IPL ਤੋਂ ਪਹਿਲਾਂ KKR ਦੇ Sunil Narine ਨੇ ਰਚਿਆ ਇਤਿਹਾਸ, ਅਜਿਹਾ ਕਰਨ ਵਾਲੇ ਦੁਨੀਆ ਦੇ ਬਣੇ ਤੀਸਰੇ ਗੇਂਦਬਾਜ਼
ਆਈਪੀਐਲ 2026 ਦੀ ਸ਼ੁਰੂਆਤ ਤੋਂ ਪਹਿਲਾਂ ਕੋਲਕਾਤਾ ਨਾਈਟ ਰਾਈਡਰਜ਼ ਦੇ ਦਿੱਗਜ ਗੇਂਦਬਾਜ਼ ਸੁਨੀਲ ਨਰਾਇਣ (Sunil Narine) ਨੇ ਇਤਿਹਾਸ ਰਚ ਦਿੱਤਾ ਹੈ। ਸੁਨੀਲ ਨਰਾਇਣ ਨੇ ਇੱਕ ਵਿਕਟ ਲੈ ਕੇ ਆਪਣੇ ਟੀ-20 ਕਰੀਅਰ ਵਿੱਚ 600 ਵਿਕਟਾਂ ਪੂਰੀਆਂ ਕਰ ਲਈਆਂ ਹਨ
Posted By alisha
Publish Date: Thu, 04 Dec 2025 11:39 AM (IST)
Updated Date: Thu, 04 Dec 2025 11:46 AM (IST)
ਸਪੋਰਟਸ ਡੈਸਕ, ਨਵੀਂ ਦਿੱਲੀ : ਆਈਪੀਐਲ 2026 ਦੀ ਸ਼ੁਰੂਆਤ ਤੋਂ ਪਹਿਲਾਂ ਕੋਲਕਾਤਾ ਨਾਈਟ ਰਾਈਡਰਜ਼ ਦੇ ਦਿੱਗਜ ਗੇਂਦਬਾਜ਼ ਸੁਨੀਲ ਨਰਾਇਣ (Sunil Narine) ਨੇ ਇਤਿਹਾਸ ਰਚ ਦਿੱਤਾ ਹੈ। ਸੁਨੀਲ ਨਰਾਇਣ ਨੇ ਇੱਕ ਵਿਕਟ ਲੈ ਕੇ ਆਪਣੇ ਟੀ-20 ਕਰੀਅਰ ਵਿੱਚ 600 ਵਿਕਟਾਂ ਪੂਰੀਆਂ ਕਰ ਲਈਆਂ ਹਨ। ਅਜਿਹਾ ਕਰਨ ਵਾਲੇ ਉਹ ਟੀ-20 ਇਤਿਹਾਸ ਦੇ ਤੀਜੇ ਗੇਂਦਬਾਜ਼ ਅਤੇ ਦੂਜੇ ਸਪਿਨਰ ਬਣ ਗਏ ਹਨ।
ਉਨ੍ਹਾਂ ਨੇ ਵੈਸਟਇੰਡੀਜ਼ ਦੇ ਡਵੇਨ ਬ੍ਰਾਵੋ ਅਤੇ ਅਫਗਾਨਿਸਤਾਨ ਦੇ ਸਟਾਰ ਰਾਸ਼ਿਦ ਖਾਨ ਦੇ ਖਾਸ ਕਲੱਬ ਵਿੱਚ ਐਂਟਰੀ ਮਾਰ ਲਈ ਹੈ। ਦੱਸ ਦਈਏ ਕਿ ਇਹ ਮਹਾਨ ਰਿਕਾਰਡ ਸੁਨੀਲ ਨਰਾਇਣ ਨੇ ILT20 2025-26 ਦੇ ਦੂਜੇ ਮੈਚ ਵਿੱਚ ਹਾਸਲ ਕੀਤਾ। ਇਹ ਮੈਚ ਸ਼ਾਰਜਾਹ ਵਾਰੀਅਰਜ਼ ਦੇ ਖ਼ਿਲਾਫ਼ ਖੇਡਿਆ ਗਿਆ।
ਸੁਨੀਲ ਨਰਾਇਣ ਨੇ ਟੀ-20 'ਚ 600 ਵਿਕਟਾਂ ਕੀਤੀਆਂ ਪੂਰੀਆਂ
ਦਰਅਸਲ, ਅਬੂ ਧਾਬੀ ਨਾਈਟ ਰਾਈਡਰਜ਼ ਬਨਾਮ ਸ਼ਾਰਜਾਹ ਵਾਰੀਅਰਜ਼ ਵਿਚਕਾਰ ਖੇਡੇ ਗਏ ILT20 ਦੇ ਦੂਜੇ ਮੈਚ ਵਿੱਚ ਸੁਨੀਲ ਨਰਾਇਣ ਨੇ ਆਪਣੇ ਟੀ-20 ਕ੍ਰਿਕਟ ਵਿੱਚ 600 ਵਿਕਟਾਂ ਪੂਰੀਆਂ ਕਰ ਲਈਆਂ। ਉਨ੍ਹਾਂ ਨੇ ਇਹ ਕਾਰਨਾਮਾ ਇੰਗਲੈਂਡ ਦੇ ਟੌਮ ਐਬੇਲ ਦੀ ਵਿਕਟ ਲੈਣ ਨਾਲ ਕੀਤਾ। ਸੁਨੀਲ ILT20 ਵਿੱਚ ਅਬੂ ਧਾਬੀ ਨਾਈਟ ਰਾਈਡਰਜ਼ ਦੇ ਕਪਤਾਨ ਹਨ ਅਤੇ ਆਪਣੀ ਟੀਮ ਲਈ ਇਸ ਸੀਜ਼ਨ ਦਾ ਪਹਿਲਾ ਮੈਚ ਖੇਡਦੇ ਹੋਏ ਉਨ੍ਹਾਂ ਨੇ ਸ਼ਾਨਦਾਰ ਗੇਂਦਬਾਜ਼ੀ ਕੀਤੀ ਅਤੇ ਇਹ ਖਾਸ ਰਿਕਾਰਡ ਬਣਾਇਆ।
600 ਵਿਕਟਾਂ ਪੂਰੀਆਂ ਕਰਨ ਨਾਲ ਹੀ ਸੁਨੀਲ ਨਰਾਇਣ ਇੱਕ ਖਾਸ ਕਲੱਬ ਵਿੱਚ ਸ਼ਾਮਲ ਹੋ ਗਏ ਹਨ। ਟੀ-20 ਕ੍ਰਿਕਟ ਵਿੱਚ ਸਭ ਤੋਂ ਜ਼ਿਆਦਾ ਵਿਕਟਾਂ ਲੈਣ ਵਾਲੇ ਗੇਂਦਬਾਜ਼ ਰਾਸ਼ਿਦ ਖਾਨ ਹਨ, ਜਿਨ੍ਹਾਂ ਨੇ 681 ਵਿਕਟਾਂ ਲਈਆਂ ਹਨ, ਜਦੋਂ ਕਿ ਡਵੇਨ ਬ੍ਰਾਵੋ ਦੇ ਨਾਮ 631 ਵਿਕਟਾਂ ਦਰਜ ਹਨ। ਇਸ ਤਰ੍ਹਾਂ ਸੁਨੀਲ ਨਰਾਇਣ ਦੁਨੀਆ ਦੇ ਤੀਜੇ ਗੇਂਦਬਾਜ਼ ਅਤੇ ਦੂਜੇ ਸਪਿਨਰ ਬਣ ਗਏ ਹਨ, ਜਿਨ੍ਹਾਂ ਨੇ ਟੀ-20 ਕ੍ਰਿਕਟ ਵਿੱਚ ਆਪਣੀਆਂ 600 ਵਿਕਟਾਂ ਪੂਰੀਆਂ ਕਰ ਲਈਆਂ ਹਨ।
ਟੀ-20 ਕ੍ਰਿਕਟ 'ਚ ਸਭ ਤੋਂ ਜ਼ਿਆਦਾ ਵਿਕਟਾਂ ਲੈਣ ਵਾਲੇ ਗੇਂਦਬਾਜ਼
- ਰਾਸ਼ਿਦ ਖਾਨ - 681
- ਡਵੇਨ ਬ੍ਰਾਵੋ - 631
- ਸੁਨੀਲ ਨਰਾਇਣ - 600
- ਇਮਰਾਨ ਤਾਹਿਰ - 570
- ਸ਼ਾਕਿਬ ਅਲ ਹਸਨ - 504
ਸੁਨੀਲ ਨਰਾਇਣ ਦੀ ਟੀਮ ਨੂੰ ਮੈਚ 'ਚ ਮਿਲੀ ਜਿੱਤ
ਸੁਨੀਲ ਨਰਾਇਣ ਨੇ ਆਪਣੇ 600 ਵਿਕਟਾਂ ਦੇ ਰਿਕਾਰਡ ਤੋਂ ਇਲਾਵਾ ਸ਼ਾਨਦਾਰ ਕਪਤਾਨੀ ਦਾ ਨਜ਼ਾਰਾ ਪੇਸ਼ ਕੀਤਾ। ਉਨ੍ਹਾਂ ਦੀ ਕਪਤਾਨੀ ਵਿੱਚ ਅਬੂ ਧਾਬੀ ਨਾਈਟ ਰਾਈਡਰਜ਼ ਨੇ ਸ਼ਾਰਜਾਹ ਵਾਰੀਅਰਜ਼ ਨੂੰ ਹਰਾ ਕੇ ਆਪਣੇ ਅਭਿਆਨ ਦੀ ਸ਼ੁਰੂਆਤ ਜਿੱਤ ਨਾਲ ਕੀਤੀ। ਅਬੂ ਧਾਬੀ ਨੇ ਲੀਆਮ ਲਿਵਿੰਗਸਟੋਨ ਦੀ ਸ਼ਾਨਦਾਰ ਪਾਰੀ ਦੇ ਦਮ 'ਤੇ ਨਿਰਧਾਰਿਤ 20 ਓਵਰਾਂ ਵਿੱਚ 4 ਵਿਕਟਾਂ ਦੇ ਨੁਕਸਾਨ 'ਤੇ 233 ਦੌੜਾਂ ਦਾ ਸਕੋਰ ਬਣਾਇਆ।
ਲੀਆਮ ਨੇ 38 ਗੇਂਦਾਂ ਵਿੱਚ 2 ਚੌਕਿਆਂ ਅਤੇ 8 ਛੱਕਿਆਂ ਦੀ ਮਦਦ ਨਾਲ 82 ਦੌੜਾਂ ਦੀ ਪਾਰੀ ਖੇਡੀ ਅਤੇ ਉਹ ਨਾਬਾਦ ਰਹੇ। ਇਸਦੇ ਜਵਾਬ ਵਿੱਚ ਸ਼ਾਰਜਾਹ ਵਾਰੀਅਰਜ਼ ਦੀ ਟੀਮ 194 ਦੌੜਾਂ ਹੀ ਬਣਾ ਸਕੀ। ਇਸ ਤਰ੍ਹਾਂ ਨਰਾਇਣ ਦੀ ਟੀਮ ਨੇ 39 ਦੌੜਾਂ ਨਾਲ ਆਪਣਾ ਪਹਿਲਾ ਮੈਚ ਜਿੱਤ ਲਿਆ। ਮੈਚ ਵਿੱਚ ਨਰਾਇਣ ਨੇ ਆਪਣੇ 4 ਓਵਰਾਂ ਵਿੱਚ ਸਿਰਫ਼ 22 ਦੌੜਾਂ ਦੇ ਕੇ ਇੱਕ ਵਿਕਟ ਹਾਸਲ ਕੀਤੀ। ਜਾਰਜ ਗਾਰਟਨ, ਆਂਦ੍ਰੇ ਰਸਲ ਅਤੇ ਓਲੀ ਸਟੋਨ ਨੂੰ 2-2 ਵਿਕਟਾਂ ਮਿਲੀਆਂ, ਜਦੋਂ ਕਿ ਪੀਯੂਸ਼ ਚਾਵਲਾ ਅਤੇ ਅਜੇ ਕੁਮਾਰ ਨੂੰ ਇੱਕ-ਇੱਕ ਸਫਲਤਾ ਮਿਲੀ।