ਕਰਨਾਟਕ ਹਾਈ ਕੋਰਟ ਤੋਂ ਕਾਂਤਾਰਾ ਵਿਵਾਦ 'ਚ ਰਣਵੀਰ ਸਿੰਘ ਨੂੰ ਮਿਲੀ ਰਾਹਤ, 'ਦੈਵ' ਦਾ ਉਡਾਇਆ ਸੀ ਮਜ਼ਾਕ

ਮਨੋਰੰਜਨ ਡੈਸਕ, ਨਵੀਂ ਦਿੱਲੀ: 'ਕਾਂਤਾਰਾ ਚੈਪਟਰ 1' ਮਿਮਿਕਰੀ ਵਿਵਾਦ ਨੂੰ ਲੈ ਕੇ ਅਦਾਕਾਰ ਰਣਵੀਰ ਸਿੰਘ ਦਾ ਨਾਮ ਪਿਛਲੇ ਕੁਝ ਸਮੇਂ ਤੋਂ ਲਗਾਤਾਰ ਸੁਰਖੀਆਂ ਬਟੋਰ ਰਿਹਾ ਹੈ। ਮੰਗਲਵਾਰ ਨੂੰ ਇਸ ਮਾਮਲੇ ਨੂੰ ਲੈ ਕੇ ਕਰਨਾਟਕ ਹਾਈ ਕੋਰਟ ਵਿੱਚ ਸੁਣਵਾਈ ਹੋਈ, ਜਿਸ ਵਿੱਚ ਅਦਾਲਤ ਨੇ ਰਣਵੀਰ ਨੂੰ ਫਿਟਕਾਰ ਲਗਾਉਂਦੇ ਹੋਏ ਕਿਹਾ ਕਿ ਪ੍ਰਤਿਭਾ ਦੀ ਆੜ ਵਿੱਚ ਧਾਰਮਿਕ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਣ ਦਾ ਕੋਈ ਅਧਿਕਾਰ ਨਹੀਂ ਹੈ।

ਹਾਲਾਂਕਿ ਕਰਨਾਟਕ ਹਾਈ ਕੋਰਟ ਨੇ ਰਣਵੀਰ ਸਿੰਘ ਨੂੰ ਰਾਹਤ ਦਿੰਦੇ ਹੋਏ ਉਨ੍ਹਾਂ ਖਿਲਾਫ ਕਿਸੇ ਵੀ ਤਰ੍ਹਾਂ ਦੀ ਸਖ਼ਤ ਕਾਰਵਾਈ ਕਰਨ ਤੋਂ ਮਨਾਂ ਕਰ ਦਿੱਤਾ ਹੈ। ਆਓ ਜਾਣਦੇ ਹਾਂ ਕਿ 'ਕਾਂਤਾਰਾ' ਵਿਵਾਦ ਨੂੰ ਲੈ ਕੇ ਅਦਾਲਤ ਨੇ ਕੀ ਨਿਰਦੇਸ਼ ਦਿੱਤੇ ਹਨ।

ਰਣਵੀਰ ਨੂੰ ਅਦਾਲਤ ਦੀ ਫਿਟਕਾਰ

ਇੱਕ ਦਿਨ ਪਹਿਲਾਂ ਇਹ ਖ਼ਬਰ ਸਾਹਮਣੇ ਆਈ ਸੀ ਕਿ ਦਿੱਗਜ ਅਦਾਕਾਰ ਰਣਵੀਰ ਸਿੰਘ ਨੇ 'ਕਾਂਤਾਰਾ' ਵਿਵਾਦ ਨੂੰ ਲੈ ਕੇ ਆਪਣੇ ਖਿਲਾਫ ਦਰਜ ਹੋਈ FIR ਅਤੇ ਮਾਮਲੇ ਵਿੱਚ ਰਾਹਤ ਲੈਣ ਲਈ ਕਰਨਾਟਕ ਹਾਈ ਕੋਰਟ ਦਾ ਦਰਵਾਜ਼ਾ ਖੜਕਾਇਆ ਸੀ। ਹੁਣ ਇਸ ਮਾਮਲੇ ਵਿੱਚ 24 ਫਰਵਰੀ ਨੂੰ ਅਦਾਲਤ ਵਿੱਚ ਸੁਣਵਾਈ ਹੋਈ, ਜਿਸ ਵਿੱਚ ਕੋਰਟ ਨੇ ਸਖ਼ਤ ਰੁਖ ਅਪਣਾਇਆ ਅਤੇ ਕਿਹਾ: "ਤੁਸੀਂ ਰਣਵੀਰ ਸਿੰਘ ਹੋਵੋ ਜਾਂ ਕੋਈ ਹੋਰ, ਇੱਕ ਅਦਾਕਾਰ ਦੇ ਤੌਰ 'ਤੇ ਤੁਹਾਡੀ ਜ਼ਿੰਮੇਵਾਰੀ ਹੋਰ ਵੀ ਵੱਧ ਜਾਂਦੀ ਹੈ, ਕਿਉਂਕਿ ਲੋਕ ਤੁਹਾਡੇ ਤੋਂ ਪ੍ਰਭਾਵਿਤ ਹੁੰਦੇ ਹਨ।

ਬੇਲਗਾਮ ਭਾਸ਼ਾ ਦੀ ਇਸ ਤਰ੍ਹਾਂ ਵਰਤੋਂ ਨਹੀਂ ਕਰਨੀ ਚਾਹੀਦੀ ਅਤੇ ਨਾ ਹੀ ਪ੍ਰਤਿਭਾ ਦੀ ਆੜ ਵਿੱਚ ਧਾਰਮਿਕ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਣ ਦਾ ਤੁਹਾਡੇ ਕੋਲ ਕੋਈ ਅਧਿਕਾਰ ਹੈ। ਰਣਵੀਰ ਸਿੰਘ ਨੇ 'ਦੈਵ' ਦੇ ਕਿਰਦਾਰ ਦੀ ਜੋ ਨਕਲ ਉਤਾਰੀ ਉਹ ਸਹੀ ਨਹੀਂ ਸੀ। ਪ੍ਰਤਿਭਾ ਜਾਂ ਪ੍ਰਸਿੱਧੀ ਕਿਸੇ ਵੀ ਕਾਨੂੰਨ ਤੋਂ ਉੱਪਰ ਨਹੀਂ ਹੋ ਸਕਦੀ। ਇੰਟਰਨੈੱਟ ਕਦੇ ਨਹੀਂ ਭੁੱਲਦਾ, ਜੋ ਵੀ ਤੁਸੀਂ ਕੀਤਾ, ਉਸ ਦਾ ਰਿਕਾਰਡ ਹਮੇਸ਼ਾ ਰਹੇਗਾ।"

ਹਾਲਾਂਕਿ, ਕਰਨਾਟਕ ਹਾਈ ਕੋਰਟ ਨੇ ਇਹ ਵੀ ਨਿਰਦੇਸ਼ ਦਿੱਤਾ ਹੈ ਕਿ ਰਣਵੀਰ ਸਿੰਘ ਖਿਲਾਫ ਕਿਸੇ ਵੀ ਤਰ੍ਹਾਂ ਦੀ ਕੋਈ ਸਖ਼ਤ ਕਾਰਵਾਈ ਨਾ ਕੀਤੀ ਜਾਵੇ। ਨਾਲ ਹੀ ਉਨ੍ਹਾਂ ਨੂੰ ਮਾਮਲੇ ਦੀ ਜਾਂਚ ਵਿੱਚ ਪੂਰਾ ਸਹਿਯੋਗ ਕਰਨ ਦਾ ਨਿਰਦੇਸ਼ ਦਿੱਤਾ ਗਿਆ ਹੈ।

2 ਮਾਰਚ ਨੂੰ ਅਗਲੀ ਸੁਣਵਾਈ

ਰਣਵੀਰ ਸਿੰਘ ਨਾਲ ਜੁੜੇ 'ਕਾਂਤਾਰਾ ਚੈਪਟਰ 1' ਦੇ 'ਦੈਵ' ਦਾ ਮਜ਼ਾਕ ਉਡਾਉਣ ਦੇ ਵਿਵਾਦ ਨੂੰ ਲੈ ਕੇ ਅਗਲੀ ਸੁਣਵਾਈ 2 ਮਾਰਚ ਨੂੰ ਕਰਨਾਟਕ ਹਾਈ ਕੋਰਟ ਵਿੱਚ ਕੀਤੀ ਜਾਵੇਗੀ। ਦੱਸ ਦੇਈਏ ਕਿ ਪਿਛਲੇ ਸਾਲ 56ਵੇਂ ਗੋਆ ਫਿਲਮ ਫੈਸਟੀਵਲ ਦੀ ਸਮਾਪਤੀ ਸਮਾਰੋਹ (Closing Ceremony) ਦੌਰਾਨ ਰਣਵੀਰ ਸਿੰਘ ਨੇ 'ਕਾਂਤਾਰਾ ਚੈਪਟਰ 1' ਦੇ ਅਦਾਕਾਰ ਰਿਸ਼ਭ ਸ਼ੈੱਟੀ ਦੇ ਸਾਹਮਣੇ ਸਟੇਜ 'ਤੇ 'ਦੈਵ' ਵਾਲੇ ਸੀਨ ਦੀ ਨਕਲ ਉਤਾਰੀ ਸੀ।