RCB vs GT: ਆਰਸੀਬੀ ਤੋਂ ਮਿਲੀ ਹਾਰ ਮਗਰੋਂ ਸ਼ੁਭਮਨ ਗਿੱਲ ਦੀ ਗੇਂਦਬਾਜ਼ਾਂ ਨੂੰ ਦੋ ਟੁੱਕ, ਜੰਮ ਕੇ ਗੁੱਸੇ ਹੋਏ ਗੁਜਰਾਤ ਦੇ ਕਪਤਾਨ

ਸਪੋਰਟਸ ਡੈਸਕ, ਨਵੀਂ ਦਿੱਲੀ: ਗੁਜਰਾਤ ਟਾਈਟਨਸ ਦੇ ਕਪਤਾਨ ਸ਼ੁਭਮਨ ਗਿੱਲ ਸ਼ੁੱਕਰਵਾਰ ਨੂੰ ਰਾਇਲ ਚੈਲੇਂਜਰਸ ਬੈਂਗਲੁਰੂ ਤੋਂ ਮਿਲੀ ਹਾਰ ਤੋਂ ਬਾਅਦ ਆਪਣੀ ਟੀਮ ਦੇ ਗੇਂਦਬਾਜ਼ਾਂ 'ਤੇ ਕਾਫੀ ਗੁੱਸੇ ਨਜ਼ਰ ਆਏ। ਉਨ੍ਹਾਂ ਨੇ ਸਾਫ ਕਿਹਾ ਹੈ ਕਿ ਜਿੱਤਣ ਲਈ ਗੇਂਦਬਾਜ਼ਾਂ ਨੂੰ ਵਿਕਟਾਂ ਲੈਣ ਦੀ ਲੋੜ ਹੈ। ਉਨ੍ਹਾਂ ਨੇ ਨਾਲ ਹੀ ਫੀਲਡਿੰਗ 'ਤੇ ਵੀ ਨਾਰਾਜ਼ਗੀ ਜ਼ਾਹਰ ਕੀਤੀ ਹੈ।

ਗੁਜਰਾਤ ਨੇ ਐੱਮ. ਚਿੰਨਾਸਵਾਮੀ ਸਟੇਡੀਅਮ 'ਚ ਖੇਡੇ ਗਏ ਮੈਚ 'ਚ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ ਸਾਈ ਸੁਦਰਸ਼ਨ ਦੇ ਸੈਂਕੜੇ ਦੇ ਦਮ 'ਤੇ ਤਿੰਨ ਵਿਕਟਾਂ ਗੁਆ ਕੇ 205 ਰਨ ਬਣਾਏ ਸਨ। ਇਸ ਟੀਚੇ ਨੂੰ ਆਰਸੀਬੀ ਨੇ ਪੰਜ ਵਿਕਟਾਂ ਗੁਆ ਕੇ 18.5 ਓਵਰਾਂ ਵਿੱਚ ਹਾਸਲ ਕਰ ਲਿਆ।

ਵਿਰਾਟ ਦਾ ਛੁੱਟਿਆ ਕੈਚ

ਆਰਸੀਬੀ ਲਈ ਵਿਰਾਟ ਕੋਹਲੀ ਨੇ 44 ਗੇਂਦਾਂ 'ਤੇ 81 ਰਨਾਂ ਦੀ ਪਾਰੀ ਖੇਡੀ ਜਿਸ ਵਿੱਚ ਅੱਠ ਚੌਕੇ ਅਤੇ ਚਾਰ ਛੱਕੇ ਸ਼ਾਮਲ ਰਹੇ। ਕੋਹਲੀ ਨੂੰ ਇਸ ਮੈਚ ਵਿੱਚ ਜੀਵਨਦਾਨ ਮਿਲਿਆ ਸੀ ਜਦੋਂ ਉਨ੍ਹਾਂ ਦਾ ਖਾਤਾ ਵੀ ਨਹੀਂ ਖੁੱਲ੍ਹਿਆ ਸੀ। ਇਸ ਗੱਲ ਨੂੰ ਲੈ ਕੇ ਵੀ ਗਿੱਲ ਕਾਫੀ ਨਾਰਾਜ਼ ਨਜ਼ਰ ਆਏ। ਗਿੱਲ ਨੇ 16ਵੇਂ ਤੋਂ 19ਵੇਂ ਓਵਰ ਤੱਕ ਗੁਜਰਾਤ ਦੇ ਬੱਲੇਬਾਜ਼ਾਂ ਵੱਲੋਂ ਘੱਟ ਰਨ ਬਣਾਉਣ ਨੂੰ ਲੈ ਕੇ ਵੀ ਗੁੱਸਾ ਜ਼ਾਹਰ ਕੀਤਾ।

ਗਿੱਲ ਨੇ ਮੈਚ ਤੋਂ ਬਾਅਦ ਕਿਹਾ, "ਯਕੀਨੀ ਤੌਰ 'ਤੇ 16ਵੇਂ ਓਵਰ ਤੋਂ 19ਵੇਂ ਓਵਰ ਤੱਕ, ਤਿੰਨ ਓਵਰਾਂ ਵਿੱਚ ਅਸੀਂ ਬਾਊਂਡਰੀ ਵੀ ਨਹੀਂ ਲਗਾਈ। ਪਾਵਰਪਲੇ ਤੱਕ ਅਸੀਂ ਚੰਗੀ ਸਥਿਤੀ ਵਿੱਚ ਸੀ। ਸਾਨੂੰ ਵਿਕਟਾਂ ਲੈਣ ਦੀ ਲੋੜ ਸੀ। ਜਦੋਂ ਬੱਲੇਬਾਜ਼ ਦਾ ਕੈਚ ਸਿਫ਼ਰ (ਜ਼ੀਰੋ) 'ਤੇ ਛੁੱਟ ਜਾਵੇ ਤਾਂ ਇਹ ਫੀਲਡਰ ਲਈ ਮੁਸ਼ਕਲ ਹੁੰਦਾ ਹੈ। ਪਰ ਤੁਸੀਂ ਕਿਵੇਂ ਵਾਪਸੀ ਕਰਦੇ ਹੋ ਇਹ ਇਸ 'ਤੇ ਨਿਰਭਰ ਕਰਦਾ ਹੈ। ਸਾਨੂੰ ਸਾਡੇ ਮੌਕੇ ਮਿਲੇ ਸਨ, ਪਰ ਅਸੀਂ ਲਗਾਤਾਰ ਸਹੀ ਲੈਂਥ 'ਤੇ ਗੇਂਦ ਨੂੰ ਨਹੀਂ ਪਾ ਸਕੇ ਜੋ ਕਾਫੀ ਅਹਿਮ ਸੀ। ਪਰ ਉਨ੍ਹਾਂ ਨੇ ਮੱਧ ਦੇ ਓਵਰਾਂ ਵਿੱਚ ਕਾਫੀ ਸ਼ਾਨਦਾਰ ਬੱਲੇਬਾਜ਼ੀ ਕੀਤੀ।"

ਕੋਹਲੀ ਅਤੇ ਪਡੀਕਲ ਦੀ ਦਮਦਾਰ ਸਾਂਝੇਦਾਰੀ

ਕੈਚ ਛੁੱਟਣ ਤੋਂ ਬਾਅਦ ਕੋਹਲੀ ਨੇ ਸ਼ਾਨਦਾਰ ਬੱਲੇਬਾਜ਼ੀ ਕੀਤੀ ਅਤੇ ਅਰਧ ਸੈਂਕੜੇ ਵਾਲੀ ਪਾਰੀ ਖੇਡੀ। ਉਨ੍ਹਾਂ ਤੋਂ ਇਲਾਵਾ ਪਡੀਕਲ ਨੇ 27 ਗੇਂਦਾਂ 'ਤੇ ਦੋ ਚੌਕਿਆਂ ਅਤੇ ਛੇ ਛੱਕਿਆਂ ਦੀ ਮਦਦ ਨਾਲ 55 ਰਨ ਬਣਾਏ। ਇਨ੍ਹਾਂ ਦੋਵਾਂ ਨੇ 115 ਰਨਾਂ ਦੀ ਸਾਂਝੇਦਾਰੀ ਕਰਦੇ ਹੋਏ ਆਰਸੀਬੀ ਦੀ ਜਿੱਤ ਪੱਕੀ ਕੀਤੀ।