ਲਵ, ਅਫੇਅਰ ਤੇ ਕਤਲ... ਪ੍ਰੇਮੀ ਨਾਲ ਮਿਲ ਕੇ ਪਤਨੀ ਨੇ ਕੀਤੀ ਪਤੀ ਦੀ ਹੱਤਿਆ, ਪੁਲਿਸ ਨੇ ਕਬਰ ਪੁੱਟ ਕੇ ਮਾਮਲੇ ਦਾ ਕੀਤਾ ਪਰਦਾਫਾਸ਼

ਡਿਜੀਟਲ ਡੈਸਕ, ਨਵੀਂ ਦਿੱਲੀ : ਵਡੋਦਰਾ ਪੁਲਿਸ ਨੇ ਐਤਵਾਰ ਨੂੰ 25 ਸਾਲਾ ਔਰਤ ਨੂੰ ਗ੍ਰਿਫਤਾਰ ਕੀਤਾ ਹੈ। ਔਰਤ 'ਤੇ ਦੋਸ਼ ਹੈ ਕਿ ਉਸਨੇ ਪੰਜ ਦਿਨ ਪਹਿਲਾਂ ਆਪਣੇ ਪਤੀ ਦਾ ਕਤਲ ਕੀਤਾ ਸੀ। ਪੁਲਿਸ ਨੇ ਦੱਸਿਆ ਕਿ ਔਰਤ ਗੁਲਬਾਨੂ ਬੰਜਾਰਾ ਨੇ ਦਾਅਵਾ ਕੀਤਾ ਸੀ ਕਿ ਉਸਦੇ ਪਤੀ (32 ਸਾਲ ਦੇ ਇਰਸ਼ਾਦ ਬੰਜਾਰਾ) ਦੀ ਮੌਤ ਦਿਲ ਦੇ ਦੌਰੇ (ਹਾਰਟ ਅਟੈਕ) ਕਾਰਨ ਹੋਈ ਸੀ, ਪਰ ਜਾਂਚ ਦੌਰਾਨ ਪਤਾ ਲੱਗਿਆ ਕਿ ਔਰਤ ਨੇ ਆਪਣੇ ਪ੍ਰੇਮੀ ਨਾਲ ਮਿਲ ਕੇ ਪਤੀ ਦਾ ਕਤਲ ਕੀਤਾ।

ਗੁਲਬਾਨੂ ਨੂੰ ਐਤਵਾਰ ਸ਼ਾਮ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ, ਜਦੋਂ ਕਿ ਉਸਦਾ ਪ੍ਰੇਮੀ ਤੌਸੀਫ਼ ਅਤੇ ਮਾਮਾ ਨਾਮ ਦਾ ਇੱਕ ਹੋਰ ਸਾਥੀ ਅਜੇ ਵੀ ਫ਼ਰਾਰ ਹੈ। ਪੁਲਿਸ ਮੁਤਾਬਕ, ਕਤਲ ਵਾਲੀ ਰਾਤ ਨੂੰ ਗੁਲਬਾਨੂ ਨੇ ਇਰਸ਼ਾਦ ਨੂੰ ਬੇਹੋਸ਼ ਕਰਨ ਲਈ ਉਸਦੇ ਖਾਣੇ ਵਿੱਚ ਕੋਈ ਨਸ਼ੀਲਾ ਪਦਾਰਥ ਮਿਲਾ ਦਿੱਤਾ ਸੀ।

ਉਸ ਰਾਤ, ਤੌਸੀਫ਼ ਅਤੇ ਮਾਮਾ ਕਥਿਤ ਤੌਰ 'ਤੇ ਘਰ ਵਿੱਚ ਦਾਖਲ ਹੋਏ। ਉਨ੍ਹਾਂ ਸਾਰਿਆਂ ਨੇ ਮਿਲ ਕੇ ਗੁਲਬਾਨੂ ਦੇ ਦੁਪੱਟੇ ਨਾਲ ਇਰਸ਼ਾਦ ਦਾ ਗਲਾ ਘੁੱਟ ਦਿੱਤਾ ਅਤੇ ਮੌਕੇ ਤੋਂ ਭੱਜ ਗਏ।

ਪਤਨੀ ਨੇ ਪ੍ਰੇਮੀ ਨਾਲ ਮਿਲ ਕੇ ਪਤੀ ਨੂੰ ਮਾਰਿਆ

ਪੁਲਿਸ ਨੇ ਦੱਸਿਆ ਕਿ 18 ਨਵੰਬਰ ਨੂੰ ਸਵੇਰੇ ਕਰੀਬ 3 ਵਜੇ ਗੁਲਬਾਨੂ ਨੇ ਇਰਸ਼ਾਦ ਦੇ ਪਰਿਵਾਰ ਨੂੰ ਫੋਨ ਕੀਤਾ ਅਤੇ ਕਿਹਾ ਕਿ ਇਰਸ਼ਾਦ ਨੂੰ ਬੇਚੈਨੀ ਹੋ ਰਹੀ ਹੈ। ਜਦੋਂ ਪਰਿਵਾਰ ਨੇ ਜ਼ੋਰ ਦਿੱਤਾ ਕਿ ਉਸਨੂੰ ਹਸਪਤਾਲ ਲਿਜਾਇਆ ਜਾਵੇ ਤਾਂ ਉਸਨੇ ਕਿਹਾ ਕਿ ਉਹ ਵਧੀਆ ਮਹਿਸੂਸ ਕਰ ਰਿਹਾ ਹੈ ਅਤੇ ਕਾਲ ਕੱਟ ਦਿੱਤੀ। ਅਗਲੀ ਸਵੇਰ ਇਰਸ਼ਾਦ ਮਰਿਆ ਹੋਇਆ ਮਿਲਿਆ।

ਗੁਲਬਾਨੂ ਨੇ ਦਾਅਵਾ ਕੀਤਾ ਕਿ ਉਹ ਦੇਰ ਰਾਤ ਤੱਕ ਆਪਣਾ ਮੋਬਾਈਲ ਫੋਨ ਵਰਤ ਰਿਹਾ ਸੀ ਅਤੇ ਜਦੋਂ ਉਹ ਸੌਂ ਰਹੀ ਸੀ ਤਾਂ ਉਸਨੂੰ ਦਿਲ ਦਾ ਦੌਰਾ ਪਿਆ ਹੋਵੇਗਾ। ਪਰਿਵਾਰ ਨੂੰ ਸ਼ੱਕ ਸੀ ਫਿਰ ਵੀ ਉਸਨੇ ਉਸਦੀ ਗੱਲ ਮੰਨ ਲਈ ਅਤੇ ਉਸੇ ਦਿਨ ਦਫ਼ਨਾ ਦਿੱਤਾ ਗਿਆ। ਹਾਲਾਂਕਿ ਡੀਸੀਪੀ ਮੰਜੀਤਾ ਵੰਜਾਰਾ ਨੇ ਦੱਸਿਆ ਕਿ ਇਰਸ਼ਾਦ ਦੇ ਪਰਿਵਾਰ ਨੇ ਦੇਖਿਆ ਕਿ ਦਫ਼ਨਾਉਣ ਵਾਲੇ ਦਿਨ ਗੁਲਬਾਨੂ ਵਾਰ-ਵਾਰ ਕਿਸੇ ਨੂੰ ਫੋਨ ਕਰ ਰਹੀ ਸੀ।

ਜਦੋਂ ਉਨ੍ਹਾਂ ਨੇ ਉਸਦਾ ਫੋਨ ਚੈੱਕ ਕੀਤਾ ਤਾਂ ਉਨ੍ਹਾਂ ਨੂੰ ਇੱਕ ਖਾਸ ਨੰਬਰ ਤੋਂ ਲੰਬੀ ਗੱਲਬਾਤ ਮਿਲੀ। ਇਹ ਗੱਲ ਪਰਿਵਾਰ ਦੇ ਸਾਹਮਣੇ ਆਉਣ 'ਤੇ ਉਸਨੇ ਗੋਲਮੋਲ ਜਵਾਬ ਦਿੱਤੇ। ਇਰਸ਼ਾਦ ਦੇ ਪਰਿਵਾਰ ਵਾਲਿਆਂ ਨੂੰ ਜਦੋਂ ਸ਼ੱਕ ਹੋਇਆ ਤਾਂ ਉਨ੍ਹਾਂ ਨੂੰ 21 ਨਵੰਬਰ ਨੂੰ ਜੇਪੀ ਰੋਡ ਪੁਲਿਸ ਨਾਲ ਸੰਪਰਕ ਕਰਨਾ ਪਿਆ ਅਤੇ ਵਿਸਥਾਰ ਵਿੱਚ ਜਾਂਚ ਦੀ ਬੇਨਤੀ ਕੀਤੀ।

ਕਬਰ ਪੁੱਟ ਕੇ ਪੁਲਿਸ ਨੇ ਕੀਤਾ ਖੁਲਾਸਾ

ਵੰਜਾਰਾ ਨੇ ਕਿਹਾ, 'ਅਸੀਂ ਜ਼ਰੂਰੀ ਆਗਿਆ (Permission) ਲਈ ਅਤੇ ਐਤਵਾਰ ਸਵੇਰੇ ਇੱਕ ਮੈਜਿਸਟ੍ਰੇਟ ਦੀ ਮੌਜੂਦਗੀ ਵਿੱਚ ਇਰਸ਼ਾਦ ਦੀ ਦੇਹ ਨੂੰ ਕਬਰ ਵਿੱਚੋਂ ਕੱਢਿਆ।' ਪੋਸਟਮਾਰਟਮ ਤੋਂ ਪਤਾ ਲੱਗਾ ਕਿ ਉਸਦਾ ਗਲਾ ਘੁੱਟਿਆ ਗਿਆ ਸੀ। ਨਤੀਜਿਆਂ ਦੇ ਆਧਾਰ 'ਤੇ ਗੁਲਬਾਨੂ ਉਸਦੇ ਪ੍ਰੇਮੀ ਤੌਸੀਫ਼ ਅਤੇ ਤੀਜੇ ਦੋਸ਼ੀ ਮਾਮਾ ਦੇ ਖਿਲਾਫ ਕਤਲ ਦਾ ਕੇਸ ਦਰਜ ਕੀਤਾ ਗਿਆ।

ਪੁਲਿਸ ਨੇ ਦੱਸਿਆ ਕਿ ਗੁਲਬਾਨੂ ਅਤੇ ਇਰਸ਼ਾਦ ਦੇ ਵਿਆਹ ਨੂੰ ਛੇ ਸਾਲ ਹੋ ਗਏ ਸਨ ਅਤੇ ਉਨ੍ਹਾਂ ਦੇ ਤਿੰਨ ਬੱਚੇ ਹਨ। ਪੁੱਛਗਿੱਛ ਦੌਰਾਨ ਗੁਲਬਾਨੂ ਨੇ ਕਥਿਤ ਤੌਰ 'ਤੇ ਕਬੂਲ ਕੀਤਾ ਕਿ ਉਹ ਲਗਪਗ ਇੱਕ ਸਾਲ ਪਹਿਲਾਂ ਉੱਤਰ ਪ੍ਰਦੇਸ਼ ਦੇ ਇੱਕ ਟੇਲਰ ਤੌਸੀਫ਼ ਦੇ ਨਾਲ ਰਿਲੇਸ਼ਨਸ਼ਿਪ ਵਿੱਚ ਆਈ ਸੀ।

ਪੁਲਿਸ ਨੇ ਦੱਸਿਆ ਕਿ ਦੋਵਾਂ ਨੇ ਸ਼ੁਰੂ ਵਿੱਚ ਭੱਜਣ ਦਾ ਪਲਾਨ ਬਣਾਇਆ ਸੀ ਪਰ ਬਾਅਦ ਵਿੱਚ ਇਰਸ਼ਾਦ ਨੂੰ ਮਾਰਨ ਦਾ ਫੈਸਲਾ ਕੀਤਾ। ਪੁਲਿਸ ਮੁਤਾਬਕ ਤਿੰਨੋਂ ਪਿਛਲੇ ਤਿੰਨ ਮਹੀਨਿਆਂ ਤੋਂ ਕਤਲ ਦੀ ਯੋਜਨਾ ਬਣਾ ਰਹੇ ਸਨ। ਪੁਲਿਸ ਨੇ ਤੌਸੀਫ਼ ਅਤੇ ਮਾਮਾ ਨੂੰ ਟਰੈਕ ਕਰਨ ਲਈ ਟੀਮਾਂ ਬਣਾਈਆਂ ਹਨ।