ਸਦਮੇ 'ਚ ਮਹਾਰਾਸ਼ਟਰ: 7 ਵਾਰ ਵਿਧਾਇਕ ਤੇ 6 ਵਾਰ ਡਿਪਟੀ CM, ਅਜੀਤ ਪਵਾਰ ਦੇ ਰਿਕਾਰਡ ਤੋੜ ਸਿਆਸੀ ਸਫ਼ਰ 'ਤੇ ਇੱਕ ਨਜ਼ਰ; ਚਾਚੇ ਦੀ ਉਂਗਲ ਫੜ ਕੇ ਬਣੇ ਸਨ ਦਿੱਗਜ ਆਗੂ

ਮਹਾਰਾਸ਼ਟਰ ਦੇ ਬਾਰਾਮਤੀ ਦੇ ਨੇੜੇ ਐਨਸੀਪੀ (NCP) ਆਗੂ ਅਤੇ ਡਿਪਟੀ ਸੀ.ਐਮ. ਅਜੀਤ ਪਵਾਰ ਦੀ ਇੱਕ ਨਿੱਜੀ ਜਹਾਜ਼ ਹਾਦਸੇ ਵਿੱਚ ਮੌਤ ਹੋ ਗਈ ਹੈ। ਲੈਂਡਿੰਗ ਦੌਰਾਨ ਹੋਏ ਇਸ ਹਾਦਸੇ ਵਿੱਚ ਅਜੀਤ ਪਵਾਰ ਸਮੇਤ ਜਹਾਜ਼ ਵਿੱਚ ਸਵਾਰ ਸਾਰੇ ਲੋਕਾਂ ਦੀ ਜਾਨ ਚਲੀ ਗਈ। ਸਿਆਸਤ ਦੇ 'ਬੇਤਾਜ ਬਾਦਸ਼ਾਹ' ਕਹੇ ਜਾਣ ਵਾਲੇ ਅਜੀਤ ਪਵਾਰ ਨੇ ਆਪਣੇ ਚਾਚੇ ਸ਼ਰਦ ਪਵਾਰ ਦੀ ਉਂਗਲ ਫੜ ਕੇ ਰਾਜਨੀਤੀ ਵਿੱਚ ਕਦਮ ਰੱਖਿਆ ਸੀ। ਉਨ੍ਹਾਂ ਨੇ ਆਪਣੀ ਸਿਆਸੀ ਮੁਹਾਰਤ ਰਾਹੀਂ ਪਾਰਟੀ ਨੂੰ ਮਹਾਰਾਸ਼ਟਰ ਵਿੱਚ ਮਜ਼ਬੂਤ ਬਣਾਇਆ। ਪਰ 2022 ਵਿੱਚ ਸ਼ਰਦ ਪਵਾਰ ਤੋਂ ਵੱਖ ਹੋ ਕੇ ਆਪਣੀ ਵੱਖਰੀ ਸਿਆਸੀ ਲਕੀਰ ਖਿੱਚੀ ਅਤੇ ਭਾਜਪਾ ਨਾਲ ਮਿਲ ਕੇ ਸਰਕਾਰ ਬਣਾਈ।

ਮਹਾਰਾਸ਼ਟਰ - ਮਹਾਰਾਸ਼ਟਰ ਦੇ ਬਾਰਾਮਤੀ ਦੇ ਨੇੜੇ ਐਨਸੀਪੀ (NCP) ਆਗੂ ਅਤੇ ਡਿਪਟੀ ਸੀ.ਐਮ. ਅਜੀਤ ਪਵਾਰ ਦੀ ਇੱਕ ਨਿੱਜੀ ਜਹਾਜ਼ ਹਾਦਸੇ ਵਿੱਚ ਮੌਤ ਹੋ ਗਈ ਹੈ। ਲੈਂਡਿੰਗ ਦੌਰਾਨ ਹੋਏ ਇਸ ਹਾਦਸੇ ਵਿੱਚ ਅਜੀਤ ਪਵਾਰ ਸਮੇਤ ਜਹਾਜ਼ ਵਿੱਚ ਸਵਾਰ ਸਾਰੇ ਲੋਕਾਂ ਦੀ ਜਾਨ ਚਲੀ ਗਈ। ਸਿਆਸਤ ਦੇ 'ਬੇਤਾਜ ਬਾਦਸ਼ਾਹ' ਕਹੇ ਜਾਣ ਵਾਲੇ ਅਜੀਤ ਪਵਾਰ ਨੇ ਆਪਣੇ ਚਾਚੇ ਸ਼ਰਦ ਪਵਾਰ ਦੀ ਉਂਗਲ ਫੜ ਕੇ ਰਾਜਨੀਤੀ ਵਿੱਚ ਕਦਮ ਰੱਖਿਆ ਸੀ। ਉਨ੍ਹਾਂ ਨੇ ਆਪਣੀ ਸਿਆਸੀ ਮੁਹਾਰਤ ਰਾਹੀਂ ਪਾਰਟੀ ਨੂੰ ਮਹਾਰਾਸ਼ਟਰ ਵਿੱਚ ਮਜ਼ਬੂਤ ਬਣਾਇਆ ਪਰ 2022 ਵਿੱਚ ਸ਼ਰਦ ਪਵਾਰ ਤੋਂ ਵੱਖ ਹੋ ਕੇ ਆਪਣੀ ਵੱਖਰੀ ਸਿਆਸੀ ਲਕੀਰ ਖਿੱਚੀ ਅਤੇ ਭਾਜਪਾ ਨਾਲ ਮਿਲ ਕੇ ਸਰਕਾਰ ਬਣਾਈ।

ਪਰਿਵਾਰਕ ਪਿਛੋਕੜ ਅਤੇ ਮੁਢਲਾ ਜੀਵਨ

22 ਜੁਲਾਈ 1959 ਨੂੰ ਅਹਿਮਦਨਗਰ ਜ਼ਿਲ੍ਹੇ ਦੇ ਦੇਵਲਾਲੀ ਪ੍ਰਵਰਾ ਵਿੱਚ ਜਨਮੇ ਅਜੀਤ ਪਵਾਰ, ਸ਼ਰਦ ਪਵਾਰ ਦੇ ਵੱਡੇ ਭਰਾ ਅਨੰਤਰਾਓ ਪਵਾਰ ਦੇ ਪੁੱਤਰ ਸਨ। ਉਨ੍ਹਾਂ ਦੇ ਪਿਤਾ ਫ਼ਿਲਮ ਜਗਤ ਨਾਲ ਜੁੜੇ ਹੋਏ ਸਨ ਅਤੇ ਮੁੰਬਈ ਦੇ ਰਾਜਕਮਲ ਸਟੂਡੀਓ ਵਿੱਚ ਕੰਮ ਕਰਦੇ ਸਨ। ਅਜੀਤ ਪਵਾਰ ਨੇ ਆਪਣੀ ਮੁਢਲੀ ਸਿੱਖਿਆ ਬਾਰਾਮਤੀ ਤੋਂ ਹਾਸਲ ਕੀਤੀ, ਪਰ ਕਾਲਜ ਦੌਰਾਨ ਪਿਤਾ ਦੇ ਦੇਹਾਂਤ ਤੋਂ ਬਾਅਦ ਉਨ੍ਹਾਂ ਨੇ ਪੜ੍ਹਾਈ ਛੱਡ ਦਿੱਤੀ ਅਤੇ ਸਿਆਸਤ ਵਿੱਚ ਕਦਮ ਰੱਖਿਆ। ਉਨ੍ਹਾਂ ਦਾ ਵਿਆਹ ਸੁਨੇਤਰਾ ਪਵਾਰ ਨਾਲ ਹੋਇਆ ਅਤੇ ਉਨ੍ਹਾਂ ਦੇ ਦੋ ਪੁੱਤਰ ਪਾਰਥ ਤੇ ਜੈ ਪਵਾਰ ਹਨ।

ਸਿਆਸੀ ਸਫ਼ਰ: ਸਹਿਕਾਰੀ ਬੈਂਕ ਤੋਂ ਲੋਕ ਸਭਾ ਤੱਕ

ਅਜੀਤ ਪਵਾਰ ਨੇ 1982 ਵਿੱਚ ਰਾਜਨੀਤੀ ਸ਼ੁਰੂ ਕੀਤੀ। ਸਭ ਤੋਂ ਪਹਿਲਾਂ ਉਹ ਇੱਕ ਸਹਿਕਾਰੀ ਖੰਡ ਮਿੱਲ ਦੇ ਬੋਰਡ ਲਈ ਚੁਣੇ ਗਏ। ਇਸ ਤੋਂ ਬਾਅਦ ਉਹ 16 ਸਾਲਾਂ ਤੱਕ ਪੁਣੇ ਸਹਿਕਾਰੀ ਬੈਂਕ ਦੇ ਚੇਅਰਮੈਨ ਰਹੇ। 1991 ਵਿੱਚ ਉਹ ਪਹਿਲੀ ਵਾਰ ਬਾਰਾਮਤੀ ਤੋਂ ਲੋਕ ਸਭਾ ਮੈਂਬਰ ਚੁਣੇ ਗਏ, ਪਰ ਬਾਅਦ ਵਿੱਚ ਇਹ ਸੀਟ ਆਪਣੇ ਚਾਚੇ ਸ਼ਰਦ ਪਵਾਰ ਲਈ ਖਾਲੀ ਕਰ ਦਿੱਤੀ। ਜਦੋਂ ਸ਼ਰਦ ਪਵਾਰ ਕੇਂਦਰ ਦੀ ਰਾਜਨੀਤੀ ਵਿੱਚ ਸਰਗਰਮ ਹੋ ਗਏ, ਤਾਂ ਅਜੀਤ ਪਵਾਰ ਨੇ ਮਹਾਰਾਸ਼ਟਰ ਦੀ ਸਿਆਸਤ ਦੀ ਕਮਾਨ ਸੰਭਾਲ ਲਈ।

7 ਵਾਰ ਵਿਧਾਇਕ ਅਤੇ 6 ਵਾਰ ਡਿਪਟੀ ਸੀ.ਐਮ.

ਅਜੀਤ ਪਵਾਰ 1995 ਤੋਂ ਲਗਾਤਾਰ 2024 ਤੱਕ 7 ਵਾਰ ਬਾਰਾਮਤੀ ਤੋਂ ਵਿਧਾਇਕ ਚੁਣੇ ਗਏ। ਆਪਣੇ 45 ਸਾਲਾਂ ਦੇ ਸਿਆਸੀ ਸਫ਼ਰ ਵਿੱਚ ਉਨ੍ਹਾਂ ਨੇ ਖੇਤੀਬਾੜੀ, ਬਿਜਲੀ, ਸਿੰਚਾਈ ਅਤੇ ਪੇਂਡੂ ਵਿਕਾਸ ਵਰਗੇ ਮਹੱਤਵਪੂਰਨ ਮੰਤਰਾਲੇ ਸੰਭਾਲੇ। ਉਹ ਮਹਾਰਾਸ਼ਟਰ ਦੇ 6 ਵਾਰ ਉਪ ਮੁੱਖ ਮੰਤਰੀ ਬਣੇ, ਜੋ ਕਿ ਇੱਕ ਰਿਕਾਰਡ ਹੈ।

ਚਾਚੇ ਨਾਲ ਬਗਾਵਤ ਅਤੇ ਨਵੀਂ ਰਾਹ

ਜਦੋਂ ਸ਼ਰਦ ਪਵਾਰ ਨੇ ਆਪਣੀ ਧੀ ਸੁਪ੍ਰਿਆ ਸੁਲੇ ਨੂੰ ਸਿਆਸੀ ਵਾਰਿਸ ਵਜੋਂ ਅੱਗੇ ਵਧਾਉਣਾ ਸ਼ੁਰੂ ਕੀਤਾ ਤਾਂ ਅਜੀਤ ਪਵਾਰ ਨੇ ਬਗਾਵਤ ਕਰ ਦਿੱਤੀ। 2023 ਵਿੱਚ ਉਹ ਐਨਸੀਪੀ ਦੇ ਬਹੁਗਿਣਤੀ ਵਿਧਾਇਕਾਂ ਨੂੰ ਨਾਲ ਲੈ ਕੇ ਭਾਜਪਾ-ਸ਼ਿੰਦੇ ਸਰਕਾਰ (ਮਹਾਂਯੂਤੀ) ਵਿੱਚ ਸ਼ਾਮਲ ਹੋ ਗਏ ਅਤੇ ਪਾਰਟੀ ਦੇ ਚੋਣ ਨਿਸ਼ਾਨ 'ਤੇ ਵੀ ਕਬਜ਼ਾ ਕਰ ਲਿਆ।