Amitabh Bachchan ਨੇ ਐਸ਼ਵਰਿਆ ਰਾਏ ਲਈ ਭੇਜਿਆ ਸੀ ਪ੍ਰਾਈਵੇਟ ਪਲੇਨ, ਇਸ ਹਾਦਸੇ ਕਾਰਨ ਦੋ ਦਿਨ ਤੱਕ ਸੌਂ ਨਹੀਂ ਸਕੇ ਸਨ 'ਬਿੱਗ ਬੀ'

ਐਂਟਰਟੇਨਮੈਂਟ ਡੈਸਕ, ਨਵੀਂ ਦਿੱਲੀ: ਬੱਚਨ ਪਰਿਵਾਰ ਦਾ ਹਿੱਸਾ ਬਣਨ ਤੋਂ ਬਹੁਤ ਪਹਿਲਾਂ ਐਸ਼ਵਰਿਆ ਰਾਏ ਸੈੱਟ 'ਤੇ ਇੱਕ ਭਿਆਨਕ ਹਾਦਸੇ ਦਾ ਸ਼ਿਕਾਰ ਹੋਈ ਸੀ, ਜਿਸ ਨੇ ਬਾਲੀਵੁੱਡ ਦੇ ਕੁਝ ਸਭ ਤੋਂ ਵੱਡੇ ਸਿਤਾਰਿਆਂ ਨੂੰ ਅੰਦਰ ਤੱਕ ਹਿਲਾ ਕੇ ਰੱਖ ਦਿੱਤਾ ਸੀ। ਇਹ ਘਟਨਾ 2003 ਵਿੱਚ ਨਾਸਿਕ ਦੇ ਕੋਲ ਫ਼ਿਲਮ 'ਖਾਕੀ' ਦੀ ਸ਼ੂਟਿੰਗ ਦੌਰਾਨ ਵਾਪਰੀ ਸੀ ਅਤੇ ਸਾਲਾਂ ਬਾਅਦ, ਅਮਿਤਾਭ ਬੱਚਨ ਨੇ ਭਾਵੁਕ ਹੁੰਦਿਆਂ ਦੱਸਿਆ ਕਿ ਸਥਿਤੀ ਅਸਲ ਵਿੱਚ ਕਿੰਨੀ ਗੰਭੀਰ ਸੀ।

ਐਸ਼ਵਰਿਆ ਨਾਲ ਵਾਪਰਿਆ ਸੀ ਇਹ ਹਾਦਸਾ

ਇਹ ਹਾਦਸਾ ਉਦੋਂ ਵਾਪਰਿਆ ਜਦੋਂ ਅਕਸ਼ੈ ਕੁਮਾਰ, ਐਸ਼ਵਰਿਆ ਅਤੇ ਤੁਸ਼ਾਰ ਕਪੂਰ ਨਾਲ ਇੱਕ ਹਾਈ-ਰਿਸਕ ਸੀਨ ਸ਼ੂਟ ਕੀਤਾ ਜਾ ਰਿਹਾ ਸੀ। ਇੱਕ ਸਟੰਟਮੈਨ ਦਾ ਤੇਜ਼ ਰਫ਼ਤਾਰ ਗੱਡੀ ਤੋਂ ਕੰਟਰੋਲ ਹਟ ਗਿਆ, ਜਿਸ ਕਾਰਨ ਗੱਡੀ ਫਿਸਲ ਗਈ ਅਤੇ ਸਿੱਧੀ ਐਸ਼ਵਰਿਆ ਦੀ ਕੁਰਸੀ ਨਾਲ ਜਾ ਟਕਰਾਈ। ਐਸ਼ਵਰਿਆ ਅਤੇ ਤੁਸ਼ਾਰ ਦੋਵੇਂ ਅਚਾਨਕ ਇਸ ਹਾਦਸੇ ਦਾ ਸ਼ਿਕਾਰ ਹੋ ਗਏ। ਅਕਸ਼ੈ ਕੁਮਾਰ ਤੁਰੰਤ ਦੌੜੇ ਅਤੇ ਕਾਰ ਨੂੰ ਹਟਾਉਣ ਵਿੱਚ ਮਦਦ ਕੀਤੀ, ਤਾਂ ਜੋ ਜ਼ਖਮੀ ਅਦਾਕਾਰਾ ਨੂੰ ਬਾਹਰ ਕੱਢ ਕੇ ਤੁਰੰਤ ਹਸਪਤਾਲ ਲਿਜਾਇਆ ਜਾ ਸਕੇ। ਇਸ ਘਟਨਾ ਨਾਲ ਪੂਰੇ ਸੈੱਟ 'ਤੇ ਤਰਥੱਲੀ ਮਚ ਗਈ।

ਅਮਿਤਾਭ ਬੱਚਨ ਨੂੰ ਸਭ ਤੋਂ ਵੱਧ ਇਸ ਗੱਲ ਦਾ ਦੁੱਖ ਹੋਇਆ ਕਿ ਉਸ ਸਮੇਂ ਇਸ ਘਟਨਾ ਨੂੰ ਕਿੰਨੇ ਹਲਕੇ ਵਿੱਚ ਲਿਆ ਗਿਆ। ਇੱਕ ਪੁਰਾਣੇ ਇੰਟਰਵਿਊ ਵਿੱਚ ਉਨ੍ਹਾਂ ਨੇ ਮੀਡੀਆ ਦੀ ਆਲੋਚਨਾ ਕੀਤੀ ਕਿ ਸੱਟਾਂ ਨੂੰ ਮਾਮੂਲੀ ਦੱਸਿਆ ਗਿਆ, ਜਦਕਿ ਅਸਲੀਅਤ ਬਹੁਤ ਗੰਭੀਰ ਸੀ। ਅਮਿਤਾਭ ਨੇ ਕਿਹਾ, 'ਮੈਂ ਐਸ਼ਵਰਿਆ ਦੀ ਮਾਂ ਨੂੰ ਪੁੱਛਿਆ ਕਿ ਕੀ ਉਹ ਆਪਣੀ ਬੇਟੀ ਨੂੰ ਮੁੰਬਈ ਵਾਪਸ ਲਿਜਾਣਾ ਚਾਹੁੰਦੇ ਹਨ। ਅਸੀਂ ਅਨਿਲ ਅੰਬਾਨੀ ਦੇ ਪ੍ਰਾਈਵੇਟ ਪਲੇਨ ਦਾ ਇੰਤਜ਼ਾਮ ਕੀਤਾ। ਕਿਉਂਕਿ ਨਾਸਿਕ ਵਿੱਚ ਰਾਤ ਨੂੰ ਲੈਂਡਿੰਗ ਦੀ ਸਹੂਲਤ ਨਹੀਂ ਸੀ, ਇਸ ਲਈ ਸਾਨੂੰ ਪਲੇਨ ਨੂੰ ਮਿਲਟਰੀ ਬੇਸ 'ਤੇ ਉਤਾਰਨ ਲਈ ਦਿੱਲੀ ਤੋਂ ਇਜਾਜ਼ਤ ਲੈਣੀ ਪਈ। ਏਅਰਕ੍ਰਾਫਟ ਵਿੱਚੋਂ ਸੀਟਾਂ ਹਟਾਉਣੀਆਂ ਪਈਆਂ ਅਤੇ ਲੋਕ ਇਸ ਨੂੰ ਇੱਕ ਛੋਟੀ ਜਿਹੀ ਘਟਨਾ ਦੱਸ ਰਹੇ ਸਨ।'

ਦੋ ਰਾਤਾਂ ਤੱਕ ਸੌਂ ਨਹੀਂ ਸਕੇ ਸਨ ਅਮਿਤਾਭ

ਅਦਾਕਾਰ ਨੇ ਇਹ ਵੀ ਦੱਸਿਆ ਕਿ ਇਸ ਹਾਦਸੇ ਦਾ ਉਨ੍ਹਾਂ 'ਤੇ ਨਿੱਜੀ ਤੌਰ 'ਤੇ ਕਿੰਨਾ ਡੂੰਘਾ ਅਸਰ ਹੋਇਆ। ਉਨ੍ਹਾਂ ਅੱਗੇ ਕਿਹਾ, 'ਦੋ ਰਾਤਾਂ ਤੱਕ ਮੈਂ ਸੌਂ ਨਹੀਂ ਸਕਿਆ। ਇਹ ਸਭ ਆਪਣੀਆਂ ਅੱਖਾਂ ਦੇ ਸਾਹਮਣੇ ਹੁੰਦੇ ਦੇਖਣਾ ਬਹੁਤ ਦਰਦਨਾਕ ਸੀ। ਉਸ ਦੀ ਪਿੱਠ 'ਤੇ ਕੈਕਟਸ ਦੇ ਕੰਢਿਆਂ ਕਾਰਨ ਡੂੰਘੇ ਜ਼ਖਮ ਹੋ ਗਏ ਸਨ। ਉਸ ਦੀਆਂ ਲੱਤਾਂ ਦੀ ਹੱਡੀ ਟੁੱਟ ਗਈ ਸੀ। ਉਸ ਨੂੰ ਗੰਭੀਰ ਸੱਟਾਂ ਲੱਗੀਆਂ ਸਨ।' ਉਸ ਸਮੇਂ ਐਸ਼ਵਰਿਆ ਦਾ ਬੱਚਨ ਪਰਿਵਾਰ ਨਾਲ ਕੋਈ ਰਿਸ਼ਤਾ ਨਹੀਂ ਸੀ।

ਬਾਅਦ ਵਿੱਚ ਐਸ਼ਵਰਿਆ ਨੇ 20 ਅਪ੍ਰੈਲ, 2007 ਨੂੰ ਅਭਿਸ਼ੇਕ ਬੱਚਨ ਨਾਲ ਵਿਆਹ ਕਰ ਲਿਆ ਅਤੇ ਐਸ਼ਵਰਿਆ ਰਾਏ ਬੱਚਨ ਬਣ ਗਈ। ਇਸ ਜੋੜੇ ਦੀ ਇੱਕ ਬੇਟੀ ਹੈ, ਜਿਸ ਦਾ ਨਾਂ ਆਰਾਧਿਆ ਬੱਚਨ ਹੈ।