ਗਰਮੀਆਂ 'ਚ ਪੇਟ ਦੀ ਜਲਣ ਨੂੰ ਸ਼ਾਂਤ ਕਰੇਗਾ 'ਆਂਵਲਾ ਸ਼ਰਬਤ', ਪੀਂਦੇ ਹੀ ਮਿੰਟਾਂ 'ਚ ਰੀਚਾਰਜ ਹੋ ਜਾਵੇਗੀ ਬਾਡੀ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ : ਗਰਮੀਆਂ ਆਉਂਦੇ ਹੀ ਚਿਲਚਿਲਾਉਂਦੀ ਧੁੱਪ, ਲੂ ਤੇ ਪਸੀਨਾ ਸਾਡਾ ਬੁਰਾ ਹਾਲ ਕਰ ਦਿੰਦੇ ਹਨ। ਇਸ ਮੌਸਮ 'ਚ ਸਭ ਤੋਂ ਵੱਧ ਪਰੇਸ਼ਾਨੀ ਸਾਡੇ ਪੇਟ ਨੂੰ ਝੱਲਣੀ ਪੈਂਦੀ ਹੈ। ਥੋੜ੍ਹਾ ਜਿਹਾ ਵੀ ਤਲਿਆ-ਭੁੰਨਿਆ ਖਾਣ ਜਾਂ ਘੱਟ ਪਾਣੀ ਪੀਣ ਨਾਲ ਪੇਟ 'ਚ ਜਲਣ, ਗੈਸ ਅਤੇ ਐਸੀਡਿਟੀ ਹੋਣਾ ਆਮ ਗੱਲ ਹੋ ਜਾਂਦੀ ਹੈ।

ਅਜਿਹੇ ਵਿਚ ਜੇਕਰ ਤੁਸੀਂ ਰਾਹਤ ਪਾਉਣ ਲਈ ਕੋਲਡ ਡਰਿੰਕਸ ਵੱਲ ਭੱਜਦੇ ਹੋ ਤਾਂ ਰੁਕ ਜਾਓ। ਅੱਜ ਅਸੀਂ ਤੁਹਾਨੂੰ ਇਕ ਅਜਿਹੇ 'ਦੇਸੀ ਜਾਦੂ' ਬਾਰੇ ਦੱਸਣ ਜਾ ਰਹੇ ਹਾਂ, ਜੋ ਨਾ ਸਿਰਫ਼ ਤੁਹਾਡੇ ਪੇਟ ਦੀ ਅੱਗ ਬੁਝਾਏਗਾ, ਸਗੋਂ ਤੁਹਾਡੀ ਬੈਟਰੀ ਨੂੰ ਵੀ ਤੁਰੰਤ ਫੁੱਲ ਕਰ ਦੇਵੇਗਾ- ਉਹ ਹੈ ਸਿਹਤਮੰਦ 'ਆਵਲਾ ਸ਼ਰਬਤ'।

ਪੇਟ ਲਈ ਕਿਸੇ ਵਰਦਾਨ ਤੋਂ ਘੱਟ ਨਹੀਂ

ਆਂਵਲਾ ਤਾਸੀਰ 'ਚ ਬੇਹੱਦ ਠੰਢਾ ਹੁੰਦਾ ਹੈ। ਜਦੋਂ ਗਰਮੀਆਂ 'ਚ ਭਾਰੀ ਪਸੀਨੇ ਤੇ ਡੀਹਾਈਡ੍ਰੇਸ਼ਨ ਕਾਰਨ ਪੇਟ 'ਚ ਗਰਮੀ ਵਧ ਜਾਂਦੀ ਹੈ ਤਾਂ ਆਵਲੇ ਦਾ ਸ਼ਰਬਤ ਇਕ ਬਿਹਤਰੀਨ ਕੁਦਰਤੀ 'ਕੂਲੈਂਟ' ਵਾਂਗ ਕੰਮ ਕਰਦਾ ਹੈ। ਇਹ ਪੇਟ ਦੇ ਐਸਿਡ ਨੂੰ ਤੁਰੰਤ ਸ਼ਾਂਤ ਕਰਦਾ ਹੈ, ਛਾਤੀ ਦੀ ਜਲਣ ਨੂੰ ਰੋਕਦਾ ਹੈ ਅਤੇ ਪਾਚਨ ਪ੍ਰਣਾਲੀ ਨੂੰ ਇਕਦਮ ਦਰੁਸਤ ਕਰ ਦਿੰਦਾ ਹੈ। ਤੇਜ਼ ਧੁੱਪ ਤੋਂ ਘਰ ਪਰਤਣ ਤੋਂ ਬਾਅਦ ਇਸ ਦਾ ਇਕ ਗਲਾਸ ਪੀਣ ਨਾਲ ਪੇਟ ਨੂੰ ਜੋ ਠੰਢਕ ਮਿਲਦੀ ਹੈ, ਉਸ ਦਾ ਕੋਈ ਜਵਾਬ ਨਹੀਂ।

ਥਕਾਵਟ ਦੂਰ, ਬਾਡੀ ਤੁਰੰਤ ਰੀਚਾਰਜ

ਗਰਮੀ ਦੇ ਮੌਸਮ 'ਚ ਪਸੀਨੇ ਰਾਹੀਂ ਸਾਡੇ ਸਰੀਰ 'ਚੋਂ ਬਹੁਤ ਸਾਰਾ ਪਾਣੀ ਤੇ ਜ਼ਰੂਰੀ ਪੋਸ਼ਕ ਤੱਤ ਬਾਹਰ ਨਿਕਲ ਜਾਂਦੇ ਹਨ। ਇਸ ਨਾਲ ਅਸੀਂ ਥੱਕਿਆ ਹੋਇਆ, ਕਮਜ਼ੋਰ ਤੇ ਸੁਸਤ ਮਹਿਸੂਸ ਕਰਨ ਲੱਗਦੇ ਹਾਂ। ਆਂਵਲੇ 'ਚ ਸੰਤਰੇ ਨਾਲੋਂ ਵੀ ਕਈ ਗੁਣਾ ਜ਼ਿਆਦਾ ਵਿਟਾਮਿਨ-ਸੀ, ਆਇਰਨ ਤੇ ਐਂਟੀਆਕਸੀਡੈਂਟਸ ਪਾਏ ਜਾਂਦੇ ਹਨ। ਜਦੋਂ ਤੁਸੀਂ ਆਵਲੇ ਦਾ ਸ਼ਰਬਤ ਪੀਂਦੇ ਹੋ ਤਾਂ ਇਹ ਸਰੀਰ 'ਚ ਇਲੈਕਟ੍ਰੋਲਾਈਟਸ ਦੀ ਕਮੀ ਨੂੰ ਤੁਰੰਤ ਪੂਰਾ ਕਰਦਾ ਹੈ। ਇਸ ਨੂੰ ਪੀਂਦੇ ਹੀ ਸਾਰੀ ਸੁਸਤੀ ਗਾਇਬ ਹੋ ਜਾਂਦੀ ਹੈ ਅਤੇ ਸਰੀਰ ਮਿੰਟਾਂ ਵਿੱਚ 'ਰੀਚਾਰਜ' ਹੋ ਜਾਂਦਾ ਹੈ।

ਇਮਿਊਨਿਟੀ ਵਧਾਏ ਤੇ ਚਿਹਰੇ 'ਤੇ ਲਿਆਏ ਚਮਕ

ਇਹ ਸ਼ਰਬਤ ਸਿਰਫ਼ ਪੇਟ ਤੇ ਐਨਰਜੀ ਤਕ ਸੀਮਤ ਨਹੀਂ ਹੈ। ਗਰਮੀਆਂ 'ਚ ਅਕਸਰ ਲੂ ਲੱਗਣ ਜਾਂ ਬਿਮਾਰ ਪੈਣ ਦਾ ਖਤਰਾ ਰਹਿੰਦਾ ਹੈ। ਆਂਵਲੇ ਦਾ ਰੋਜ਼ਾਨਾ ਸੇਵਨ ਤੁਹਾਡੀ ਇਮਿਊਨਿਟੀ ਨੂੰ ਇੰਨਾ ਮਜ਼ਬੂਤ ਕਰ ਦਿੰਦਾ ਹੈ ਕਿ ਲੂ ਤੁਹਾਡਾ ਕੁਝ ਨਹੀਂ ਵਿਗਾੜ ਸਕਦੀ। ਇਸ ਤੋਂ ਇਲਾਵਾ, ਇਹ ਖੂਨ ਨੂੰ ਸਾਫ਼ ਕਰਦਾ ਹੈ ਜਿਸ ਨਾਲ ਗਰਮੀਆਂ 'ਚ ਵੀ ਤੁਹਾਡੇ ਚਿਹਰੇ 'ਤੇ ਇਕ ਗਜ਼ਬ ਦਾ ਨਿਖਾਰ ਬਣਿਆ ਰਹਿੰਦਾ ਹੈ।

ਘਰ ਵਿੱਚ ਕਿਵੇਂ ਬਣਾਈਏ ਆਂਵਲਾ ਸ਼ਰਬਤ?

• ਇਸ ਨੂੰ ਬਣਾਉਣਾ ਬਹੁਤ ਹੀ ਆਸਾਨ ਹੈ ਅਤੇ ਇਸ ਵਿਚ ਮੁਸ਼ਕਲ ਨਾਲ 5 ਮਿੰਟ ਲੱਗਦੇ ਹਨ:
• 2-3 ਤਾਜ਼ੇ ਆਂਵਲੇ ਲਓ ਤੇ ਉਨ੍ਹਾਂ ਦੇ ਬੀਜ ਕੱਢ ਕੇ ਉਨ੍ਹਾਂ ਨੂੰ ਮਿਕਸੀ ਵਿੱਚ ਚੰਗੀ ਤਰ੍ਹਾਂ ਪੀਸ ਲਓ।
• ਹੁਣ ਇਸ ਆਂਵਲੇ ਦੇ ਪੇਸਟ ਨੂੰ ਇਕ ਗਲਾਸ ਠੰਢੇ ਪਾਣੀ ਵਿੱਚ ਛਾਣ ਲਓ।
• ਇਸ ਦੇ ਸਵਾਦ ਤੇ ਫ਼ਾਇਦਿਆਂ ਨੂੰ ਦੁੱਗਣਾ ਕਰਨ ਲਈ ਇਸ ਵਿਚ ਚੁਟਕੀ ਭਰ ਕਾਲਾ ਨਮਕ, ਥੋੜ੍ਹਾ ਜਿਹਾ ਭੁੰਨਿਆ ਹੋਇਆ ਜੀਰਾ ਪਾਊਡਰ ਅਤੇ ਤਾਜ਼ੇ ਪੁਦੀਨੇ ਦੀਆਂ ਕੁਝ ਪੱਤੀਆਂ ਪਾ ਲਓ।
• ਜੇਕਰ ਤੁਹਾਨੂੰ ਮਿੱਠਾ ਪਸੰਦ ਹੈ ਤਾਂ ਤੁਸੀਂ ਇਸ ਵਿੱਚ ਚੀਨੀ ਦੀ ਥਾਂ ਧਾਗੇ ਵਾਲੀ ਮਿਸ਼ਰੀ ਦਾ ਪਾਊਡਰ ਜਾਂ ਸ਼ਹਿਦ ਮਿਲਾ ਸਕਦੇ ਹੋ।
• ਲਓ ਜੀ, ਤੁਹਾਡਾ ਸੁਪਰ-ਰਿਫ੍ਰੈਸ਼ਿੰਗ ਅਤੇ ਸਿਹਤਮੰਦ 'ਆਂਵਲਾ ਸ਼ਰਬਤ' ਤਿਆਰ ਹੈ। ਇਹ ਤੁਹਾਨੂੰ ਅੰਦਰੋਂ ਠੰਢਾ ਰੱਖੇਗਾ ਅਤੇ ਚਿਲਚਿਲਾਉਂਦੀ ਗਰਮੀ ਵਿੱਚ ਵੀ ਇੱਕਦਮ ਤਰੋਤਾਜ਼ਾ ਬਣਾਈ ਰੱਖੇਗਾ।