਪੰਜਾਬੀ ਜਾਗਰਣ, ਡੇਰਾਬੱਸੀ : ਵਿਧਾਇਕ ਕੁਲਜੀਤ ਸਿੰਘ ਰੰਧਾਵਾ ਨੇ ਸ਼ਨਿੱਚਰਵਾਰ ਨੂੰ ਡੇਰਾਬੱਸੀ ਹਲਕੇ ਦੀਆਂ 36 ਗ੍ਰਾਮ ਪੰਚਾਇਤਾਂ ਨੂੰ ਚੱਲ ਰਹੇ ਵਿਕਾਸ ਕਾਰਜਾਂ ਨੂੰ ਤੇਜ਼ ਕਰਨ ਤੇ ਨਵੇਂ ਪੇਂਡੂ ਵਿਕਾਸ ਕਾਰਜਾਂ ਲਈ 87.93 ਲੱਖ ਰੁਪਏ ਦੀਆਂ ਵਿਕਾਸ ਗਰਾਂਟਾਂ ਵੰਡੀਆਂ। ਅੱਜ ਜਾਰੀ ਕੀਤੇ ਗਏ ਫੰਡ ਲਾਇਬਰੇਰੀਆਂ, ਠੋਸ ਰਹਿੰਦ-ਖੂੰਹਦ ਪ੍ਰਬੰਧਨ, ਸਟਰੀਟ ਲਾਈਟਾਂ, ਖੇਡ ਦੇ ਮੈਦਾਨ, ਪੀਣ ਵਾਲੇ ਪਾਣੀ ਦੀਆਂ ਸਹੂਲਤਾਂ, ਕਮਿਊਨਿਟੀ ਸੈਂਟਰਾਂ, ਪਿੰਡਾਂ ਦੀਆਂ ਗਲੀਆਂ ਦੀ ਮੁਰੰਮਤ ਅਤੇ ਡਰੇਨੇਜ਼ ਪ੍ਰਣਾਲੀਆਂ ਨਾਲ ਸਬੰਧਤ ਪ੍ਰਾਜੈਕਟਾਂ ਵਾਸਤੇ ਸਨ। ਜਿਨ੍ਹਾਂ ਪਿੰਡਾਂ ਨੂੰ ਖ਼ਾਸ ਪ੍ਰਾਜੈਕਟਾਂ ਲਈ ਗਰਾਂਟਾਂ ਜਾਰੀ ਕੀਤੀਆਂ ਗਈਆਂ, ਉਨ੍ਹਾਂ ਵਿਚ ਭਾਂਖਰਪੁਰ ਅਤੇ ਬਾਕਰਪੁਰ ਨੂੰ ਲਾਇਬ੍ਰੇਰੀਆਂ ਲਈ 5-5 ਲੱਖ ਰੁਪਏ, ਸਮਗੌਲੀ ਅਤੇ ਧਰਮਗੜ੍ਹ ਨੂੰ ਲਾਇਬ੍ਰੇਰੀਆਂ ਲਈ 3-3 ਲੱਖ ਰੁਪਏ ਅਲਾਟ ਕੀਤੇ ਗਏ, ਜਦੋਂ ਕਿ ਮੋਰ ਠੀਕਰੀ ਨੂੰ ਸਟਰੀਟ ਲਾਈਟਾਂ ਲਈ 3 ਲੱਖ ਰੁਪਏ ਮਿਲੇ। ਮੀਆਂਪੁਰ ਨੂੰ ਧਰਮਸ਼ਾਲਾ ਦੇ ਕੰਮਾਂ ਲਈ 3 ਲੱਖ ਰੁਪਏ ਦਿੱਤੇ ਗਏ, ਅਤੇ ਇਬਰਾਹਿਮਪੁਰ ਨੂੰ ਗਲੀਆਂ ਅਤੇ ਡਰੇਨੇਜ਼ ਸੁਧਾਰ ਲਈ 3 ਲੱਖ ਰੁਪਏ ਮਿਲੇ। ਸਾਲਿਡ ਵੇਸਟ ਮੈਨੇਜਮੈਂਟ (ਠੋਸ ਕੂੜਾ ਪ੍ਰਬੰਧਨ) ਪਹਿਲਕਦਮੀਆਂ ਲਈ ਇਬਰਾਹਿਮਪੁਰ, ਪਰਾਗਪੁਰ, ਰਾਮਪੁਰ ਸੈਣੀਆਂ, ਖੇੜੀ ਜੱਟਾਂ, ਪੁਨਸਰ, ਰਾਮਪੁਰ ਬਹਿਲ, ਝਵਾਂਸਾ, ਫ਼ਤਿਹਪੁਰ ਜੱਟਾਂ, ਰਾਮਗੜ੍ਹ ਰੁੜਕੀ ਅਤੇ ਸਿਉਲੀ ਨੂੰ 2-2 ਲੱਖ ਰੁਪਏ ਅਲਾਟ ਕੀਤੇ ਗਏ ਹਨ। ਜਵਾਹਰਪੁਰ ਨੂੰ ਪੀਣ ਵਾਲੇ ਪਾਣੀ ਦੀ ਸਹੂਲਤ ਲਈ 2.93 ਲੱਖ ਰੁਪਏ ਮਿਲੇ ਹਨ। ਇਸੇ ਤਰ੍ਹਾਂ ਪਿੰਡ ਡੰਗਡੇਹਰਾ, ਝਰਮੜੀ, ਅਮਲਾਲਾ, ਚੰਡਿਆਲਾ, ਰਾਜਾਪੁਰ, ਧੀਰੇਮਾਜਰਾ, ਰਾਮਪੁਰ ਸੈਣੀਆਂ, ਖੇਲਾਂ, ਮੱਲਣ, ਜੋਧਪੁਰ ਅਤੇ ਸਾਰੰਗਪੁਰ ਨੂੰ ਸਟਰੀਟ ਲਾਈਟਾਂ ਲਗਾਉਣ ਲਈ 2-2 ਲੱਖ ਰੁਪਏ ਦੀ ਵਿਕਾਸ ਗਰਾਂਟ ਦਿੱਤੀ ਗਈ। ਇਸੇ ਤਰ੍ਹਾਂ ਪਿੰਡ ਟਿਵਾਣਾ ਅਤੇ ਸਾਧਾਂਪੁਰ ਨੂੰ ਖੇਡ ਮੈਦਾਨ, ਮੰਡੀ ਖਜ਼ੂਰ ਨੂੰ ਫਿਰਨੀ ਰੋਡ ਦੀ ਮੁਰੰਮਤ ਲਈ, ਬਤੋਲੀ ਅਤੇ ਭਾਂਖਰਪੁਰ ਨੂੰ ਕਮਿਊਨਿਟੀ ਸੈਂਟਰ ਦੇ ਕੰਮਾਂ ਲਈ, ਜੜੋਤ ਅਤੇ ਰਾਮਗੜ੍ਹ ਰੁੜਕੀ ਨੂੰ ਗਲੀਆਂ ਅਤੇ ਡਰੇਨੇਜ ਦੇ ਸੁਧਾਰ ਲਈ, ਬਰੋਲੀ ਨੂੰ ਬੱਸ ਸ਼ੈੱਲਟਰ ਲਈ ਅਤੇ ਨਗਲਾ ਨੂੰ ਡਰੇਨੇਜ ਸਿਸਟਮ ਦੇ ਕੰਮਾਂ ਲਈ ਦੋ-ਦੋ ਲੱਖ ਰੁਪਏ ਦੇ ਫੰਡ ਦਿੱਤੇ ਗਏ ਹਨ। ਇਸ ਮੌਕੇ ਬੋਲਦਿਆਂ ਵਿਧਾਇਕ ਕੁਲਜੀਤ ਸਿੰਘ ਰੰਧਾਵਾ ਨੇ ਕਿਹਾ ਕਿ ਡੇਰਾਬੱਸੀ ਦੇ ਪੇਂਡੂ ਖੇਤਰਾਂ ਦਾ ਸਰਵਪੱਖੀ ਵਿਕਾਸ ਉਨ੍ਹਾਂ ਦੀ ਪਹਿਲੀ ਤਰਜੀਹ ਹੈ, ਅਤੇ ਅੱਜ ਜਾਰੀ ਕੀਤੀਆਂ ਗਈਆਂ ਗਰਾਂਟਾਂ ਜ਼ਰੂਰੀ ਬੁਨਿਆਦੀ ਢਾਂਚੇ ਦੇ ਪ੍ਰਾਜੈਕਟਾਂ ਨੂੰ ਤੇਜ਼ੀ ਨਾਲ ਅੱਗੇ ਵਧਾਉਣਗੀਆਂ। ਉਨ੍ਹਾਂ ਕਿਹਾ ਕਿ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਦੀ ਅਗਵਾਈ ਹੇਠ ਪੰਜਾਬ ਸਰਕਾਰ ਪਿੰਡ ਪੱਧਰੀ ਸਹੂਲਤਾਂ ਨੂੰ ਮਜ਼ਬੂਤ ਕਰਨ ਅਤੇ ਸਰਕਾਰੀ ਫੰਡਾਂ ਦੀ ਪਾਰਦਰਸ਼ੀ ਅਤੇ ਕੁਸ਼ਲ ਵਰਤੋਂ ਨੂੰ ਯਕੀਨੀ ਬਣਾਉਣ ਲਈ ਵਚਨਬੱਧ ਹੈ। ਉਨ੍ਹਾਂ ਪੰਚਾਇਤ ਪ੍ਰਤੀਨਿਧੀਆਂ ਨੂੰ ਅਪੀਲ ਕੀਤੀ ਕਿ ਉਹ ਉੱਚ-ਗੁਣਵੱਤਾ ਦੇ ਮਿਆਰਾਂ ਨੂੰ ਬਣਾਈ ਰੱਖਦੇ ਹੋਏ ਸਾਰੇ ਮਨਜ਼ੂਰ ਕੀਤੇ ਕੰਮਾਂ ਨੂੰ ਨਿਰਧਾਰਤ ਸਮਾਂ-ਸੀਮਾ ਦੇ ਅੰਦਰ ਪੂਰਾ ਕਰਨ ਤਾਂ ਜੋ ਪਿੰਡ ਵਾਸੀਆਂ ਨੂੰ ਵੱਧ ਤੋਂ ਵੱਧ ਲਾਭ ਮਿਲ ਸਕੇ। ਗਰਾਂਟ ਵੰਡ ਸਮਾਰੋਹ ਦੌਰਾਨ ਪੇਂਡੂ ਵਿਕਾਸ ਵਿਭਾਗ ਦੇ ਅਧਿਕਾਰੀ, ਪੰਚਾਇਤ ਪ੍ਰਤੀਨਿਧੀ ਅਤੇ ਸਥਾਨਕ ਨਿਵਾਸੀ ਮੌਜੂਦ ਸਨ।