Vijay-Rashmika Wedding : ਆ ਗਈ ਤਰੀਕ! ਇਸ ਦਿਨ ਵਿਆਹ ਦੇ ਬੰਧਨ 'ਚ ਬੱਝਣਗੇ ਵਿਜੇ-ਰਸ਼ਮਿਕਾ ? ਵੈਡਿੰਗ ਕਾਰਡ ਵਾਇਰਲ

ਐਂਟਰਟੇਨਮੈਂਟ ਡੈਸਕ, ਨਵੀਂ ਦਿੱਲੀ : ਵਿਜੇ ਦੇਵਰਕੋਂਡਾ ਤੇ ਰਸ਼ਮਿਕਾ ਮੰਦਾਨਾ ਦੇ ਵਿਆਹ ਨੂੰ ਲੈ ਕੇ ਪ੍ਰਸ਼ੰਸਕ ਪਹਿਲਾਂ ਹੀ ਕਾਫੀ ਉਤਸ਼ਾਹਿਤ ਹਨ। ਕੁਝ ਦਿਨ ਪਹਿਲਾਂ ਖ਼ਬਰਾਂ ਆਈਆਂ ਸਨ ਕਿ ਇਹ ਸਾਊਥ ਅਦਾਕਾਰ-ਅਦਾਕਾਰਾ ਫਰਵਰੀ ਦੀ ਸ਼ੁਰੂਆਤ 'ਚ ਵਿਆਹ ਕਰਨ ਜਾ ਰਹੇ ਹਨ। ਹੁਣ ਇਕ ਅਜਿਹੀ ਖ਼ਬਰ ਸਾਹਮਣੇ ਆਈ ਹੈ ਜਿਸ ਨਾਲ ਉਨ੍ਹਾਂ ਦੇ ਪ੍ਰਸ਼ੰਸਕਾਂ ਵਿੱਚ ਖੁਸ਼ੀ ਦੀ ਲਹਿਰ ਦੌੜ ਜਾਵੇਗੀ।

ਵੈਡਿੰਗ ਕਾਰਡ ਹੋਇਆ ਵਾਇਰਲ

ਦਰਅਸਲ, ਸੋਸ਼ਲ ਮੀਡੀਆ 'ਤੇ ਇਕ ਵੈਡਿੰਗ ਕਾਰਡ ਵਾਇਰਲ ਹੋ ਰਿਹਾ ਹੈ ਜਿਸ ਵਿਚ ਵਿਜੇ ਦੇਵਰਕੋਂਡਾ (Vijay Deverakonda) ਅਤੇ ਰਸ਼ਮਿਕਾ ਮੰਦਾਨਾ (Rashmika Mandanna) ਦੇ ਵਿਆਹ ਅਤੇ ਰਿਸੈਪਸ਼ਨ ਦੀ ਤਰੀਕ ਦੱਸੀ ਗਈ ਹੈ। ਆਓ ਜਾਣਦੇ ਹਾਂ ਇਸ ਕਾਰਡ ਮੁਤਾਬਕ ਦੋਵੇਂ ਕਿਸ ਦਿਨ ਵਿਆਹ ਕਰ ਰਹੇ ਹਨ।

ਕਿਸ ਦਿਨ ਹੋਵੇਗਾ ਵਿਆਹ?

ਵਾਇਰਲ ਹੋ ਰਹੇ ਇਸ ਕਾਰਡ ਅਨੁਸਾਰ ਵਿਜੇ ਅਤੇ ਰਸ਼ਮਿਕਾ ਦਾ ਵਿਆਹ 26 ਫਰਵਰੀ ਨੂੰ ਇਕ ਪ੍ਰਾਈਵੇਟ ਸਮਾਰੋਹ 'ਚ ਹੋਵੇਗਾ। ਉੱਥੇ ਹੀ, 4 ਮਾਰਚ ਨੂੰ ਉਨ੍ਹਾਂ ਦੀ ਰਿਸੈਪਸ਼ਨ ਪਾਰਟੀ ਹੋਵੇਗੀ। ਮੀਡੀਆ 'ਚ ਚੱਲ ਰਹੇ ਇਸ ਸੱਦਾ ਪੱਤਰ 'ਚ ਲਿਖਿਆ ਹੈ, 'ਸਾਡੇ ਪਰਿਵਾਰਾਂ ਦੇ ਪਿਆਰ ਅਤੇ ਆਸ਼ੀਰਵਾਦ ਨਾਲ ਰਸ਼ਮਿਕਾ ਅਤੇ ਮੈਂ 26.02.26 ਨੂੰ ਇੱਕ ਛੋਟੇ ਅਤੇ ਖ਼ਾਸ ਸਮਾਰੋਹ ਵਿੱਚ ਵਿਆਹ ਕਰਾਂਗੇ।'

ਲਵ ਸਟੋਰੀ ਦੀ ਸ਼ੁਰੂਆਤ

ਖ਼ਬਰਾਂ ਹਨ ਕਿ ਮੰਦਾਨਾ ਅਤੇ ਦੇਵਰਕੋਂਡਾ ਨੇ ਪਿਛਲੇ ਸਾਲ ਅਕਤੂਬਰ 'ਚ ਹੈਦਰਾਬਾਦ 'ਚ ਇਕ ਨਿੱਜੀ ਸਮਾਰੋਹ ਦੌਰਾਨ ਮੰਗਣੀ ਕਰ ਲਈ ਸੀ। ਹਾਲਾਂਕਿ ਉਨ੍ਹਾਂ ਇਸ ਦੀ ਅਧਿਕਾਰਤ ਪੁਸ਼ਟੀ ਨਹੀਂ ਕੀਤੀ, ਪਰ ਬਾਅਦ 'ਚ ਵੱਖ-ਵੱਖ ਪ੍ਰੋਗਰਾਮਾਂ 'ਚ ਉਨ੍ਹਾਂ ਨੇ ਇਸ ਤੋਂ ਇਨਕਾਰ ਵੀ ਨਹੀਂ ਕੀਤਾ।

ਦੋਵਾਂ ਨੇ ਪਹਿਲੀ ਵਾਰ ਤੇਲਗੂ ਫਿਲਮ 'ਗੀਤਾ ਗੋਵਿੰਦਮ' (2018) 'ਚ ਇਕੱਠੇ ਕੰਮ ਕੀਤਾ ਸੀ, ਜੋ ਕਿ ਇੱਕ ਵੱਡੀ ਹਿੱਟ ਰਹੀ ਅਤੇ ਉਨ੍ਹਾਂ ਨੂੰ ਸਾਊਥ ਸਿਨੇਮਾ ਦੀ ਸਭ ਤੋਂ ਪਸੰਦੀਦਾ ਜੋੜੀ ਬਣਾ ਦਿੱਤਾ। ਇਸ ਤੋਂ ਬਾਅਦ ਉਹ 'ਡੀਅਰ ਕਾਮਰੇਡ' (2019) ਵਿੱਚ ਫਿਰ ਨਾਲ ਨਜ਼ਰ ਆਏ। ਅਕਸਰ ਇੱਕੋ ਸਮੇਂ ਇੱਕੋ ਜਿਹੀਆਂ ਥਾਵਾਂ 'ਤੇ ਛੁੱਟੀਆਂ ਮਨਾਉਣਾ, ਸੋਸ਼ਲ ਮੀਡੀਆ ਪੋਸਟਾਂ ਅਤੇ ਇੱਕ-ਦੂਜੇ ਦਾ ਸਮਰਥਨ ਕਰਨ ਨੇ ਉਨ੍ਹਾਂ ਦੇ ਰਿਸ਼ਤੇ ਦੀਆਂ ਅਫਵਾਹਾਂ ਨੂੰ ਹਮੇਸ਼ਾ ਹਵਾ ਦਿੱਤੀ ਹੈ।

ਹਾਲਾਂਕਿ, ਇਸ ਵੈਡਿੰਗ ਕਾਰਡ ਨੂੰ ਦੋਵਾਂ ਵਿੱਚੋਂ ਕਿਸੇ ਨੇ ਵੀ ਅਧਿਕਾਰਤ ਤੌਰ 'ਤੇ ਪੋਸਟ ਨਹੀਂ ਕੀਤਾ ਹੈ, ਇਸ ਲਈ ਇਸ ਵਿੱਚ ਲਿਖੀ ਤਰੀਕ ਦੀ ਪੂਰੀ ਤਰ੍ਹਾਂ ਪੁਸ਼ਟੀ ਨਹੀਂ ਕੀਤੀ ਜਾ ਸਕਦੀ।