IPL 2026 'ਚ ਵਿਵਾਦਾਂ ਦੇ ਘੇਰੇ 'ਚ ਮੁੰਬਈ ਇੰਡੀਅਨਜ਼, 'Concussion' ਨਿਯਮ ਦੀ ਗਲਤ ਵਰਤੋਂ ਦੇ ਲੱਗੇ ਗੰਭੀਰ ਦੋਸ਼

ਸਪੋਰਟਸ ਡੈਸਕ, ਨਵੀਂ ਦਿੱਲੀ: ਪੰਜ ਵਾਰ ਦੀ ਆਈਪੀਐਲ ਚੈਂਪੀਅਨ ਮੁੰਬਈ ਇੰਡੀਅਨਜ਼ ਆਈਪੀਐਲ 2026 ਦੇ ਵਿਚਕਾਰ ਵਿਵਾਦਾਂ ਵਿੱਚ ਘਿਰ ਗਈ ਹੈ। ਫਰੈਂਚਾਈਜ਼ੀ 'ਤੇ 'ਕਨਕਸ਼ਨ ਸਬ' (Concussion Sub) ਨਿਯਮ ਦੀ ਗਲਤ ਵਰਤੋਂ ਕਰਨ ਦਾ ਗੰਭੀਰ ਦੋਸ਼ ਲੱਗਾ ਹੈ।

ਚੇਨਈ ਸੁਪਰ ਕਿੰਗਜ਼ ਵਿਰੁੱਧ ਵੀਰਵਾਰ ਨੂੰ ਜਸਪ੍ਰੀਤ ਬੁਮਰਾਹ ਦੀ ਗੇਂਦ 'ਤੇ ਕਾਰਤਿਕ ਸ਼ਰਮਾ ਦਾ ਕੈਚ ਲੈਂਦੇ ਸਮੇਂ ਮਿਸ਼ੇਲ ਸੈਂਟਨਰ ਜ਼ਖ਼ਮੀ ਹੋ ਗਏ। ਉਨ੍ਹਾਂ ਦੇ ਮੋਢੇ 'ਤੇ ਸੱਟ ਲੱਗੀ ਸੀ। ਮੁੰਬਈ ਦੇ ਇਸ ਆਲਰਾਊਂਡਰ ਨੂੰ ਮੈਦਾਨ ਤੋਂ ਬਾਹਰ ਲਿਜਾਣਾ ਪਿਆ। ਮੁੰਬਈ ਇੰਡੀਅਨਜ਼ (MI) ਨੇ ਮਿਸ਼ੇਲ ਸੈਂਟਨਰ ਦੀ ਜਗ੍ਹਾ ਸ਼ਾਰਦੁਲ ਠਾਕੁਰ ਨੂੰ ਸ਼ਾਮਲ ਕਰਨ ਦੀ ਰਸਮੀ ਬੇਨਤੀ ਕੀਤੀ, ਜਿਸ ਨੂੰ ਸਵੀਕਾਰ ਕਰ ਲਿਆ ਗਿਆ।

ਸਵਾਲਾਂ ਦੇ ਘੇਰੇ 'ਚ ਮੁੰਬਈ ਦੀ ਟੀਮ

ਸਬਸਟੀਟਿਊਟ (ਬਦਲਵੇਂ ਖਿਡਾਰੀ) ਨੂੰ ਲੈ ਕੇ ਵੱਡਾ ਵਿਵਾਦ ਖੜ੍ਹਾ ਹੋ ਗਿਆ ਹੈ ਕਿਉਂਕਿ ਸਵਾਲ ਸਿਰਫ਼ ਇਹ ਨਹੀਂ ਉੱਠ ਰਹੇ ਕਿ ਮੁੰਬਈ ਨੇ ਕਥਿਤ ਤੌਰ 'ਤੇ ਕਨਕਸ਼ਨ ਨਿਯਮ ਦੀ ਗਲਤ ਵਰਤੋਂ ਕੀਤੀ ਹੈ, ਬਲਕਿ ਇਹ ਵੀ ਕਿ ਕੀ ਸ਼ਾਰਦੁਲ ਠਾਕੁਰ ਨੂੰ ਸੈਂਟਨਰ ਦੇ ਸਮਾਨ ਬਦਲ ਵਜੋਂ ਮੰਨਿਆ ਜਾ ਸਕਦਾ ਹੈ।

ਆਈਪੀਐਲ ਦੇ ਨਿਯਮਾਂ ਅਨੁਸਾਰ, ਕਨਕਸ਼ਨ ਸਬ ਦੀ ਇਜਾਜ਼ਤ ਉਦੋਂ ਹੀ ਦਿੱਤੀ ਜਾਂਦੀ ਹੈ ਜਦੋਂ ਕਿਸੇ ਖਿਡਾਰੀ ਦੇ ਸਿਰ ਜਾਂ ਗਰਦਨ 'ਤੇ ਸੱਟ ਲੱਗੇ। ਸੱਟ ਦੀ ਗੰਭੀਰਤਾ ਨੂੰ ਮੈਡੀਕਲ ਜਾਂਚ ਦੇ ਅਧਾਰ 'ਤੇ ਮੰਨਿਆ ਜਾਂਦਾ ਹੈ ਅਤੇ ਫਿਰ ਮੈਚ ਰੈਫਰੀ ਇਸ ਦੀ ਮਨਜ਼ੂਰੀ ਦਿੰਦਾ ਹੈ। ਸੈਂਟਨਰ ਦੇ ਮਾਮਲੇ ਵਿੱਚ ਸੱਟ ਮੋਢੇ 'ਤੇ ਲੱਗੀ ਨਜ਼ਰ ਆਈ, ਜਦਕਿ ਸਬਸਟੀਟਿਊਟ ਦੀ ਮੰਗ ਨਿਊਰੋਲੌਜੀਕਲ ਲੱਛਣਾਂ (ਦਿਮਾਗੀ ਪ੍ਰਭਾਵ) ਦੇ ਅਧਾਰ 'ਤੇ ਕੀਤੀ ਗਈ ਸੀ।

ਕੀ ਹੈ ICC ਦਾ ਨਿਯਮ?

ਮੁੰਬਈ ਇੰਡੀਅਨਜ਼ ਦੇ ਡਰੈਸਿੰਗ ਰੂਮ ਵਿੱਚ ਬਾਅਦ ਵਿੱਚ ਦੇਖਿਆ ਗਿਆ ਕਿ ਮਿਸ਼ੇਲ ਸੈਂਟਨਰ ਆਪਣੇ ਮੋਢੇ 'ਤੇ ਬਰਫ਼ ਨਾਲ ਸਿਕਾਈ ਕਰ ਰਹੇ ਸਨ। ਆਈਸੀਸੀ ਨਿਯਮ ਅਨੁਸਾਰ ਕਨਕਸ਼ਨ ਸਬਸਟੀਟਿਊਟ ਉਦੋਂ ਲਿਆ ਜਾ ਸਕਦਾ ਹੈ:

ਕਨਕਸ਼ਨ ਹੋਣ ਜਾਂ ਸ਼ੱਕ ਹੋਣ ਦੀ ਸਥਿਤੀ ਵਿੱਚ ਤੁਰੰਤ ਵਰਤੋਂ ਕਰ ਸਕਦੇ ਹੋ।

ਮੈਦਾਨ ਦੇ ਅੰਦਰ ਜਾਂ ਬਾਹਰ ਜਾਂਚ ਕਰਨ ਤੋਂ ਬਾਅਦ।

ਜਾਂ ਕਿਸੇ ਹੋਰ ਸਮੇਂ ਜਦੋਂ ਕਨਕਸ਼ਨ ਹੋਇਆ ਹੋਵੇ ਜਾਂ ਸ਼ੱਕ ਹੋਵੇ।

ਜੈਵਰਧਨੇ ਨੇ ਕੀ ਕਿਹਾ?

ਮੁੰਬਈ ਇੰਡੀਅਨਜ਼ ਦੇ ਹੈੱਡ ਕੋਚ ਮਹੇਲਾ ਜੈਵਰਧਨੇ ਨੇ ਪ੍ਰੈੱਸ ਕਾਨਫਰੰਸ ਵਿੱਚ ਇਸ ਮਾਮਲੇ 'ਤੇ ਸਫ਼ਾਈ ਪੇਸ਼ ਕੀਤੀ। ਉਨ੍ਹਾਂ ਕਿਹਾ ਕਿ ਕੈਚ ਲੈਂਦੇ ਸਮੇਂ ਸੈਂਟਨਰ ਦੀ ਗਰਦਨ ਅਤੇ ਮੋਢੇ ਦੋਵਾਂ 'ਤੇ ਸੱਟ ਲੱਗੀ ਸੀ। ਉਨ੍ਹਾਂ ਨੇ ਨਾਲ ਹੀ ਖੁਲਾਸਾ ਕੀਤਾ ਕਿ ਜਦੋਂ ਪ੍ਰਬੰਧਕਾਂ ਨੇ ਕਨਕਸ਼ਨ ਸਬਸਟੀਟਿਊਟ ਦੀ ਮੰਗ ਕੀਤੀ ਤਾਂ ਮੈਚ ਰੈਫਰੀ ਨੇ ਸ਼ਾਰਦੁਲ ਨੂੰ ਉਨ੍ਹਾਂ ਦੀ ਜਗ੍ਹਾ ਲੈਣ ਦੀ ਇਜਾਜ਼ਤ ਦਿੱਤੀ।

ਹਾਲਾਂਕਿ, ਸ਼ਾਰਦੁਲ ਦੇ ਸੈਂਟਨਰ ਨੂੰ ਰਿਪਲੇਸ ਕਰਨ ਦਾ ਕੋਈ ਫਾਇਦਾ ਨਹੀਂ ਹੋਇਆ ਕਿਉਂਕਿ ਮੁੰਬਈ ਇੰਡੀਅਨਜ਼ ਨੂੰ ਆਪਣੇ ਆਈਪੀਐਲ ਇਤਿਹਾਸ ਵਿੱਚ ਸੀਐਸਕੇ ਦੇ ਹੱਥੋਂ ਦੌੜਾਂ ਦੇ ਅੰਤਰ ਨਾਲ ਸਭ ਤੋਂ ਵੱਡੀ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਮੁੰਬਈ ਨੂੰ ਸੀਐਸਕੇ ਨੇ 103 ਦੌੜਾਂ ਨਾਲ ਹਰਾਇਆ।