ਚਾਰਲੀ ਕਿਰਕ ਕਤਲ-ਅਮਰੀਕੀ ਨਸਾਂ ’ਚ ਹਿੰਸਾ

ਅਮਰੀਕਾ ’ਚ 31 ਸਾਲਾ ਚਾਰਲੀ ਕਿਰਕ ਦੀ 10 ਸਤੰਬਰ ਨੂੰ ਦੁਪਹਿਰ ਉਸ ਦੇ ਵਿਚਾਰਾਂ ਦੇ ਘੋਰ ਵਿਰੋਧੀ ਸਿਰਫਿਰੇ ਨੌਜਵਾਨ ਟਾਇਲਰ ਰਾਬਿਨਸਨ ਨੇ ਗ਼ੋਲ਼ੀ ਮਾਰ ਕੇ ਜਾਨ ਲੈ ਲਈ। ਉਸ ਨੂੰ 140 ਗਜ਼ ਦੂਰੀ ਤੋਂ ਇੰਪੋਰਟਿਡ 30-06 ਕੈਲੀਬਰ ਮਾਊਜ਼ਰ ਬੋਲਟ ਐਕਸ਼ਨ ਰਾਈਫਲ ਨਾਲ ਛੱਤ ਤੋਂ ਇਕ ਗੋਲ਼ੀ ਮਾਰੀ ਗਈ ਜੋ ਉਸ ਦੀ ਧੌਣ ਵਿਚ ਲੱਗੀ ਜਿਸ ਕਾਰਨ ਉਹ ਢੇਰ ਹੋ ਗਿਆ। ਜਦੋਂ ਉਹ ਯੂਟਾ ਵੈਲੀ ਯੂਨੀਵਰਸਿਟੀ, ਓਰਮ ਵਿਖੇ ਇਕ ਸਾਦਾ ਚਿੱਟੇ ਰੰਗ ਦੇ ਟੈਂਟ ਵਿਚ ਨੌਜਵਾਨਾਂ ਨਾਲ ਡਿਬੇਟ ਵਿਚ ਰੁੱਝਾ ਹੋਇਆ ਹੁੰਦਾ ਹੈ, ਉਦੋਂ ਇਹ ਘਟਨਾ ਵਾਪਰੀ। ਇਸ ਹਿਰਦਾ ਕੰਬਾਊ ਘਟਨਾ ਨੇ ਪੂਰੇ ਅਮਰੀਕਾ ਨੂੰ ਬੁਰੀ ਤਰ੍ਹਾਂ ਹਿਲਾ ਕੇ ਰੱਖ ਦਿਤਾ ਹੈ। ਇਹ ਉਸੇ ਹਿੰਸਾ ਅਤੇ ਬੰਦੂਕ ਸੱਭਿਆਚਾਰ ਦਾ ਦਰਦਨਾਕ ਕਾਂਡ ਹੈ ਜੋ ਇਸ ਰਾਸ਼ਟਰ ਦੀ ਮਾਨਸਿਕਤਾ ਦਾ ਅਨਿੱਖੜਵਾਂ ਅੰਗ ਹੈ।

ਚਾਰਲੀ ਕਿਰਕ ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਅਤਿ ਨੇੜਲੇ ਸਮਰਥਕਾਂ ਵਿੱਚੋਂ ਇਕ ਸੀ ਜਿਸ ਨੇ ਉਸ ਦੀ 6 ਜਨਵਰੀ 2021 ਵਿਚ ਅਮਰੀਕੀ ਕੈਪੀਟਲ ’ਤੇ ਉਸ ਦੇ ਹਮਾਇਤੀਆਂ ਵੱਲੋਂ ਹਮਲਾ ਕਰਨ ਦੀ ਯੋਜਨਾ ਵਿਚ ਵੱਡਾ ਯੋਗਦਾਨ ਪਾਉਣ ਅਤੇ ਸੰਨ 2024 ਵਿਚ ਉਸ ਦੀ ਚੋਣ ਮੁਹਿੰਮ ਵਿਚ ਸਭ ਤੋਂ ਵੱਧ 30 ਸਾਲਾਂ ਤੋਂ ਘੱਟ ਉਮਰ ਦੇ ਨੌਜਵਾਨ ਜੋੜਨ ਵਿਚ ਅਹਿਮ ਭੂਮਿਕਾ ਨਿਭਾਈ ਸੀ। ਹੈਰਾਨਕੁੰਨ ਅਮਰੀਕੀ ਹਿੰਸਕ ਇਤਿਹਾਸ ਦੀ ਸਿਤਮਗਿਰੀ ਇਹ ਰਹੀ ਕਿ ਉਸ ਦਾ ਰਾਜਨੀਤਕ ਪਾਲਕ ਅਮਰੀਕੀ ਰਾਸ਼ਟਰਪਤੀ, ਜੋ ਵਿਸ਼ਵ ਦੇ ਸਭ ਤੋਂ ਤਾਕਤਵਰ ਦੇਸ਼ ਦਾ ਸਭ ਤੋਂ ਤਾਕਤਵਰ ਸ਼ਾਸਕ ਹੈ, ਉਸ ਦੀ ਰੱਖਿਆ ਨਾ ਕਰ ਸਕਿਆ। ਜਿਸ ਵੇਲੇ ਉਹ ਡਿਬੇਟ ਕਰ ਰਿਹਾ ਸੀ, ਕਰੀਬ 3000 ਨੌਜਵਾਨ ਉੱਥੇ ਮੌਜੂਦ ਸਨ। ਉਸ ਦੀ ਰੱਖਿਆ ਲਈ 15 ਗਾਰਡ ਉੱਥੇ ਮੌਜੂਦ ਸਨ।

ਚਾਰਲੀ ਕਿਰਕ ਇਕ ਰੱਜੇ-ਪੁੱਜੇ ਅਮਰੀਕੀ ਪਰਿਵਾਰ ਨਾਲ ਸਬੰਧਤ ਸੀ। ਉਸ ਦਾ ਪਿਤਾ ਇਕ ਮਸ਼ਹੂਰ ਆਰਕੀਟੈਕਟ ਅਤੇ ਮਾਂ ਮਾਨਸਿਕ ਸਿਹਤ ਕੌਂਸਲਰ ਸਨ। ਸਕੂਲ ਵਿਚ ਉਹ ਇਕ ਵਧੀਆ ਸਕਾਊਟ ਸੀ ਜਿਸ ਨੇ ‘ਈਗਲ ਸਕਾਊਟ’ ਖਿਤਾਬ ਜਿੱਤਿਆ ਸੀ। ਇਨਕਲਾਬੀ, ਰਾਸ਼ਟਰਵਾਦੀ ਤੇ ਦੇਸ਼ ਭਗਤ ਵਿਚਾਰਾਂ ਦਾ ਧਾਰਨੀ ਹੋਣ ਕਰਕੇ ਸਕੂਲ ਕੈਫੇ ਵਿਚ ਵਸਤਾਂ ਮਹਿੰਗੇ ਭਾਅ ਵੇਚਣ ਵਿਰੁੱਧ ਉਹ ਆਵਾਜ਼ ਉਠਾਉਂਦਾ। ਉਹ ਕਾਲਜ ਸਮੇਂ ਮਾਰਕਸਵਾਦੀ ਵਿਚਾਰਧਾਰਾ ਵਾਲੇ ਪ੍ਰੋਫੈਸਰਾਂ ਨਾਲ ਅਕਸਰ ਖਹਿਬੜ ਪੈਂਦਾ। ਉਹ ਹੋਮੋਫੋਬੀਆ ਤੇ ਇਸਲਾਮੋਫੋਬੀਆ ਵਿਰੋਧੀ ਸੀ।

ਉਸ ਨੇ ਮੌਤ ਵਾਲੇ ਹਫ਼ਤੇ ਵਿਚ ਟਵੀਟ ਕੀਤਾ ਸੀ ਕਿ ਉਹ ਇਸਲਾਮ ਨੂੰ ਖੱਬੇ ਪੱਖੀਆਂ ਦੇ ਹੱਥ ਅਮਰੀਕਾ ਦਾ ਗਲਾ ਕੱਟਣ ਵਾਲੀ ਤਲਵਾਰ ਸਮਝਦਾ ਹੈ। ਉਹ ਰਾਜਨੀਤੀ ਅਤੇ ਚਰਚ ਨੂੰ ਇਕ-ਦੂਜੇ ਤੋਂ ਵੱਖ ਨਹੀਂ ਸਮਝਦਾ। ਅਠਾਰਾਂ ਸਾਲ ਦੀ ਉਮਰ ਵਿਚ ਉਸ ਨੇ ਬਿਲ ਮੋਂਟਗੁਮਰੀ ਨਾਲ ਮਿਲ ਕੇ ‘ਟਰਨਿੰਗ ਪੁਆਇੰਟ ਯੂਐੱਸਏ’ ਸੰਸਥਾ ਸੰਨ 2012 ਵਿਚ ਸਥਾਪਤ ਕੀਤੀ। ਨੌਜਵਾਨਾਂ ਦੇ ਬੁਲਾਰੇ ਵਜੋਂ ਰੇਡੀਓ, ਟੈਲੀਵਿਜ਼ਨ ਅਤੇ ਹੋਰ ਸਟੇਜਾਂ ’ਤੇ ਆਪਣੇ ਵਿਚਾਰ ਪ੍ਰਗਟ ਕਰਦਾ ਰਿਹਾ। ਜਦੋਂ ਉਸ ਨੇ ਇਹ ਜਾਗ੍ਰਿਤੀ ਸੰਸਥਾ ਗਠਿਤ ਕੀਤੀ, ਇਸ ਦੀ ਆਮਦਨ 78000 ਡਾਲਰ ਸੀ।

ਸੰਨ 2024 ਵਿਚ ਇਸ ਦੀ ਸਾਲਾਨਾ ਆਮਦਨ 85 ਮਿਲੀਅਨ ਡਾਲਰ ਦਰਜ ਕੀਤੀ ਗਈ। ਉਸ ਦੇ ਇਕ ਪੋਡਕਾਸਟ ਸ਼ੋਅ ਵਿਚ 5 ਤੋਂ ਸਾਢੇ 7 ਲੱਖ ਲੋਕ ਸ਼ਮੂਲੀਅਤ ਕਰਦੇ। ਵਿਸ਼ਵ ਦੇ 25 ਮਕਬੂਲ ਪੋਡਕਾਸਟਾਂ ਵਿਚ ਉਸ ਦੇ ਪੋਡਕਾਸਟ ਦਾ ਸ਼ੁਮਾਰ ਸੀ। ਉਸ ਦੀ ਦੀ ਸੰਸਥਾ ਦੇ ਸਟਾਫ ਵਿਚ 450 ਲੋਕ ਸਨ। ਟਿਕਟਾਕ ਸਰਵੇ ਅਨੁਸਾਰ ਸੰਨ 2024 ਦੀਆਂ ਰਾਸ਼ਟਰਪਤੀ ਚੋਣਾਂ ਵਿਚ ਡੋਨਾਲਡ ਟਰੰਪ ਦੇ 30 ਤੋਂ ਘੱਟ ਉਮਰ ਦੇ ਜਿਨ੍ਹਾਂ ਹਮਾਇਤੀ ਨੌਜਵਾਨਾਂ ਨੇ ਵੋਟਾਂ ਪਾਈਆਂ, ਉਹ ਦਰਅਸਲ ਚਾਰਲੀ ਕਿਰਕ ਦੇ ਭਰੋਸੇਮੰਦ ਪੈਰੋਕਾਰ ਸਨ।

ਉਸ ਦੇ ਕਾਲੇ, ਯਹੂਦੀ, ਅੰਤਰਜਾਤੀ ਅਤੇ ਪਰਵਾਸੀ ਵਿਅਕਤੀਆਂ ਸਬੰਧੀ ਵਿਚਾਰ ਵਿਵਾਦਤ ਸਨ। ਉਹ ਯੂਨੀਵਰਸਿਟੀ ਤੇ ਕਾਲਜ ਕੈਂਪਸਾਂ ਵਿਚ ਨੌਜਵਾਨਾਂ ਨੂੰ ਡਿਬੇਟ ਲਈ ਵੰਗਾਰਦਾ ਤੇ ਚਣੌਤੀ ਦਿੰਦਾ ਕਿ ਉਹ ਉਸ ਦੇ ਵਿਚਾਰਾਂ ਨੂੰ ਗ਼ਲਤ ਸਾਬਿਤ ਕਰਨ। ਉਸ ਦਾ ਇਹ ਅੰਦਾਜ਼ ਲੱਖਾਂ ਦਰਸ਼ਕਾਂ ਨੂੰ ਪ੍ਰਭਾਵਿਤ ਕਰਦਾ। ਵੈਸੇ ਤਾਂ ਉਸ ਨੇ ਸੰਨ 2010 ਤੋਂ ਸੈਨੇਟਰ ਚੋਣਾਂ ਵੇਲੇ ਤੋਂ ਰਾਜਨੀਤੀ ਵਿਚ ਦਿਲਚਸਪੀ ਲੈਣੀ ਸ਼ੁਰੂ ਕਰ ਦਿੱਤੀ ਸੀ ਪਰ ਟੈਕਸਾਸ ਦੇ ਰਿਪਬਲੀਕਨ ਸੈਨੇਟਰ ਟੈੱਡ ਕਰੁਜ਼ ਅਤੇ ਵਿਸਕਾਂਸਨ ਦੇ ਸਾਬਕਾ ਗਵਰਨਰ ਸਕਾਟ ਵਾਕਰ ਦੀ ਹਮਾਇਤ ਤੋਂ ਬਾਅਦ ਉਹ ਸੰਨ 2016 ਵਿਚ ਡੋਨਾਲਡ ਟੰਰਪ ਦੀ ਹਮਾਇਤ ’ਤੇ ਐਸਾ ਆਇਆ ਕਿ ਫਿਰ ਉਸ ਨੇ ਪਿਛਾਂਹ ਨਹੀਂ ਤੱਕਿਆ। ਉਸ ਦੀ ਸੰਸਥਾ ਨੇ ਟਰੰਪ ਦੀਆਂ 2024 ਦੀਆਂ ਚੋਣਾਂ ਵਿਚ ਲੱਖਾਂ ਡਾਲਰ ਖ਼ਰਚ ਕੀਤੇ। ਸੰਨ 2021 ਵਿਚ ਉਸ ਨੇ ਏਰਿਕਾ ਫਰਾਂਟਜ਼ਵ ਨਾਲ ਸ਼ਾਦੀ ਕੀਤੀ। ਅਗਸਤ 2022 ਵਿਚ ਉਸ ਦੇ ਘਰ ਇਕ ਪੁੱਤਰੀ ਅਤੇ ਜੂਨ 2024 ਵਿਚ ਇਕ ਲੜਕੇ ਨੇ ਜਨਮ ਲਿਆ।

ਕਿਰਕ ਕੋਈ ਰਵਾਇਤੀ ਕਿਸਮ ਦਾ ਰਾਜਨੀਤੀਵਾਨ ਨਹੀਂ ਸੀ। ਉਹ ਆਧੁਨਿਕ ਪੀੜ੍ਹੀ ਦਾ ਧੜੱਲੇਦਾਰ ਰਾਸ਼ਟਰਵਾਦੀ ਆਗੂ ਸੀ। ਉਹ ਅਮਰੀਕੀ ਨੌਜਵਾਨਾਂ ਦੀ ਉੱਭਰਦੀ ਆਸ ਸੀ। ਉਹ ਆਧੁਨਿਕ ਤੇ ਤਾਕਤਵਰ ਅਮਰੀਕਾ ਨੂੰ ਨਵੇਂ ਸਿਰਿਉਂ ਤਹਿ ਕਰਨ ਦੀ ਸਮਰੱਥਾ ਰੱਖਣ ਵਾਲੇ ਪ੍ਰਤੀਬੱਧ ਨੌਜਵਾਨ ਆਗੂ ਵਜੋਂ ਤੇਜ਼ੀ ਨਾਲ ਉੱਭਰ ਰਿਹਾ ਸੀ। ਰੋਨਾਲਡ ਰੀਗਨ ਮਰਹੂਮ ਰਾਸ਼ਟਰਪਤੀ, ਅਮਰੀਕਾ ਬਾਰੇ ਕਹਿੰਦਾ ਸੀ, ‘‘ਪਹਾੜੀ ਤੇ ਇਕ ਚਮਕਦਾ ਸ਼ਹਿਰ।’’ ਚਾਰਲੀ ਕਿਰਕ ਵੀ ਅਮਰੀਕਾ ਨੂੰ ਇਸ ਗਲੋਬ ’ਤੇ ਇਕ ਖ਼ੂਬਸੂਰਤ ਚਮਕਦੇ ਦੇਸ਼ ਵਜੋਂ ਸਥਾਪਤ ਕਰਨ ਦਾ ਸੁਪਨਾ ਵੇਖ ਰਿਹਾ ਸੀ। ਉਹ ਚੀਨ, ਰੂਸ ਅਤੇ ਉੱਤਰੀ ਕੋਰੀਆ ਦੇ ਸਮੂਹਿਕ ਚੈਲੇਂਜ ਸਨਮੁੱਖ ਅਮਰੀਕਾ ਨੂੰ ਇਕ ਭਰੋਸੇਮੰਦ, ਮਜ਼ਬੂਤ ਅਤੇ ਗਲੋਬਲ ਪੱਧਰ ’ਤੇ ਸ਼ਕਤੀਸ਼ਾਲੀ ਰਾਸ਼ਟਰ ਵਜੋਂ ਸਥਾਪਤ ਕਰਨਾ ਚਾਹੁੰਦਾ ਸੀ।

ਅਮਰੀਕਾ ਦੀ ਆਜ਼ਾਦੀ ਰੂਹ ਕੰਬਾਊ ਹਿੰਸਾ ਅਤੇ ਲਹੂ ਭਿੱਜੀਆਂ ਜੰਗਾਂ ’ਤੇ ਖੜ੍ਹੀ ਹੈ। ਇਸ ਦੀ ਰੈਵੋਲੂਸ਼ਨਰੀ ਜੰਗ, ਘਰੋਗੀ ਜੰਗ, ਮੁੜ ਉਸਾਰੀ ਅਤੇ ਸਿਵਲ ਅਧਿਕਾਰ ਜਦੋਜਹਿਦ ਅਨੇਕ ਹਿੰਸਕ ਘਟਨਾਵਾਂ ਦੀਆਂ ਦਾਸਤਾਨਾਂ ਨਾਲ ਲਬਰੇਜ਼ ਹਨ। ਤਾਹੀਓਂ ਤਾਂ ਡੂੰਘੇ ਰਾਜਨਤੀਕ, ਯੁੱਧਨੀਤਕ, ਸਮਾਜਿਕ, ਮਨੋਵਿਗਿਆਨ ਵਿਸ਼ਲੇਸ਼ਣਕਾਰ ਅਮਰੀਕਾ ਨੂੰ ਇਕ ਐਸਾ ਰਾਸ਼ਟਰ ਮੰਨਦੇ ਹਨ ਜਿਸ ਦੀ ਨਸ-ਨਸ ਵਿਚ ਹਿੰਸਾ ਭਰੀ ਹੋਈ ਹੈ।

ਵਿਸ਼ਵ ਦੇ ਵੱਖ-ਵੱਖ ਖਿੱਤਿਆਂ, ਰਾਸ਼ਟਰਾਂ, ਵਰਗਾਂ, ਨਸਲਾਂ, ਜਾਤਾਂ ਅਤੇ ਧਰਮਾਂ ਆਧਾਰਤ ਭਾਈਚਾਰਿਆਂ ਵਿਚ ਹਿੰਸਾ, ਜੰਗਾਂ, ਰਾਜ ਪਲਟਿਆਂ, ਆਗੂਆਂ ਦੇ ਕਤਲਾਂ ਪਿੱਛੇ ਇਸ ਦੀ ਬਦਨਾਮ ਖ਼ੁਫ਼ੀਆ ਏਜੰਸੀ ਸੀਆਈਏ ਡਿਪਲੋਮੈਟਿਕ ਮਿਸ਼ਨਾਂ ਅਤੇ ਏਜੰਟਾਂ ਦਾ ਹੱਥ ਸਾਬਿਤ ਹੁੰਦਾ ਹੈ। ਇਹ ਇਸ ਦੀ ਘਰੇਲੂ ਹਿੰਸਾ ਦਾ ਹੀ ਵਿਕਰਾਲ ਰੂਪ ਹੈ। ਚਾਰਲੀ ਕਿਰਕ ਦਾ ਕਤਲ ਪਿਛਲੇ ਸਾਲਾਂ ਵਿਚ ਅਨੇਕ ਰਾਜਨੀਤਕ ਕਤਲਾਂ ਦੀ ਲੜੀ ਵਿਚ ਹੋਇਆ ਇਕ ਕਤਲ ਹੈ। ਸੰਨ 2024 ਵਿਚ ਰਾਸ਼ਟਰਪਤੀ ਪਦ ਦੀ ਚੋਣ ਮੁਹਿੰਮ ਵੇਲੇ ਰਾਸ਼ਟਰਪਤੀ ਟਰੰਪ ’ਤੇ ਦੋ ਕਾਤਲਾਨਾ ਹਮਲੇ ਹੋਏ।

ਇਕ ਵਿਚ ਉਹ ਮੌਤ ਤੋਂ ਸਿਰਫ਼ 1 ਇੰਚ ਦੂਰ ਰਿਹਾ। ਦਸਬੰਰ, 2024 ’ਚ ਇਕ ਸ਼ੂਟਰ ਨੇ ਯੂਨਾਈਟਿਡ ਹੈਲਥ ਕੇਅਰ ਮੁਖੀ ਕਤਲ ਕਰ ਦਿਤਾ। ਅਪ੍ਰੈਲ, 2025 ਵਿਚ ਪੈਨਸਲਵੇਨੀਆ ਦੇ ਗਵਰਨਰ ਦਾ ਘਰ ਹਿੰਸਾਕਾਰੀਆਂ ਅਗਨਭੇਟ ਕਰ ਦਿੱਤਾ। ਗਾਜ਼ਾ ’ਚ ਨਸਲਘਾਤ ਜੋ ਅਮਰੀਕਾ ਦੀ ਸ਼ਹਿ ’ਤੇ ਇਜ਼ਰਾਈਲ ਕਰ ਰਿਹਾ ਹੈ, ਵਿਰੁੱਧ 50 ਰਾਜਾਂ ਵਿਚ ਸੈਂਕੜੇ ਵਿਰੋਧ ਪ੍ਰਦਰਸ਼ਨ ਵੇਖਣ ਨੂੰ ਮਿਲੇ। ਜੂਨ 2025 ਵਿਚ ਪੁਲਿਸ ਵਰਦੀ ਵਿਚ ਕਾਤਲ ਨੇ ਮਿਨਸੋਟਾ ਰਾਜ ਵਿਧਾਨ ਸਭਾ ਦੀ ਸਪੀਕਰ ਅਤੇ ਉਸ ਦਾ ਪਤੀ ਮਾਰ ਮੁਕਾਏ। ਇਕ ਹੋਰ ਵਿਧਾਇਕ ਅਤੇ ਉਸ ਦੀ ਪਤਨੀ ਜ਼ਖ਼ਮੀ ਕਰ ਦਿੱਤੇ। ਇਕ ਹੋਰ ਘਟਨਾ ਵਿਚ ਇਕ ਪੁਲਿਸ ਅਫ਼ਸਰ ਬਿਮਾਰੀਆਂ ਰੋਕੂ ਕੇਂਦਰ ਵਿਚ ਮੌਤ ਦੇ ਘਾਟ ਉਤਾਰ ਦਿੱਤਾ।

ਸਰਵੇ ਵਿਖਾਉਂਦੇ ਹਨ ਕਿ ਕਿਵੇਂ ਅਮਰੀਕਾ ’ਚ ਰਾਜਨੀਤਕ ਕਤਲਾਂ ਵਿਚ ਵਾਧਾ ਦਰਜ ਕੀਤਾ ਗਿਆ ਹੈ। ਹਾਲਾਂਕਿ ਬਹੁ-ਗਿਣਤੀ ਲੋਕ ਅਜਿਹਾ ਨਹੀਂ ਚਾਹੁੰਦੇ। ਸ਼ਿਕਾਗੋ ਪ੍ਰਾਜੈਕਟ ਮੁਖੀ ਰਾਬਰਟ ਪੇਪ ‘ਨਿਊਯਾਰਕ ਟਾਈਮਜ਼’ ਵਿਚ ਲਿਖਦਾ ਹੈ ਕਿ ਉਸ ਵੱਲੋਂ ਕੀਤਾ ਸਰਵੇ ਅਤਿ ਚਿੰਤਾਜਨਕ ਹੈ।

ਚਾਲੀ ਪ੍ਰਤੀਸ਼ਤ ਡੈਮੋਕ੍ਰੇਟਾਂ ਨੇ ਟਰੰਪ ਨੂੰ ਸੱਤਾ ਤੋਂ ਲਾਂਭੇ ਕਰਨ ਲਈ ਹਿੰਸਾ ਦਾ ਸਹਾਰਾ ਲਿਆ। ਲਗਪਗ 25 ਪ੍ਰਤੀਸ਼ਤ ਰਿਪਬਲਿਕਨ ਟਰੰਪ ਵਿਰੋਧੀ ਮਜ਼ਾਹਰੇ ਫ਼ੌਜ ਦੀ ਮਦਦ ਨਾਲ ਦਬਾਉਣ ਨੂੰ ਜਾਇਜ਼ ਕਰਾਰ ਦਿੰਦੇ ਹਨ। ਹੁਣ ਇਨ੍ਹਾਂ ਦੀ ਗਿਣਤੀ ਦੁੱਗਣੀ ਹੋ ਚੁੱਕੀ ਹੈ। ‘ਦਿ ਗਾਰਡੀਅਨ’ ਅਖ਼ਬਾਰ ਨੂੰ 10 ਸਤੰਬਰ, 2025 ਵਿਚ ਦੱਸਦੇ ਹਨ ਕਿ ਅਸੀਂ ਵੱਧ ਤੋਂ ਵੱਧ ਅੱਗ ਦੇ ਗੋਲ਼ੇ ਬਣ ਰਹੇ ਹਾਂ। ਉਨ੍ਹਾਂ ਜ਼ੋਰਦਾਰ ਢੰਗ ਨਾਲ ਮੰਗ ਕੀਤੀ ਕਿ ਰਾਜਨੀਤੀਵਾਨ ਹਿੰਸਾ ਵਿਰੁੱਧ ਖੁੱਲ੍ਹ ਕੇ ਆਵਾਜ਼ ਬੁਲੰਦ ਕਰਨ। ਹਿੰਸਾ ਦੀ ਨਿੰਦਾ ਸਾਨੂੰ ਅੱਗੇ ਵਧਣ ਵਿਚ ਮਦਦ ਕਰੇਗੀ।

ਟਰੰਪ ਅਜੋਕੀ ਹਿੰਸਾ ਨੂੰ ਜੋ ਬਾਇਡਨ ਕਾਲ ਵੇਲੇ ਤਾਕਤਵਰ ਖੱਬੇ-ਪੱਖੀ ਜਮਾਵੜੇ ਨੂੰ ਜ਼ਿੰਮੇਵਾਰ ਠਹਿਰਾਉਂਦੇ ਹਨ। ਸੰਨ 2016 ਤੋਂ 2023 ਤੱਕ 21 ਦਸਤਾਵੇਜ਼ੀ ਅੱਤਵਾਦੀ ਹਮਲੇ ਦਰਜ ਕੀਤੇ ਗਏ ਹਨ ਜੋ ਅਰਮੀਕੀ ਰਾਜਨੀਤਕ ਇਤਖ਼ਿਲਾਫ਼ਾਂ ਦੀ ਉਪਜ ਹਨ। ਇਸ ਵਿਚ ਸੰਨ 2024 ਵਿਚ ਟਰੰਪ ’ਤੇ ਦੋ ਹਮਲੇ ਸ਼ਾਮਲ ਨਹੀਂ ਹਨ।

ਇਲੋਨੀਅਸ ਡੈਮੋਕ੍ਰੈਟ ਗਵਰਨਰ ਜੇ.ਬੀ. ਪ੍ਰਿਤਜ਼ਕਰ ਦਾ ਕਹਿਣਾ ਹੈ, ‘‘ਬਦਕਿਸਮਤੀ ਨਾਲ ਰਾਜਨੀਤਕ ਹਿੰਸਾ ਦੇਸ਼ ਵਿਚ ਵਧ ਰਹੀ ਹੈ। ਇਹ ਬੰਦ ਹੋਣੀ ਚਾਹੀਦੀ ਹੈ। ਮੈਂ ਸਮਝਦਾ ਹਾਂ ਕਿ ਬਹੁਤ ਸਾਰੇ ਸਿਆਸੀ ਲੋਕ ਹੀ ਹਨ ਜੋ ਇਸ ਨੂੰ ਪੈਦਾ ਕਰ ਰਹੇ ਹਨ। ਰਾਸ਼ਟਰਪਤੀ (ਟਰੰਪ) ਦੀ ਬੋਲ-ਬਾਣੀ ਵੀ ਇਸ ਲਈ ਜ਼ਿੰਮੇਵਾਰ ਹੈ।’’ ਕਾਨੂੰਨ ਦੇ ਰਾਜ ਨੂੰ ਟਿੱਚ ਜਾਣਨਾ, ਕਾਰਜਕਾਰੀ ਸ਼ਕਤੀ ’ਤੇ ਲੱਗੀਆਂ ਸੰਵਿਧਾਨਕ ਰੋਕਾਂ ਨੂੰ ਨਾ ਮੰਨਣਾ ਅਤੇ ਮਨੁੱਖੀ ਆਜ਼ਾਦੀਆਂ ਦੇ ਖ਼ਾਤਮੇ ਸਬੰਧੀ ਟਰੰਪ ਦੀਆਂ ਮਨਮਾਨੀਆਂ ਦੇਸ਼ ਵਿਚ ਹਿੰਸਾ ਨੂੰ ਲਾਂਬੂ ਲਾਉਣ ਦੇ ਸਮਾਨ ਹਨ।

ਓਧਰ ਰਾਸ਼ਟਰਪਤੀ ਟਰੰਪ ਚਾਰਲੀ ਨੂੰ ‘ਵਿਚਾਰਾਂ ਦੀ ਅਜ਼ਾਦੀ ਦਾ ਹਰਮਨ ਪਿਆਰਾ ਅਮਰ ਸ਼ਹੀਦ’ ਕਰਾਰ ਦੇ ਰਹੇ ਹਨ। ਮਰਨ ਉਪਰੰਤ ‘ਆਜ਼ਾਦੀ ਦੇ ਰਾਸ਼ਟਰਪਤੀ ਮੈਡਲ’ ਨਾਲ ਨਿਵਾਜ਼ ਰਹੇ ਹਨ।

ਅਮਰੀਕੀ ਸੰਵਿਧਾਨ ਦੀ ਦੂਸਰੀ ਸੋਧ ਜੋ ਅਮਰੀਕੀਆਂ ਨੂੰ ਬੰਦੂਕ ਰੱਖਣ ਦਾ ਸਵੈ-ਰੱਖਿਆ ਦਾ ਅਧਿਕਾਰ ਦਿੰਦੀ ਹੈ, ਉਸ ਵੱਲੋਂ ਪੈਦਾ ਹਿੰਸਕ ਸੱਭਿਆਚਾਰ ਦੀ ਕੀਮਤ ਆਏ ਦਿਨ ਉਤਰਾਨ ਦੇ ਬਾਵਜੂਦ ਇਸ ਨੂੰ ਖ਼ਤਮ ਕਰਨ ਲਈ ਤਿਆਰ ਨਹੀਂ। ਹਿੰਸਕ ਗੰਨ ਲਾਬੀ ਬਹੁਤ ਭਾਰੂ ਹੈ।

-ਦਰਬਾਰਾ ਸਿੰਘ ਕਾਹਲੋਂ

-(ਸਾਬਕਾ ਰਾਜ ਸੂਚਨਾ ਕਮਿਸ਼ਨਰ ਪੰਜਾਬ)।

-ਸੰਪਰਕ : +12898292929