Holashtak 2026: ਹੋਲਾਸ਼ਟਕ ਤੋਂ ਇਲਾਵਾ ਖਰਮਾਸ, ਚਤੁਰਮਾਸ ਤੇ ਪਿੱਤਰ ਪੱਖ 'ਚ ਕਿਉਂ ਵਰਜਿਤ ਹਨ ਮੰਗਲਿਕ ਕੰਮ? ਜਾਣੋ ਵਜ੍ਹਾ

ਧਰਮ ਡੈਸਕ, ਨਵੀਂ ਦਿੱਲੀ: ਹੋਲੀ ਦਾ ਤਿਉਹਾਰ ਆਪਣੇ ਨਾਲ ਰੰਗ, ਉਮੰਗ ਅਤੇ ਢੇਰ ਸਾਰੀਆਂ ਖੁਸ਼ੀਆਂ ਲੈ ਕੇ ਆਉਂਦਾ ਹੈ, ਪਰ ਇਸ ਤਿਉਹਾਰ ਤੋਂ ਠੀਕ ਅੱਠ ਦਿਨ ਪਹਿਲਾਂ 'ਹੋਲਾਸ਼ਟਕ' ਲੱਗ ਜਾਂਦਾ ਹੈ। ਧਾਰਮਿਕ ਮਾਨਤਾਵਾਂ ਅਨੁਸਾਰ, ਇਹਨਾਂ 8 ਦਿਨਾਂ ਨੂੰ ਅਸ਼ੁਭ ਮੰਨਿਆ ਗਿਆ ਹੈ, ਕਿਉਂਕਿ ਇਸ ਦੌਰਾਨ ਨਵਗ੍ਰਹਿ ਉਗਰ (ਤੇਜ਼) ਅਵਸਥਾ ਵਿੱਚ ਹੁੰਦੇ ਹਨ। ਇਹੀ ਕਾਰਨ ਹੈ ਕਿ ਹੋਲਾਸ਼ਟਕ ਵਿੱਚ ਸ਼ਾਦੀ-ਵਿਆਹ, ਮੁੰਡਨ, ਮੰਗਣੀ, ਨਵਾਂ ਕਾਰੋਬਾਰ ਅਤੇ ਗ੍ਰਹਿ ਪ੍ਰਵੇਸ਼ ਵਰਗੇ ਮੰਗਲਿਕ ਕੰਮਾਂ ਦੀ ਸਖ਼ਤ ਮਨਾਹੀ ਹੁੰਦੀ ਹੈ।

ਪਰ, ਸਨਾਤਨ ਪਰੰਪਰਾ ਵਿੱਚ ਕੇਵਲ ਹੋਲਾਸ਼ਟਕ ਹੀ ਨਹੀਂ, ਸਗੋਂ ਕਈ ਹੋਰ ਸਮੇਂ ਵੀ ਅਜਿਹੇ ਹਨ, ਜਿਨ੍ਹਾਂ ਵਿੱਚ ਗ੍ਰਹਿਆਂ ਦੀ ਸਥਿਤੀ ਅਤੇ ਧਾਰਮਿਕ ਮਾਨਤਾਵਾਂ ਕਾਰਨ ਸ਼ੁਭ ਕੰਮ ਨਹੀਂ ਕੀਤੇ ਜਾਂਦੇ। ਆਓ ਉਨ੍ਹਾਂ ਬਾਰੇ ਜਾਣਦੇ ਹਾਂ -

ਖਰਮਾਸ

ਜਦੋਂ ਸੂਰਜ ਦੇਵਤਾ ਗੁਰੂ ਬ੍ਰਹਸਪਤੀ ਦੀ ਰਾਸ਼ੀ ਧਨੁ ਜਾਂ ਮੀਨ ਵਿੱਚ ਪ੍ਰਵੇਸ਼ ਕਰਦੇ ਹਨ, ਤਾਂ ਉਸ ਇੱਕ ਮਹੀਨੇ ਦੀ ਮਿਆਦ ਨੂੰ ਖਰਮਾਸ ਜਾਂ ਮਲਮਾਸ ਕਿਹਾ ਜਾਂਦਾ ਹੈ। ਸਾਲ ਵਿੱਚ ਦੋ ਵਾਰ ਖਰਮਾਸ ਲੱਗਦਾ ਹੈ। ਅਜਿਹੀ ਮਾਨਤਾ ਹੈ ਕਿ ਇਸ ਦੌਰਾਨ ਸੂਰਜ ਦੀ ਗਤੀ ਹੌਲੀ ਪੈ ਜਾਂਦੀ ਹੈ ਅਤੇ ਗੁਰੂ ਦਾ ਪ੍ਰਭਾਵ ਘੱਟ ਜਾਂਦਾ ਹੈ, ਇਸ ਲਈ ਵਿਆਹ, ਮੁੰਡਨ ਅਤੇ ਗ੍ਰਹਿ ਪ੍ਰਵੇਸ਼ ਵਰਗੇ ਸ਼ੁਭ ਕੰਮ ਰੋਕ ਦਿੱਤੇ ਜਾਂਦੇ ਹਨ।

ਚਤੁਰਮਾਸ

ਹਾੜ ਮਹੀਨੇ ਦੇ ਸ਼ੁਕਲ ਪੱਖ ਦੀ ਦੇਵਸ਼ੈਣੀ ਇਕਾਦਸ਼ੀ ਤੋਂ ਕੱਤਕ ਸ਼ੁਕਲ ਪੱਖ ਦੀ ਦੇਵਉਠਣੀ ਇਕਾਦਸ਼ੀ ਤੱਕ ਦੇ ਚਾਰ ਮਹੀਨਿਆਂ ਨੂੰ ਚਾਤੁਰਮਾਸ ਕਿਹਾ ਜਾਂਦਾ ਹੈ। ਧਾਰਮਿਕ ਮਾਨਤਾਵਾਂ ਅਨੁਸਾਰ, ਇਹਨਾਂ ਚਾਰ ਮਹੀਨਿਆਂ ਵਿੱਚ ਭਗਵਾਨ ਵਿਸ਼ਨੂੰ ਖੀਰ ਸਾਗਰ ਵਿੱਚ ਯੋਗ ਨਿਦਰਾ ਵਿੱਚ ਰਹਿੰਦੇ ਹਨ। ਜਗਤ ਦੇ ਪਾਲਣਹਾਰ ਦੇ ਯੋਗ ਨਿਦਰਾ ਵਿੱਚ ਹੋਣ ਕਾਰਨ ਇਸ ਦੌਰਾਨ ਵਿਆਹ, ਮੁੰਡਨ ਅਤੇ ਮੰਗਣੀ ਵਰਗੇ ਕੋਈ ਵੀ ਮੰਗਲਿਕ ਕੰਮ ਨਹੀਂ ਕੀਤੇ ਜਾਂਦੇ।

ਪਿੱਤਰ ਪੱਖ

ਭਾਦੋਂ ਦੀ ਪੂਰਨਮਾਸ਼ੀ ਤੋਂ ਲੈ ਕੇ ਅੱਸੂ ਦੀ ਮੱਸਿਆ ਤੱਕ ਦੇ 15 ਦਿਨਾਂ ਨੂੰ ਪਿੱਤਰ ਪੱਖ ਕਿਹਾ ਜਾਂਦਾ ਹੈ। ਇਹ ਸਮਾਂ ਪੂਰੀ ਤਰ੍ਹਾਂ ਪਿੱਤਰਾਂ (ਬਜ਼ੁਰਗਾਂ) ਨੂੰ ਸਮਰਪਿਤ ਹੈ। ਇਸ ਦੌਰਾਨ ਲੋਕ ਆਪਣੇ ਪਿੱਤਰਾਂ ਦਾ ਤਰਪਣ, ਸ਼ਰਾਧ ਅਤੇ ਪਿੰਡ ਦਾਨ ਕਰਦੇ ਹਨ। ਇਸ ਲਈ ਪਿੱਤਰ ਪੱਖ ਵਿੱਚ ਨਵੀਆਂ ਚੀਜ਼ਾਂ ਖਰੀਦਣਾ, ਨਵੇਂ ਘਰ ਵਿੱਚ ਪ੍ਰਵੇਸ਼ ਕਰਨਾ ਅਤੇ ਮੰਗਲਿਕ ਕੰਮ ਕਰਨਾ ਅਸ਼ੁਭ ਮੰਨਿਆ ਜਾਂਦਾ ਹੈ।