ਕਿਥੇ ਗਏ ਫ਼ਿਲਮਾਂ ਦੇ 'ਸੰਸਕਾਰੀ ਬਾਬੂਜੀ'? Me Too ਦੇ ਇਲਜ਼ਾਮਾਂ ਤੋਂ ਬਾਅਦ ਅਲੋਕ ਨਾਥ ਦੀ ਜ਼ਿੰਦਗੀ ਹੋਈ ਨਰਕ, ਦੋਸਤ ਨੇ ਖੋਲ੍ਹੇ ਡੂੰਘੇ ਰਾਜ਼!

ਮਨੋਰੰਜਨ ਡੈਸਕ, ਨਵੀਂ ਦਿੱਲੀ: 90 ਦੇ ਦਹਾਕੇ ਵਿੱਚ ਫ਼ਿਲਮੀ ਪਰਦੇ 'ਤੇ 'ਆਦਰਸ਼ ਪਿਤਾ' ਦਾ ਕਿਰਦਾਰ ਨਿਭਾਉਣ ਵਾਲੇ ਅਲੋਕ ਨਾਥ ਅੱਜ ਗੁੰਮਨਾਮੀ ਦੀ ਜ਼ਿੰਦਗੀ ਜੀ ਰਹੇ ਹਨ। 'ਹਮ ਆਪਕੇ ਹੈਂ ਕੌਨ' ਅਤੇ 'ਹਮ ਸਾਥ-ਸਾਥ ਹੈਂ' ਵਰਗੀਆਂ ਬਲਾਕਬਸਟਰ ਫ਼ਿਲਮਾਂ ਰਾਹੀਂ ਹਰ ਘਰ ਵਿੱਚ ਪਛਾਣ ਬਣਾਉਣ ਵਾਲੇ ਇਸ ਅਦਾਕਾਰ ਦੀ 'ਸੰਸਕਾਰੀ' ਤਸਵੀਰ ਸਾਲ 2018 ਵਿੱਚ Me Too ਮੁਹਿੰਮ ਦੌਰਾਨ ਪੂਰੀ ਤਰ੍ਹਾਂ ਧੁੰਦਲੀ ਹੋ ਗਈ ਸੀ। ਵਿੰਟਾ ਨੰਦਾ ਅਤੇ ਸੰਧਿਆ ਮ੍ਰਿਦੁਲ ਵਰਗੀਆਂ ਅਭਿਨੇਤਰੀਆਂ ਵੱਲੋਂ ਲਗਾਏ ਗਏ ਜਿਨਸੀ ਸ਼ੋਸ਼ਣ ਦੇ ਗੰਭੀਰ ਇਲਜ਼ਾਮਾਂ ਤੋਂ ਬਾਅਦ ਉਨ੍ਹਾਂ ਨੇ ਸਿਨੇਮਾ ਤੋਂ ਦੂਰੀ ਬਣਾ ਲਈ।

7 ਸਾਲਾਂ ਤੋਂ ਪਰਦੇ ਤੋਂ ਦੂਰ, ਦੋਸਤ ਨੇ ਕੀਤਾ ਵੱਡਾ ਖ਼ੁਲਾਸਾ

ਅਲੋਕ ਨਾਥ ਆਖਰੀ ਵਾਰ 2019 ਵਿੱਚ ਫ਼ਿਲਮ 'ਦੇ ਦੇ ਪਿਆਰ ਦੇ' ਵਿੱਚ ਨਜ਼ਰ ਆਏ ਸਨ। ਉਨ੍ਹਾਂ ਦੇ ਕਰੀਬੀ ਦੋਸਤ ਅਤੇ ਅਦਾਕਾਰ ਰਾਜੇਸ਼ ਪੁਰੀ ਨੇ ਹਾਲ ਹੀ ਵਿੱਚ ਖ਼ੁਲਾਸਾ ਕੀਤਾ ਹੈ ਕਿ ਅਲੋਕ ਨਾਥ ਹੁਣ ਕਿਸ ਤਰ੍ਹਾਂ ਦੇ ਸੰਘਰਸ਼ ਵਿੱਚੋਂ ਗੁਜ਼ਰ ਰਹੇ ਹਨ ਅਤੇ ਉਨ੍ਹਾਂ ਨੇ ਇੰਡਸਟਰੀ ਦੇ ਸਾਰੇ ਰਿਸ਼ਤੇ ਕਿਉਂ ਖ਼ਤਮ ਕਰ ਦਿੱਤੇ ਹਨ।

ਸਿਧਾਰਥ ਆਨੰਦ ਦੇ ਪੌਡਕਾਸਟ ਵਿੱਚ ਅਦਾਕਾਰ ਰਾਜੇਸ਼ ਪੁਰੀ ਨੇ ਅਲੋਕ ਨਾਥ ਦੀ ਜ਼ਿੰਦਗੀ ਦੇ ਉਹ ਪੰਨੇ ਫਰੋਲੇ ਹਨ, ਜਿਨ੍ਹਾਂ ਤੋਂ ਦੁਨੀਆ ਅਣਜਾਣ ਸੀ। ਰਾਜੇਸ਼ ਪੁਰੀ ਨੇ ਦੱਸਿਆ ਕਿ Me Too ਦੇ ਇਲਜ਼ਾਮਾਂ ਤੋਂ ਬਾਅਦ ਅਲੋਕ ਨਾਥ ਬਹੁਤ ਜ਼ਿਆਦਾ ਟੁੱਟ ਚੁੱਕੇ ਹਨ ਅਤੇ ਲੋਕਾਂ ਦਾ ਸਾਹਮਣਾ ਕਰਨ ਤੋਂ ਕਤਰਾਉਂਦੇ ਹਨ।

"ਘਰ ਵਿੱਚ ਹੀ ਕੈਦ ਹੋ ਕੇ ਰਹਿ ਗਏ ਨੇ ਬਾਬੂਜੀ"

ਰਾਜੇਸ਼ ਪੁਰੀ ਮੁਤਾਬਕ, ਜਦੋਂ ਵੀ ਉਹ ਅਲੋਕ ਨਾਥ ਨੂੰ ਮਿਲਣ ਜਾਂ ਬਾਹਰ ਜਾਣ ਲਈ ਕਹਿੰਦੇ ਹਨ, ਤਾਂ ਉਹ ਸਾਫ਼ ਇਨਕਾਰ ਕਰ ਦਿੰਦੇ ਹਨ। ਅਲੋਕ ਨਾਥ ਦਾ ਕਹਿਣਾ ਹੈ ਕਿ ਉਹ 'ਵਰਕ ਫਰਾਮ ਹੋਮ' (Work from Home) ਕਰ ਰਹੇ ਹਨ, ਪਰ ਅਸਲ ਵਿੱਚ ਉਹ ਕੀ ਕੰਮ ਕਰ ਰਹੇ ਹਨ, ਇਹ ਕਿਸੇ ਨੂੰ ਨਹੀਂ ਪਤਾ। ਉਹ ਹੁਣ ਕਿਸੇ ਨੂੰ ਮਿਲਣਾ ਨਹੀਂ ਚਾਹੁੰਦੇ ਅਤੇ ਇੱਕ ਤਰ੍ਹਾਂ ਨਾਲ ਗੁੰਮਨਾਮੀ ਵਿੱਚ ਹਨ।

ਸ਼ਰਾਬ ਪੀਣ ਤੋਂ ਬਾਅਦ ਹੋ ਜਾਂਦੇ ਸਨ 'ਵਾਈਲਡ'

ਰਾਜੇਸ਼ ਪੁਰੀ ਨੇ ਮੰਨਿਆ ਕਿ ਅਲੋਕ ਨਾਥ ਤੋਂ ਗਲਤੀਆਂ ਹੋਈਆਂ ਹੋ ਸਕਦੀਆਂ ਹਨ ਕਿਉਂਕਿ "ਬਿਨਾਂ ਅੱਗ ਤੋਂ ਧੂੰਆਂ ਨਹੀਂ ਨਿਕਲਦਾ।" ਉਨ੍ਹਾਂ ਨੇ ਖ਼ੁਲਾਸਾ ਕੀਤਾ ਕਿ ਅਲੋਕ ਨਾਥ ਸ਼ਰਾਬ ਪੀਣ ਤੋਂ ਬਾਅਦ ਅਕਸਰ 'ਆਫੈਂਸਿਵ' ਅਤੇ 'ਵਾਈਲਡ' ਹੋ ਜਾਂਦੇ ਸਨ, ਜੋ ਕਿ ਬਹੁਤ ਮਾੜਾ ਲੱਗਦਾ ਸੀ। ਸ਼ਾਇਦ ਹੁਣ ਉਹ ਆਪਣੀਆਂ ਗਲਤੀਆਂ 'ਤੇ ਪਛਤਾਵਾ ਕਰ ਰਹੇ ਹਨ।

ਅਲੋਕ ਨਾਥ ਦੇ ਪੁਰਾਣੇ ਦੋਸਤ ਰਾਜੇਸ਼ ਪੁਰੀ ਨੇ ਦੱਸਿਆ ਕਿ ਉਹ ਅਲੋਕ ਨਾਥ ਨੂੰ ਸਪਿਰਚੁਅਲ ਰਸਤੇ 'ਤੇ ਲਿਆਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ, ਪਰ ਉਹ ਉੱਥੇ ਵੀ ਨਹੀਂ ਆ ਰਹੇ। ਰਾਜੇਸ਼ ਪੁਰੀ ਨੇ ਦੱਸਿਆ ਕਿ ਉਹ 'ਛਤਰਪੁਰ ਵਾਲੇ ਗੁਰੂਜੀ' ਨੂੰ ਮੰਨਦੇ ਹਨ ਅਤੇ ਉਨ੍ਹਾਂ ਨੇ ਅਲੋਕ ਨਾਥ ਤੇ ਉਨ੍ਹਾਂ ਦੀ ਪਤਨੀ ਨੂੰ ਵੀ ਬੁਲਾਇਆ ਸੀ, ਪਰ ਅਲੋਕ ਨਾਥ ਨੇ ਬਾਹਰ ਆਉਣ ਦੀ ਹਿੰਮਤ ਨਹੀਂ ਜੁਟਾਈ।

"ਦਿੱਲੀ ਤੋਂ ਮੁੰਬਈ ਤੱਕ ਦਾ ਸਫ਼ਰ ਅਤੇ ਦੋ ਰੂਪ"

ਰਾਜੇਸ਼ ਪੁਰੀ, ਸਤੀਸ਼ ਕੌਸ਼ਿਕ ਅਤੇ ਅਲੋਕ ਨਾਥ ਨੇ ਦਿੱਲੀ ਤੋਂ ਮੁੰਬਈ ਤੱਕ ਦਾ ਸਫ਼ਰ ਇਕੱਠੇ ਤੈਅ ਕੀਤਾ ਸੀ। ਰਾਜੇਸ਼ ਨੇ ਦੱਸਿਆ ਕਿ ਅਲੋਕ ਨਾਥ ਦੇ ਦੋ ਰੂਪ ਸਨ—ਇੱਕ ਬਹੁਤ ਸਾਫ਼ ਦਿਲ ਵਾਲਾ ਇਨਸਾਨ ਅਤੇ ਦੂਜਾ ਉਹ ਜੋ ਸ਼ਰਾਬ ਪੀਣ ਤੋਂ ਬਾਅਦ ਬਦਲ ਜਾਂਦਾ ਸੀ। ਪਰ ਹੁਣ ਰਾਹਤ ਦੀ ਗੱਲ ਇਹ ਹੈ ਕਿ ਅਲੋਕ ਨਾਥ ਨੇ ਸ਼ਰਾਬ ਪੀਣੀ ਪੂਰੀ ਤਰ੍ਹਾਂ ਛੱਡ ਦਿੱਤੀ ਹੈ, ਹਾਲਾਂਕਿ ਉਹ ਅਜੇ ਵੀ ਲੋਕਾਂ ਦਾ ਸਾਹਮਣਾ ਕਰਨ ਤੋਂ ਡਰਦੇ ਹਨ।