ਰਿਸ਼ਤੇ 'ਚ ਵਧਦਾ ਸ਼ੱਕ ਤੇ ਓਵਰ-ਥਿੰਕਿੰਗ: ਕਿਤੇ ਤੁਹਾਡਾ ਪਿਆਰ 'ਐਂਜ਼ਾਇਟੀ' ਦੀ ਭੇਟ ਤਾਂ ਨਹੀਂ ਚੜ੍ਹ ਰਿਹਾ? ਜਾਣੋ ਮੈਨੇਜ ਕਰਨ ਦੇ ਤਰੀਕੇ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ: ਰਿਲੇਸ਼ਨਸ਼ਿਪ ਐਂਜ਼ਾਇਟੀ ਇੱਕ ਅਜਿਹੀ ਸਥਿਤੀ ਹੈ, ਜਿੱਥੇ ਵਿਅਕਤੀ ਆਪਣੇ ਰਿਸ਼ਤੇ ਨੂੰ ਲੈ ਕੇ ਲਗਾਤਾਰ ਅਸੁਰੱਖਿਅਤ, ਤਣਾਅਗ੍ਰਸਤ ਜਾਂ ਦੁਖੀ ਮਹਿਸੂਸ ਕਰਦਾ ਹੈ।

ਰਿਸ਼ਤੇ ਨੂੰ ਲੈ ਕੇ ਕਦੇ-ਕਦਾਈਂ ਫ਼ਿਕਰਮੰਦ ਹੋਣਾ ਨਾਰਮਲ ਹੈ, ਪਰ ਜਦੋਂ ਇਹ ਚਿੰਤਾ ਤੁਹਾਡੇ ਮਾਨਸਿਕ ਸਕੂਨ ਨੂੰ ਖੋਹ ਲਵੇ ਅਤੇ ਰਿਸ਼ਤੇ ਵਿੱਚ ਦਰਾਰ ਪੈਦਾ ਕਰਨ ਲੱਗੇ, ਤਾਂ ਇਸ ਨੂੰ ਗੰਭੀਰਤਾ ਨਾਲ ਲੈਣਾ ਜ਼ਰੂਰੀ ਹੈ। ਆਓ ਜਾਣੀਏ ਕਿਵੇਂ ਪਛਾਣੀਏ ਕਿ ਤੁਸੀਂ ਰਿਲੇਸ਼ਨਸ਼ਿਪ ਐਂਜ਼ਾਇਟੀ ਦਾ ਸ਼ਿਕਾਰ ਹੋ ਅਤੇ ਇਸ ਨੂੰ ਕਿਵੇਂ ਮੈਨੇਜ ਕਰ ਸਕਦੇ ਹੋ।

ਰਿਲੇਸ਼ਨਸ਼ਿਪ ਐਂਜ਼ਾਇਟੀ ਦੇ ਲੱਛਣ

ਲਗਾਤਾਰ ਅਸੁਰੱਖਿਆ: ਇਹ ਡਰ ਸਤਾਉਣਾ ਕਿ ਤੁਹਾਡਾ ਪਾਰਟਨਰ ਤੁਹਾਨੂੰ ਛੱਡ ਦੇਵੇਗਾ ਜਾਂ ਉਹ ਹੁਣ ਤੁਹਾਨੂੰ ਪਿਆਰ ਨਹੀਂ ਕਰਦਾ।

ਓਵਰ-ਥਿੰਕਿੰਗ: ਪਾਰਟਨਰ ਦੇ ਮੈਸੇਜ ਦਾ ਜਵਾਬ ਦੇਰ ਨਾਲ ਆਉਣ 'ਤੇ ਇਹ ਮੰਨ ਲੈਣਾ ਕਿ ਉਹ ਤੁਹਾਡੇ ਤੋਂ ਨਾਰਾਜ਼ ਹਨ ਜਾਂ ਕਿਸੇ ਹੋਰ ਦੇ ਨਾਲ ਹਨ।

ਵਾਰ-ਵਾਰ ਭਰੋਸਾ ਮੰਗਣਾ: ਪਾਰਟਨਰ ਤੋਂ ਵਾਰ-ਵਾਰ ਪੁੱਛਣਾ, ‘ਕੀ ਤੂੰ ਵਾਕਈ ਮੈਨੂੰ ਪਿਆਰ ਕਰਦਾ ਹੈਂ?’ ਜਾਂ ‘ਤੂੰ ਮੈਨੂੰ ਛੱਡੇਂਗਾ ਤਾਂ ਨਹੀਂ?’ ਇਹ ਰਿਸ਼ਤੇ ਵਿੱਚ ਅਸੁਰੱਖਿਆ ਨੂੰ ਦਿਖਾਉਂਦਾ ਹੈ।

ਖ਼ੁਦ ਨੂੰ ਬਦਲਣਾ: ਪਾਰਟਨਰ ਨੂੰ ਖੁਸ਼ ਕਰਨ ਲਈ ਆਪਣੀ ਪਸੰਦ ਅਤੇ ਸ਼ਖ਼ਸੀਅਤ ਨੂੰ ਪੂਰੀ ਤਰ੍ਹਾਂ ਦਬਾ ਦੇਣਾ।

ਪਾਰਟਨਰ ਦੀ ਜਾਸੂਸੀ: ਉਨ੍ਹਾਂ ਦੇ ਫ਼ੋਨ, ਸੋਸ਼ਲ ਮੀਡੀਆ ਜਾਂ ਹਰ ਗਤੀਵਿਧੀ 'ਤੇ ਸ਼ੱਕ ਦੀ ਨਜ਼ਰ ਰੱਖਣੀ।

ਕਿਉਂ ਹੁੰਦੀ ਹੈ ਰਿਲੇਸ਼ਨਸ਼ਿਪ ਐਂਜ਼ਾਇਟੀ?

ਪੁਰਾਣੇ ਤਜ਼ਰਬੇ: ਜੇਕਰ ਪਿਛਲੇ ਰਿਸ਼ਤੇ ਵਿੱਚ ਧੋਖਾ ਮਿਲਿਆ ਹੋਵੇ, ਤਾਂ ਨਵੇਂ ਰਿਸ਼ਤੇ ਵਿੱਚ ਭਰੋਸਾ ਕਰਨਾ ਮੁਸ਼ਕਲ ਹੋ ਜਾਂਦਾ ਹੈ।

ਬਚਪਨ ਦੇ ਅਨੁਭਵ: ਜੇਕਰ ਬਚਪਨ ਵਿੱਚ ਮਾਤਾ-ਪਿਤਾ ਤੋਂ ਪਿਆਰ ਜਾਂ ਸੁਰੱਖਿਆ ਨਹੀਂ ਮਿਲੀ, ਤਾਂ ਵਿਅਕਤੀ ਵੱਡਾ ਹੋ ਕੇ ਆਪਣੇ ਰੋਮਾਂਟਿਕ ਰਿਸ਼ਤਿਆਂ ਵਿੱਚ ਹਮੇਸ਼ਾ ਪਿਆਰ ਅਤੇ ਸੁਰੱਖਿਆ ਲੱਭਦਾ ਰਹਿੰਦਾ ਹੈ।

ਘੱਟ ਆਤਮ-ਵਿਸ਼ਵਾਸ: ਜਦੋਂ ਤੁਸੀਂ ਖ਼ੁਦ ਨੂੰ ਪਿਆਰ ਦੇ ਕਾਬਲ ਨਹੀਂ ਸਮਝਦੇ, ਤਾਂ ਤੁਹਾਨੂੰ ਲੱਗਦਾ ਹੈ ਕਿ ਪਾਰਟਨਰ ਕਦੇ ਵੀ ਤੁਹਾਨੂੰ ਛੱਡ ਸਕਦਾ ਹੈ।

ਰਿਲੇਸ਼ਨਸ਼ਿਪ ਐਂਜ਼ਾਇਟੀ ਨਾਲ ਕਿਵੇਂ ਡੀਲ ਕਰੀਏ?

ਆਪਣੀਆਂ ਭਾਵਨਾਵਾਂ ਨੂੰ ਸਵੀਕਾਰ ਕਰੋ: ਸਭ ਤੋਂ ਪਹਿਲਾਂ ਇਹ ਪਛਾਣੋ ਕਿ ਤੁਹਾਨੂੰ ਐਂਜ਼ਾਇਟੀ ਹੋ ਰਹੀ ਹੈ। ਆਪਣੀ ਘਬਰਾਹਟ ਨੂੰ ਦਬਾਉਣ ਦੀ ਬਜਾਏ ਉਸ ਨੂੰ ਸਵੀਕਾਰ ਕਰੋ। ਜਦੋਂ ਤੁਸੀਂ ਇਹ ਸਮਝ ਜਾਂਦੇ ਹੋ ਕਿ ਇਹ ਤੁਹਾਡੇ ਵਿਚਾਰ ਹਨ, ਹਕੀਕਤ ਨਹੀਂ, ਤਾਂ ਅੱਧੀ ਸਮੱਸਿਆ ਉੱਥੇ ਹੀ ਹੱਲ ਹੋ ਜਾਂਦੀ ਹੈ।

ਖੁੱਲ੍ਹ ਕੇ ਗੱਲ ਕਰੋ: ਪਾਰਟਨਰ ਨਾਲ ਮਨ ਦੀ ਗੱਲ ਕਰੋ। ਉਨ੍ਹਾਂ 'ਤੇ ਦੋਸ਼ ਲਗਾਉਣ ਦੀ ਬਜਾਏ ਆਪਣੇ ਇਮੋਸ਼ਨਸ ਦੱਸੋ। ਜਿਵੇਂ 'ਜਦੋਂ ਤੁਸੀਂ ਬਿਨਾਂ ਦੱਸੇ ਦੇਰ ਨਾਲ ਆਉਂਦੇ ਹੋ, ਤਾਂ ਮੈਨੂੰ ਘਬਰਾਹਟ ਹੁੰਦੀ ਹੈ', ਨਾ ਕਿ 'ਤੁਸੀਂ ਹਮੇਸ਼ਾ ਮੈਨੂੰ ਅਣਦੇਖਾ ਕਰਦੇ ਹੋ'। ਇਸ ਨਾਲ ਤੁਹਾਡਾ ਪਾਰਟਨਰ ਬਚਾਅ (defensive) ਮੁਦਰਾ ਵਿੱਚ ਆਏ ਬਿਨਾਂ ਤੁਹਾਡੀ ਗੱਲ ਸੁਣਦਾ ਹੈ।

ਖ਼ੁਦ 'ਤੇ ਧਿਆਨ ਦਿਓ: ਆਪਣੀ ਪੂਰੀ ਦੁਨੀਆ ਪਾਰਟਨਰ ਦੇ ਆਲੇ-ਦੁਆਲੇ ਨਾ ਬੁਣੋ। ਆਪਣੀ ਹੌਬੀ, ਦੋਸਤਾਂ ਅਤੇ ਕਰੀਅਰ 'ਤੇ ਧਿਆਨ ਦਿਓ। ਜਦੋਂ ਤੁਸੀਂ ਆਪਣੀ ਲਾਈਫ ਵਿੱਚ ਖੁਸ਼ ਰਹੋਗੇ, ਤਾਂ ਰਿਸ਼ਤੇ 'ਤੇ ਤੁਹਾਡੀ ਨਿਰਭਰਤਾ ਅਤੇ ਉਸ ਤੋਂ ਹੋਣ ਵਾਲੀ ਐਂਗਜ਼ਾਇਟੀ ਘੱਟ ਹੋਵੇਗੀ।

ਮਾਈਂਡਫੁਲਨੈੱਸ ਦੀ ਪ੍ਰੈਕਟਿਸ: ਐਂਜ਼ਾਇਟੀ ਅਕਸਰ ਭਵਿੱਖ ਦੇ ਡਰ ਤੋਂ ਪੈਦਾ ਹੁੰਦੀ ਹੈ। ਵਰਤਮਾਨ ਵਿੱਚ ਜੀਣਾ ਸਿੱਖੋ। ਮੈਡੀਟੇਸ਼ਨ ਅਤੇ ਡੂੰਘੇ ਸਾਹ ਲੈਣ ਦੀਆਂ ਤਕਨੀਕਾਂ ਤੁਹਾਡੇ ਦਿਮਾਗ ਨੂੰ ਸ਼ਾਂਤ ਰੱਖਣ ਵਿੱਚ ਮਦਦ ਕਰਨਗੀਆਂ।

ਪ੍ਰੋਫੈਸ਼ਨਲ ਮਦਦ ਲਓ: ਜੇਕਰ ਐਂਗਜ਼ਾਇਟੀ ਤੁਹਾਡੇ ਕੰਟਰੋਲ ਤੋਂ ਬਾਹਰ ਹੋ ਰਹੀ ਹੈ, ਤਾਂ ਕਿਸੇ ਥੈਰੇਪਿਸਟ ਜਾਂ ਕੌਂਸਲਰ ਨਾਲ ਗੱਲ ਕਰਨ ਵਿੱਚ ਸੰਕੋਚ ਨਾ ਕਰੋ। ਥੈਰੇਪੀ ਤੁਹਾਨੂੰ ਤੁਹਾਡੇ ਡਰ ਦੀ ਜੜ੍ਹ ਤੱਕ ਪਹੁੰਚਣ ਵਿੱਚ ਮਦਦ ਕਰਦੀ ਹੈ।