ਖੁਸ਼ਖਬਰੀ ! SBI ਦੇਣ ਜਾ ਰਿਹਾ ਹੈ 4,000 ਨਵੀਆਂ ਨੌਕਰੀਆਂ, ਇਸ ਵਿਭਾਗ 'ਚ ਹੋਵੇਗੀ ਭਰਤੀ; ਚੇਅਰਮੈਨ CS Setty ਨੇ ਦੱਸਿਆ ਪਲਾਨ

ਨਵੀਂ ਦਿੱਲੀ : ਭਾਰਤ ਦਾ ਸਭ ਤੋਂ ਵੱਡਾ ਸਰਕਾਰੀ ਬੈਂਕ, ਐਸਬੀਆਈ (SBI New Jobs) ਨਵੀਆਂ ਭਰਤੀਆਂ ਕਰਨ ਜਾ ਰਿਹਾ ਹੈ। ਦਰਅਸਲ, ਸਟੇਟ ਬੈਂਕ ਆਫ ਇੰਡੀਆ (SBI) ਨੇ ਅਗਲੇ ਸਾਲ ਤੱਕ 4,000 ਮੁਲਾਜ਼ਮਾਂ ਦੀ ਭਰਤੀ ਕਰਨ ਦੀ ਯੋਜਨਾ ਬਣਾਈ ਹੈ ਤਾਂ ਜੋ ਇੱਕ ਮਜ਼ਬੂਤ ਰਿਕਵਰੀ ਸਿਸਟਮ ਤਿਆਰ ਕੀਤਾ ਜਾ ਸਕੇ। ਐਸਬੀਆਈ ਆਪਣੇ ਵਧਦੇ ਲੋਨ ਪੋਰਟਫੋਲੀਓ ਦੇ ਵਿਚਕਾਰ ਐਸੇਟ ਕੁਆਲਿਟੀ (Asset Quality) ਨੂੰ ਸੁਰੱਖਿਅਤ ਕਰਨ ਲਈ ਇਹ ਕਦਮ ਚੁੱਕ ਰਿਹਾ ਹੈ।

ਮਨੀਕੰਟਰੋਲ ਦੀ ਰਿਪੋਰਟ ਦੇ ਅਨੁਸਾਰ, ਐਸਬੀਆਈ ਦੇ ਚੇਅਰਮੈਨ ਸੀਐਸ ਸੈੱਟੀ ਨੇ ਬੈਂਕ ਦੇ ਚੌਥੀ ਤਿਮਾਹੀ ਦੇ ਨਤੀਜਿਆਂ ਤੋਂ ਬਾਅਦ ਦੱਸਿਆ, “ਐਸਬੀਆਈ ਵਰਗੀ ਐਸੇਟ ਕੁਆਲਿਟੀ ਕਿਸੇ ਹੋਰ ਕੋਲ ਨਹੀਂ ਹੈ, ਅਤੇ ਅਸੀਂ ਆਪਣੀ ਅੰਡਰਰਾਈਟਿੰਗ ਪ੍ਰਕਿਰਿਆ ਨੂੰ ਪੂਰੀ ਤਰ੍ਹਾਂ ਬਦਲ ਦਿੱਤਾ ਹੈ। ਹੁਣ ਅਸੀਂ ਇੱਕ ਮਜ਼ਬੂਤ ਰਿਕਵਰੀ ਸਿਸਟਮ ਸ਼ੁਰੂ ਕਰ ਰਹੇ ਹਾਂ। ਅਸੀਂ ਲੋਨ ਰਿਕਵਰੀ ਵਿਭਾਗ 'ਚ ਲਗਪਗ 3,000 ਤੋਂ 4,000 ਲੋਕਾਂ ਨੂੰ ਨਿਯੁਕਤ ਕਰਾਂਗੇ।”

ਐਸਬੀਆਈ ਦੇ ਵਿੱਤੀ ਸਾਲ 2026 ਦੇ ਅੰਤ ਤੱਕ 2.45 ਲੱਖ ਕਰਮਚਾਰੀ ਸਨ, ਜੋ ਪਿਛਲੇ ਸਾਲ ਦੇ 2.36 ਲੱਖ ਕਰਮਚਾਰੀਆਂ ਨਾਲੋਂ ਵੱਧ ਸਨ; ਕੰਪਨੀ ਦੀ ਪੇਸ਼ਕਾਰੀ ਵਿੱਚ ਇਹ ਜਾਣਕਾਰੀ ਦਿੱਤੀ ਗਈ ਹੈ। ਸੈੱਟੀ ਨੇ ਕਿਹਾ ਕਿ ਇਹ ਰਿਕਵਰੀ ਕਰਮਚਾਰੀ ਮੁੱਖ ਤੌਰ 'ਤੇ ਸ਼ਾਖਾਵਾਂ (Branches) ਦੇ ਬਜਾਏ ਫੀਲਡ ਵਿੱਚ ਕੰਮ ਕਰਨਗੇ।

ਉਨ੍ਹਾਂ ਕਿਹਾ, “ਇਹ ਮੌਜੂਦਾ ਕਰਮਚਾਰੀਆਂ ਵਿੱਚੋਂ ਨਹੀਂ ਹੋਣਗੇ; ਇਸ ਦੀ ਬਜਾਏ, ਅਸੀਂ ਆਪਣੀ ਸਹਾਇਕ ਕੰਪਨੀ ਦਾ ਲਾਭ ਉਠਾਵਾਂਗੇ। ਉਹ ਫੀਲਡ ਵਿੱਚ ਤਾਇਨਾਤ ਰਹਿਣਗੇ ਪਰ ਉਨ੍ਹਾਂ ਦਾ ਪ੍ਰਬੰਧ ਕੇਂਦਰੀ ਤੌਰ 'ਤੇ ਸਾਡੇ ਦੁਆਰਾ ਕੀਤਾ ਜਾਵੇਗਾ।” ਇਹ ਟਿੱਪਣੀਆਂ ਭਾਰਤ ਦੇ ਸਭ ਤੋਂ ਵੱਡੇ ਜਨਤਕ ਖੇਤਰ ਦੇ ਬੈਂਕ ਦੁਆਰਾ ਦੋ ਦਹਾਕਿਆਂ ਵਿੱਚ ਸਭ ਤੋਂ ਘੱਟ ਨਾਨ-ਪਰਫਾਰਮਿੰਗ ਐਸੇਟਸ (NPA) ਦੀ ਰਿਪੋਰਟ ਕਰਨ ਤੋਂ ਬਾਅਦ ਆਈਆਂ ਹਨ।