ਭਾਰਤੀ ਕੋਚਿੰਗ ਸਟਾਫ 'ਚ ਸ਼ਾਮਲ ਹੋਵੇਗਾ ਇਹ ਜਾਦੂਈ ਸਪਿਨਰ, ਗੰਭੀਰ ਨੇ ਬੋਰਡ ਸਾਹਮਣੇ ਰੱਖੀ ਆਪਣੀ ਮੰਗ

ਸਪੋਰਟਸ ਡੈਸਕ, ਨਵੀਂ ਦਿੱਲੀ: ਭਾਰਤੀ ਕ੍ਰਿਕਟ ਟੀਮ ਦੇ ਕੋਚਿੰਗ ਸੈੱਟਅੱਪ 'ਚ ਵੱਡਾ ਬਦਲਾਅ ਹੋ ਸਕਦਾ ਹੈ। ਗੌਤਮ ਗੰਭੀਰ ਦੇ ਨਾਲ ਇਕ ਹੋਰ ਕੋਚ ਟੀਮ ਇੰਡੀਆ ਨਾਲ ਜੁੜ ਸਕਦਾ ਹੈ। ਅਸਲ ਵਿਚ, ਸਾਈਰਾਜ ਬਹੁਤੁਲੇ ਭਾਰਤੀ ਟੀਮ 'ਚ ਸਪਿਨ ਗੇਂਦਬਾਜ਼ੀ ਕੋਚ ਵਜੋਂ ਸ਼ਾਮਲ ਹੋ ਸਕਦੇ ਹਨ। ਬਹੁਤੁਲੇ ਪਹਿਲਾਂ ਵੀ ਭਾਰਤੀ ਟੀਮ ਨਾਲ ਜੁੜ ਚੁੱਕੇ ਹਨ, ਪਰ ਉਹ ਕਦੇ ਪੱਕੇ (ਪਰਮਾਨੈਂਟ) ਕੋਚ ਨਹੀਂ ਬਣੇ।

ਹੈੱਡ ਕੋਚ ਗੰਭੀਰ ਵੀ ਬਹੁਤੁਲੇ ਤੋਂ ਕਾਫੀ ਪ੍ਰਭਾਵਿਤ ਦਿਖਾਈ ਦਿੰਦੇ ਹਨ। ਉਨ੍ਹਾਂ ਨੇ ਵੀ ਬੀਸੀਸੀਆਈ (BCCI) ਤੋਂ ਬਹੁਤੁਲੇ ਨੂੰ ਕੋਚਿੰਗ ਸਟਾਫ ਵਿੱਚ ਸ਼ਾਮਲ ਕਰਨ ਦੀ ਮੰਗ ਕੀਤੀ ਹੈ। ਭਾਰਤੀ ਟੀਮ ਵਿੱਚ ਫਿਲਹਾਲ ਹੈੱਡ ਕੋਚ ਤੋਂ ਇਲਾਵਾ ਬੱਲੇਬਾਜ਼ੀ ਕੋਚ ਸਿਤਾਂਸ਼ੂ ਕੋਟਕ, ਤੇਜ਼ ਗੇਂਦਬਾਜ਼ੀ ਕੋਚ ਮੋਰਨੀ ਮੋਰਕਲ, ਫੀਲਡਿੰਗ ਕੋਚ ਟੀ ਦਿਲੀਪ ਅਤੇ ਸਹਾਇਕ ਕੋਚ ਰਿਆਨ ਟੈਨ ਡੋਸ਼ੇਟ ਸ਼ਾਮਲ ਹਨ। ਹਾਲਾਂਕਿ, ਕੋਈ ਸਪਿਨ ਗੇਂਦਬਾਜ਼ੀ ਕੋਚ ਨਹੀਂ ਹੈ ਅਤੇ ਅਜਿਹੇ ਵਿੱਚ ਉਨ੍ਹਾਂ ਨੂੰ ਕੋਚਿੰਗ ਸਟਾਫ ਵਿੱਚ ਸ਼ਾਮਲ ਕੀਤਾ ਜਾ ਸਕਦਾ ਹੈ।

ਸਾਈਰਾਜ ਬਹੁਤੁਲੇ ਬਣ ਸਕਦੇ ਹਨ ਕੋਚ

ਕ੍ਰਿਕਬਜ਼ ਦੀ ਇਕ ਰਿਪੋਰਟ ਮੁਤਾਬਕ ਸਾਈਰਾਜ ਬਹੁਤੁਲੇ ਭਾਰਤ ਦੇ ਕੋਚਿੰਗ ਸਟਾਫ 'ਚ ਸ਼ਾਮਲ ਹੋ ਸਕਦੇ ਹਨ। ਉਹ ਇਸ ਸਮੇਂ ਪੰਜਾਬ ਕਿੰਗਜ਼ ਨਾਲ ਜੁੜੇ ਹੋਏ ਹਨ, ਪਰ ਉਨ੍ਹਾਂ ਦੇ ਫਰੈਂਚਾਈਜ਼ੀ ਤੋਂ ਵੱਖ ਹੋਣ ਦੀ ਉਮੀਦ ਜਤਾਈ ਜਾ ਰਹੀ ਹੈ। ਅਜਿਹੇ ਵਿਚ ਉਨ੍ਹਾਂ ਨੇ ਬੀਸੀਸੀਆਈ ਦੇ ਸੀਨੀਅਰ ਅਧਿਕਾਰੀਆਂ ਨਾਲ ਇਸ ਸਬੰਧ ਵਿੱਚ ਗੱਲ ਕੀਤੀ ਹੈ। ਇਸ ਤੋਂ ਇਲਾਵਾ ਗੰਭੀਰ ਨੇ ਵੀ ਉਨ੍ਹਾਂ ਨੂੰ ਕੋਚ ਬਣਾਉਣ ਦੀ ਸਿਫਾਰਸ਼ ਕੀਤੀ ਹੈ।

ਬਹੁਤੁਲੇ ਇਸ ਤੋਂ ਪਹਿਲਾਂ ਕਈ ਵਾਰ ਭਾਰਤੀ ਟੀਮ ਨਾਲ ਯਾਤਰਾ ਕਰ ਚੁੱਕੇ ਹਨ। ਉਹ ਨੈਸ਼ਨਲ ਕ੍ਰਿਕਟ ਅਕੈਡਮੀ (NCA) ਵਿੱਚ ਵੀ ਰਹਿ ਚੁੱਕੇ ਹਨ, ਜਿੱਥੇ ਕਈ ਮੌਕਿਆਂ 'ਤੇ ਉਨ੍ਹਾਂ ਨੇ ਰਾਹੁਲ ਦ੍ਰਾਵਿੜ ਦੀ ਗੈਰ-ਮੌਜੂਦਗੀ ਵਿੱਚ ਸਿਤਾਂਸ਼ੂ ਕੋਟਕ ਦੇ ਨਾਲ ਭਾਰਤ ਦੇ ਕੋਚ ਵਜੋਂ ਕੰਮ ਕੀਤਾ ਸੀ। ਹੁਣ ਉਨ੍ਹਾਂ ਦੀ ਕੋਚਿੰਗ ਵਿੱਚ ਐਂਟਰੀ ਹੋ ਸਕਦੀ ਹੈ। ਹਾਲਾਂਕਿ, ਹੁਣ ਤੱਕ ਇਸ ਬਾਰੇ ਬੀਸੀਸੀਆਈ ਜਾਂ ਕਿਸੇ ਹੋਰ ਵੱਲੋਂ ਕੋਈ ਅਧਿਕਾਰਤ ਜਾਣਕਾਰੀ ਸਾਹਮਣੇ ਨਹੀਂ ਆਈ ਹੈ।

ਬਹੁਤੁਲੇ ਦਾ ਕ੍ਰਿਕਟ ਕਰੀਅਰ

ਬਹੁਤੁਲੇ ਭਾਰਤ ਲਈ ਵੀ ਕ੍ਰਿਕਟ ਖੇਡ ਚੁੱਕੇ ਹਨ। ਉਨ੍ਹਾਂ ਨੇ 2 ਟੈਸਟ ਮੈਚ ਖੇਡੇ ਹਨ ਅਤੇ 3 ਵਿਕਟਾਂ ਆਪਣੇ ਨਾਮ ਕੀਤੀਆਂ ਹਨ। ਇਸ ਤੋਂ ਇਲਾਵਾ 8 ਵਨਡੇ ਮੈਚਾਂ ਵਿੱਚ 2 ਵਿਕਟਾਂ ਲਈਆਂ। ਉਨ੍ਹਾਂ ਨੇ 188 ਫਰਸਟ ਕਲਾਸ ਮੈਚ ਖੇਡੇ ਹਨ, ਜਿਨ੍ਹਾਂ ਵਿੱਚ ਉਨ੍ਹਾਂ ਨੇ 6176 ਦੌੜਾਂ ਬਣਾਈਆਂ ਹਨ ਅਤੇ 630 ਵਿਕਟਾਂ ਆਪਣੇ ਨਾਮ ਕੀਤੀਆਂ। 143 ਲਿਸਟ-ਏ ਮੈਚਾਂ ਵਿੱਚ 1367 ਦੌੜਾਂ ਬਣਾਈਆਂ, ਜਦਕਿ 197 ਵਿਕਟਾਂ ਹਾਸਲ ਕੀਤੀਆਂ ਹਨ।