ਚੰਡੀਗੜ੍ਹ 'ਚ ਫੜੀ ਗਈ 15 ਸਾਲਾ ਸ਼ਾਤਰ ਕੁੜੀ; ਬੱਚੇ ਨੂੰ ਅਗਵਾ ਕਰ ਕੇ ਹਰਿਦੁਆਰ 'ਚ ਮੰਗਵਾਈ ਭੀਖ, ਪਿਤਾ ਨੂੰ ਦੇਖਦਿਆਂ ਹੀ ਗਲ ਲੱਗ ਕੇ ਰੋਇਆ

ਜਾਗਰਣ ਸੰਵਾਦਦਾਤਾ, ਚੰਡੀਗੜ੍ਹ : ਸ਼ਹਿਰ 'ਚ ਇਕ ਹੈਰਾਨ ਕਰ ਦੇਣ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਇਕ 15 ਸਾਲਾ ਨਾਬਾਲਗ ਕੁੜੀ 10 ਸਾਲ ਦੇ ਬੱਚੇ ਨੂੰ ਅਗਵਾ ਕਰ ਕੇ ਉਸਨੂੰ ਹਰਿਦੁਆਰ ਲੈ ਗਈ ਤੇ ਉੱਥੇ ਇਕ ਔਰਤ ਕੋਲ ਛੱਡ ਦਿੱਤਾ। ਬੱਚੇ ਦੀ ਪਛਾਣ ਲੁਕਾਉਣ ਲਈ ਉਸਦੇ ਵਾਲ ਕਟਵਾ ਦਿੱਤੇ ਗਏ ਤੇ ਉਸ ਕੋਲੋਂ ਭੀਖ ਮੰਗਵਾਈ ਗਈ।

ਪੁਲਿਸ ਨੇ ਨਾਬਾਲਗ ਕੁੜੀ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਨਿਸ਼ਾਨਦੇਹੀ 'ਤੇ ਜਦੋਂ ਪਿਤਾ ਆਪਣੇ ਪੁੱਤਰ ਨੂੰ ਲੱਭਣ ਲਈ ਹਰਿਦੁਆਰ ਪਹੁੰਚਿਆ ਤਾਂ ਬੱਚਾ ਇਕ ਵਿਅਕਤੀ ਕੋਲ ਸੁੱਤਾ ਹੋਇਆ ਮਿਲਿਆ ਤੇ ਆਪਣੇ ਪਿਤਾ ਨੂੰ ਦੇਖਦਿਆਂ ਹੀ ਉਸਦੇ ਗਲ ਲੱਗ ਕੇ ਰੋਣ ਲੱਗ ਪਿਆ। ਪੁਲਿਸ ਮਾਮਲੇ ਦੀ ਬਾਰੀਕੀ ਨਾਲ ਜਾਂਚ ਕਰ ਰਹੀ ਹੈ ਤੇ ਇਹ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ ਕਿ ਕਿਤੇ ਇਹ ਕੁੜੀ ਕਿਸੇ ਵੱਡੇ ਗਿਰੋਹ ਨਾਲ ਤਾਂ ਨਹੀਂ ਜੁੜੀ ਹੋਈ।

ਜਾਣਕਾਰੀ ਅਨੁਸਾਰ, ਇਹ ਕੁੜੀ ਬੁੜੈਲ 'ਚ ਹੀ ਬੱਚੇ ਦੇ ਗੁਆਂਢ 'ਚ ਰਹਿੰਦੀ ਸੀ। ਉਹ ਬੱਚੇ ਨੂੰ ਜੂਸ ਪਿਲਾਉਣ ਦਾ ਬਹਾਨਾ ਬਣਾ ਕੇ ਆਪਣੇ ਨਾਲ ਲੈ ਗਈ। ਇਸ ਤੋਂ ਬਾਅਦ ਉਹ ਉਸਨੂੰ ਚੰਡੀਗੜ੍ਹ ਤੋਂ ਹਰਿਦੁਆਰ ਲੈ ਕੇ ਪਹੁੰਚੀ। ਦੋਸ਼ ਹੈ ਕਿ ਉੱਥੇ ਬੱਚੇ ਦੇ ਵਾਲ ਕਟਵਾਏ ਗਏ ਤੇ ਉਸਦੀ ਪਛਾਣ ਬਦਲਣ ਦੀ ਕੋਸ਼ਿਸ਼ ਕੀਤੀ ਗਈ।

ਪਰਿਵਾਰ ਵਾਲਿਆਂ ਨੇ ਜਦੋਂ ਬੱਚੇ ਨੂੰ ਘਰੋਂ ਗਾਇਬ ਦੇਖਿਆ ਤਾਂ ਭਾਲ ਸ਼ੁਰੂ ਕੀਤੀ। ਕਾਫ਼ੀ ਖੋਜਬੀਨ ਤੋਂ ਬਾਅਦ ਵੀ ਕੋਈ ਸੁਰਾਗ ਨਾ ਮਿਲਣ 'ਤੇ ਪੁਲਿਸ ਨੂੰ ਸ਼ਿਕਾਇਤ ਦਿੱਤੀ ਗਈ। ਬੱਚੇ ਦੇ ਨਾਲ ਉਸ ਕੁੜੀ ਦੇ ਪੋਸਟਰ ਵੀ ਲਗਾਏ ਗਏ। ਇਸ ਦੌਰਾਨ ਇਕ ਦੁਕਾਨਦਾਰ ਨੇ ਦੱਸਿਆ ਕਿ ਉਸਨੇ ਉਸ ਕੁੜੀ ਨੂੰ ਗਲੀ ਵਿੱਚੋਂ ਲੰਘਦਿਆਂ ਦੇਖਿਆ ਹੈ।

ਇਸ ਗੱਲ ਦੀ ਜਾਣਕਾਰੀ ਬੱਚੇ ਦੇ ਪਰਿਵਾਰ ਵਾਲਿਆਂ ਨੇ ਪੁਲਿਸ ਨੂੰ ਦਿੱਤੀ। ਪੁਲਿਸ ਨੇ ਜਦੋਂ ਕੁੜੀ ਨੂੰ ਹਿਰਾਸਤ 'ਚ ਲੈ ਕੇ ਪੁੱਛਗਿੱਛ ਕੀਤੀ ਤਾਂ ਉਸਨੇ ਸਾਰੀ ਸੱਚਾਈ ਉਗਲ ਦਿੱਤੀ। ਉਸਨੇ ਦੱਸਿਆ ਕਿ ਬੱਚੇ ਨੂੰ ਹਰਿਦੁਆਰ ਵਿੱਚ ਇੱਕ ਔਰਤ ਕੋਲ ਛੱਡ ਕੇ ਉਹ 7 ਹਜ਼ਾਰ ਰੁਪਏ ਅਤੇ ਇਕ ਮੋਬਾਈਲ ਫ਼ੋਨ ਲੈ ਕੇ ਵਾਪਸ ਆ ਗਈ ਸੀ।

ਇਸ ਤੋਂ ਬਾਅਦ ਬੱਚੇ ਦਾ ਪਿਤਾ, ਮਾਸੀ ਤੇ ਪੁਲਿਸ ਦੀ ਟੀਮ ਬੱਚੇ ਨੂੰ ਲੱਭਣ ਲਈ ਹਰਿਦੁਆਰ ਰਵਾਨਾ ਹੋਈ। ਉੱਥੇ ਘਾਟਾਂ 'ਤੇ ਖੋਜ ਕੀਤੀ ਗਈ। ਸੁੱਤੇ ਹੋਏ ਲੋਕਾਂ ਦੇ ਉੱਤੋਂ ਚਾਦਰਾਂ ਚੁੱਕ-ਚੁੱਕ ਕੇ ਬੱਚੇ ਨੂੰ ਲੱਭਿਆ ਗਿਆ। ਇਸੇ ਦੌਰਾਨ ਇਕ ਵਿਅਕਤੀ ਕੋਲ ਦੋ ਬੱਚੇ ਸੁੱਤੇ ਹੋਏ ਮਿਲੇ, ਜਿਨ੍ਹਾਂ ਵਿੱਚੋਂ ਇਕ ਉਨ੍ਹਾਂ ਦਾ ਪੁੱਤਰ ਸੀ। ਇਸ ਤੋਂ ਬਾਅਦ ਬੱਚੇ ਨੂੰ ਸਹੀ-ਸਲਾਮਤ ਚੰਡੀਗੜ੍ਹ ਵਾਪਸ ਲਿਆਂਦਾ ਗਿਆ। ਬੱਚੇ ਨੇ ਦੱਸਿਆ ਕਿ ਉਸਨੂੰ ਕੋਈ ਨਸ਼ੀਲੀ ਚੀਜ਼ ਦਿੱਤੀ ਗਈ ਸੀ। ਜਦੋਂ ਉਸਨੂੰ ਰੇਲਗੱਡੀ ਵਿੱਚ ਲੈ ਕੇ ਜਾਇਆ ਜਾਣ ਲੱਗਾ ਤਾਂ ਉਸਨੇ ਘਰ ਜਾਣ ਦੀ ਜ਼ਿੱਦ ਕੀਤੀ, ਜਿਸ 'ਤੇ ਉਸ ਕੁੜੀ ਨੇ ਉਸਨੂੰ ਜਾਨੋਂ ਮਾਰਨ ਦੀ ਧਮਕੀ ਦਿੱਤੀ। ਹਰਿਦੁਆਰ 'ਚ ਉਸ ਕੋਲੋਂ ਜ਼ਬਰਦਸਤੀ ਭੀਖ ਮੰਗਵਾਈ ਜਾਂਦੀ ਸੀ ਅਤੇ ਲੰਗਰ 'ਚ ਖਾਣਾ ਖਵਾਇਆ ਜਾਂਦਾ ਸੀ।