ਕੀ ਤੁਹਾਨੂੰ ਵੀ ਹੈ ਹਰ ਗੱਲ 'ਤੇ ਸਫਾਈ ਦੇਣ ਦੀ ਆਦਤ? ਜਾਣੋ ਇਹ ਕਿਵੇਂ ਇਹ ਤੁਹਾਡੀ Personality ਨੂੰ ਕਰਦੀ ਕਮਜ਼ੋਰ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ: ਕੀ ਤੁਹਾਨੂੰ ਵੀ ਆਪਣੀ ਹਰ ਛੋਟੀ-ਵੱਡੀ ਗੱਲ ਲਈ ਦੂਜਿਆਂ ਨੂੰ ਸਫਾਈ ਦੇਣ ਦੀ ਆਦਤ ਹੈ? ਜੇਕਰ ਤੁਸੀਂ ਕੰਮ ਤੋਂ ਛੁੱਟੀ ਲੈਂਦੇ ਹੋ, ਕਿਸੇ ਰਿਸ਼ਤੇਦਾਰ ਦੇ ਘਰ ਜਾਣ ਤੋਂ ਮਨ੍ਹਾ ਕਰਦੇ ਹੋ ਜਾਂ ਆਪਣਾ ਕੋਈ ਨਿੱਜੀ ਫੈਸਲਾ ਲੈਂਦੇ ਹੋ, ਤਾਂ ਕੀ ਤੁਸੀਂ ਸਾਹਮਣੇ ਵਾਲੇ ਨੂੰ ਲੰਬੀਆਂ-ਚੌੜੀਆਂ ਵਜ੍ਹਾਵਾਂ ਗਿਣਾਉਣ ਲੱਗ ਪੈਂਦੇ ਹੋ? ਜੇਕਰ ਤੁਹਾਡਾ ਜਵਾਬ 'ਹਾਂ' ਹੈ, ਤਾਂ ਤੁਹਾਨੂੰ ਥੋੜ੍ਹਾ ਰੁਕ ਕੇ ਸੋਚਣ ਦੀ ਲੋੜ ਹੈ।

ਹਰ ਗੱਲ 'ਤੇ ਸਫਾਈ ਦੇਣਾ ਉੱਪਰੋਂ ਦੇਖਣ ਵਿਚ ਭਾਵੇਂ ਇਕ ਚੰਗੀ ਆਦਤ ਲੱਗੇ, ਪਰ ਅਸਲ ਵਿਚ ਇਹ ਤੁਹਾਡੀ ਸ਼ਖਸੀਅਤ ਨੂੰ ਹੌਲੀ-ਹੌਲੀ ਕਮਜ਼ੋਰ ਬਣਾ ਰਹੀ ਹੈ। ਆਓ ਜਾਣਦੇ ਹਾਂ ਕਿਵੇਂ:

1. ਆਤਮ-ਵਿਸ਼ਵਾਸ ਵਿੱਚ ਕਮੀ ਦੀ ਨਿਸ਼ਾਨੀ

ਲੋੜ ਤੋਂ ਵੱਧ ਸਫਾਈ ਦੇਣਾ ਸਿੱਧੇ ਤੌਰ 'ਤੇ ਤੁਹਾਡੇ ਕਮਜ਼ੋਰ ਆਤਮ-ਵਿਸ਼ਵਾਸ ਨੂੰ ਦਰਸਾਉਂਦਾ ਹੈ। ਜਦੋਂ ਤੁਸੀਂ ਆਪਣੇ ਹਰ ਫੈਸਲੇ ਦੇ ਪਿੱਛੇ ਦੇ ਕਾਰਨ ਦੱਸਣ ਲੱਗਦੇ ਹੋ, ਤਾਂ ਸਾਹਮਣੇ ਵਾਲੇ ਨੂੰ ਅਜਿਹਾ ਮਹਿਸੂਸ ਹੁੰਦਾ ਹੈ ਕਿ ਤੁਹਾਨੂੰ ਖੁਦ ਆਪਣੇ ਫੈਸਲੇ 'ਤੇ ਸ਼ੱਕ ਹੈ। ਇੱਕ ਮਜ਼ਬੂਤ ਅਤੇ ਆਤਮ-ਵਿਸ਼ਵਾਸੀ ਵਿਅਕਤੀ ਆਪਣੇ ਫੈਸਲਿਆਂ 'ਤੇ ਕਾਇਮ ਰਹਿੰਦਾ ਹੈ, ਉਸਨੂੰ ਇਹ ਸਾਬਤ ਕਰਨ ਦੀ ਲੋੜ ਨਹੀਂ ਹੁੰਦੀ ਕਿ ਉਹ ਸਹੀ ਹੈ।

2. ਦੂਜਿਆਂ ਨੂੰ ਹਾਵੀ ਹੋਣ ਦਾ ਮੌਕਾ ਦੇਣਾ

ਜਦੋਂ ਤੁਸੀਂ ਕਿਸੇ ਗੱਲ ਲਈ 'ਨਾਂ' ਕਹਿੰਦੇ ਹੋ ਅਤੇ ਨਾਲ ਹੀ ਚਾਰ ਵੱਖ-ਵੱਖ ਕਾਰਨ ਵੀ ਗਿਣਾ ਦਿੰਦੇ ਹੋ, ਤਾਂ ਤੁਸੀਂ ਅਣਜਾਣੇ ਵਿੱਚ ਸਾਹਮਣੇ ਵਾਲੇ ਨੂੰ ਬਹਿਸ ਕਰਨ ਦਾ ਮੌਕਾ ਦੇ ਦਿੰਦੇ ਹੋ। ਲੋਕ ਤੁਹਾਡੀ ਦਿੱਤੀ ਗਈ ਸਫਾਈ ਵਿੱਚੋਂ ਹੀ ਕੋਈ ਨਾ ਕੋਈ ਰਸਤਾ ਕੱਢ ਕੇ ਤੁਹਾਨੂੰ ਆਪਣੀ ਗੱਲ ਮਨਵਾਉਣ ਲਈ ਮਜ਼ਬੂਰ ਕਰ ਸਕਦੇ ਹਨ। ਇਸ ਦੀ ਬਜਾਏ, ਬਿਨਾਂ ਕਿਸੇ ਲੰਬੀ ਸਫਾਈ ਦੇ ਕਹਿਆ ਗਿਆ ਇੱਕ ਸਿੱਧਾ ਅਤੇ ਸਤਿਕਾਰਯੋਗ 'ਨਾਂ' ਜ਼ਿਆਦਾ ਪ੍ਰਭਾਵਸ਼ਾਲੀ ਹੁੰਦਾ ਹੈ।

3. ਤੁਹਾਡੀ ਕੋਈ ਗਲਤੀ ਨਹੀਂ ਹੈ

ਅਸੀਂ ਅਕਸਰ ਉਦੋਂ ਸਫਾਈ ਦਿੰਦੇ ਹਾਂ ਜਦੋਂ ਸਾਨੂੰ ਲੱਗਦਾ ਹੈ ਕਿ ਅਸੀਂ ਕੁਝ ਗਲਤ ਕੀਤਾ ਹੈ। ਪਰ ਆਪਣੀ ਜ਼ਿੰਦਗੀ ਨੂੰ ਆਪਣੇ ਤਰੀਕੇ ਨਾਲ ਜਿਊਣਾ, ਆਪਣੀਆਂ ਤਰਜੀਹਾਂ (Priorities) ਨੂੰ ਚੁਣਨਾ ਜਾਂ ਖੁਦ ਨੂੰ ਸਮਾਂ ਦੇਣਾ ਕੋਈ 'ਗਲਤੀ' ਨਹੀਂ ਹੈ। ਹਰ ਗੱਲ ਲਈ 'ਸੌਰੀ' ਬੋਲਣਾ ਜਾਂ ਸਫਾਈ ਪੇਸ਼ ਕਰਨਾ ਲੋਕਾਂ ਦੇ ਮਨ ਵਿੱਚ ਤੁਹਾਡੀ ਤਸਵੀਰ ਅਜਿਹੀ ਬਣਾ ਦਿੰਦਾ ਹੈ ਜਿਵੇਂ ਤੁਸੀਂ ਹਮੇਸ਼ਾ ਖੁਦ ਨੂੰ ਕਟਹਿਰੇ ਵਿੱਚ ਖੜ੍ਹਾ ਮਹਿਸੂਸ ਕਰਦੇ ਹੋ।

4. ਐਨਰਜੀ ਅਤੇ ਸਮੇਂ ਦੀ ਬਰਬਾਦੀ

ਸੱਚ ਤਾਂ ਇਹ ਹੈ ਕਿ ਜ਼ਿਆਦਾਤਰ ਲੋਕਾਂ ਨੂੰ ਤੁਹਾਡੀ ਸਫਾਈ ਨਾਲ ਕੋਈ ਖਾਸ ਮਤਲਬ ਨਹੀਂ ਹੁੰਦਾ, ਉਹਨਾਂ ਨੂੰ ਸਿਰਫ ਇਸ ਗੱਲ ਨਾਲ ਫਰਕ ਪੈਂਦਾ ਹੈ ਕਿ ਉਹਨਾਂ ਦਾ ਕੰਮ ਹੋਇਆ ਜਾਂ ਨਹੀਂ। ਹਰ ਕਿਸੇ ਨੂੰ ਆਪਣੇ ਫੈਸਲੇ ਦਾ ਕਾਰਨ ਸਮਝਾਉਣਾ ਸਿਰਫ ਤੁਹਾਡੇ ਦਿਮਾਗ ਨੂੰ ਥਕਾਉਂਦਾ ਹੈ। ਆਪਣੀ ਇਸ ਕੀਮਤੀ ਊਰਜਾ (Energy) ਨੂੰ ਖੁਦ ਨੂੰ ਸਹੀ ਸਾਬਤ ਕਰਨ ਦੀ ਬਜਾਏ, ਆਪਣੀ ਤਰੱਕੀ ਅਤੇ ਖੁਸ਼ੀ 'ਤੇ ਲਗਾਓ।

ਬਦਲਾਅ ਕਿਵੇਂ ਲਿਆਈਏ?

ਯਾਦ ਰੱਖੋ, ਤੁਹਾਡੀ ਜ਼ਿੰਦਗੀ ਅਤੇ ਤੁਹਾਡੇ ਫੈਸਲੇ ਤੁਹਾਡੇ ਆਪਣੇ ਹਨ। ਜਦੋਂ ਤੱਕ ਤੁਹਾਡੇ ਕਿਸੇ ਕੰਮ ਨਾਲ ਦੂਜਿਆਂ ਦਾ ਕੋਈ ਨੁਕਸਾਨ ਨਹੀਂ ਹੋ ਰਿਹਾ, ਉਦੋਂ ਤੱਕ ਤੁਹਾਨੂੰ ਕਿਸੇ ਨੂੰ ਕੋਈ ਸਫਾਈ ਦੇਣ ਦੀ ਲੋੜ ਨਹੀਂ ਹੈ। ਆਪਣੀ ਗੱਲ ਘੱਟ ਸ਼ਬਦਾਂ ਵਿੱਚ, ਸ਼ਾਂਤੀ ਨਾਲ ਅਤੇ ਪੂਰੇ ਆਤਮ-ਵਿਸ਼ਵਾਸ ਨਾਲ ਕਹਿਣਾ ਸਿੱਖੋ।