ਯਮੁਨਾ ਨਦੀ 'ਚ ਵੱਡਾ ਹਾਦਸਾ: ਜਨਮਦਿਨ ਦੀ ਪਾਰਟੀ 'ਚ ਆਏ ਤਿੰਨ ਨੌਜਵਾਨਾਂ ਦੀ ਡੁੱਬਣ ਕਾਰਨ ਮੌਤ, ਇਕ ਲਾਪਤਾ

ਜਾਗਰਣ ਪ੍ਰਤੀਨਿਧ, ਆਗਰਾ : ਜਨਮਦਿਨ ਦੇ ਪ੍ਰੋਗਰਾਮ ਵਿੱਚ ਆਏ ਰਿਸ਼ਤੇਦਾਰ ਨੌਜਵਾਨ ਅਤੇ ਮੁਟਿਆਰਾਂ ਮੰਗਲਵਾਰ ਸਵੇਰੇ ਫਾਊਂਡਰੀ ਨਗਰ ਦੇ ਕੋਲ ਯਮੁਨਾ ਵਿੱਚ ਨਹਾਉਣ ਚਲੇ ਗਏ। ਡੂੰਘੇ ਪਾਣੀ 'ਚ ਜਾਣ ਕਾਰਨ ਚਾਰ ਜਣੇ ਡੁੱਬ ਗਏ। ਪੁਲਿਸ ਨੇ ਦੱਸਿਆ ਕਿ ਕਾਨ੍ਹਾ, ਰੀਆ ਅਤੇ ਮਹਿਕ ਨੂੰ ਤੁਰੰਤ ਇਲਾਜ ਲਈ ਐੱਸਐੱਨ ਮੈਡੀਕਲ ਕਾਲਜ ਭੇਜਿਆ ਗਿਆ, ਜਿੱਥੇ ਇਲਾਜ ਦੌਰਾਨ ਕਾਨ੍ਹਾ ਅਤੇ ਮਹਿਕ ਦੀ ਮੌਤ ਹੋ ਗਈ। ਉੱਥੇ ਹੀ ਕੁਝ ਦੇਰ ਬਾਅਦ ਰੀਆ ਦੀ ਵੀ ਮੌਤ ਹੋ ਗਈ। ਇਸ ਹਾਦਸੇ ਵਿੱਚ ਕਾਜਲ ਅਤੇ ਅੰਸ਼ੂ ਸੁਰੱਖਿਅਤ ਹਨ। ਇੱਕ ਹੋਰ ਦੀ ਭਾਲ ਲਈ ਸਰਚ ਆਪ੍ਰੇਸ਼ਨ ਜਾਰੀ ਹੈ।

ਯਮੁਨਾ 'ਚ ਨਹਾਉਂਦੇ ਸਮੇਂ ਛੇ ਨੌਜਵਾਨ ਡੁੱਬੇ ਸਨ

ਫਾਊਂਡਰੀ ਨਗਰ ਦੇ ਪਿੱਛੇ ਯਮੁਨਾ ਵਿੱਚ ਨਹਾਉਂਦੇ ਸਮੇਂ ਮੰਗਲਵਾਰ ਦੁਪਹਿਰ 12 ਵਜੇ ਸਾਦਾਬਾਦ ਦੇ ਕੁੰਜਨਪੁਰ ਦੇ ਰਹਿਣ ਵਾਲੇ 19 ਸਾਲਾ ਮਹਿਕ, 22 ਸਾਲਾ ਕਾਨ੍ਹਾ, 13 ਸਾਲਾ ਅੰਸ਼ੂ ਅਤੇ ਮਥੁਰਾ ਦੇ ਤਾਰਸੀ ਦੀ ਰਹਿਣ ਵਾਲੀ 17 ਸਾਲਾ ਰੀਆ, 11 ਸਾਲਾ ਵਿੱਕੀ ਅਤੇ ਵਿਦਿਆਪੁਰਮ ਫਾਊਂਡਰੀ ਨਗਰ ਦੀ ਰਹਿਣ ਵਾਲੀ 17 ਸਾਲਾ ਕਾਜਲ ਡੁੱਬਣ ਲੱਗੇ ਸਨ। ਕਾਜਲ ਅਤੇ ਅੰਸ਼ੂ ਨੂੰ ਆਸ-ਪਾਸ ਦੇ ਲੋਕਾਂ ਨੇ ਸੁਰੱਖਿਅਤ ਬਾਹਰ ਕੱਢ ਲਿਆ ਸੀ, ਜਦਕਿ ਬਾਕੀ ਯਮੁਨਾ ਵਿੱਚ ਡੁੱਬ ਗਏ।

ਇਕ ਬੱਚਾ ਅਤੇ ਲੜਕੀ ਸੁਰੱਖਿਅਤ, ਬਰਥਡੇ 'ਚ ਸ਼ਾਮਲ ਹੋਣ ਸਾਦਾਬਾਦ ਤੋਂ ਆਏ ਸਨ ਨੌਜਵਾਨ

ਪੁਲਿਸ ਅਤੇ ਗੋਤਾਖੋਰਾਂ ਨੇ ਮੌਕੇ 'ਤੇ ਪਹੁੰਚ ਕੇ ਕਾਨ੍ਹਾ, ਮਹਿਕ ਅਤੇ ਰੀਆ ਨੂੰ ਬਾਹਰ ਕੱਢ ਲਿਆ। ਤਿੰਨਾਂ ਨੂੰ ਗੰਭੀਰ ਹਾਲਤ ਵਿੱਚ ਪੁਲਿਸ ਨੇ ਹਸਪਤਾਲ ਭੇਜਿਆ ਸੀ, ਜਿੱਥੇ ਹਸਪਤਾਲ ਵਿੱਚ ਤਿੰਨਾਂ ਦੀ ਮੌਤ ਹੋ ਗਈ। ਜਾਣਕਾਰੀ ਮਿਲਣ 'ਤੇ ਪਰਿਵਾਰਕ ਮੈਂਬਰ ਵੀ ਪਹੁੰਚ ਗਏ। ਉਨ੍ਹਾਂ ਦੱਸਿਆ ਕਿ ਸੋਮਵਾਰ ਨੂੰ ਸਾਦਾਬਾਦ ਤੋਂ ਰਿਸ਼ਤੇਦਾਰ ਫਾਊਂਡਰੀ ਨਗਰ ਦੇ ਵਿਦਿਆ ਨਗਰ ਵਿੱਚ ਸੌਰਭ ਦੀ ਬੇਟੀ ਨਿੱਤਿਆ ਦੇ ਜਨਮਦਿਨ 'ਤੇ ਆਏ ਸਨ। ਤਿੰਨ ਮੌਤਾਂ ਕਾਰਨ ਪਰਿਵਾਰ ਵਿੱਚ ਕੋਹਰਾਮ ਮਚਿਆ ਹੋਇਆ ਹੈ।