ਅਗਨੀਪਥ ਸਕੀਮ : ਇਸ ਸਾਲ ਭਰਤੀ 'ਚ ਦੋ ਸਾਲ ਦੀ ਛੋਟ, ਸਰਕਾਰ ਨੇ ਉਮਰ ਹੱਦ 21 ਤੋਂ ਵਧਾ ਕੇ 23 ਸਾਲ ਕੀਤੀ

ਜੇਐੱਨਐੱਨ, ਨਵੀਂ ਦਿੱਲੀ : ਫੌਜ ਵਿਚ ਚਾਰ ਸਾਲ ਦੀ ਥੋੜ੍ਹੇ ਸਮੇਂ ਦੀ ਸੇਵਾ ਦੇ ਮੱਦੇਨਜ਼ਰ ਕੇਂਦਰ ਸਰਕਾਰ ਦੀ ਅਗਨੀਪਥ ਯੋਜਨਾ ਖਿਲਾਫ ਅੱਜ ਦੇਸ਼ ਦੇ ਕਈ ਹਿੱਸਿਆਂ ਵਿਚ ਭਾਰੀ ਵਿਰੋਧ ਪ੍ਰਦਰਸ਼ਨ ਹੋਏ । ਦਰਅਸਲ, ਵਿਦਿਆਰਥੀ ਇਸ ਸਕੀਮ ਤਹਿਤ ਪੈਨਸ਼ਨ ਖਤਮ ਕਰਨ ਦਾ ਵਿਰੋਧ ਕਰ ਰਹੇ ਹਨ । ਇਸ ਤੋਂ ਇਲਾਵਾ ਵਿਦਿਆਰਥੀ ਇਸ ਗੱਲ ਦਾ ਵੀ ਵਿਰੋਧ ਕਰ ਰਹੇ ਹਨ ਕਿ ਅਗਨੀਵੀਰਾਂ ਦੀ ਵੱਧ ਤੋਂ ਵੱਧ ਉਮਰ ਸੀਮਾ ਸਿਰਫ਼ 21 ਸਾਲ ਹੈ । ਹੁਣ ਰੱਖਿਆ ਮੰਤਰਾਲੇ ਨੇ ਫੈਸਲਾ ਕੀਤਾ ਹੈ ਕਿ ਇਸ ਸਾਲ ਭਰਤੀ ਪ੍ਰਕਿਰਿਆ ਵਿਚ ਦੋ ਸਾਲ ਦੀ ਇਕ ਵਾਰ ਦੀ ਛੋਟ ਦਿੱਤੀ ਜਾਵੇਗੀ । ਯਾਨੀ ਉਮੀਦਵਾਰ ਇਸ ਸਾਲ 23 ਸਾਲ ਦੀ ਉਮਰ ਤਕ ਫਾਰਮ ਭਰ ਸਕਣਗੇ। ਕਿਉਂਕਿ ਦੋ ਸਾਲਾਂ ਤੋਂ ਫੌਜ ਵਿਚ ਕੋਈ ਭਰਤੀ ਨਹੀਂ ਹੋਈ ਹੈ, ਇਸ ਲਈ 2022 ਲਈ ਪ੍ਰਸਤਾਵਿਤ ਭਰਤੀ ਵਿਚ ਦੋ ਸਾਲ ਦੀ ਇਕ ਵਾਰ ਦੀ ਛੋਟ ਦਿੱਤੀ ਗਈ ਹੈ।

2 ਸਾਲ ਤਕ ਇਕਮੁਸ਼ਤ ਛੋਟ

ਇਸ ਤਰ੍ਹਾਂ, 23 ਸਾਲ ਤਕ ਦੇ ਨੌਜਵਾਨ ਅਗਨੀਪਥ ਭਰਤੀ ਪ੍ਰਕਿਰਿਆ 2022 ਲਈ ਅਰਜ਼ੀ ਦੇ ਸਕਦੇ ਹਨ। ਹਾਲਾਂਕਿ ਅਗਨੀਪਥ ਸਕੀਮ ਤਹਿਤ ਸਿਰਫ ਸਾਢੇ 17 ਸਾਲ ਤੋਂ 21 ਸਾਲ ਤਕ ਦੇ ਨੌਜਵਾਨ ਹੀ ਅਪਲਾਈ ਕਰਨ ਦੇ ਯੋਗ ਹਨ ਪਰ ਇਸ ਸਾਲ 23 ਸਾਲ ਤਕ ਦੇ ਨੌਜਵਾਨ ਇਸ ਲਈ ਅਪਲਾਈ ਕਰ ਸਕਦੇ ਹਨ। ਉਨ੍ਹਾਂ ਨੂੰ ਦੋ ਸਾਲ ਦੀ ਇਕ ਵਾਰ ਦੀ ਛੋਟ ਦਿੱਤੀ ਗਈ ਹੈ। ਅਗਨੀਪਥ ਯੋਜਨਾ ਦੀ ਸ਼ੁਰੂਆਤੀ ਪ੍ਰਕਿਰਿਆ ਦੌਰਾਨ ਹਥਿਆਰਬੰਦ ਬਲਾਂ ਵਿਚ ਸਾਰੇ ਨਵੇਂ ਭਰਤੀ ਹੋਣ ਵਾਲਿਆਂ ਲਈ ਦਾਖਲੇ ਦੀ ਉਮਰ 17 ਤੋਂ 21 ਸਾਲ ਨਿਰਧਾਰਤ ਕੀਤੀ ਗਈ ਹੈ ਪਰ ਇਸ ਸਾਲ 23 ਸਾਲ ਤਕ ਦੇ ਨੌਜਵਾਨ ਦੋ ਸਾਲ ਦੀ ਇਕ ਵਾਰ ਦੀ ਛੋਟ ਦੇ ਨਾਲ ਫਾਰਮ ਭਰ ਸਕਣਗੇ।

4 ਸਾਲ ਬਾਅਦ ਸਰਕਾਰ ਦੇਵੇਗੀ ਬਿਹਤਰ ਬਦਲ

ਧਿਆਨ ਯੋਗ ਹੈ ਕਿ ਸਰਕਾਰ ਨੇ ਹੁਣ ਫੌਜ ਵਿਚ ਭਰਤੀ ਲਈ ਚਾਰ ਸਾਲ ਦੀ ਛੋਟੀ ਮਿਆਦ ਦੀ ਨੌਕਰੀ ਦੀ ਪ੍ਰਕਿਰਿਆ ਸ਼ੁਰੂ ਕੀਤੀ ਹੈ। ਇਸ ਤਹਿਤ ਇਸ ਸਾਲ 46 ਹਜ਼ਾਰ ਸਿਪਾਹੀਆਂ ਦੀ ਭਰਤੀ ਕੀਤੀ ਜਾਵੇਗੀ। ਇਸ ਚਾਰ ਸਾਲ ਦੇ ਸਮੇਂ ਦੌਰਾਨ ਛੇ ਮਹੀਨੇ ਦੀ ਸਿਖਲਾਈ ਦਿੱਤੀ ਜਾਵੇਗੀ। 4 ਸਾਲਾਂ ਬਾਅਦ, ਕੁਝ ਭਰਤੀ ਹੋਣ ਵਾਲਿਆਂ ਨੂੰ ਫੌਜ ਵਿਚ ਸਥਾਈ ਅਸਾਮੀ ਮਿਲੇਗੀ, ਜਦੋਂ ਕਿ ਜ਼ਿਆਦਾਤਰ ਫੌਜ ਵਿਚ ਆਪਣੀ ਸੇਵਾ ਖਤਮ ਕਰ ਦੇਣਗੇ। ਜਿਨ੍ਹਾਂ ਦੀ ਸੇਵਾ ਖਤਮ ਹੋ ਜਾਵੇਗੀ, ਉਨ੍ਹਾਂ ਨੂੰ ਸਰਕਾਰ ਨੇ ਕਈ ਤਰ੍ਹਾਂ ਦੇ ਮੌਕਿਆਂ 'ਚ ਰਿਆਇਤ ਦੇਣ ਦਾ ਐਲਾਨ ਕੀਤਾ ਹੈ।