83 ਲੱਖ ਦੇ ਬੀਮਾ ਕਲੇਮ ਲਈ ਕਰੂਰਤਾ: ਮੌਤ ਤੋਂ ਬਾਅਦ ਲਾਸ਼ ਨੂੰ ਕਰੰਟ ਲਾ ਕੇ ਸਾੜੀਆਂ ਹੱਥਾਂ-ਪੈਰਾਂ ਦੀਆਂ ਉਂਗਲੀਆਂ

ਜਾਗਰਣ ਸੰਵਾਦਦਾਤਾ, ਉਦੈਪੁਰ : ਰਾਜਸਥਾਨ ਦੇ ਭੀਲਵਾੜਾ ਜ਼ਿਲ੍ਹੇ ’ਚ 83 ਲੱਖ ਦੇ ਬੀਮੇ ਲਈ ਇੱਕ ਨੌਜਵਾਨ ਦੀ ਲਾਸ਼ ਨੂੰ ਬਿਜਲੀ ਦਾ ਕਰੰਟ ਲਾ ਕੇ ਹਾਦਸਾ ਸਾਬਤ ਕਰਨ ਦੀ ਸਾਜ਼ਿਸ਼ ਸਾਹਮਣੇ ਆਈ ਹੈ। ਪੁਲਿਸ ਨੇ ਇਸ ਮਾਮਲੇ ’ਚ 4 ਲੋਕਾਂ ਨੂੰ ਹਿਰਾਸਤ ’ਚ ਲਿਆ ਹੈ। ਗਾਂਧੀਨਗਰ ਥਾਣਾ ਇੰਚਾਰਜ ਪੁਸ਼ਪਾ ਕਾਸੋਟੀਆ ਨੇ ਦੱਸਿਆ ਕਿ 7 ਮਈ ਦੀ ਰਾਤ ਨੂੰ ਮੰਡਲ ਥਾਣੇ ਤੋਂ ਇਕ ਸ਼ੱਕੀ ਲਾਸ਼ ਹਸਪਤਾਲ ਲਿਜਾਣ ਦੀ ਸੂਚਨਾ ਮਿਲੀ ਸੀ। ਮ੍ਰਿਤਕ ਦੀਪਕ ਦੀ ਮਾਂ ਚੰਪਾ ਬੇਨ ਨੇ ਦੱਸਿਆ ਕਿ ਕੁਝ ਲੋਕ ਉਸ ਦੇ ਲੜਕੇ ਨੂੰ ਇਲਾਜ ਦੇ ਬਹਾਨੇ ਗੁਜਰਾਤ ਤੋਂ ਰਾਜਸਥਾਨ ਲੈ ਕੇ ਆਏ ਸਨ। ਰਾਤ ਨੂੰ ਦੀਪਕ ਦੀ ਮੌਤ ਹੋ ਗਈ। ਔਰਤ ਨੇ ਦੋਸ਼ ਲਾਇਆ ਕਿ ਉਸ ਦੇ ਨਾਲ ਆਏ ਲੋਕਾਂ ਨੇ ਮੌਤ ਨੂੰ ਹਾਦਸਾ ਦਰਸਾਉਣ ਲਈ ਸਰੀਰ ਦੇ ਪੈਰ ਦੇ ਅੰਗੂਠੇ ਤੇ ਉਂਗਲ ਨੂੰ ਸਾੜ ਦਿੱਤਾ ਤੇ ਹਸਪਤਾਲ ਨੂੰ ਦੱਸਿਆ ਕਿ ਮੌਤ ਖੇਤਾਂ ’ਚ ਕੰਮ ਕਰਦੇ ਸਮੇਂ ਕਰੰਟ ਲੱਗਣ ਕਾਰਨ ਹੋਈ ਹੈ।

ਡਾ. ਰੋਹਿਤ ਸਹਿਰਾਵਤ ਨੇ ਦੱਸਿਆ ਕਿ ਸਰੀਰ ’ਤੇ ਕਰੰਟ ਲੱਗਣ ਦੇ ਸਾਧਾਰਨ ਨਿਸ਼ਾਨ ਨਹੀਂ ਸਨ, ਜਦਕਿ ਛਾਤੀ ’ਤੇ ਈਸੀਜੀ ਇਲੈਕਟ੍ਰੋਡ ਦੇ ਨਿਸ਼ਾਨ ਸਨ | ਇਸ ਤੋਂ ਬਾਅਦ ਪੁਲਿਸ ਨੂੰ ਸੂਚਨਾ ਦਿੱਤੀ ਗਈ। ਮ੍ਰਿਤਕ ਦੇ 14 ਸਾਲਾ ਪੁੱਤਰ ਨੇ ਪੁਲਿਸ ਨੂੰ ਚਾਰ ਮੁਲਜ਼ਮਾਂ ਦੇ ਨਾਂ ਦੱਸੇ। ਮੋਬਾਈਲ ਲੋਕੇਸ਼ਨ ਦੇ ਆਧਾਰ ’ਤੇ ਪੁਲਿਸ ਨੇ ਗੰਗਰਾਰ ਟੋਲ ਨਾਕੇ ’ਤੇ ਨਾਕਾਬੰਦੀ ਕਰ ਕੇ ਚਾਰਾਂ ਨੂੰ ਹਿਰਾਸਤ ’ਚ ਲੈ ਲਿਆ।

ਅਜਿਹੇ ਲੋਕਾਂ ਨੂੰ ਬਣਾਉਂਦੇ ਸਨ ਨਿਸ਼ਾਨਾ

ਮ੍ਰਿਤਕ ਦੇ ਬੇਟੇ ਨੇ ਦੱਸਿਆ ਕਿ ਪਹਿਲਾਂ ਉਸ ਦੇ ਪਿਤਾ ਨੂੰ ਅਹਿਮਦਾਬਾਦ ਦੇ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਸ ਦੀ ਹਾਲਤ ਗੰਭੀਰ ਦੱਸੀ। ਇਸ ਤੋਂ ਬਾਅਦ ਮੁਲਜ਼ਮਾਂ ਨੇ ਦੱਸਿਆ ਕਿ ਬਿਮਾਰੀ ਕਾਰਨ ਮੌਤ ਹੋਣ ਦੀ ਬਜਾਏ ਜੇਕਰ ਉਹ ਇਸ ਨੂੰ ਮੌਜੂਦਾ ਹਾਦਸਾ ਕਰਾਰ ਦਿੰਦੇ ਹਨ ਤਾਂ ਉਨ੍ਹਾਂ ਨੂੰ ਬੀਮੇ ਦੀ ਰਕਮ ਮਿਲੇਗੀ। ਉਸ ਨੇ ਦੋਸ਼ ਲਾਇਆ ਕਿ ਉਸ ਦੇ ਪਿਤਾ ਦੇ ਹੱਥ, ਪੇਟ ਤੇ ਉਂਗਲਾਂ ਸੜ ਗਈਆਂ ਸਨ ਤੇ ਸਰੀਰ ’ਚੋਂ ਖੂਨ ਕੱਢਣ ਦੀ ਕੋਸ਼ਿਸ਼ ਵੀ ਕੀਤੀ ਗਈ ਸੀ। ਮੁਲਜ਼ਮ ਸ਼ਰਾਬ ਦੇ ਆਦੀ, ਗੰਭੀਰ ਬੀਮਾਰੀ ਤੋਂ ਪੀੜਤ ਜਾਂ ਆਰਥਿਕ ਤੌਰ ’ਤੇ ਕਮਜ਼ੋਰ ਲੋਕਾਂ ਨੂੰ ਆਪਣਾ ਨਿਸ਼ਾਨਾ ਬਣਾਉਂਦੇ ਸਨ। ਉਨ੍ਹਾਂ ਨੂੰ ਹਰ ਮਹੀਨੇ ਸ਼ਰਾਬ ਦੇ ਪੈਸੇ ਦਿੱਤੇ ਜਾਂਦੇ ਸਨ ਤੇ ਬੀਮੇ ਦਾ ਪ੍ਰੀਮੀਅਮ ਵੀ ਮੁਲਜ਼ਮਾਂ ਵੱਲੋਂ ਅਦਾ ਕੀਤਾ ਜਾਂਦਾ ਸੀ। ਡਾਕਟਰਾਂ ਵੱਲੋਂ ਮਰੀਜ਼ ਦੇ ਜ਼ਿਆਦਾ ਦਿਨ ਜਿਊਂਦਾ ਨਾ ਰਹਿਣ ਦੀ ਜਾਣਕਾਰੀ ਮਿਲਣ ਉਪਰੰਤ ਇਹ ਗਿਰੋਹ ਸਰਗਰਮ ਹੋ ਜਾਂਦਾ ਸੀ।

83 ਲੱਖ ਰੁਪਏ ਦੇ ਚਾਰ ਬੀਮੇ

ਰਿਸ਼ਤੇਦਾਰਾਂ ਮੁਤਾਬਕ ਦੀਪਕ ਦੇ ਨਾਂ ’ਤੇ ਕਰੀਬ 83 ਲੱਖ ਰੁਪਏ ਦੀਆਂ 4 ਬੀਮਾ ਪਾਲਿਸੀਆਂ ਬਣੀਆਂ ਹੋਈਆਂ ਸਨ। ਇਸ ਤੋਂ ਪਹਿਲਾਂ ਵੀ ਇਕ ਵਾਰ ਬੀਮਾ ਕਰਵਾਇਆ ਗਿਆ ਸੀ ਪਰ ਮਿਆਦ ਦੌਰਾਨ ਉਸ ਦੀ ਮੌਤ ਨਹੀਂ ਹੋਈ। ਕਰੀਬ ਦੋ ਮਹੀਨੇ ਪਹਿਲਾਂ ਨਵਾਂ ਬੀਮਾ ਦੁਬਾਰਾ ਕੀਤਾ ਗਿਆ ਸੀ। ਪੁਲਿਸ ਪੋਸਟਮਾਰਟਮ ਰਿਪੋਰਟ, ਕਾਲ ਡਿਟੇਲ ਤੇ ਬੀਮਾ ਦਸਤਾਵੇਜ਼ਾਂ ਦੀ ਜਾਂਚ ਕਰ ਰਹੀ ਹੈ। ਮੁੱਢਲੀ ਜਾਂਚ ’ਚ ਇੰਸ਼ੋਰੈਂਸ ਏਜੰਟਾਂ, ਸਰਵੇਅਰਾਂ ਤੇ ਹੋਰਾਂ ਦੀ ਮਿਲੀਭੁਗਤ ਨਾਲ ਵੱਡੇ ਗਿਰੋਹ ਦੇ ਹੋਣ ਦਾ ਖ਼ਦਸ਼ਾ ਪ੍ਰਗਟ ਕੀਤਾ ਗਿਆ ਹੈ।