Border 3 Confirm : 'ਬਾਰਡਰ 2' ਦੀ ਸਫ਼ਲਤਾ ਤੋਂ ਬਾਅਦ ਮੇਕਰਜ਼ ਨੇ 'ਬਾਰਡਰ 3' 'ਤੇ ਲਾਈ ਮੋਹਰ, ਮੁੜ ਸਿਨੇਮਾਘਰਾਂ 'ਚ ਗਰਜਣਗੇ ਸੰਨੀ ਭਾਅਜੀ

ਐਂਟਰਟੇਨਮੈਂਟ ਡੈਸਕ, ਨਵੀਂ ਦਿੱਲੀ : ਸੰਨੀ ਦਿਓਲ (Sunny Deol) ਦੇ ਪ੍ਰਸ਼ੰਸਕਾਂ ਲਈ ਸ਼ਾਨਦਾਰ ਖ਼ੁਸ਼ਖ਼ਬਰੀ ਹੈ। 'ਬਾਰਡਰ' ਅਤੇ 'ਬਾਰਡਰ 2' ਦੀ ਜ਼ਬਰਦਸਤ ਸਫ਼ਲਤਾ ਤੋਂ ਬਾਅਦ ਇਹ ਫਰੈਂਚਾਈਜ਼ੀ ਆਪਣੀ ਅਗਲੀ ਕੜੀ, 'ਬਾਰਡਰ 3' ਲਈ ਪੂਰੀ ਤਰ੍ਹਾਂ ਤਿਆਰ ਹੈ। ਪ੍ਰੋਡਿਊਸਰ ਭੂਸ਼ਣ ਕੁਮਾਰ ਨੇ ਹਾਲ ਹੀ 'ਚ ਪੁਸ਼ਟੀ ਕੀਤੀ ਹੈ ਕਿ 'ਬਾਰਡਰ 3' ਨੂੰ ਹਰੀ ਝੰਡੀ ਮਿਲ ਗਈ ਹੈ ਤੇ ਇਸ ਨੂੰ 'ਬਾਰਡਰ 2' ਦੇ ਡਾਇਰੈਕਟਰ ਅਨੁਰਾਗ ਸਿੰਘ ਹੀ ਡਾਇਰੈਕਟ ਕਰਨਗੇ।

ਮੇਕਰਜ਼ ਨੇ 'ਬਾਰਡਰ 3' 'ਤੇ ਲਗਾਈ ਮੋਹਰ

ਇਕ ਇੰਟਰਵਿਊ ਦੌਰਾਨ ਗੱਲਬਾਤ ਕਰਦਿਆਂ ਭੂਸ਼ਣ ਕੁਮਾਰ ਨੇ ਅਨੁਰਾਗ ਨਾਲ ਬਣਾਈ ਜਾ ਰਹੀ ਇੱਕ ਵੱਖਰੀ ਫਿਲਮ ਬਾਰੇ ਵੀ ਦੱਸਿਆ। ਭੂਸ਼ਣ ਨੇ ਕਿਹਾ, "ਅਸੀਂ ਉਨ੍ਹਾਂ ਦੀ ਕੰਪਨੀ ਅਤੇ ਆਪਣੀ ਕੰਪਨੀ ਦੇ ਨਾਲ ਇੱਕ ਜੁਆਇੰਟ ਵੈਂਚਰ (ਇੱਕ ਵੱਖਰੀ ਫਿਲਮ) ਕਰ ਰਹੇ ਹਾਂ। ਉਹ ਇਸ ਨੂੰ ਡਾਇਰੈਕਟ ਕਰਨਗੇ ਅਤੇ ਇਹ ਕੁਝ ਨਵਾਂ ਹੋਵੇਗਾ। 'ਬਾਰਡਰ 3' ਵੀ ਸਹੀ ਸਮੇਂ 'ਤੇ ਬਣੇਗੀ।"

ਪ੍ਰੋਡਿਊਸਰ ਨੇ ਮੁੜ ਪੁਸ਼ਟੀ ਕੀਤੀ ਕਿ 'ਬਾਰਡਰ 3' ਨੂੰ ਮਨਜ਼ੂਰੀ ਮਿਲ ਚੁੱਕੀ ਹੈ। ਭੂਸ਼ਣ ਕੁਮਾਰ ਨੇ ਕਿਹਾ, "ਜ਼ਾਹਿਰ ਹੈ, ਇਹ ਇੰਨੀ ਵੱਡੀ ਫਰੈਂਚਾਈਜ਼ੀ ਹੈ। ਅਨੁਰਾਗ ਨੇ ਇਸ ਨੂੰ ਮੁੜ ਬਣਾਉਣ ਲਈ ਬਹੁਤ ਮਿਹਨਤ ਕੀਤੀ ਹੈ। ਜੇਕਰ ਤੁਸੀਂ ਲਗਭਗ 30 ਸਾਲਾਂ ਬਾਅਦ ਕਿਸੇ ਚੀਜ਼ ਨੂੰ ਵਾਪਸ ਲਿਆਉਂਦੇ ਹੋ ਅਤੇ ਉਸ ਨੂੰ ਇੰਨਾ ਪਿਆਰ ਮਿਲ ਰਿਹਾ ਹੈ, ਤਾਂ ਅਸੀਂ ਯਕੀਨੀ ਤੌਰ 'ਤੇ ਇਸ ਨੂੰ ਅੱਗੇ ਵਧਾਵਾਂਗੇ।"

ਬਾਕਸ ਆਫਿਸ 'ਤੇ ਤਬਾਹੀ ਮਚਾ ਰਹੀ 'ਬਾਰਡਰ 2'

ਇਸ ਦੌਰਾਨ, 'ਬਾਰਡਰ 2' ਬਾਕਸ ਆਫਿਸ 'ਤੇ ਜ਼ਬਰਦਸਤ ਕਮਾਈ ਕਰ ਰਹੀ ਹੈ। ਅਨੁਰਾਗ ਸਿੰਘ ਵੱਲੋਂ ਨਿਰਦੇਸ਼ਿਤ 'ਬਾਰਡਰ 2' ਵਿੱਚ ਸੰਨੀ ਦਿਓਲ ਮੁੱਖ ਭੂਮਿਕਾ ਵਿੱਚ ਹਨ, ਉਨ੍ਹਾਂ ਦੇ ਨਾਲ ਵਰੁਣ ਧਵਨ, ਦਿਲਜੀਤ ਦੋਸਾਂਝ ਅਤੇ ਅਹਾਨ ਸ਼ੈੱਟੀ ਵੀ ਨਜ਼ਰ ਆ ਰਹੇ ਹਨ। ਇਹ ਫਿਲਮ ਟੀ-ਸੀਰੀਜ਼ ਅਤੇ ਜੇਪੀ ਫਿਲਮਜ਼ ਵੱਲੋਂ ਬਣਾਈ ਗਈ ਹੈ, ਜੋ 1997 ਦੀ ਕਲਾਸਿਕ ਫਿਲਮ 'ਬਾਰਡਰ' ਦੀ ਵਿਰਾਸਤ ਨੂੰ ਅੱਗੇ ਵਧਾ ਰਹੀ ਹੈ। ਫਿਲਮ ਨੂੰ ਬਹੁਤ ਵਧੀਆ ਰੀਵਿਊ ਵੀ ਮਿਲੇ ਹਨ।

ਘਰੇਲੂ ਕਮਾਈ : ਫਿਲਮ ਨੇ ਭਾਰਤੀ ਬਾਕਸ ਆਫਿਸ 'ਤੇ ਹੁਣ ਤੱਕ 180 ਕਰੋੜ ਰੁਪਏ ਕਮਾ ਲਏ ਹਨ।

ਗਣਤੰਤਰ ਦਿਵਸ ਦਾ ਰਿਕਾਰਡ : ਸਭ ਤੋਂ ਵੱਧ ਕਮਾਈ ਰਿਪਬਲਿਕ ਡੇਅ 'ਤੇ ਹੋਈ, ਜਦੋਂ ਫਿਲਮ ਨੇ ਇੱਕੋ ਦਿਨ ਵਿੱਚ 59 ਕਰੋੜ ਰੁਪਏ ਬਟੋਰੇ।

ਵਰਲਡਵਾਈਡ ਕੁਲੈਕਸ਼ਨ : ਫਿਲਮ ਨੇ ਦੁਨੀਆ ਭਰ 'ਚ 200 ਕਰੋੜ ਦਾ ਅੰਕੜਾ ਪਾਰ ਕਰਦਿਆਂ ਹੁਣ ਤਕ 239.4 ਕਰੋੜ ਰੁਪਏ ਦੀ ਕਮਾਈ ਕਰ ਲਈ ਹੈ।