ਸਿੰਗਾਪੁਰ 'ਚ ਜ਼ੁਬੀਨ ਗਰਗ ਦੀ ਮੌਤ ਦੇ ਮਾਮਲੇ 'ਚ ਜਹਾਜ਼ ਸੰਚਾਲਕਾਂ 'ਤੇ ਉੱਠੇ ਸਵਾਲ; ਸਮੁੰਦਰ 'ਚ ਡੁੱਬਣ ਕਾਰਨ ਗਈ ਸੀ ਗਾਇਕ ਦੀ ਜਾਨ

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਭਾਰਤੀ ਗਾਇਕ ਜ਼ੁਬੀਨ ਗਰਗ ਦੇ ਡੁੱਬਣ ਦੀ ਘਟਨਾ ਨੇ ਨਸ਼ੇ ਦੀ ਹਾਲਤ 'ਚ ਮੁਸਾਫ਼ਰਾਂ ਨਾਲ ਨਜਿੱਠਣ ਦੌਰਾਨ ਜਹਾਜ਼ ਸੰਚਾਲਕਾਂ ਦੀਆਂ ਜ਼ਿੰਮੇਵਾਰੀਆਂ 'ਤੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। ਇਹ ਗੱਲ 'ਸਟ੍ਰੇਟਸ ਟਾਈਮਜ਼' ਦੀ ਰਿਪੋਰਟ 'ਚ ਵਕੀਲਾਂ ਦੇ ਹਵਾਲੇ ਨਾਲ ਕਹੀ ਗਈ ਹੈ।

ਰਿਪੋਰਟ 'ਚ ਹੋਰਨਾਂ ਦੇ ਨਾਲ-ਨਾਲ ਸਿੰਗਾਪੁਰ ਦੀ ਇਕ ਲਾਅ ਫਰਮ, ਟ੍ਰਾਈਐਂਗਲ ਲੀਗਲ ਦੇ ਪ੍ਰਬੰਧਕੀ ਨਿਰਦੇਸ਼ਕ ਨਿਕੋ ਲੀ ਦਾ ਵੀ ਜ਼ਿਕਰ ਹੈ, ਜਿਨ੍ਹਾਂ ਨੇ ਸਿੰਗਾਪੁਰ ਸਮੁੰਦਰੀ ਅਤੇ ਬੰਦਰਗਾਹ ਅਥਾਰਟੀ (ਪੋਰਟ) ਦੇ ਨਿਯਮਾਂ ਦਾ ਹਵਾਲਾ ਦਿੱਤਾ ਹੈ। ਇਸ ਵਿਚ ਨਸ਼ੇ 'ਚ ਧੁੱਤ ਯਾਤਰੀਆਂ ਨੂੰ ਜਹਾਜ਼ 'ਤੇ ਚੜ੍ਹਨ ਤੋਂ ਰੋਕਣ ਦੀਆਂ ਵਿਵਸਥਾਵਾਂ ਹਨ।

ਕੀ ਨਸ਼ੇ 'ਚ ਸਨ ਗਾਇਕ?

ਲੀ ਦੇ ਅਨੁਸਾਰ, ਜਹਾਜ਼ ਦੇ ਮਾਲਕ, ਏਜੰਟ ਜਾਂ ਕਪਤਾਨ ਨੂੰ ਕਿਸੇ ਵੀ ਅਜਿਹੇ ਵਿਅਕਤੀ ਨੂੰ ਜਹਾਜ਼ 'ਤੇ ਚੜ੍ਹਨ ਦੀ ਇਜਾਜ਼ਤ ਨਹੀਂ ਦੇਣੀ ਚਾਹੀਦੀ ਜੋ ਸ਼ਰਾਬ ਜਾਂ ਡਰੱਗਜ਼ ਦੇ ਪ੍ਰਭਾਵ ਹੇਠ ਹੋਵੇ ਅਤੇ ਜਿਸ ਦਾ ਨਸ਼ਾ ਜਹਾਜ਼, ਚਾਲਕ ਦਲ ਜਾਂ ਕਿਸੇ ਹੋਰ ਵਿਅਕਤੀ ਦੀ ਸੁਰੱਖਿਆ ਨੂੰ ਖ਼ਤਰੇ ਵਿੱਚ ਪਾਉਂਦਾ ਹੋਵੇ।

ਸਟ੍ਰੇਟਸ ਟਾਈਮਜ਼ ਨੇ ਲੀ ਦੇ ਹਵਾਲੇ ਨਾਲ ਕਿਹਾ, "ਨਾਗਰਿਕ ਜ਼ਿੰਮੇਵਾਰੀ ਦੇ ਸੰਦਰਭ ਵਿੱਚ, ਇਹ ਦਲੀਲ ਦਿੱਤੀ ਜਾ ਸਕਦੀ ਹੈ ਕਿ ਜਹਾਜ਼ ਦਾ ਕਪਤਾਨ ਲਾਪਰਵਾਹ ਹੈ, ਕਿਉਂਕਿ ਆਮ ਲਾਪਰਵਾਹੀ ਦੇ ਸਿਧਾਂਤਾਂ ਦੇ ਤਹਿਤ ਜਹਾਜ਼ 'ਤੇ ਸਵਾਰ ਮਹਿਮਾਨਾਂ ਪ੍ਰਤੀ ਉਸਦੀ ਦੇਖਭਾਲ ਦੀ ਮੁੱਢਲੀ ਜ਼ਿੰਮੇਵਾਰੀ ਹੁੰਦੀ ਹੈ।"

ਨਿੱਜੀ ਤੌਰ 'ਤੇ ਸਪੱਸ਼ਟੀਕਰਨ ਦੀ ਮੰਗ

ਗਰਗ ਦੇ ਮਾਮਲੇ ਦਾ ਹਵਾਲਾ ਦਿੰਦੇ ਹੋਏ ਲੀ ਨੇ ਕਿਹਾ ਕਿ ਹਾਲਾਤ ਗੰਭੀਰ ਸਨ, ਕਿਉਂਕਿ ਜਹਾਜ਼ ਦੇ ਕੰਟਰੋਲਰ ਨੂੰ ਪਤਾ ਸੀ ਕਿ ਯਾਤਰੀ ਨਸ਼ੇ 'ਚ ਸੀ। ਉਨ੍ਹਾਂ ਅੱਗੇ ਕਿਹਾ ਕਿ ਗਾਇਕ ਨੇ ਸ਼ਾਇਦ ਸਾਰੇ ਯਾਤਰੀਆਂ ਲਈ ਦਿੱਤੀ ਗਈ ਸੁਰੱਖਿਆ ਸਬੰਧੀ ਜਾਣਕਾਰੀ ਨੂੰ ਸਮਝਿਆ ਨਹੀਂ ਹੋਵੇਗਾ।

ਜਹਾਜ਼ ਸੰਚਾਲਕ ਚਾਲਕ ਦਲ ਦੇ ਕਿਸੇ ਮੈਂਬਰ ਨੂੰ ਸਿੱਧੇ ਤੌਰ 'ਤੇ ਉਸ ਦੀ ਨਿਗਰਾਨੀ ਲਈ ਨਿਯੁਕਤ ਕਰ ਸਕਦੇ ਸਨ ਜਾਂ ਇਹ ਯਕੀਨੀ ਬਣਾ ਸਕਦੇ ਸਨ ਕਿ ਜਦੋਂ ਉਹ ਸਮਝਣ ਦੇ ਯੋਗ ਹੋਵੇ, ਉਦੋਂ ਉਸ ਨੂੰ ਨਿੱਜੀ ਤੌਰ 'ਤੇ ਸਪੱਸ਼ਟੀਕਰਨ ਦਿੱਤਾ ਜਾਵੇ।