ਕਮਰਸ਼ੀਅਲ ਗੈਸ ਮਹਿੰਗੀ ਹੋਣ ਦਾ ਦਿੱਸਣ ਲੱਗਾ ਅਸਰ; 5 ਮਈ ਤੋਂ ਵਧ ਜਾਣਗੇ ਹੋਸਟਲ-PG ਦੇ ਰੇਟ, ਚੈੱਕ ਕਰੋ ਨਵੇਂ ਕਿਰਾਏ ਦੀ ਲਿਸਟ

ਬਿਜ਼ਨੈੱਸ ਡੈਸਕ, ਨਵੀਂ ਦਿੱਲੀ : 1 ਤਰੀਕ ਤੋਂ ਪੂਰੇ ਦੇਸ਼ 'ਚ ਕਮਰਸ਼ੀਅਲ ਗੈਸ ਸਿਲੰਡਰ ਦੀਆਂ ਕੀਮਤਾਂ 'ਚ ਭਾਰੀ ਵਾਧਾ ਕੀਤਾ ਗਿਆ ਹੈ। ਤਾਮਿਲਨਾਡੂ 'ਚ ਵੀ ਕਮਰਸ਼ੀਅਲ ਗੈਸ ਸਿਲੰਡਰ ਦਾ ਰੇਟ 993 ਰੁਪਏ ਵਧਾਇਆ ਗਿਆ। ਇਸ ਨਾਲ ਉੱਥੇ ਕਮਰਸ਼ੀਅਲ ਗੈਸ ਸਿਲੰਡਰ ਦੀ ਕੀਮਤ 3,237 ਰੁਪਏ ਹੋ ਗਈ ਹੈ। ਹੁਣ ਇਸਦੇ ਨਤੀਜੇ ਵਜੋਂ ਤਾਮਿਲਨਾਡੂ 'ਚ ਹੋਸਟਲ ਤੇ ਪੇਇੰਗ ਗੈਸਟ (ਪੀਜੀ) 'ਚ ਰਹਿਣ ਵਾਲੇ ਵਿਦਿਆਰਥੀਆਂ ਤੇ ਨੌਕਰੀਪੇਸ਼ਾ ਲੋਕਾਂ ਨੂੰ ਹੁਣ ਜ਼ਿਆਦਾ ਖਰਚ ਕਰਨਾ ਪਵੇਗਾ। ਇਸਦਾ ਕਾਰਨ ਇਹ ਹੈ ਕਿ ਹੋਸਟਲ ਅਤੇ ਪੀਜੀ ਚਲਾਉਣ ਵਾਲਿਆਂ ਨੇ ਕਿਰਾਇਆ ਲਗਪਗ 10 ਫੀਸਦੀ ਵਧਾ ਦਿੱਤਾ ਹੈ। ਦਰਅਸਲ, ਕਮਰਸ਼ੀਅਲ ਐਲਪੀਜੀ ਗੈਸ ਸਿਲੰਡਰ ਅਤੇ ਖਾਣਾ ਬਣਾਉਣ ਦੀ ਲਾਗਤ ਕਾਫੀ ਵਧ ਗਈ ਹੈ, ਜਿਸ ਕਾਰਨ ਇਹ ਫੈਸਲਾ ਲਿਆ ਗਿਆ।

ਕਦੋਂ ਤੋਂ ਲਾਗੂ ਹੋਵੇਗਾ ਨਵਾਂ ਕਿਰਾਇਆ?

ਸੂਬਾ ਪੱਧਰ 'ਤੇ ਹੋਸਟਲ ਅਤੇ ਪੀਜੀ ਮਾਲਕਾਂ ਦੀ ਇੱਕ ਜਥੇਬੰਦੀ ਨੇ ਦੱਸਿਆ ਹੈ ਕਿ ਨਵੇਂ ਕਿਰਾਏ 5 ਮਈ ਤੋਂ ਲਾਗੂ ਹੋਣਗੇ। ਪਿਛਲੇ ਕੁਝ ਮਹੀਨਿਆਂ ਵਿੱਚ ਖਾਸ ਕਰਕੇ ਖਾਣਾ ਬਣਾਉਣ ਦਾ ਖਰਚਾ ਕਾਫੀ ਵਧ ਗਿਆ ਹੈ, ਜਿਸ ਨਾਲ ਉਨ੍ਹਾਂ ਦਾ ਖਰਚ ਵਧਿਆ ਹੈ। ਨਵੇਂ ਕਿਰਾਏ ਅਨੁਸਾਰ, ਬਿਨਾਂ ਏਸੀ ਵਾਲੇ ਕਮਰਿਆਂ ਦੇ ਰੇਟ ਤੈਅ ਕਰ ਦਿੱਤੇ ਗਏ ਹਨ:

ਚਾਰ ਲੋਕਾਂ ਦੇ ਕਮਰੇ ਦਾ ਕਿਰਾਇਆ: ਹੁਣ 6,500 ਤੋਂ 7,500 ਰੁਪਏ ਦੇ ਵਿਚਕਾਰ ਹੋਣ ਦੀ ਉਮੀਦ ਹੈ।

ਤਿੰਨ ਲੋਕਾਂ ਦੇ ਕਮਰੇ ਦਾ ਕਿਰਾਇਆ: 7,000 ਤੋਂ 8,000 ਰੁਪਏ ਹੋਵੇਗਾ।

ਦੋ ਲੋਕਾਂ ਦੇ ਕਮਰੇ ਦਾ ਕਿਰਾਇਆ: 8,000 ਤੋਂ 9,000 ਰੁਪਏ ਤੱਕ ਹੋਣ ਦੀ ਉਮੀਦ ਹੈ।

ਹਾਲਾਂਕਿ, ਅਸਲੀ ਕਿਰਾਇਆ ਜਗ੍ਹਾ, ਸਹੂਲਤਾਂ ਅਤੇ ਮੰਗ ਦੇ ਅਨੁਸਾਰ ਵੱਖ-ਵੱਖ ਹੋ ਸਕਦਾ ਹੈ। ਕਿਰਾਇਆ ਵਧਣ ਦਾ ਮੁੱਖ ਕਾਰਨ 19 ਕਿਲੋ ਵਾਲੇ ਕਮਰਸ਼ੀਅਲ ਗੈਸ ਸਿਲੰਡਰ ਦੀ ਕੀਮਤ ਵਿੱਚ ਭਾਰੀ ਵਾਧਾ ਹੈ।

ਗੈਸ ਦੀਆਂ ਕੀਮਤਾਂ ਦੁੱਗਣੇ ਤੋਂ ਵੀ ਜ਼ਿਆਦਾ

ਪਿਛਲੇ ਕੁਝ ਮਹੀਨਿਆਂ ਵਿੱਚ ਗੈਸ ਦੀਆਂ ਕੀਮਤਾਂ ਦੁੱਗਣੇ ਤੋਂ ਵੀ ਜ਼ਿਆਦਾ ਹੋ ਗਈਆਂ ਹਨ, ਜਿਸ ਨਾਲ ਹੋਸਟਲ ਦੀ ਰਸੋਈ 'ਤੇ ਵੱਡਾ ਅਸਰ ਪਿਆ ਹੈ, ਕਿਉਂਕਿ ਉੱਥੇ ਵੱਡੇ ਪੱਧਰ 'ਤੇ ਖਾਣਾ ਬਣਾਉਣ ਲਈ ਗੈਸ ਦੀ ਵਰਤੋਂ ਹੁੰਦੀ ਹੈ। ਇਸ ਤੋਂ ਇਲਾਵਾ, ਗੈਸ ਦੀ ਕਮੀ ਕਾਰਨ ਕਈ ਜਗ੍ਹਾ ਮਾਲਕਾਂ ਨੂੰ ਮਹਿੰਗੇ ਰੇਟ 'ਤੇ ਬਾਹਰੋਂ ਸਿਲੰਡਰ ਖਰੀਦਣੇ ਪਏ।

20 ਲੱਖ ਲੋਕ ਹੋਣਗੇ ਪ੍ਰਭਾਵਿਤ

ਖਰਚ ਘੱਟ ਕਰਨ ਲਈ ਕੁਝ ਹੋਸਟਲਾਂ ਨੇ ਕੁਝ ਸਮੇਂ ਲਈ ਲੱਕੜ ਵਰਗੇ ਦੂਜੇ ਵਿਕਲਪਾਂ ਨਾਲ ਖਾਣਾ ਬਣਾਉਣਾ ਸ਼ੁਰੂ ਕੀਤਾ, ਪਰ ਉਨ੍ਹਾਂ ਦੇ ਰੇਟ ਵੀ ਵਧ ਗਏ। ਇਸ ਲਈ ਹੁਣ ਮਾਲਕਾਂ ਨੂੰ ਮਜਬੂਰ ਹੋ ਕੇ ਕਿਰਾਇਆ ਵਧਾਉਣਾ ਪਿਆ ਅਤੇ ਕੁਝ ਸਹੂਲਤਾਂ ਵੀ ਘਟਾਉਣੀਆਂ ਪਈਆਂ। ਅਨੁਮਾਨ ਹੈ ਕਿ ਪੂਰੇ ਰਾਜ ਵਿੱਚ 20,000 ਤੋਂ ਵੱਧ ਹੋਸਟਲ ਹਨ, ਜਿਨ੍ਹਾਂ ਵਿੱਚ ਕਰੀਬ 20 ਲੱਖ ਲੋਕ ਰਹਿੰਦੇ ਹਨ। ਇਨ੍ਹਾਂ ਵਿੱਚੋਂ ਵੱਡੀ ਗਿਣਤੀ ਚੇਨਈ ਵਿੱਚ ਹੈ।

ਰਹਿਣ ਵਾਲਿਆਂ 'ਤੇ ਪੈ ਰਿਹਾ ਅਸਰ

ਇਸਦਾ ਅਸਰ ਰਹਿਣ ਵਾਲਿਆਂ 'ਤੇ ਵੀ ਪੈ ਰਿਹਾ ਹੈ, ਖਾਸ ਕਰਕੇ ਉਨ੍ਹਾਂ ਲੋਕਾਂ 'ਤੇ ਜੋ ਹੋਸਟਲ ਦੇ ਖਾਣੇ 'ਤੇ ਨਿਰਭਰ ਹਨ। ਕਈ ਲੋਕਾਂ ਨੂੰ ਹੁਣ ਬਾਹਰ ਦਾ ਖਾਣਾ ਜਾਂ ਪੈਕੇਟ ਵਾਲਾ ਖਾਣਾ ਲੈਣਾ ਪੈ ਰਿਹਾ ਹੈ, ਜਿਸ ਨਾਲ ਉਨ੍ਹਾਂ ਦਾ ਖਰਚਾ ਹੋਰ ਵਧ ਗਿਆ ਹੈ। ਇਸ ਤੋਂ ਇਲਾਵਾ, ਕੁਝ ਥਾਵਾਂ 'ਤੇ ਮੇਨਟੇਨੈਂਸ ਚਾਰਜ ਵੀ ਵਧਾ ਦਿੱਤੇ ਗਏ ਹਨ, ਜਿਸ ਨਾਲ ਲੋਕਾਂ 'ਤੇ ਆਰਥਿਕ ਬੋਝ ਵਧ ਗਿਆ ਹੈ। ਜੇਕਰ ਗੈਸ ਅਤੇ ਹੋਰ ਖਰਚੇ ਇੰਝ ਹੀ ਵਧਦੇ ਰਹੇ, ਤਾਂ ਆਉਣ ਵਾਲੇ ਸਮੇਂ ਵਿੱਚ ਹੋਸਟਲ ਅਤੇ ਪੀਜੀ ਵਿੱਚ ਰਹਿਣਾ ਹੋਰ ਮਹਿੰਗਾ ਹੋ ਸਕਦਾ ਹੈ।

ਬਾਕੀ ਸੂਬਿਆਂ 'ਤੇ ਅਸਰ

ਤਾਮਿਲਨਾਡੂ 'ਚ ਕਮਰਸ਼ੀਅਲ ਗੈਸ ਸਿਲੰਡਰ ਮਹਿੰਗੇ ਹੋਣ ਦਾ ਅਸਰ ਜੇਕਰ ਨਜ਼ਰ ਆਉਣ ਲੱਗਾ ਹੈ ਤਾ ਅਜਿਹਾ ਬਾਕੀ ਸੂਬਿਆਂ 'ਚ ਵੀ ਹੋ ਸਕਦਾ ਹੈ। ਹਰ ਸੂਬੇ 'ਚ ਕਈ ਲੋਕ ਨੌਕਰੀ ਲਈ ਘਰੋਂ ਬਾਹਰ ਹੋਸਟਲ ਜਾਂ ਪੀਜੀ 'ਚ ਰਹਿੰਦੇ ਹਨ, ਇਸ ਲਈ ਆਉਣ ਵਾਲੇ ਸਮੇਂ 'ਚ ਉਨ੍ਹਾਂ ਦੀ ਜੇਬ ਉੱਤੇ ਵੀ ਵਾਧੂ ਬੋਝ ਪੈ ਸਕਦਾ ਹੈ।