ਇਹ 7 ਦੇਸ਼ ਭਾਰਤੀ ਅੰਬਾਂ ਦੇ ਸਭ ਤੋਂ ਵੱਡੇ ਖਰੀਦਦਾਰ, ਜਹਾਜ਼ ਭਰ-ਭਰ ਕੇ ਹੁੰਦਾ ਹੈ ਐਕਸਪੋਰਟ; ਕੌਣ ਮੰਗਵਾ ਰਿਹਾ ਹਜ਼ਾਰਾਂ ਮੀਟ੍ਰਿਕ ਟਨ?

ਨਵੀਂ ਦਿੱਲੀ: ਭਾਰਤ ਤੋਂ ਅੰਬਾਂ ਦੀ ਬਰਾਮਦ (ਨਿਰਯਾਤ) ਵੱਡੇ ਪੱਧਰ 'ਤੇ ਕੀਤੀ ਜਾਂਦੀ ਹੈ। ਅਲਫਾਂਸੋ, ਦੁਸਹਿਰੀ, ਲੰਗੜਾ ਅਤੇ ਕੇਸਰ ਵਰਗੀਆਂ ਪ੍ਰੀਮੀਅਮ ਕਿਸਮਾਂ ਦੀ ਮੰਗ ਵਿਦੇਸ਼ਾਂ ਵਿੱਚ ਲਗਾਤਾਰ ਬਣੀ ਰਹਿੰਦੀ ਹੈ। ਬਿਹਤਰ ਪੈਕਹਾਊਸ ਸਹੂਲਤਾਂ, ਸਖ਼ਤ ਕੁਆਲਿਟੀ ਚੈੱਕ ਅਤੇ ਤੇਜ਼ ਏਅਰ ਕਾਰਗੋ ਕਨੈਕਟੀਵਿਟੀ ਦੇ ਕਾਰਨ ਭਾਰਤੀ ਅੰਬਾਂ ਦੀ ਪਹੁੰਚ ਨਵੇਂ ਦੇਸ਼ਾਂ ਤੱਕ ਵਧ ਰਹੀ ਹੈ। ਬਰਾਮਦਕਾਰ ਅਤੇ ਬਾਗਬਾਨ ਹੁਣ 'ਪ੍ਰੋਡਿਊਸ ਆਫ ਇੰਡੀਆ' ਬ੍ਰਾਂਡ ਨੂੰ ਮਜ਼ਬੂਤ ਕਰ ਰਹੇ ਹਨ, ਜਿਸ ਨਾਲ ਭਾਰਤੀ ਅੰਬ ਦੁਨੀਆ ਭਰ ਦੇ ਸੁਪਰਮਾਰਕੀਟਾਂ ਤੱਕ ਆਪਣੀ ਮੌਜੂਦਗੀ ਦਰਜ ਕਰਵਾ ਰਿਹਾ ਹੈ। ਪਰ ਉਹ ਕਿਹੜੇ ਦੇਸ਼ ਹਨ, ਜੋ ਭਾਰਤ ਤੋਂ ਸਭ ਤੋਂ ਵੱਧ ਅੰਬ ਖਰੀਦਦੇ ਹਨ? ਆਓ ਜਾਣਦੇ ਹਾਂ।

ਦੁਨੀਆ 'ਚ ਅੰਬਾਂ ਦਾ ਸਭ ਤੋਂ ਵੱਡਾ ਉਤਪਾਦਕ

ਦੱਸ ਦੇਈਏ ਕਿ ਭਾਰਤ ਦੁਨੀਆ ਵਿੱਚ ਅੰਬਾਂ ਦਾ ਸਭ ਤੋਂ ਵੱਡਾ ਉਤਪਾਦਕ ਹੈ। 2024–25 ਦੇ ਅੰਕੜੇ ਦੱਸਦੇ ਹਨ ਕਿ ਕੁਝ ਖਾਸ ਦੇਸ਼ ਭਾਰਤੀ ਅੰਬਾਂ ਦੇ ਨਿਰਯਾਤ ਦਾ ਇੱਕ ਵੱਡਾ ਹਿੱਸਾ ਖਰੀਦਦੇ ਹਨ। ਇੱਥੇ ਇੱਕ ਨਜ਼ਰ ਮਾਰਦੇ ਹਾਂ ਕਿ ਭਾਰਤੀ ਅੰਬ ਸਭ ਤੋਂ ਵੱਧ ਕਿੱਥੇ ਜਾ ਰਹੇ ਹਨ:

ਪਹਿਲੇ ਨੰਬਰ 'ਤੇ UAE

APEDA ਐਗਰੀ ਐਕਸਚੇਂਜ ਦੇ ਅੰਕੜਿਆਂ ਅਨੁਸਾਰ UAE ਭਾਰਤੀ ਅੰਬਾਂ ਦਾ ਸਭ ਤੋਂ ਵੱਡਾ ਖਰੀਦਦਾਰ ਹੈ। 2024-25 ਵਿੱਚ ਯੂਏਈ ਨੇ 12,897 ਮੀਟ੍ਰਿਕ ਟਨ (MT) ਭਾਰਤੀ ਅੰਬਾਂ ਦੀ ਦਰਾਮਦ (ਆਯਾਤ) ਕੀਤੀ। ਉੱਥੇ ਭਾਰਤੀ ਮੂਲ ਦੇ ਲੋਕਾਂ ਵਿੱਚ ਮਜ਼ਬੂਤ ਮੰਗ ਕਾਰਨ ਇਹ ਅੰਕੜਾ ਕਾਫੀ ਉੱਚਾ ਹੈ।

ਯੂਕੇ ਤੇ ਨੇਪਾਲ

ਦੂਜੇ ਨੰਬਰ 'ਤੇ ਯੂਕੇ ਹੈ, ਜਿਸ ਨੇ 4,367 MT ਅੰਬਾਂ ਦੀ ਦਰਾਮਦ ਕੀਤੀ। ਇਸ ਦੀ ਮੁੱਖ ਵਜ੍ਹਾ ਰਿਟੇਲ ਅਤੇ ਐਥਨਿਕ ਫੂਡ ਮਾਰਕੀਟਸ ਵਿੱਚ ਅਲਫਾਂਸੋ ਵਰਗੀਆਂ ਕਿਸਮਾਂ ਦੀ ਪ੍ਰਸਿੱਧੀ ਹੈ। ਨੇਪਾਲ ਨੇ 3,329 MT ਅੰਬ ਮੰਗਵਾਏ। ਨੇਪਾਲ ਦੀ ਭੂਗੋਲਿਕ ਨੇੜਤਾ ਕਾਰਨ ਅੰਬਾਂ ਦੀ ਢੋਆ-ਢੁਆਈ ਤੇਜ਼ੀ ਨਾਲ ਹੁੰਦੀ ਹੈ ਅਤੇ ਉਹ ਤਾਜ਼ੇ ਰਹਿੰਦੇ ਹਨ।

ਅਮਰੀਕਾ ਤੇ ਕੁਵੈਤ

ਅਗਲਾ ਨੰਬਰ ਅਮਰੀਕਾ ਦਾ ਹੈ, ਜਿੱਥੇ 2,138 MT ਅੰਬਾਂ ਦਾ ਨਿਰਯਾਤ ਕੀਤਾ ਗਿਆ। ਅਮਰੀਕਾ ਨੂੰ ਹੋਣ ਵਾਲਾ ਨਿਰਯਾਤ ਲਗਾਤਾਰ ਵਧ ਰਿਹਾ ਹੈ। ਕੁਵੈਤ ਨੇ 1,260 MT ਅੰਬ ਖਰੀਦੇ। ਕੁਵੈਤ ਖਾੜੀ ਖੇਤਰ ਦਾ ਇੱਕ ਹੋਰ ਅਹਿਮ ਬਾਜ਼ਾਰ ਹੈ, ਜਿੱਥੇ ਗਰਮੀਆਂ ਦੇ ਮੌਸਮ ਵਿੱਚ ਭਾਰਤੀ ਅੰਬਾਂ ਦੀ ਕਾਫੀ ਖਪਤ ਹੁੰਦੀ ਹੈ।

ਓਮਾਨ ਤੇ ਕਤਰ

ਓਮਾਨ ਵਿੱਚ ਤਾਜ਼ੇ ਭਾਰਤੀ ਅੰਬਾਂ ਦੀ ਮੰਗ ਹਮੇਸ਼ਾ ਬਣੀ ਰਹਿੰਦੀ ਹੈ। 2024-25 ਵਿੱਚ ਓਮਾਨ ਨੇ 1,238 MT ਭਾਰਤੀ ਅੰਬ ਮੰਗਵਾਏ। ਇਸੇ ਤਰ੍ਹਾਂ ਕਤਰ ਨੇ 1,194 MT ਭਾਰਤੀ ਅੰਬ ਖਰੀਦੇ।