ਨਗਰ ਕੌਂਸਲ ਤੇ ਨਗਰ ਪੰਚਾਇਤ ਚੋਣਾਂ : ਜ਼ਿਲ੍ਹੇ ’ਚ ਕੁੱਲ 209 ਉਮੀਦਵਾਰ ਚੋਣ ਮੈਦਾਨ ’ਚ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ

ਅੰਮ੍ਰਿਤਸਰ : ਜ਼ਿਲ੍ਹੇ ਵਿਚ ਤਿੰਨ ਨਗਰ ਕੌਂਸਲ ਚੋਣਾਂ-ਜੰਡਿਆਲਾ ਗੁਰੂ, ਮਜੀਠਾ ਅਤੇ ਰਮਦਾਸ ਤੇ ਅਜਨਾਲਾ ਤੇ ਰਈਆ ਵਿਚ ਦੋ ਨਗਰ ਪੰਚਾਇਤ ਚੋਣਾਂ ਲਈ ਨਾਮਜ਼ਦਗੀ ਪ੍ਰਕਿਰਿਆ ਪੂਰੀ ਹੋ ਗਈ ਹੈ। ਅੰਮ੍ਰਿਤਸਰ-1, ਅਜਨਾਲਾ, ਮਜੀਠਾ ਤੇ ਬਾਬਾ ਬਕਾਲਾ ਸਾਹਿਬ ਲਈ ਸਬੰਧਤ ਰਿਟਰਨਿੰਗ ਅਫਸਰਾਂ-ਕਮ-ਸਬ-ਡਿਵੀਜ਼ਨਲ ਮੈਜਿਸਟ੍ਰੇਟਾਂ ਦੁਆਰਾ ਜਾਰੀ ਕੀਤੀ ਗਈ ਸੂਚੀ ਅਨੁਸਾਰ ਜ਼ਿਲ੍ਹੇ ਵਿਚ ਕੁੱਲ 467 ਨਾਮਜ਼ਦਗੀ ਪੱਤਰ ਦਾਖਲ ਕੀਤੇ ਗਏ ਸਨ। ਪੜਤਾਲ ਪ੍ਰਕਿਰਿਆ ਤੋਂ ਬਾਅਦ 72 ਨਾਮਜ਼ਦਗੀਆਂ ਰੱਦ ਕੀਤੀਆਂ ਗਈਆਂ, ਜਦਕਿ 395 ਯੋਗ ਪਾਏ ਗਏ। 173 ਉਮੀਦਵਾਰਾਂ ਨੇ ਆਪਣੇ ਨਾਮਜ਼ਦਗੀ ਪੱਤਰ ਵਾਪਸ ਲੈ ਲਏ। 12 ਬਿਨਾਂ ਮੁਕਾਬਲਾ ਚੁਣੇ ਗਏ। ਇਸ ਤਰ੍ਹਾਂ ਜੰਡਿਆਲਾ ਤੋਂ 39 ਉਮੀਦਵਾਰ ਚੋਣ ਮੈਦਾਨ ਵਿਚ ਹਨ, ਮਜੀਠਾ ਤੋਂ 45, ਰਮਦਾਸ ਤੋਂ 44, ਅਜਨਾਲਾ ਤੋਂ 66 ਅਤੇ ਰਈਆ ਤੋਂ 15 (ਕੁੱਲ 209) ਉਮੀਦਵਾਰ ਚੋਣ ਮੈਦਾਨ ਵਿਚ ਹਨ। ਰਿਪੋਰਟ ਅਨੁਸਾਰ ਜੰਡਿਆਲਾ ਗੁਰੂ ਵਿਚ 15 ਵਾਰਡਾਂ ਲਈ 82 ਨਾਮਜ਼ਦਗੀਆਂ ਦਾਖਲ ਕੀਤੀਆਂ ਗਈਆਂ ਸਨ। ਇਨ੍ਹਾਂ ਵਿਚੋਂ 2 ਰੱਦ ਹੋਣ ਤੋਂ ਬਾਅਦ 80 ਨੂੰ ਯੋਗ ਪਾਇਆ ਗਿਆ ਤੇ 38 ਉਮੀਦਵਾਰਾਂ ਨੇ ਵਾਪਸ ਲੈ ਲਿਆ। ਇੱਥੇ ਦੋ ਉਮੀਦਵਾਰ ਬਿਨਾਂ ਮੁਕਾਬਲਾ ਚੁਣੇ ਗਏ, ਜਿਸ ਨਾਲ 39 ਉਮੀਦਵਾਰ ਮੈਦਾਨ ਵਿਚ ਹਨ।

ਮਜੀਠਾ ਵਿਚ 13 ਵਾਰਡਾਂ ਲਈ 82 ਨਾਮਜ਼ਦਗੀਆਂ ਦਾਖਲ ਕੀਤੀਆਂ ਗਈਆਂ ਸਨ, ਜਿਨ੍ਹਾਂ ਵਿੱਚੋਂ 8 ਰੱਦ ਹੋ ਗਈਆਂ। 74 ਵੈਧ ਨਾਮਜ਼ਦਗੀਆਂ ਵਿੱਚੋਂ, 27 ਉਮੀਦਵਾਰਾਂ ਨੇ ਵਾਪਸ ਲੈ ਲਿਆ, ਅਤੇ 2 ਬਿਨਾਂ ਮੁਕਾਬਲਾ ਚੁਣੇ ਗਏ। ਹੁਣ 45 ਉਮੀਦਵਾਰ ਇੱਥੇ ਚੋਣ ਲੜਨਗੇ। ਰਮਦਾਸ ਵਿਚ 11 ਵਾਰਡਾਂ ਲਈ 90 ਨਾਮਜ਼ਦਗੀਆਂ ਦਾਖਲ ਕੀਤੀਆਂ ਗਈਆਂ ਸਨ। ਜਾਂਚ ਤੋਂ ਬਾਅਦ 84 ਯੋਗ ਪਾਏ ਗਏ ਤੇ 40 ਵਾਪਸ ਲੈ ਲਏ ਗਏ। 44 ਉਮੀਦਵਾਰ ਮੈਦਾਨ ਵਿਚ ਹਨ। ਅਜਨਾਲਾ ਵਿਚ 15 ਵਾਰਡਾਂ ਲਈ 125 ਨਾਮਜ਼ਦਗੀਆਂ ਦਾਖਲ ਕੀਤੀਆਂ ਗਈਆਂ ਸਨ, ਜਿਨ੍ਹਾਂ ਵਿਚੋਂ 118 ਨੂੰ ਯੋਗ ਪਾਇਆ ਗਿਆ। 52 ਵਾਰਡਾਂ ਲਈ ਵਾਪਸੀ ਤੋਂ ਬਾਅਦ 66 ਉਮੀਦਵਾਰ ਹੁਣ ਚੋਣਾਂ ਲੜਨਗੇ। ਨਗਰ ਪੰਚਾਇਤ ਰਾਇਆ ਵਿਚ 13 ਵਾਰਡਾਂ ਲਈ 88 ਨਾਮਜ਼ਦਗੀਆਂ ਦਾਖਲ ਕੀਤੀਆਂ ਗਈਆਂ ਸਨ, ਜਿਨ੍ਹਾਂ ਵਿੱਚੋਂ 49 ਰੱਦ ਕਰ ਦਿੱਤੀਆਂ ਗਈਆਂ। ਅੱਠ ਉਮੀਦਵਾਰ ਬਿਨਾਂ ਮੁਕਾਬਲਾ ਚੁਣੇ ਗਏ ਸਨ ਤੇ ਹੁਣ 15 ਚੋਣ ਲੜ ਰਹੇ ਹਨ।