ਹੈਵਾਨੀਅਤ ਦੀ ਹੱਦ ਪਾਰ: ਨਾਜਾਇਜ਼ ਸਬੰਧਾਂ ਦੇ ਦੋਸ਼ ’ਚ ਵਿਧਵਾ ਔਰਤ ਨੂੰ ਅਰਧ-ਨੰਗੀ ਕਰਕੇ ਪਿੰਡ ’ਚ ਘੁਮਾਇਆ, ਮੂੰਹ 'ਤੇ ਗੋਹਾ ਮਲ ਕੇ ਕੀਤੀ ਕੁੱਟਮਾਰ
ਛੱਤੀਸਗੜ੍ਹ ਦੇ ਗੌਰੇਲਾ-ਪੇਂਡਰਾ-ਮਰਵਾਹੀ ਜ਼ਿਲ੍ਹੇ ਤੋਂ ਇੱਕ ਹੈਰਾਨ ਕਰਨ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਪੇਂਡਰਾ ਥਾਣਾ ਖੇਤਰ ਦੇ ਅਧੀਨ ਖੋਡਰੀ ਚੌਕੀ ਦੇ ਪਿੰਡ ਰਾਨੀਝਾਪ ਵਿੱਚ ਇੱਕ ਵਿਧਵਾ ਔਰਤ ਨਾਲ ਅਣਮਨੁੱਖੀ ਅਤੇ ਸ਼ਰਮਨਾਕ ਸਲੂਕ ਕੀਤਾ ਗਿਆ। ਨਾਜਾਇਜ਼ ਸਬੰਧਾਂ ਦੇ ਚੱਲਦਿਆਂ ਔਰਤ ਦੀ ਨਾ ਸਿਰਫ਼ ਬੇਰਹਿਮੀ ਨਾਲ ਕੁੱਟਮਾਰ ਕੀਤੀ ਗਈ, ਸਗੋਂ ਉਸ ਦੀ ਸਾੜੀ ਉਤਾਰ ਕੇ ਅੱਧ-ਨੰਗੀ ਹਾਲਤ ਵਿੱਚ ਪੂਰੇ ਪਿੰਡ ਵਿੱਚ ਘੁਮਾਇਆ ਗਿਆ ਅਤੇ ਉਸ ਦੇ ਮੂੰਹ 'ਤੇ ਗੋਹਾ ਮਲ ਦਿੱਤਾ ਗਿਆ।
Posted By Anuradha Bains
Publish Date: Sun, 25 Jan 2026 01:23 PM (IST)
Updated Date: Sun, 25 Jan 2026 01:30 PM (IST)
ਡਿਜੀਟਲ ਡੈਸਕ, ਨਵੀਂ ਦਿੱਲੀ। ਛੱਤੀਸਗੜ੍ਹ ਦੇ ਗੌਰੇਲਾ-ਪੇਂਡਰਾ-ਮਰਵਾਹੀ ਜ਼ਿਲ੍ਹੇ ਤੋਂ ਇੱਕ ਹੈਰਾਨ ਕਰਨ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਪੇਂਡਰਾ ਥਾਣਾ ਖੇਤਰ ਦੇ ਅਧੀਨ ਖੋਡਰੀ ਚੌਕੀ ਦੇ ਪਿੰਡ ਰਾਨੀਝਾਪ ਵਿੱਚ ਇੱਕ ਵਿਧਵਾ ਔਰਤ ਨਾਲ ਅਣਮਨੁੱਖੀ ਅਤੇ ਸ਼ਰਮਨਾਕ ਸਲੂਕ ਕੀਤਾ ਗਿਆ।
ਨਾਜਾਇਜ਼ ਸਬੰਧਾਂ ਦੇ ਚੱਲਦਿਆਂ ਔਰਤ ਦੀ ਨਾ ਸਿਰਫ਼ ਬੇਰਹਿਮੀ ਨਾਲ ਕੁੱਟਮਾਰ ਕੀਤੀ ਗਈ, ਸਗੋਂ ਉਸ ਦੀ ਸਾੜੀ ਉਤਾਰ ਕੇ ਅੱਧ-ਨੰਗੀ ਹਾਲਤ ਵਿੱਚ ਪੂਰੇ ਪਿੰਡ ਵਿੱਚ ਘੁਮਾਇਆ ਗਿਆ ਅਤੇ ਉਸ ਦੇ ਮੂੰਹ 'ਤੇ ਗੋਹਾ ਮਲ ਦਿੱਤਾ ਗਿਆ। ਇਸ ਘਟਨਾ ਦੀ ਵੀਡੀਓ ਵੀ ਸਾਹਮਣੇ ਆਈ ਹੈ। ਪੁਲਿਸ ਨੇ ਮਾਮਲੇ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਤਿੰਨ ਮੁਲਜ਼ਮਾਂ ਖ਼ਿਲਾਫ਼ ਕੇਸ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
ਪ੍ਰੇਮ ਪ੍ਰਸੰਗ ਦਾ ਮਾਮਲਾ
ਜਾਣਕਾਰੀ ਅਨੁਸਾਰ ਇਹ ਘਟਨਾ ਸ਼ਨੀਵਾਰ 24 ਜਨਵਰੀ ਦੀ ਸਵੇਰ ਕਰੀਬ 10 ਵਜੇ ਪਿੰਡ ਰਾਨੀਝਾਪ ਵਿੱਚ ਹੋਈ। ਪੀੜਤ ਔਰਤ ਦੀ ਉਮਰ ਲਗਪਗ 35 ਸਾਲ ਦੱਸੀ ਜਾ ਰਹੀ ਹੈ। ਕਰੀਬ ਇੱਕ ਸਾਲ ਪਹਿਲਾਂ ਉਸ ਦੇ ਪਤੀ ਦੀ ਮੌਤ ਹੋ ਗਈ ਸੀ। ਇਸ ਤੋਂ ਬਾਅਦ ਔਰਤ ਦਾ ਪਿੰਡ ਦੇ ਹੀ ਇੱਕ 35 ਸਾਲਾ ਸ਼ਾਦੀਸ਼ੁਦਾ ਵਿਅਕਤੀ ਹਰਿ ਪ੍ਰਸਾਦ ਰਾਠੌੜ ਨਾਲ ਪ੍ਰੇਮ ਪ੍ਰਸੰਗ ਚੱਲ ਰਿਹਾ ਸੀ।
ਹਰਿ ਪ੍ਰਸਾਦ ਵਿਆਹਿਆ ਹੋਇਆ ਹੈ ਅਤੇ ਉਸ ਦੀਆਂ ਦੋ ਛੋਟੀਆਂ ਬੇਟੀਆਂ ਵੀ ਹਨ। ਦੱਸਿਆ ਗਿਆ ਹੈ ਕਿ ਔਰਤ ਅਤੇ ਹਰਿ ਪ੍ਰਸਾਦ 29 ਅਕਤੂਬਰ 2025 ਨੂੰ ਪਿੰਡੋਂ ਭੱਜ ਗਏ ਸਨ ਅਤੇ ਮੱਧ ਪ੍ਰਦੇਸ਼ ਦੇ ਸ਼ਹਿਡੋਲ ਜ਼ਿਲ੍ਹੇ ਦੇ ਪਿੰਡ ਮਾਲਾਚੁਵਾ ਵਿੱਚ ਰਹਿ ਰਹੇ ਸਨ।
ਸ਼ੁੱਕਰਵਾਰ 23 ਜਨਵਰੀ ਨੂੰ ਜਦੋਂ ਦੋਵੇਂ ਪਿੰਡ ਪਰਤੇ, ਤਾਂ ਪਿੰਡ ਵਿੱਚ ਵਿਵਾਦ ਦੀ ਸਥਿਤੀ ਬਣ ਗਈ। ਇਸ ਤੋਂ ਬਾਅਦ ਦੋਵਾਂ ਪੱਖਾਂ ਦੇ ਪਰਿਵਾਰਕ ਮੈਂਬਰ ਖੋਡਰੀ ਚੌਕੀ ਪਹੁੰਚੇ, ਜਿੱਥੇ ਔਰਤ ਨੇ ਪੁਲਿਸ ਦੇ ਸਾਹਮਣੇ ਹਰਿ ਪ੍ਰਸਾਦ ਨਾਲ ਰਹਿਣ ਦੀ ਇੱਛਾ ਜਤਾਈ। ਚੌਕੀ ਵਿੱਚ ਸਮਝਾਉਣ ਤੋਂ ਬਾਅਦ ਦੋਵੇਂ ਆਪਣੇ ਪਿੰਡ ਪਰਤ ਆਏ।
ਪਿੰਡ ਵਿੱਚ ਹੋਈ ਬਦਸਲੂਕੀ ਸ਼ੁੱਕਰਵਾਰ ਰਾਤ ਔਰਤ ਅਤੇ ਹਰਿ ਪ੍ਰਸਾਦ ਨੇ ਪਿੰਡ ਦੇ ਹੀ ਭੁੱਲਨ ਗੋਂੜ ਦੇ ਘਰ ਪਨਾਹ ਲਈ ਸੀ। ਪਰ ਸ਼ਨੀਵਾਰ ਸਵੇਰੇ ਕਰੀਬ 10 ਵਜੇ ਹਰਿ ਪ੍ਰਸਾਦ ਦੀ ਪਤਨੀ ਸਰੋਜ ਰਾਠੌੜ, ਉਸ ਦਾ ਭਰਾ ਮਨੋਜ ਰਾਠੌੜ, ਭੈਣ ਯਸ਼ੋਦਾ ਰਾਠੌੜ ਸਮੇਤ ਹੋਰ ਲੋਕ ਇਕੱਠੇ ਹੋ ਗਏ।
ਇਲਜ਼ਾਮ ਹੈ ਕਿ ਇਨ੍ਹਾਂ ਲੋਕਾਂ ਨੇ ਔਰਤ ਨੂੰ ਘਰੋਂ ਬਾਹਰ ਘਸੀਟ ਕੇ ਵਿਚਕਾਰ ਸੜਕ 'ਤੇ ਕੁੱਟਮਾਰ ਸ਼ੁਰੂ ਕਰ ਦਿੱਤੀ। ਇਸ ਤੋਂ ਬਾਅਦ ਔਰਤ ਦੀ ਸਾੜੀ ਉਤਾਰ ਕੇ ਉਸ ਨੂੰ ਅੱਧ-ਨੰਗੀ ਕਰ ਦਿੱਤਾ ਗਿਆ ਅਤੇ ਪੂਰੇ ਪਿੰਡ ਵਿੱਚ ਘੁਮਾਇਆ ਗਿਆ। ਚਸ਼ਮਦੀਦਾਂ ਅਨੁਸਾਰ ਮੁਲਜ਼ਮਾਂ ਨੇ ਔਰਤ ਦੇ ਮੂੰਹ 'ਤੇ ਗੋਹਾ ਮਲਿਆ ਅਤੇ ਵਾਲ ਖਿੱਚਦਿਆਂ ਉਸ ਨੂੰ ਪਿੱਟਿਆ। ਇਸ ਦੌਰਾਨ ਮੁਲਜ਼ਮ ਇਹ ਕਹਿੰਦੇ ਨਜ਼ਰ ਆਏ ਕਿ "ਘਰ ਉਜਾੜਨ ਦੀ ਸਜ਼ਾ ਕੀ ਹੁੰਦੀ ਹੈ, ਸੋਚ ਲੈ।"
ਔਰਤ ਨੂੰ ਪਿੱਟਦੇ ਹੋਏ ਪਿੰਡ ਦੇ ਮੁੱਖ ਰਸਤੇ ਤੋਂ ਕਾਲੀ ਮੰਦਰ ਤੱਕ ਲਿਜਾਇਆ ਗਿਆ। ਘਟਨਾ ਦੌਰਾਨ ਔਰਤ ਲਗਾਤਾਰ ਰੋਂਦੀ ਰਹੀ ਅਤੇ ਮਦਦ ਦੀ ਗੁਹਾਰ ਲਗਾਉਂਦੀ ਰਹੀ। ਘਟਨਾ ਦੀ ਸੂਚਨਾ ਮਿਲਣ 'ਤੇ ਪਿੰਡ ਵਾਸੀ ਅਤੇ ਪੀੜਤਾ ਦੇ ਪਰਿਵਾਰਕ ਮੈਂਬਰ ਮੌਕੇ 'ਤੇ ਪਹੁੰਚੇ। ਅਮਰ ਸਿੰਘ ਧੁਰਵੇ, ਦਸ਼ਰਥ ਵਿਸ਼ਵਕਰਮਾ ਸਮੇਤ ਹੋਰ ਪਿੰਡ ਵਾਸੀਆਂ ਨੇ ਵਿਚ-ਬਚਾਅ ਕਰਕੇ ਔਰਤ ਨੂੰ ਮੁਲਜ਼ਮਾਂ ਦੇ ਚੁੰਗਲ ਵਿੱਚੋਂ ਛੁਡਾਇਆ।
ਪੁਲਿਸ ਨੇ ਦਰਜ ਕੀਤਾ ਮਾਮਲਾ
ਔਰਤ ਨੂੰ ਕੱਪੜੇ ਪਹਿਨਾਏ ਗਏ ਅਤੇ ਤੁਰੰਤ ਪੁਲਿਸ ਨੂੰ ਸੂਚਨਾ ਦਿੱਤੀ ਗਈ। ਪੁਲਿਸ ਮੌਕੇ 'ਤੇ ਪਹੁੰਚੀ ਅਤੇ ਜ਼ਖ਼ਮੀ ਔਰਤ ਨੂੰ ਆਪਣੇ ਨਾਲ ਥਾਣੇ ਲੈ ਗਈ। ਇਸ ਮਾਮਲੇ ਵਿੱਚ ਗੌਰੇਲਾ ਥਾਣਾ ਇੰਚਾਰਜ ਸੌਰਭ ਸਿੰਘ ਨੇ ਦੱਸਿਆ ਕਿ ਹਰਿ ਪ੍ਰਸਾਦ ਰਾਠੌੜ ਦੀ ਪਤਨੀ, ਭਰਾ ਅਤੇ ਭੈਣ ਖ਼ਿਲਾਫ਼ ਵੱਖ-ਵੱਖ ਧਾਰਾਵਾਂ ਤਹਿਤ ਕੇਸ ਦਰਜ ਕਰ ਲਿਆ ਗਿਆ ਹੈ।
ਮੁਲਜ਼ਮਾਂ ਨੂੰ ਜ਼ਮਾਨਤ 'ਤੇ ਰਿਹਾਅ ਕਰ ਦਿੱਤਾ ਗਿਆ ਹੈ। ਥਾਣਾ ਇੰਚਾਰਜ ਨੇ ਦੱਸਿਆ ਕਿ ਮਾਮਲੇ ਦੀ ਸੰਵੇਦਨਸ਼ੀਲਤਾ ਨੂੰ ਦੇਖਦੇ ਹੋਏ ਇਸ ਨੂੰ ਸੈਂਸਿਟਿਵ ਮੋਡ ਵਿੱਚ ਰੱਖਿਆ ਗਿਆ ਹੈ ਅਤੇ ਪੂਰੇ ਘਟਨਾਕ੍ਰਮ ਦੀ ਗੰਭੀਰਤਾ ਨਾਲ ਜਾਂਚ ਕੀਤੀ ਜਾ ਰਹੀ ਹੈ।