ਕੋਰਟ 'ਚ ਫਿਰ ਸੰਨੀ ਦਿਓਲ ਨੂੰ ਮਿਲੇਗੀ 'ਤਾਰੀਖ਼ ਪੇ ਤਾਰੀਖ਼'; 33 ਸਾਲ ਬਾਅਦ ਕਾਲੇ ਕੋਟ 'ਚ ਵਾਪਸੀ ਕਰਨਗੇ 'ਬਾਰਡਰ 2' ਐਕਟਰ

ਮਨੋਰੰਜਨ ਡੈਸਕ, ਨਵੀਂ ਦਿੱਲੀ: ਜੇਕਰ ਬਾਲੀਵੁੱਡ ਵਿੱਚ ਕਿਸੇ ਸਟਾਰ ਦੀ ਵਾਪਸੀ (Comeback) ਹੋਵੇ ਤਾਂ ਬਿਲਕੁਲ ਸੰਨੀ ਦਿਓਲ ਵਰਗੀ। 'ਗਦਰ 2' ਰਾਹੀਂ 'ਤਾਰਾ ਸਿੰਘ' ਬਣ ਕੇ ਪਰਦੇ 'ਤੇ ਧਮਾਕਾ ਕਰਨ ਵਾਲੇ ਸੰਨੀ ਦਿਓਲ ਇੱਕ ਵਾਰ ਫਿਰ ਦਰਸ਼ਕਾਂ ਦੇ ਪਸੰਦੀਦਾ ਬਣ ਗਏ ਹਨ। ਹੁਣ ਉਹ ਆਪਣੇ 33 ਸਾਲ ਪੁਰਾਣੇ ਆਈਕਾਨਿਕ 'ਵਕੀਲ' ਦੇ ਕਿਰਦਾਰ ਵਿੱਚ ਵਾਪਸੀ ਕਰਨ ਲਈ ਤਿਆਰ ਹਨ।

OTT 'ਤੇ ਡੈਬਿਊ ਕਰਨਗੇ ਸੰਨੀ ਦਿਓਲ

ਵੱਡੇ ਪਰਦੇ 'ਤੇ ਆਪਣਾ ਦਬਦਬਾ ਬਣਾਉਣ ਤੋਂ ਬਾਅਦ, ਹੁਣ ਸੰਨੀ ਦਿਓਲ ਡਿਜੀਟਲ ਪਲੇਟਫਾਰਮ 'ਤੇ ਗਦਰ ਮਚਾਉਣ ਦੀ ਤਿਆਰੀ ਕਰ ਰਹੇ ਹਨ। ਉਹ 'ਇੱਕਾ' (Ikka) ਨਾਮ ਦੀ ਫ਼ਿਲਮ/ਸੀਰੀਜ਼ ਰਾਹੀਂ ਆਪਣਾ OTT ਡੈਬਿਊ ਕਰਨਗੇ। ਇਸ ਦਾ ਐਲਾਨ ਮੰਗਲਵਾਰ ਨੂੰ ਮੁੰਬਈ ਵਿੱਚ ਨੈੱਟਫਲਿਕਸ (Netflix) ਦੇ 'ਸਲੇਟ ਲਾਂਚ' ਦੌਰਾਨ ਕੀਤੀ ਗਈ।

'ਦਾਮਿਨੀ' ਦੀ ਯਾਦ ਹੋਵੇਗੀ ਤਾਜ਼ਾ

ਸਾਲ 1993 ਵਿੱਚ ਆਈ ਫ਼ਿਲਮ 'ਦਾਮਿਨੀ' ਵਿੱਚ ਸੰਨੀ ਦਿਓਲ ਨੇ ਵਕੀਲ ਦੀ ਭੂਮਿਕਾ ਨਿਭਾਈ ਸੀ, ਜਿੱਥੇ ਉਨ੍ਹਾਂ ਦਾ 'ਤਾਰੀਖ਼ ਪੇ ਤਾਰੀਖ਼' ਡਾਇਲਾਗ ਇਤਿਹਾਸਕ ਬਣ ਗਿਆ ਸੀ। ਹਾਲਾਂਕਿ 'ਇੱਕਾ' ਉਸ ਫ਼ਿਲਮ ਦਾ ਸੀਕਵਲ ਨਹੀਂ ਹੈ, ਪਰ 33 ਸਾਲਾਂ ਬਾਅਦ ਸੰਨੀ ਦਿਓਲ ਨੂੰ ਮੁੜ ਵਕੀਲ ਦੇ ਕਾਲੇ ਕੋਟ ਵਿੱਚ ਦੇਖਣਾ ਪ੍ਰਸ਼ੰਸਕਾਂ ਲਈ ਕਿਸੇ ਤੋਹਫ਼ੇ ਤੋਂ ਘੱਟ ਨਹੀਂ ਹੋਵੇਗਾ।

ਅਕਸ਼ੈ ਖੰਨਾ ਤੇ ਸੰਨੀ ਦਿਓਲ ਹੋਣਗੇ ਆਹਮੋ-ਸਾਹਮਣੇ

ਇਸ ਕੋਰਟ-ਰੂਮ ਡਰਾਮਾ ਵਿੱਚ ਸੰਨੀ ਦਿਓਲ ਦੇ ਸਾਹਮਣੇ ਅਕਸ਼ੈ ਖੰਨਾ ਇੱਕ ਮੁਲਜ਼ਮ (Accused) ਦੇ ਰੂਪ ਵਿੱਚ ਨਜ਼ਰ ਆਉਣਗੇ। ਨਿਰਦੇਸ਼ਕ ਸਿਧਾਰਥ ਪੀ. ਮਲਹੋਤਰਾ ਨੇ ਦੱਸਿਆ ਕਿ ਇਹ ਫ਼ਿਲਮ ਬਣ ਕੇ ਤਿਆਰ ਹੈ। ਸੰਨੀ ਅਤੇ ਅਕਸ਼ੈ ਤੋਂ ਇਲਾਵਾ ਇਸ ਵਿੱਚ ਦੀਆ ਮਿਰਜ਼ਾ ਅਤੇ ਸੰਜੀਦਾ ਸ਼ੇਖ ਵੀ ਅਹਿਮ ਭੂਮਿਕਾਵਾਂ ਵਿੱਚ ਨਜ਼ਰ ਆਉਣਗੀਆਂ।