Zomato 'ਚ ਵੱਡਾ ਫੇਰਬਦਲ: ਦੀਪਿੰਦਰ ਗੋਇਲ ਨੇ ਛੱਡੀ CEO ਦੀ ਕੁਰਸੀ, ਹੁਣ ਅਲਬਿੰਦਰ ਢੀਂਡਸਾ ਸੰਭਾਲਣਗੇ ਕਮਾਨ!

ਨਵੀਂ ਦਿੱਲੀ: ਜ਼ੋਮੈਟੋ ਦੇ ਫਾਊਂਡਰ ਦੀਪਿੰਦਰ ਗੋਇਲ (Deepinder Goyal) ਨੇ ਕੰਪਨੀ ਵਿੱਚ ਗਰੁੱਪ CEO ਦੇ ਅਹੁਦੇ ਤੋਂ ਅਸਤੀਫ਼ਾ ਦੇ ਦਿੱਤਾ ਹੈ। 'ਇਟਰਨਲ' (Eternal) ਨੇ ਇੱਕ ਵੱਡੇ ਲੀਡਰਸ਼ਿਪ ਬਦਲਾਅ ਦੇ ਤਹਿਤ ਇਹ ਐਲਾਨ ਕੀਤਾ ਹੈ। ਸ਼ੇਅਰਧਾਰਕਾਂ ਦੀ ਮਨਜ਼ੂਰੀ ਮਿਲਣ ਤੋਂ ਬਾਅਦ ਦੀਪਿੰਦਰ ਗੋਇਲ ਨੇ ਅਹੁਦਾ ਛੱਡ ਦਿੱਤਾ ਹੈ ਅਤੇ ਅਲਬਿੰਦਰ ਢੀਂਡਸਾ ਨੂੰ ਤੁਰੰਤ ਪ੍ਰਭਾਵ ਨਾਲ ਇਟਰਨਲ ਦਾ ਨਵਾਂ ਗਰੁੱਪ CEO ਨਿਯੁਕਤ ਕੀਤਾ ਗਿਆ ਹੈ।

ਦੀਪਿੰਦਰ ਗੋਇਲ ਨੇ ਕਿਉਂ ਛੱਡਿਆ ਅਹੁਦਾ?

ਜ਼ੋਮੈਟੋ ਵਿੱਚ ਗਰੁੱਪ CEO ਦਾ ਅਹੁਦਾ ਛੱਡਣ ਦਾ ਦੀਪਿੰਦਰ ਗੋਇਲ ਦਾ ਫ਼ੈਸਲਾ ਨਵੀਆਂ ਚੀਜ਼ਾਂ ਨੂੰ ਅਜ਼ਮਾਉਣ ਦੀ ਇੱਛਾ ਤੋਂ ਪ੍ਰੇਰਿਤ ਹੈ, ਜਿਨ੍ਹਾਂ ਵਿੱਚ ਜ਼ਿਆਦਾ ਜੋਖਮ (Risk) ਲੈਣ ਦੀ ਲੋੜ ਹੁੰਦੀ ਹੈ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਇਹ ਕੰਮ 'Eternal' ਵਰਗੀ ਪਬਲਿਕ ਕੰਪਨੀ ਦੇ ਢਾਂਚੇ ਤੋਂ ਬਾਹਰ ਰਹਿ ਕੇ ਬਿਹਤਰ ਤਰੀਕੇ ਨਾਲ ਕੀਤਾ ਜਾ ਸਕਦਾ ਹੈ। ਉਨ੍ਹਾਂ ਅਨੁਸਾਰ Eternal ਨੂੰ ਅਜਿਹੀ ਲੀਡਰਸ਼ਿਪ ਦੀ ਲੋੜ ਹੈ ਜੋ ਆਪਣੇ ਮੁੱਖ ਕਾਰੋਬਾਰ 'ਤੇ ਧਿਆਨ ਕੇਂਦਰਿਤ ਕਰੇ ਅਤੇ ਅਨੁਸ਼ਾਸਿਤ ਹੋਵੇ।

ਕੌਣ ਹਨ ਅਲਬਿੰਦਰ ਢੀਂਡਸਾ?

ਦੀਪਿੰਦਰ ਗੋਇਲ ਦੀ ਜਗ੍ਹਾ ਲੈਣ ਵਾਲੇ ਅਲਬਿੰਦਰ ਢੀਂਡਸਾ (ਅਲਬੀ) ਹੁਣ ਆਪਰੇਟਿੰਗ ਤਰਜੀਹਾਂ ਅਤੇ ਕਾਰੋਬਾਰ ਨਾਲ ਜੁੜੇ ਫ਼ੈਸਲਿਆਂ ਲਈ ਜ਼ਿੰਮੇਵਾਰ ਹੋਣਗੇ। ਬਲਿੰਕਿਟ (Blinkit) ਨੂੰ ਖਰੀਦਣ ਤੋਂ ਲੈ ਕੇ ਉਸ ਨੂੰ ਫ਼ਾਇਦੇ ਵਿੱਚ ਲਿਆਉਣ ਤੱਕ ਉਨ੍ਹਾਂ ਦੀ ਲੀਡਰਸ਼ਿਪ ਨੂੰ ਬਹੁਤ ਸਲਾਹਿਆ ਗਿਆ ਹੈ। ਢੀਂਡਸਾ ਦੀ ਅਗਵਾਈ ਵਿੱਚ ਬਲਿੰਕਿਟ ਕੰਪਨੀ ਦੀ ਮੁੱਖ ਤਰਜੀਹ ਬਣਿਆ ਰਹੇਗਾ।