Google Map 'ਤੇ ਅੰਨ੍ਹਾ ਭਰੋਸਾ ਪਿਆ ਭਾਰੀ, ਅੰਡਰਪਾਸ 'ਚ ਫਸ ਗਿਆ ਵੱਡਾ ਟਰੱਕ; ਮੁਸ਼ਕਲ 'ਚ ਫਸੀਆਂ ਸੈਂਕੜੇ ਗੱਡੀਆਂ

ਪ੍ਰਵੀਨ ਕੌਸ਼ਿਕ, ਫਰੀਦਾਬਾਦ : ਕਈ ਵਾਰ ਗੂਗਲ ਮੈਪ ਦੀ ਵਜ੍ਹਾ ਕਰਕੇ ਲੋਕ ਪਰੇਸ਼ਾਨੀ 'ਚ ਆ ਜਾਂਦੇ ਹਨ। ਇਸੇ ਤਰ੍ਹਾਂ ਦਾ ਇਕ ਮਾਮਲਾ ਫਰੀਦਾਬਾਦ 'ਚ ਐਤਵਾਰ ਦੇਰ ਰਾਤ ਸਾਹਮਣੇ ਆਇਆ। ਐੱਨਆਈਟੀ (NIT) ਵੱਲੋਂ ਕੰਕਰੀਟ ਮਿਕਸਚਰ ਵਾਲਾ ਵੱਡਾ ਟਰੱਕ ਓਲਡ ਫਰੀਦਾਬਾਦ ਰੇਲਵੇ ਅੰਡਰਪਾਸ 'ਚ ਫਸ ਗਿਆ। ਉਚਾਈ ਜ਼ਿਆਦਾ ਹੋਣ ਕਰਕੇ ਟਰੱਕ ਦਾ ਉਪਰਲਾ ਹਿੱਸਾ ਅੰਡਰਪਾਸ ਦੇ ਲੈਂਟਰ ਨਾਲ ਰਗੜ ਖਾ ਰਿਹਾ ਸੀ। ਕਾਫ਼ੀ ਦੇਰ ਤਕ ਕੋਸ਼ਿਸ਼ ਕਰਨ ਦੇ ਬਾਵਜੂਦ ਟਰੱਕ ਟੱਸ ਤੋਂ ਮੱਸ ਨਾ ਹੋਇਆ।

ਅੰਡਰਪਾਸ ਦੀ ਇਕ ਲੇਨ ਹੋਈ ਬੰਦ

ਉੱਥੇ ਹੀ, ਇਸ ਵਜ੍ਹਾ ਕਰਕੇ ਅੰਡਰਪਾਸ ਦੀ ਇਕ ਲੇਨ ਬੰਦ ਹੋ ਗਈ ਤੇ ਵਾਹਨਾਂ ਦੀਆਂ ਲਾਈਨਾਂ ਲੱਗ ਗਈਆਂ। ਬਾਅਦ 'ਚ ਐੱਨਆਈਟੀ ਥਾਣਾ ਪੁਲਿਸ ਆਈ। ਟਰੱਕ ਦੇ ਟਾਇਰਾਂ ਦੀ ਹਵਾ ਕੱਢੀ ਗਈ, ਤਦ ਜਾ ਕੇ ਟਰੱਕ ਬਾਹਰ ਨਿਕਲ ਸਕਿਆ।

ਗੂਗਲ ਮੈਪ ਦੀ ਲਈ ਸੀ ਮਦਦ

ਟਰੱਕ ਦੇ ਡਰਾਈਵਰ ਨੇ ਪੁਲਿਸ ਨੂੰ ਦੱਸਿਆ ਕਿ ਉਹ ਪਹਿਲੀ ਵਾਰ ਇਸ ਰਸਤੇ ਤੋਂ ਆਇਆ ਹੈ। ਉਸਨੂੰ ਜਾਣਕਾਰੀ ਨਹੀਂ ਸੀ। ਇਸ ਲਈ ਉਸਨੇ ਗੂਗਲ ਮੈਪ ਦੀ ਮਦਦ ਲਈ। ਗੂਗਲ ਮੈਪ ਨੇ ਅੰਡਰਪਾਸ ਰਾਹੀਂ ਦਿੱਲੀ ਜਾਣ ਦਾ ਰਸਤਾ ਦਿਖਾਇਆ ਤਾਂ ਉਹ ਇੱਥੋਂ ਜਾਣ ਲੱਗਾ। ਪੁਲਿਸ ਮੁਲਾਜ਼ਮ ਸੰਜੇ ਨੇ ਦੱਸਿਆ ਕਿ ਇਸ ਤੋਂ ਪਹਿਲਾਂ ਵੀ ਕਈ ਵਾਰ ਵੱਡੇ ਵਾਹਨ ਅੰਡਰਪਾਸ 'ਚ ਫਸ ਚੁੱਕੇ ਹਨ। ਇਸ ਲਈ ਗੂਗਲ ਮੈਪ ਦੇ ਨਾਲ-ਨਾਲ ਰਸਤਿਆਂ ਬਾਰੇ ਖ਼ੁਦ ਵੀ ਪਤਾ ਕਰ ਲੈਣਾ ਚਾਹੀਦਾ ਹੈ।