ਦਾਊਦ ਦਾ ਕਰੀਬੀ ਤੇ ਡਰੱਗ ਸਰਗਨਾ ਸਲੀਮ ਡੋਲਾ ਭਾਰਤ ਡਿਪੋਰਟ; ਤੁਰਕੀ ਤੋਂ ਦਿੱਲੀ ਲਿਆਂਦਾ, ਏਜੰਸੀਆਂ ਕਰ ਰਹੀਆਂ ਪੁੱਛਗਿੱਛ

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਅੰਡਰਵਰਲਡ ਡਾਨ ਦਾਊਦ ਇਬਰਾਹਿਮ ਦੇ ਬੇਹੱਦ ਕਰੀਬੀ ਅਤੇ ਨਸ਼ਾ ਤਸਕਰੀ ਦੇ ਸਰਗਨਾ ਸਲੀਮ ਡੋਲਾ ਨੂੰ ਭਾਰਤ ਡਿਪੋਰਟ ਕਰ ਦਿੱਤਾ ਗਿਆ ਹੈ। ਉਸ ਨੂੰ ਤੁਰਕੀ ਦੇ ਇਸਤਾਂਬੁਲ ਵਿੱਚ ਹਿਰਾਸਤ ਵਿੱਚ ਲਿਆ ਗਿਆ ਸੀ। ਡੋਲਾ ਨੂੰ ਇੱਕ ਵਿਸ਼ੇਸ਼ ਜਹਾਜ਼ ਰਾਹੀਂ ਭਾਰਤ ਲਿਆਂਦਾ ਗਿਆ।

ਭਾਰਤੀ ਖੁਫ਼ੀਆ ਏਜੰਸੀਆਂ ਨੇ ਅੰਤਰਰਾਸ਼ਟਰੀ ਏਜੰਸੀਆਂ ਨਾਲ ਮਿਲ ਕੇ ਉਸ ਦੇ extradition ਦੀ ਪ੍ਰਕਿਰਿਆ ਵਿੱਚ ਅਹਿਮ ਭੂਮਿਕਾ ਨਿਭਾਈ। ਮੰਗਲਵਾਰ ਨੂੰ ਦਿੱਲੀ ਦੇ ਇੱਕ ਤਕਨੀਕੀ ਹਵਾਈ ਅੱਡੇ 'ਤੇ ਸਲੀਮ ਡੋਲਾ ਨੂੰ ਲੈ ਕੇ ਜਹਾਜ਼ ਲੈਂਡ ਹੋਇਆ।

ਖੁਫ਼ੀਆ ਅਧਿਕਾਰੀ ਕਰ ਰਹੇ ਹਨ ਪੁੱਛਗਿੱਛ

ਨਿਊਜ਼ ਏਜੰਸੀ ਏਐਨਆਈ (ANI) ਮੁਤਾਬਕ, ਸਲੀਮ ਡੋਲਾ ਤੋਂ ਖੁਫ਼ੀਆ ਅਧਿਕਾਰੀ ਪੁੱਛਗਿੱਛ ਕਰ ਰਹੇ ਹਨ, ਬਾਅਦ ਵਿੱਚ ਅਗਲੇਰੀ ਪੁੱਛਗਿੱਛ ਲਈ ਉਸ ਨੂੰ ਮੁੰਬਈ ਪੁਲਿਸ ਦੇ ਹਵਾਲੇ ਕਰ ਦਿੱਤਾ ਜਾਵੇਗਾ। ਡੋਲਾ ਨੂੰ ਤੁਰਕੀ ਦੀ ਰਾਸ਼ਟਰੀ ਖੁਫ਼ੀਆ ਏਜੰਸੀ (MIT) ਅਤੇ ਸਥਾਨਕ ਪੁਲਿਸ ਦੀ ਇੱਕ ਸਾਂਝੀ ਕਾਰਵਾਈ ਵਿੱਚ ਹਿਰਾਸਤ ਵਿੱਚ ਲਿਆ ਗਿਆ ਸੀ।

ਇਹ ਕਾਰਵਾਈ ਇੰਟਰਪੋਲ ਦੇ 'ਰੇਡ ਕਾਰਨਰ ਨੋਟਿਸ' ਤੋਂ ਬਾਅਦ ਕੀਤੀ ਗਈ ਸੀ। ਡੋਲਾ ਨਸ਼ਿਆਂ ਦੇ ਇੱਕ ਵੱਡੇ ਮਾਮਲੇ ਵਿੱਚ ਮੁੱਖ ਮੁਲਜ਼ਮ ਹੈ ਅਤੇ ਮੁੰਬਈ ਦੀ ਕ੍ਰਾਈਮ ਬ੍ਰਾਂਚ ਇਸ ਦੀ ਜਾਂਚ ਕਰ ਰਹੀ ਹੈ। ਡੋਲਾ ਕੋਲ ਸੰਯੁਕਤ ਅਰਬ ਅਮੀਰਾਤ (UAE) ਦਾ ਪਾਸਪੋਰਟ ਹੈ।

ਜਾਂਚਕਰਤਾਵਾਂ ਦਾ ਕਹਿਣਾ ਹੈ ਕਿ 2018 ਵਿੱਚ ਜ਼ਮਾਨਤ ਮਿਲਣ ਤੋਂ ਬਾਅਦ ਉਹ ਕਥਿਤ ਤੌਰ 'ਤੇ UAE ਭੱਜ ਗਿਆ ਸੀ ਅਤੇ ਉੱਥੇ ਉਸ ਨੇ ਕਿਸੇ ਦੂਜੇ ਨਾਮ 'ਤੇ ਪਾਸਪੋਰਟ ਬਣਵਾ ਲਿਆ ਸੀ। ਇਸ ਤੋਂ ਬਾਅਦ ਉਹ UAE ਤੋਂ ਹੀ ਆਪਣਾ ਗਿਰੋਹ ਚਲਾ ਰਿਹਾ ਸੀ। ਬਾਅਦ ਵਿੱਚ ਉਹ ਤੁਰਕੀ ਚਲਾ ਗਿਆ ਸੀ।

ਕੌਣ ਹੈ ਸਲੀਮ ਡੋਲਾ?

ਸਲੀਮ ਡੋਲਾ ਦਾ ਜਨਮ 1966 ਵਿੱਚ ਮੁੰਬਈ ਵਿੱਚ ਹੋਇਆ ਸੀ। ਉਹ ਬਹੁਤ ਛੋਟੀ ਉਮਰ ਵਿੱਚ ਹੀ ਅੰਡਰਵਰਲਡ ਦੇ ਕਰੀਬ ਆ ਗਿਆ ਸੀ। ਉਸ ਨੇ ਦਾਊਦ ਦੇ ਖ਼ਾਸ ਗੁਰਗੇ ਛੋਟਾ ਸ਼ਕੀਲ ਦੇ ਨਾਲ ਮਿਲ ਕੇ ਕੰਮ ਕੀਤਾ। ਉਸ ਨੇ ਗੁਟਖਾ ਦੀ ਸਪਲਾਈ ਨਾਲ ਆਪਣਾ ਧੰਦਾ ਸ਼ੁਰੂ ਕੀਤਾ, ਜਿਸ ਤੋਂ ਬਾਅਦ ਉਸ ਨੇ ਗਾਂਜੇ ਦੀ ਤਸਕਰੀ ਸ਼ੁਰੂ ਕਰ ਦਿੱਤੀ।

2012 ਵਿੱਚ ਨਾਰਕੋਟਿਕਸ ਕੰਟਰੋਲ ਬਿਊਰੋ (NCB) ਨੇ ਉਸ ਨੂੰ ਗ੍ਰਿਫ਼ਤਾਰ ਕਰ ਲਿਆ ਸੀ। ਪੰਜ ਸਾਲ ਜੇਲ੍ਹ ਵਿੱਚ ਬਿਤਾਉਣ ਤੋਂ ਬਾਅਦ ਉਸ ਨੂੰ ਰਿਹਾਅ ਕਰ ਦਿੱਤਾ ਗਿਆ। ਰਿਹਾਈ ਤੋਂ ਬਾਅਦ ਉਸ ਨੇ ਸਿੰਥੈਟਿਕ ਡਰੱਗਜ਼ ਬਣਾਉਣ ਦੀ ਯੂਨਿਟ ਸਥਾਪਿਤ ਕੀਤੀ। 2018 ਵਿੱਚ ਉਸ ਨੂੰ ਮੁੰਬਈ ਵਿੱਚ ਫਿਰ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਹਾਲਾਂਕਿ, ਚਾਰ ਮਹੀਨਿਆਂ ਬਾਅਦ ਉਸ ਨੂੰ ਜ਼ਮਾਨਤ ਮਿਲ ਗਈ ਸੀ।