PGI ਦੇ ਡਾਕਟਰਾਂ ਦਾ ਕਮਾਲ: 2 ਸਾਲ ਦੇ ਬੱਚੇ ਦਾ ਨੱਕ ਰਾਹੀਂ ਕੱਢਿਆ 7 ਸੈਂਟੀਮੀਟਰ ਦਾ ਟਿਊਮਰ, ਬਣਾਇਆ ਵਿਸ਼ਵ ਰਿਕਾਰਡ
ਜਿਸ ਉਮਰ ਵਿੱਚ ਬੱਚੇ ਠੀਕ ਤਰ੍ਹਾਂ ਬੋਲਣਾ ਸਿੱਖਦੇ ਹਨ, ਉਸੇ ਉਮਰ ਵਿੱਚ ਪੀਜੀਆਈ ਦੇ ਡਾਕਟਰਾਂ ਨੇ ਉਸ ਦੀ ਜ਼ਿੰਦਗੀ ਨੂੰ ਨਵੀਂ ਸਵੇਰ ਦਿੱਤੀ। ਦੋ ਸਾਲ ਦੇ ਬੱਚੇ ਦੇ ਦਿਮਾਗ ਵਿੱਚ ਫੈਲੇ ਦੁਰਲੱਭ ਅਤੇ ਖ਼ਤਰਨਾਕ ਟਿਊਮਰ ਨੂੰ ਸਫ਼ਲ ਸਰਜਰੀ ਰਾਹੀਂ ਪੂਰੀ ਤਰ੍ਹਾਂ ਕੱਢ ਦਿੱਤਾ ਗਿਆ। ਨਿਊਰੋਸਰਜਨ ਅਤੇ ਈਐੱਨਟੀ ਮਾਹਰਾਂ ਦੀ ਟੀਮ ਨੇ ਇੱਕ ਬਹੁਤ ਹੀ ਔਖਾ ਅਤੇ ਦੁਰਲੱਭ ਸਰਜਰੀ ਕਰਕੇ ਦੁਨੀਆ ਵਿੱਚ ਮਿਸਾਲ ਕਾਇਮ ਕੀਤੀ ਹੈ। ਹਰਿਆਣਾ ਦੇ ਸੋਨੀਪਤ ਤੋਂ ਆਏ ਦੋ ਸਾਲ ਦੇ ਬੱਚੇ ਦੇ ਸਿਰ ਦੇ ਵਿੱਚ ਮੌਜੂਦ ਵਿਸ਼ਾਲ ਬ੍ਰੇਨ ਟਿਊਮਰ ਨੂੰ ਨੱਕ ਦੇ ਰਸਤੇ ਐਂਡੋਸਕੋਪੀ ਦੀ ਮਦਦ ਨਾਲ ਪੂਰੀ ਤਰ੍ਹਾਂ ਕੱਢ ਦਿੱਤਾ ਗਿਆ।
Posted By Anuradha Bains
Publish Date: Fri, 16 Jan 2026 12:38 PM (IST)
Updated Date: Fri, 16 Jan 2026 12:49 PM (IST)
ਤਰੁਣ ਭਜਨੀ, ਪੰਜਾਬੀ ਜਾਗਰਣ, ਚੰਡੀਗੜ੍ਹ। ਜਿਸ ਉਮਰ ਵਿੱਚ ਬੱਚੇ ਠੀਕ ਤਰ੍ਹਾਂ ਬੋਲਣਾ ਸਿੱਖਦੇ ਹਨ, ਉਸੇ ਉਮਰ ਵਿੱਚ ਪੀਜੀਆਈ ਦੇ ਡਾਕਟਰਾਂ ਨੇ ਉਸ ਦੀ ਜ਼ਿੰਦਗੀ ਨੂੰ ਨਵੀਂ ਸਵੇਰ ਦਿੱਤੀ। ਦੋ ਸਾਲ ਦੇ ਬੱਚੇ ਦੇ ਦਿਮਾਗ ਵਿੱਚ ਫੈਲੇ ਦੁਰਲੱਭ ਅਤੇ ਖ਼ਤਰਨਾਕ ਟਿਊਮਰ ਨੂੰ ਸਫ਼ਲ ਸਰਜਰੀ ਰਾਹੀਂ ਪੂਰੀ ਤਰ੍ਹਾਂ ਕੱਢ ਦਿੱਤਾ ਗਿਆ। ਨਿਊਰੋਸਰਜਨ ਅਤੇ ਈਐੱਨਟੀ ਮਾਹਰਾਂ ਦੀ ਟੀਮ ਨੇ ਇੱਕ ਬਹੁਤ ਹੀ ਔਖਾ ਅਤੇ ਦੁਰਲੱਭ ਸਰਜਰੀ ਕਰਕੇ ਦੁਨੀਆ ਵਿੱਚ ਮਿਸਾਲ ਕਾਇਮ ਕੀਤੀ ਹੈ। ਹਰਿਆਣਾ ਦੇ ਸੋਨੀਪਤ ਤੋਂ ਆਏ ਦੋ ਸਾਲ ਦੇ ਬੱਚੇ ਦੇ ਸਿਰ ਦੇ ਵਿੱਚ ਮੌਜੂਦ ਵਿਸ਼ਾਲ ਬ੍ਰੇਨ ਟਿਊਮਰ ਨੂੰ ਨੱਕ ਦੇ ਰਸਤੇ ਐਂਡੋਸਕੋਪੀ ਦੀ ਮਦਦ ਨਾਲ ਪੂਰੀ ਤਰ੍ਹਾਂ ਕੱਢ ਦਿੱਤਾ ਗਿਆ।
ਬੱਚੇ ਦੀ ਖੱਬੀ ਅੱਖ ਬਾਹਰ ਨਿਕਲ ਆਉਣੀ, ਅੱਖ ਦੀ ਮੂਵਮੈਂਟ ਰੁਕ ਜਾਣੀ, ਸਾਹ ਲੈਂਦੇ ਸਮੇਂ ਘਬਰਾਹਟ , ਨੱਕ ਵਿੱਚੋਂ ਮਾਸ ਦਾ ਟੁਕੜਾ ਦਿਸਣਾ ਅਤੇ ਅੱਖ ਵਿੱਚੋਂ ਲਗਾਤਾਰ ਪਾਣੀ ਆਉਣ ਵਰਗੀਆਂ ਗੰਭੀਰ ਸਮੱਸਿਆਵਾਂ ਸਨ। ਜਾਂਚ ਦੌਰਾਨ ਸੀਟੀ ਸਕੈਨ ਅਤੇ ਐੱਮਆਰਆਈ ਨਾਲ ਪਤਾ ਲੱਗਿਆ ਕਿ ਬੱਚੇ ਦੇ ਨੱਕ, ਸਾਇਨਸ, ਅੱਖ ਅਤੇ ਦਿਮਾਗ ਤੱਕ ਫੈਲਿਆ ਲਗਪਗ 7 ਸੈਂਟੀਮੀਟਰ ਦਾ ਟਿਊਮਰ ਹੈ। ਬਾਇਓਪਸੀ ਵਿੱਚ ਇਹ ਟਿਊਮਰ ਮੇਨਿੰਜੀਓਮਾ ਨਿਕਲਿਆ, ਜੋ ਬੱਚਿਆਂ ਵਿੱਚ ਬਹੁਤ ਹੀ ਦੁਰਲੱਭ ਹੁੰਦਾ ਹੈ।
ਡਾਕਟਰਾਂ ਅਨੁਸਾਰ, ਇੰਨੀ ਘੱਟ ਉਮਰ ਵਿੱਚ ਇਸ ਤਰ੍ਹਾਂ ਦਾ ਟਿਊਮਰ ਅਤੇ ਉਸ ਦੀ ਸਰਜਰੀ ਬਹੁਤ ਜੋਖ਼ਿਮ ਭਰੀ ਹੁੰਦੀ ਹੈ। ਇਸ ਤੋਂ ਪਹਿਲਾਂ ਦੁਨੀਆ ਵਿੱਚ ਸਿਰਫ਼ ਇੱਕ ਮਾਮਲਾ 2020 ਵਿੱਚ ਸਾਹਮਣੇ ਆਇਆ ਸੀ, ਜਿਸ ਵਿੱਚ 12 ਸਾਲ ਦੀ ਬੱਚੀ ਦਾ ਓਪਨ ਸਰਜਰੀ ਰਾਹੀਂ ਇਲਾਜ ਕੀਤਾ ਗਿਆ ਸੀ।
9 ਘੰਟੇ ਚੱਲੀ ਹਾਈ ਰਿਸਕ ਸਰਜਰੀ, ਬਿਨਾਂ ਓਪਨ ਆਪਰੇਸ਼ਨ ਮਿਲੀ ਸਫ਼ਲਤਾ
ਨਿਊਰੋਸਰਜਰੀ ਵਿਭਾਗ ਦੇ ਡਾ. ਐੱਸ.ਐੱਸ. ਧਨਦਾਪਾਨੀ ਅਤੇ ਈਐੱਨਟੀ ਵਿਭਾਗ ਦੇ ਪ੍ਰੋ. ਅਨੁਰਾਗ ਦੀ ਅਗਵਾਈ ਹੇਠ ਡਾਕਟਰਾਂ ਦੀ ਸਾਂਝੀ ਟੀਮ ਬਣਾਈ ਗਈ। ਸਰਜਰੀ ਦੌਰਾਨ ਬੱਚੇ ਨੂੰ ਠੰਢ ਲੱਗਣ, ਵੱਧ ਖੂਨ ਵਹਿਣ ਅਤੇ ਸਰੀਰ ਦੇ ਤਰਲ ਸੰਤੁਲਨ ਵਿਗੜਣ ਵਰਗੇ ਗੰਭੀਰ ਖ਼ਤਰੇ ਸਨ। ਨਾਲ ਹੀ ਟਿਊਮਰ ਨੱਕ ਤੋਂ ਹੇਠਾਂ ਤੱਕ ਅਤੇ ਅੱਖ ਤੇ ਸਾਇਨਸ ਤੱਕ ਫੈਲ ਚੁੱਕਾ ਸੀ, ਇਸ ਲਈ ਡਾਕਟਰਾਂ ਨੂੰ ਅਡਵਾਂਸ ਐਂਡੋਨੇਜ਼ਲ ਐਂਡੋਸਕੋਪੀ ਤਕਨੀਕ ਅਪਣਾਉਣੀ ਪਈ। ਇਸ ਵਿੱਚ ਨੱਕ ਦੇ ਰਸਤੇ ਵਾਧੂ ਜਗ੍ਹਾ ਬਣਾਕੇ, ਆਧੁਨਿਕ ਨੇਵੀਗੇਸ਼ਨ ਸਿਸਟਮ, 45 ਡਿਗਰੀ ਐੰਗਲ ਵਾਲਾ ਐਂਡੋਸਕੋਪ, ਕੋਬਲੇਟਰ ਅਤੇ ਵਿਸ਼ੇਸ਼ ਮੁੜੇ ਹੋਏ ਉਪਕਰਨ ਵਰਤੇ ਗਏ।
ਐਂਡੋਸਕੋਪੀ ਤਕਨੀਕ ਨਾਲ ਓਪਨ ਸਰਜਰੀ ਤੋਂ ਬਚਾਅ
ਟਿਊਮਰ ਕਾਫ਼ੀ ਖੂਨ ਵਾਲਾ ਅਤੇ ਹੱਡੀਆਂ ਵਿੱਚ ਫੈਲਿਆ ਹੋਇਆ ਸੀ, ਇਸ ਦੇ ਬਾਵਜੂਦ ਡਾਕਟਰਾਂ ਨੇ ਬਹੁਤ ਸਾਵਧਾਨੀ ਨਾਲ ਪੂਰਾ ਟਿਊਮਰ ਨੱਕ ਦੇ ਰਸਤੇ ਹੀ ਕੱਢ ਦਿੱਤਾ। ਐਂਡੋਸਕੋਪੀ ਤਕਨੀਕ ਕਾਰਨ ਓਪਨ ਬ੍ਰੇਨ ਸਰਜਰੀ ਦੀ ਲੋੜ ਨਹੀਂ ਪਈ। ਟਿਊਮਰ ਹਟਾਉਣ ਤੋਂ ਬਾਅਦ ਸਕਲ ਬੇਸ ਵਿੱਚ ਬਣੇ ਵੱਡੇ ਛੇਦ ਨੂੰ ਕਈ ਪਰਤਾਂ ਵਿੱਚ ਸੁਰੱਖਿਅਤ ਤਰੀਕੇ ਨਾਲ ਬੰਦ ਕੀਤਾ ਗਿਆ। ਪੂਰੀ ਸਰਜਰੀ ਅਤੇ ਤਿਆਰੀ ਵਿੱਚ ਲਗਭਗ 9 ਘੰਟੇ ਲੱਗੇ। ਸਰਜਰੀ ਤੋਂ ਬਾਅਦ ਬੱਚਾ ਹੁਣ ਬਿਹਤਰ ਹੈ। ਐਮਆਰਆਈ ਜਾਂਚ ਵਿੱਚ ਟਿਊਮਰ ਪੂਰੀ ਤਰ੍ਹਾਂ ਕੱਢੇ ਜਾਣ ਦੀ ਪੁਸ਼ਟੀ ਹੋਈ।