ਕੀ ਹੈ ‘ਕੋਰੀਅਨ ਲਵਰ’ ਗੇਮ ? ਜਿਸ ਨੇ ਗਾਜ਼ਿਆਬਾਦ 'ਚ ਲੈ ਲਈ ਤਿੰਨ ਭੈਣਾਂ ਦੀ ਜਾਨ, ਤੁਸੀਂ ਵੀ ਬੱਚਿਆਂ ਦੀ ਆਨਲਾਈਨ ਗੇਮਿੰਗ 'ਤੇ ਇੰਝ ਰੱਖੋ ਨਜ਼ਰ

ਟੈਕਨਾਲੋਜੀ ਡੈਸਕ, ਨਵੀਂ ਦਿੱਲੀ : ਦਿੱਲੀ-NCR ਦੇ ਗਾਜ਼ੀਆਬਾਦ 'ਚ ਤਿੰਨ ਭੈਣਾਂ ਨੇ ਗੇਮ ਦੇ ਚਲਦਿਆਂ 9ਵੀਂ ਮੰਜ਼ਿਲ ਤੋਂ ਛਾਲ ਮਾਰ ਕੇ ਮੌਤ ਨੂੰ ਗਲੇ ਲਗਾ ਲਿਆ। ਦੱਸਿਆ ਜਾ ਰਿਹਾ ਹੈ ਕਿ ਤਿੰਨੋਂ ਭੈਣਾਂ ਨੂੰ ਕੋਰੀਅਨ ਗੇਮ ਦੀ ਲਤ ਸੀ। ਰਿਪੋਰਟਾਂ ਦੀ ਮੰਨੀਏ ਤਾਂ ਗੇਮ ਦਾ ਨਾਂ 'ਕੋਰਿਅਨ ਲਵਰ' (Korean Lover) ਸੀ। ਇਸ ਗੇਮ 'ਚ ਯੂਜ਼ਰਜ਼ ਨੂੰ ਵੱਖ-ਵੱਖ ਟਾਸਕ ਮਿਲਦੇ ਹਨ। ਜੇਕਰ ਤੁਹਾਡੇ ਘਰ 'ਚ ਵੀ ਬੱਚੇ ਇਹ ਗੇਮ ਖੇਡਦੇ ਹਨ ਤਾਂ ਤੁਹਾਨੂੰ ਸਾਵਧਾਨ ਰਹਿਣ ਦੀ ਲੋੜ ਹੈ। ਇੱਥੇ ਅਸੀਂ ਤੁਹਾਨੂੰ ਇਸ ਗੇਮ ਨਾਲ ਜੁੜੀਆਂ ਗੱਲਾਂ ਬਾਰੇ ਵਿਸਥਾਰ ਵਿੱਚ ਜਾਣਕਾਰੀ ਦੇ ਰਹੇ ਹਾਂ।

ਕੀ ਹੈ 'ਕੋਰੀਅਨ ਲਵਰ' ਗੇਮ?

ਕੋਰੀਅਨ ਲਵਰ ਗੇਮ ਇਕ ਟਾਸਕ-ਅਧਾਰਿਤ ਗੇਮ ਹੈ। ਇਨ੍ਹਾਂ ਨੂੰ 'ਰੋਲ-ਪਲੇਇੰਗ ਗੇਮ' (RPG) ਵਜੋਂ ਜਾਣਿਆ ਜਾਂਦਾ ਹੈ। ਇਸ ਗੇਮ 'ਚ ਯੂਜ਼ਰ ਨੂੰ ਇਕ ਵਰਚੁਅਲ ਕੋਰੀਅਨ ਕਿਰਦਾਰ ਦੇ ਰੂਪ 'ਚ ਦਿਖਾਇਆ ਜਾਂਦਾ ਹੈ। ਗੇਮ ਨੂੰ ਇਸ ਤਰ੍ਹਾਂ ਡਿਜ਼ਾਈਨ ਕੀਤਾ ਗਿਆ ਹੈ ਕਿ ਬੱਚਿਆਂ ਨੂੰ ਲੱਗਦਾ ਹੈ ਕਿ ਉਹ ਸੱਚਮੁੱਚ ਕਿਸੇ ਨਾਲ ਜੁੜੇ ਹੋਏ ਹਨ ਅਤੇ ਗੱਲ ਕਰ ਰਹੇ ਹਨ।

ਇਸ ਵਿੱਚ ਯੂਜ਼ਰਜ਼ ਨੂੰ ਵੱਖ-ਵੱਖ ਚੁਣੌਤੀਆਂ ਦਿੱਤੀਆਂ ਜਾਂਦੀਆਂ ਹਨ। ਇਹ ਗੇਮ ਕਾਫੀ ਹੱਦ ਤਕ ਬਲੂ ਵੇਲ੍ਹ (Blue Whale) ਜਾਂ ਮੋਮੋ ਚੈਲੇਂਜ (Momo Challenge) ਵਰਗੀ ਹੀ ਹੈ। ਇਨ੍ਹਾਂ ਗੇਮਾਂ ਕਾਰਨ ਪਹਿਲਾਂ ਵੀ ਕਈ ਬੱਚੇ ਆਪਣੇ ਆਪ ਨੂੰ ਨੁਕਸਾਨ ਪਹੁੰਚਾ ਚੁੱਕੇ ਹਨ।

ਬੱਚਿਆਂ ਦੀਆਂ ਆਨਲਾਈਨ ਗਤੀਵਿਧੀਆਂ 'ਤੇ ਇੰਝ ਰੱਖੋ ਨਜ਼ਰ:

• ਗੇਮਿੰਗ ਐਪਸ ਦੀ ਜਾਂਚ: ਜੇਕਰ ਤੁਹਾਡੇ ਬੱਚੇ ਆਨਲਾਈਨ ਗੇਮਿੰਗ ਦੇ ਸ਼ੌਕੀਨ ਹਨ ਤਾਂ ਸਭ ਤੋਂ ਪਹਿਲਾਂ ਇਹ ਜਾਣਨ ਦੀ ਕੋਸ਼ਿਸ਼ ਕਰੋ ਕਿ ਉਹ ਕਿਸ ਤਰ੍ਹਾਂ ਦੀ ਗੇਮ ਖੇਡ ਰਹੇ ਹਨ। ਜੇਕਰ ਗੇਮ ਟਾਸਕ ਜਾਂ ਚੈਲੇਂਜ ਵਾਲੀ ਹੈ ਤਾਂ ਬੱਚੇ ਦੇ ਵਿਵਹਾਰ 'ਤੇ ਨਜ਼ਰ ਰੱਖੋ।
• ਐਕਟੀਵਿਟੀ ਹਿਸਟਰੀ ਚੈੱਕ ਕਰੋ: ਕਈ ਵਾਰ ਬੱਚੇ ਟਾਸਕ ਪੂਰਾ ਕਰਨ ਤੋਂ ਬਾਅਦ ਐਪ ਨੂੰ ਡਿਲੀਟ ਕਰ ਦਿੰਦੇ ਹਨ। ਇਸ ਲਈ ਫੋਨ ਦੀ 'ਐਕਟੀਵਿਟੀ ਹਿਸਟਰੀ' ਜ਼ਰੂਰ ਚੈੱਕ ਕਰੋ ਕਿ ਬੱਚੇ ਨੇ ਕਿਸ ਐਪ 'ਤੇ ਕਿੰਨਾ ਸਮਾਂ ਬਿਤਾਇਆ ਹੈ।
• ਗੇਮਿੰਗ ਚੈਟ: ਗੇਮ ਦੇ ਅੰਦਰ ਹੋਣ ਵਾਲੀ ਚੈਟ ਨੂੰ ਨਿਯਮਿਤ ਰੂਪ 'ਚ ਚੈੱਕ ਕਰੋ। ਪਲੇਅਰਜ਼ ਅਕਸਰ ਇੱਕ-ਦੂਜੇ ਨਾਲ ਜੁੜਨ ਲਈ ਇਸ ਦੀ ਵਰਤੋਂ ਕਰਦੇ ਹਨ, ਜਿੱਥੇ ਗਲਤ ਨਿਰਦੇਸ਼ ਦਿੱਤੇ ਜਾ ਸਕਦੇ ਹਨ।
• ਪਲੇਅ ਸਟੋਰ ਰੇਟਿੰਗ: ਬੱਚਾ ਜੋ ਵੀ ਗੇਮ ਖੇਡਦਾ ਹੈ, ਪਲੇਅ ਸਟੋਰ 'ਤੇ ਉਸ ਦੀ ਰੇਟਿੰਗ ਅਤੇ ਉਮਰ ਹੱਦ (Age Rating) ਜ਼ਰੂਰ ਦੇਖੋ। ਨਾਲ ਹੀ ਇਹ ਵੀ ਚੈੱਕ ਕਰੋ ਕਿ ਐਪ ਫੋਨ ਦੀ ਕਿਹੜੀ-ਕਿਹੜੀ ਜਾਣਕਾਰੀ ਤਕ ਪਹੁੰਚ (Permissions) ਮੰਗ ਰਹੀ ਹੈ।