ਪਾਰਟਨਰ ਤੋਂ ਇਹ 5 ਗੱਲਾਂ ਲੁਕਾਉਣ 'ਚ ਕੋਈ ਬੁਰਾਈ ਨਹੀਂ, ਆਪਣੇ ਤਕ ਹੀ ਰੱਖੋਗੇ ਤਾਂ ਬਿਹਤਰ ਚੱਲੇਗਾ ਰਿਸ਼ਤਾ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ : ਅਕਸਰ ਕਿਹਾ ਜਾਂਦਾ ਹੈ ਕਿ ਕਿਸੇ ਵੀ ਰਿਸ਼ਤੇ ਦੀ ਨੀਂਹ 'ਈਮਾਨਦਾਰੀ' 'ਤੇ ਟਿਕੀ ਹੁੰਦੀ ਹੈ। ਪਾਰਟਨਰ ਤੋਂ ਕੁਝ ਵੀ ਛੁਪਾਉਣਾ ਨਹੀਂ ਚਾਹੀਦਾ, ਸਭ ਕੁਝ 'ਪਾਰਦਰਸ਼ੀ' ਹੋਣਾ ਚਾਹੀਦਾ ਹੈ, ਪਰ ਕੀ ਸੱਚਮੁੱਚ ਅਜਿਹਾ ਹੈ?

ਦੱਸ ਦੇਈਏ ਕਿ ਹਰ ਛੋਟੀ-ਵੱਡੀ ਗੱਲ ਪਾਰਟਨਰ ਨੂੰ ਦੱਸਣਾ ਹਮੇਸ਼ਾ ਸਹੀ ਨਹੀਂ ਹੁੰਦਾ। ਕਦੇ-ਕਦੇ 'ਸਮਾਰਟ' ਬਣ ਕੇ ਕੁਝ ਗੱਲਾਂ ਆਪਣੇ ਤਕ ਰੱਖਣ ਵਿਚ ਹੀ ਰਿਸ਼ਤੇ ਦੀ ਭਲਾਈ ਹੁੰਦੀ ਹੈ। ਜੀ ਹਾਂ, ਇਸ ਨੂੰ ਝੂਠ ਬੋਲਣਾ ਨਹੀਂ, ਸਗੋਂ ਰਿਸ਼ਤੇ ਵਿਚ 'ਸ਼ਾਂਤੀ' ਬਣਾਈ ਰੱਖਣਾ ਕਹਿੰਦੇ ਹਨ। ਆਓ ਜਾਣਦੇ ਹਾਂ ਅਜਿਹੀਆਂ 5 ਗੱਲਾਂ ਜੋ ਜੇਕਰ ਤੁਸੀਂ ਆਪਣੇ ਪਾਰਟਨਰ ਨੂੰ ਨਾ ਵੀ ਦੱਸੋ, ਤਾਂ ਕੋਈ ਬੁਰਾਈ ਨਹੀਂ ਹੈ।

1. ਐਕਸ (Ex) ਦੀਆਂ ਗੱਲਾਂ

ਆਪਣੇ ਅਤੀਤ ਬਾਰੇ ਪਾਰਟਨਰ ਨੂੰ ਦੱਸਣਾ ਠੀਕ ਹੈ, ਪਰ ਹਰ ਛੋਟੀ ਡਿਟੇਲ ਸਾਂਝੀ ਕਰਨਾ ਮੁਸੀਬਤ ਖੜ੍ਹੀ ਕਰ ਸਕਦਾ ਹੈ। ਖਾਸ ਤੌਰ 'ਤੇ ਆਪਣੇ 'ਐਕਸ-ਪਾਰਟਨਰ' ਦੀ ਤਾਰੀਫ਼ ਕਰਨਾ ਜਾਂ ਉਨ੍ਹਾਂ ਨਾਲ ਬਿਤਾਏ ਨਿੱਜੀ ਪਲਾਂ ਦਾ ਜ਼ਿਕਰ ਕਰਨਾ। ਇਸ ਨਾਲ ਤੁਹਾਡੇ ਮੌਜੂਦਾ ਪਾਰਟਨਰ ਦੇ ਮਨ ਵਿਚ ਬੇਵਜ੍ਹਾ ਜਲਣ ਅਤੇ ਤੁਲਨਾ ਦੀ ਭਾਵਨਾ ਆ ਸਕਦੀ ਹੈ। ਅਤੀਤ ਨੂੰ ਪਿੱਛੇ ਛੱਡੋ ਅਤੇ ਵਰਤਮਾਨ 'ਤੇ ਧਿਆਨ ਦਿਉ।

2. ਆਪਣਿਆਂ ਦੀ ਬੁਰਾਈ

ਹੋ ਸਕਦਾ ਹੈ ਕਿ ਤੁਹਾਨੂੰ ਆਪਣੇ ਪਾਰਟਨਰ ਦਾ ਕੋਈ ਦੋਸਤ ਜਾਂ ਉਨ੍ਹਾਂ ਦੇ ਪਰਿਵਾਰ ਦਾ ਕੋਈ ਮੈਂਬਰ ਬਿਲਕੁਲ ਪਸੰਦ ਨਾ ਹੋਵੇ। ਪਰ ਇਹ ਗੱਲ ਚੀਕ-ਚੀਕ ਕੇ ਦੱਸਣ ਦੀ ਲੋੜ ਨਹੀਂ ਹੈ। ਜੇਕਰ ਤੁਸੀਂ ਸਿੱਧਾ ਕਹੋਗੇ ਕਿ "ਤੁਹਾਡੀ ਮਾਂ ਬਹੁਤ ਦਖਲ ਦਿੰਦੀ ਹੈ" ਜਾਂ "ਤੁਹਾਡਾ ਦੋਸਤ ਬਹੁਤ ਅਜੀਬ ਹੈ", ਤਾਂ ਪਾਰਟਨਰ ਨੂੰ ਬੁਰਾ ਲੱਗੇਗਾ ਹੀ। ਇਸ ਨੂੰ 'ਡਿਪਲੋਮੇਸੀ' ਨਾਲ ਸੰਭਾਲੋ। ਜਦੋਂ ਤਕ ਗੱਲ ਬਹੁਤ ਵੱਡੀ ਨਾ ਹੋਵੇ, ਆਪਣੀ ਨਾਪਸੰਦਗੀ ਨੂੰ ਆਪਣੇ ਤਕ ਹੀ ਸੀਮਤ ਰੱਖੋ।

3. ਦੂਜਿਆਂ ਦੇ ਰਾਜ਼

ਜੇਕਰ ਤੁਹਾਡੀ ਬੈਸਟ ਫ੍ਰੈਂਡ ਜਾਂ ਕਿਸੇ ਦੋਸਤ ਨੇ ਤੁਹਾਡੇ 'ਤੇ ਭਰੋਸਾ ਕਰ ਕੇ ਆਪਣਾ ਕੋਈ ਰਾਜ਼ ਦੱਸਿਆ ਹੈ ਤਾਂ ਉਸ ਨੂੰ ਆਪਣੇ ਪਾਰਟਨਰ ਨੂੰ ਦੱਸਣਾ ਜ਼ਰੂਰੀ ਨਹੀਂ ਹੈ। ਕਈ ਲੋਕ ਸੋਚਦੇ ਹਨ ਕਿ "ਅਸੀਂ ਪਤੀ-ਪਤਨੀ ਜਾਂ ਕਪਲ ਹਾਂ, ਸਾਡੇ ਵਿਚਕਾਰ ਕੋਈ ਰਾਜ਼ ਨਹੀਂ," ਪਰ ਇਹ ਉਸ ਤੀਜੇ ਇਨਸਾਨ ਦੇ ਭਰੋਸੇ ਨੂੰ ਤੋੜਨ ਵਾਂਗ ਹੈ। ਆਪਣੇ ਦੋਸਤਾਂ ਦੀ ਪ੍ਰਾਈਵੇਸੀ ਦਾ ਸਤਿਕਾਰ ਕਰੋ।

4. ਪਸੰਦ-ਨਾਪਸੰਦ

ਜੇਕਰ ਤੁਹਾਡੇ ਪਾਰਟਨਰ ਨੇ ਬੜੇ ਪਿਆਰ ਨਾਲ ਤੁਹਾਡੇ ਲਈ ਕੋਈ ਤੋਹਫ਼ਾ (Gift) ਖਰੀਦਿਆ ਹੈ, ਪਰ ਉਹ ਤੁਹਾਨੂੰ ਬਿਲਕੁਲ ਪਸੰਦ ਨਹੀਂ ਆਇਆ ਤਾਂ ਇੱਥੇ ਪੂਰੀ ਤਰ੍ਹਾਂ ਈਮਾਨਦਾਰ ਹੋਣ ਦੀ ਲੋੜ ਨਹੀਂ ਹੈ। ਇਹ ਕਹਿਣਾ ਕਿ "ਇਹ ਰੰਗ ਮੈਨੂੰ ਪਸੰਦ ਨਹੀਂ" ਜਾਂ "ਇਹ ਤਾਂ ਬਹੁਤ ਸਸਤਾ ਲੱਗ ਰਿਹਾ ਹੈ", ਉਨ੍ਹਾਂ ਦਾ ਦਿਲ ਤੋੜ ਸਕਦਾ ਹੈ। ਕਦੇ-ਕਦੇ ਦਿਲ ਰੱਖਣਾ, ਸੱਚ ਬੋਲਣ ਨਾਲੋਂ ਜ਼ਿਆਦਾ ਜ਼ਰੂਰੀ ਹੁੰਦਾ ਹੈ।

5. ਸੋਸ਼ਲ ਮੀਡੀਆ ਦੇ ਪਾਸਵਰਡ

ਅੱਜ ਦੇ ਡਿਜੀਟਲ ਦੌਰ ਵਿੱਚ ਇਹ ਇੱਕ ਵੱਡਾ ਮੁੱਦਾ ਹੈ। ਕਈ ਜੋੜਿਆਂ ਨੂੰ ਲੱਗਦਾ ਹੈ ਕਿ ਇੱਕ-ਦੂਜੇ ਦਾ ਪਾਸਵਰਡ ਪਤਾ ਹੋਣਾ ਪਿਆਰ ਦਾ ਸਬੂਤ ਹੈ, ਪਰ ਸੱਚ ਤਾਂ ਇਹ ਹੈ ਕਿ ਹਰ ਇਨਸਾਨ ਨੂੰ ਥੋੜ੍ਹੀ 'ਪਰਸਨਲ ਸਪੇਸ' ਦੀ ਲੋੜ ਹੁੰਦੀ ਹੈ। ਆਪਣੇ ਫ਼ੋਨ ਜਾਂ ਸੋਸ਼ਲ ਮੀਡੀਆ ਦਾ ਪਾਸਵਰਡ ਆਪਣੇ ਤਕ ਰੱਖਣਾ ਕੋਈ ਗੁਨਾਹ ਨਹੀਂ ਹੈ। ਜਦੋਂ ਤੱਕ ਤੁਸੀਂ ਕੁਝ ਗਲਤ ਨਹੀਂ ਕਰ ਰਹੇ, ਉਦੋਂ ਤਕ ਆਪਣੀ ਪ੍ਰਾਈਵੇਸੀ ਬਣਾਈ ਰੱਖਣ ਵਿੱਚ ਕੋਈ ਬੁਰਾਈ ਨਹੀਂ।