'ਆਪ ਘਮੰਡੀ ਹੋ', ਅਭਿਸ਼ੇਕ ਨੂੰ ਦੇਖਣ ਪਹੁੰਚੀ ਮਮਤਾ ਬੈਨਰਜੀ ਨੇ ਹਸਪਤਾਲ ਦੇ ਅਧਿਕਾਰੀਆਂ ਨੂੰ ਪਾਈ ਝਾੜ

ਡੀਜੀਟਲ ਡੈਸਕ, ਨਵੀਂ ਦਿੱਲੀ: ਸੋਸ਼ਲ ਮੀਡੀਆ 'ਤੇ ਇੱਕ ਵੀਡੀਓ ਵਾਇਰਲ ਹੋ ਰਹੀ ਹੈ, ਜਿਸ ਵਿੱਚ ਮਮਤਾ ਬੈਨਰਜੀ ਕੋਲਕਾਤਾ ਦੇ ਬੇਲੇ ਵਿਊ ਹਸਪਤਾਲ ਵਿੱਚ ਅਧਿਕਾਰੀਆਂ ਨਾਲ ਬਹਿਸ ਕਰਦੀ ਹੋਈ ਦਿਖਾਈ ਦੇ ਰਹੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਇਹ ਘਟਨਾ ਉਸ ਸਮੇਂ ਹੋਈ, ਜਦੋਂ ਉਨ੍ਹਾਂ ਦੇ ਭਤੀਜੇ ਅਤੇ ਟੀਐੱਮਸੀ ਸੰਸਦ ਮੈਂਬਰ ਅਭਿਸ਼ੇਕ ਬੈਨਰਜੀ ਭੀੜ ਦੇ ਹਮਲੇ ਮਗਰੋਂ ਇਲਾਜ ਕਰਵਾ ਰਹੇ ਸਨ।

ਵੀਡੀਓ ਵਿੱਚ ਮਮਤਾ ਬੈਨਰਜੀ ਹਸਪਤਾਲ ਦੇ ਅਧਿਕਾਰੀਆਂ ਨਾਲ ਤਿੱਖੇ ਲਹਿਜੇ ਨਾਲ ਗੱਲ ਕਰਦੀ ਦਿਖਾਈ ਦੇ ਰਹੀ ਹੈ ਅਤੇ ਅਜਿਹਾ ਲੱਗ ਰਿਹਾ ਹੈ ਕਿ ਉਹ ਬੇਲੇ ਵਿਊ ਹਸਪਤਾਲ ਦੇ ਸੀਈਓ ਪ੍ਰਦੀਪ ਟੰਡਨ ਨੂੰ ਨਿਸ਼ਾਨਾ ਬਣਾ ਰਹੀ ਹੈ। ਵਾਇਰਲ ਕਲਿੱਪ ਅਨੁਸਾਰ, ਉਨ੍ਹਾਂ ਨੂੰ ਇਹ ਕਹਿੰਦੇ ਹੋਏ ਸੁਣਿਆ ਜਾ ਸਕਦਾ ਹੈ, "ਆਪ ਹਸਪਤਾਲ ਚਲਾ ਰਹੇ ਹੈਂ, ਆਪ ਬਹੁਤ ਘਮੰਡੀ ਹੈਂ।"

ਬੀਜੇਪੀ ਨੇ ਸਾਧਿਆ ਨਿਸ਼ਾਨਾ

ਫੁਟੇਜ ਵਿੱਚ ਅਭਿਸ਼ੇਕ ਬੈਨਰਜੀ ਵੀ ਇੱਕ ਸਟ੍ਰੈਚਰ 'ਤੇ ਲੇਟੇ ਹੋਏ ਦਿਖਾਈ ਦੇ ਰਹੇ ਹਨ, ਜਦੋਂ ਕਿ ਮੈਡੀਕਲ ਸਟਾਫ ਉਨ੍ਹਾਂ ਦਾ ਇਲਾਜ ਕਰ ਰਿਹਾ ਹੈ। ਇਸ ਵੀਡੀਓ ਨੂੰ ਐਕਸ (X) 'ਤੇ ਸ਼ੇਅਰ ਕਰਦੇ ਹੋਏ ਬੀਜੇਪੀ ਦੇ ਟਿੱਪਣੀਕਾਰ ਸੁਧਾਨਿਧੀ ਬੰਦੋਪਾਧਿਆਏ ਨੇ ਲਿਖਿਆ, "ਕੱਲ੍ਹ ਰਾਤ ਮਮਤਾ ਬੈਨਰਜੀ ਬੇਲੇ ਵਿਊ ਹਸਪਤਾਲ ਦੇ ਅਧਿਕਾਰੀਆਂ 'ਤੇ ਅਤੇ ਵਿਸ਼ੇਸ਼ ਤੌਰ 'ਤੇ ਪ੍ਰਦੀਪ ਟੰਡਨ (CEO) 'ਤੇ ਚੀਕ ਰਹੀ ਸੀ। ਉਸ ਦਾ ਹੰਕਾਰ ਵੀ ਘੱਟ ਹੋਣ ਦਾ ਨਾਮ ਨਹੀਂ ਲੈ ਰਿਹਾ ਹੈ।"

ਪੱਛਮੀ ਬੰਗਾਲ ਬੀਜੇਪੀ ਦੇ ਮੁੱਖ ਬੁਲਾਰੇ ਨੇ ਵੀ ਇਸ ਵੀਡੀਓ ਨੂੰ ਐਕਸ 'ਤੇ ਸ਼ੇਅਰ ਕੀਤਾ ਅਤੇ ਟੀਐੱਮਸੀ ਮੁਖੀ 'ਤੇ ਹਸਪਤਾਲ ਅਧਿਕਾਰੀਆਂ 'ਤੇ ਦਬਾਅ ਪਾਉਣ ਦਾ ਦੋਸ਼ ਲਗਾਇਆ, ਜਦੋਂ ਕਿ ਮੈਡੀਕਲ ਜਾਂਚ ਵਿੱਚ ਕਥਿਤ ਤੌਰ 'ਤੇ ਇਹ ਸਾਹਮਣੇ ਆਇਆ ਸੀ ਕਿ ਅਭਿਸ਼ੇਕ ਨੂੰ ਕੋਈ ਗੰਭੀਰ ਸੱਟ ਨਹੀਂ ਲੱਗੀ ਸੀ।

ਉਨ੍ਹਾਂ ਨੇ ਲਿਖਿਆ, "ਮਮਤਾ ਬੈਨਰਜੀ ਨੂੰ ਸ਼ਰਮ ਆਉਣੀ ਚਾਹੀਦੀ ਹੈ ਕਿ ਉਨ੍ਹਾਂ ਨੇ ਕਥਿਤ ਤੌਰ 'ਤੇ ਬੇਲੇ ਵਿਊ ਹਸਪਤਾਲ ਦੇ ਸੀਈਓ ਪ੍ਰਦੀਪ ਟੰਡਨ ਨੂੰ ਧਮਕਾਇਆ ਅਤੇ ਹਸਪਤਾਲ ਦੇ ਅਧਿਕਾਰੀਆਂ 'ਤੇ ਅਭਿਸ਼ੇਕ ਬੈਨਰਜੀ ਨੂੰ ਭਰਤੀ ਕਰਨ ਦਾ ਦਬਾਅ ਪਾਇਆ, ਜਦੋਂ ਕਿ ਮੈਡੀਕਲ ਰਿਪੋਰਟ ਵਿੱਚ ਕੋਈ ਗੰਭੀਰ ਸੱਟ ਨਹੀਂ ਦੱਸੀ ਗਈ ਸੀ।"

ਉਨ੍ਹਾਂ ਨੇ ਅੱਗੇ ਲਿਖਿਆ, "ਇਹ ਮੈਡੀਕਲ ਸੰਸਥਾਵਾਂ ਦਾ ਸਿਆਸੀ ਨੈਰੇਟਿਵ ਲਈ ਗਲਤ ਇਸਤੇਮਾਲ ਕਰਨ ਦੀ ਇੱਕ ਪਰੇਸ਼ਾਨ ਕਰਨ ਵਾਲੀ ਕੋਸ਼ਿਸ਼ ਹੈ। ਹਸਪਤਾਲ ਮਰੀਜ਼ਾਂ ਦੀ ਸੇਵਾ ਮੈਡੀਕਲ ਲੋੜ ਦੇ ਆਧਾਰ 'ਤੇ ਕਰਨ ਲਈ ਹੁੰਦੇ ਹਨ ਨਾ ਕਿ ਸਿਆਸੀ ਸਹੂਲਤ ਲਈ। ਡਾਕਟਰਾਂ, ਪ੍ਰਸ਼ਾਸਕਾਂ ਜਾਂ ਹੈਲਥਕੇਅਰ ਸੰਸਥਾਵਾਂ ਨੂੰ ਡਰਾਉਣ-ਧਮਕਾਉਣ ਦੀ ਕੋਈ ਵੀ ਕੋਸ਼ਿਸ਼ ਜਨਤਾ ਦੇ ਭਰੋਸੇ ਨੂੰ ਕਮਜ਼ੋਰ ਕਰਦੀ ਹੈ ਅਤੇ ਲੋਕਤੰਤਰ ਤੇ ਸ਼ਾਸਨ ਦੇ ਬੁਨਿਆਦੀ ਸਿਧਾਂਤਾਂ ਦੀ ਉਲੰਘਣਾ ਕਰਦੀ ਹੈ।"

ਹਸਪਤਾਲ ਦਾ ਕੀ ਕਹਿਣਾ ਹੈ?

ਬੇਲੇ ਵਿਊ ਹਸਪਤਾਲ ਨੇ ਇੱਕ ਬਿਆਨ ਵਿੱਚ ਕਿਹਾ, "ਛਾਤੀ 'ਤੇ ਝਰੀਟਾਂ ਤੋਂ ਇਲਾਵਾ ਸੱਟ ਦਾ ਕੋਈ ਗੰਭੀਰ ਸਰੀਰਕ ਨਿਸ਼ਾਨ ਨਹੀਂ ਹੈ। ਮਰੀਜ਼ ਗੱਲ ਕਰ ਰਿਹਾ ਹੈ ਅਤੇ ਪੂਰੀ ਤਰ੍ਹਾਂ ਹੋਸ਼ ਵਿੱਚ ਹੈ ਅਤੇ ਉਸਨੂੰ ਸਭ ਕੁਝ ਯਾਦ ਹੈ। ਇਸ ਲਈ, ਮਰੀਜ਼ ਨੂੰ ਭਰਤੀ ਕਰਨ ਦੀ ਕੋਈ ਲੋੜ ਨਹੀਂ ਹੈ।"

ਅਭਿਸ਼ੇਕ ਚੋਣਾਂ ਮਗਰੋਂ ਹੋਈ ਹਿੰਸਾ ਤੋਂ ਪ੍ਰਭਾਵਿਤ ਪਰਿਵਾਰਾਂ ਨੂੰ ਮਿਲਣ ਗਏ ਸਨ, ਉਦੋਂ ਹੀ ਪ੍ਰਦਰਸ਼ਨਕਾਰੀਆਂ ਨੇ ਉਨ੍ਹਾਂ 'ਤੇ ਪੱਥਰ, ਆਂਡੇ ਅਤੇ ਜੁੱਤੀਆਂ ਸੁੱਟੀਆਂ। ਘਟਨਾ ਸਥਾਨ ਤੋਂ ਮਿਲੇ ਵਿਜ਼ੂਅਲਸ ਵਿੱਚ ਦਿਖਿਆ ਕਿ ਮਾਰ-ਕੁੱਟ ਦੌਰਾਨ ਉਨ੍ਹਾਂ ਦੀ ਸ਼ਰਟ ਪਾੜ ਦਿੱਤੀ ਸੀ, ਜਦੋਂ ਕਿ ਸੁਰੱਖਿਆ ਕਰਮੀ ਉਨ੍ਹਾਂ ਨੂੰ ਉੱਥੋਂ ਸੁਰੱਖਿਅਤ ਬਾਹਰ ਕੱਢ ਰਹੇ ਸਨ।

ਮਮਤਾ ਬੈਨਰਜੀ ਨੇ ਕੀ ਦੋਸ਼ ਲਗਾਇਆ?

ਇਸ ਘਟਨਾ ਮਗਰੋਂ ਮਮਤਾ ਬੈਨਰਜੀ ਨੇ ਦੋਸ਼ ਲਗਾਇਆ ਕਿ ਅਭਿਸ਼ੇਕ ਬੈਨਰਜੀ ਦੇ ਇਲਾਜ ਨੂੰ ਲੈ ਕੇ ਹਸਪਤਾਲਾਂ ਅਤੇ ਡਾਕਟਰਾਂ 'ਤੇ ਦਬਾਅ ਪਾਇਆ ਜਾ ਰਿਹਾ ਹੈ। ਉਨ੍ਹਾਂ ਦਾਅਵਾ ਕੀਤਾ ਕਿ ਹਸਪਤਾਲ ਦੇ ਅਧਿਕਾਰੀਆਂ ਨੂੰ ਧਮਕੀ ਭਰੇ ਫੋਨ ਆ ਰਹੇ ਸਨ ਅਤੇ ਮੈਡੀਕਲ ਸਲਾਹ ਦੇ ਬਾਵਜੂਦ ਉਨ੍ਹਾਂ ਨੂੰ ਟੀਐੱਮਸੀ ਸੰਸਦ ਮੈਂਬਰ ਨੂੰ ਭਰਤੀ ਕਰਨ ਤੋਂ ਰੋਕਿਆ ਜਾ ਰਿਹਾ ਸੀ।

ਪੁਲਿਸ ਨੇ ਪੰਜ ਲੋਕਾਂ ਨੂੰ ਕੀਤਾ ਗ੍ਰਿਫ਼ਤਾਰ

ਸ਼ਨਿੱਚਰਵਾਰ ਨੂੰ ਦੱਖਣੀ 24 ਪਰਗਨਾ ਜ਼ਿਲ੍ਹੇ ਦੇ ਸੋਨਾਰਪੁਰ ਦੌਰੇ ਦੌਰਾਨ ਅਭਿਸ਼ੇਕ ਬੈਨਰਜੀ 'ਤੇ ਹਮਲੇ ਨੂੰ ਲੈ ਕੇ ਮਚੇ ਸਿਆਸੀ ਹੰਗਾਮੇ ਦੇ ਵਿਚਕਾਰ ਇਹ ਵੀਡੀਓ ਸਾਹਮਣੇ ਆਈ ਹੈ। ਨਿਊਜ਼ ਏਜੰਸੀ ਏਐੱਨਆਈ (ANI) ਦੀ ਰਿਪੋਰਟ ਅਨੁਸਾਰ, ਪੱਛਮੀ ਬੰਗਾਲ ਪੁਲਿਸ ਨੇ ਦੱਸਿਆ ਹੈ ਕਿ ਇਸ ਹਮਲੇ ਦੇ ਸਿਲਸਿਲੇ ਵਿੱਚ ਪੰਜ ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।

Last night Mamata Banerjee was shouting at the Hospital Authorities of Belle Vue & especially against Mr. Pradip Tandon (CEO), her arrogance isn't going away either. pic.twitter.com/CP8djkGYns

— Sudhanidhi Bandyopadhyay (@SudhanidhiB) May 31, 2026