ਇਨ੍ਹਾਂ ਮੁਲਾਜ਼ਮਾਂ ਦੀ ਮੌਜ! ਸਰਕਾਰ ਨੇ ਤਨਖਾਹ ਅਤੇ ਪੈਨਸ਼ਨ ਵਾਧੇ ਨੂੰ ਦਿੱਤੀ ਮਨਜ਼ੂਰੀ; ਹੁਣ ਖਾਤੇ 'ਚ ਵਧ ਕੇ ਆਵੇਗੀ ਸੈਲਰੀ

ਨਵੀਂ ਦਿੱਲੀ: ਕੇਂਦਰ ਸਰਕਾਰ ਨੇ ਹਜ਼ਾਰਾਂ ਕੇਂਦਰੀ ਮੁਲਾਜ਼ਮਾਂ ਅਤੇ ਪੈਨਸ਼ਨਰਾਂ ਨੂੰ ਵੱਡਾ ਤੋਹਫ਼ਾ ਦਿੱਤਾ ਹੈ। ਕੇਂਦਰ ਸਰਕਾਰ ਨੇ ਜਨਤਕ ਖੇਤਰ ਦੀਆਂ ਸਾਧਾਰਨ ਬੀਮਾ ਕੰਪਨੀਆਂ (PSU Insurance Companies) ਅਤੇ ਨਾਬਾਰਡ (NABARD) ਦੇ ਕਰਮਚਾਰੀਆਂ ਦੀ ਤਨਖਾਹ ਸੋਧ (Salary Hike) ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ। ਇਸ ਦੇ ਨਾਲ ਹੀ ਭਾਰਤੀ ਰਿਜ਼ਰਵ ਬੈਂਕ (RBI) ਅਤੇ ਨਾਬਾਰਡ ਦੇ ਸੇਵਾਮੁਕਤ ਕਰਮਚਾਰੀਆਂ ਲਈ ਪੈਨਸ਼ਨ ਸੋਧ ਨੂੰ ਵੀ ਪ੍ਰਵਾਨਗੀ ਦਿੱਤੀ ਗਈ ਹੈ।

ਇਸ ਦਾ ਮਤਲਬ ਹੈ ਕਿ ਹੁਣ ਇਨ੍ਹਾਂ ਸਰਕਾਰੀ ਸੰਸਥਾਵਾਂ ਵਿੱਚ ਕੰਮ ਕਰਨ ਵਾਲੇ ਕਰਮਚਾਰੀਆਂ ਦੀ ਸੈਲਰੀ ਅਤੇ ਇੱਥੋਂ ਰਿਟਾਇਰ ਹੋਏ ਲੋਕਾਂ ਦੀ ਪੈਨਸ਼ਨ ਵਿੱਚ ਵਾਧੇ ਦਾ ਰਸਤਾ ਸਾਫ਼ ਹੋ ਗਿਆ ਹੈ।

ਕਿੰਨੇ ਮੁਲਾਜ਼ਮਾਂ ਦੀ ਵਧੇਗੀ ਤਨਖਾਹ?

ਵਿੱਤ ਮੰਤਰਾਲੇ ਨੇ ਸ਼ੁੱਕਰਵਾਰ ਨੂੰ ਦੱਸਿਆ ਕਿ ਇਸ ਤਨਖਾਹ ਸੋਧ ਨਾਲ ਕੁੱਲ:

46,322 ਕਰਮਚਾਰੀ

23,570 ਪੈਨਸ਼ਨਰ

23,260 ਪਰਿਵਾਰਕ ਪੈਨਸ਼ਨਰ ਲਾਭ ਉਠਾਉਣਗੇ।

ਬੀਮਾ ਕੰਪਨੀਆਂ ਲਈ ਇਹ ਵਾਧਾ 1 ਅਗਸਤ 2022 ਤੋਂ ਲਾਗੂ ਮੰਨਿਆ ਜਾਵੇਗਾ।

ਕਿੰਨਾ ਆਵੇਗਾ ਖਰਚਾ?

ਇਸ 'ਤੇ ਕੁੱਲ ਖਰਚ 8,170.30 ਕਰੋੜ ਰੁਪਏ ਹੋਵੇਗਾ। ਇਸ ਵਿੱਚ ਸ਼ਾਮਲ ਹਨ:

ਤਨਖਾਹ ਸੋਧ ਦੇ ਬਕਾਏ (Arrears) ਵਜੋਂ: 5,822.68 ਕਰੋੜ ਰੁਪਏ

ਨੈਸ਼ਨਲ ਪੈਨਸ਼ਨ ਸਿਸਟਮ (NPS) ਲਈ: 250.15 ਕਰੋੜ ਰੁਪਏ

ਪਰਿਵਾਰਕ ਪੈਨਸ਼ਨ ਲਈ: 2,097.47 ਕਰੋੜ ਰੁਪਏ

ਨਾਬਾਰਡ ਅਤੇ ਆਰਬੀਆਈ ਲਈ ਵਿਸ਼ੇਸ਼ ਵੇਰਵੇ

ਨਾਬਾਰਡ: ਤਨਖਾਹ ਸੋਧ 1 ਨਵੰਬਰ 2022 ਤੋਂ ਪ੍ਰਭਾਵੀ ਹੋਵੇਗੀ, ਜਿਸ ਨਾਲ ਸਾਲਾਨਾ ਤਨਖਾਹ 'ਚ ਲਗਪਗ 170 ਕਰੋੜ ਰੁਪਏ ਦਾ ਵਾਧਾ ਹੋਵੇਗਾ ਅਤੇ ਬਕਾਏ ਦੀ ਕੁੱਲ ਰਕਮ ਲਗਪਗ 510 ਕਰੋੜ ਰੁਪਏ ਹੋਵੇਗੀ। ਨਾਬਾਰਡ ਦੇ ਪੈਨਸ਼ਨਰਾਂ ਨੂੰ 50.82 ਕਰੋੜ ਰੁਪਏ ਦਾ ਬਕਾਇਆ ਇੱਕਮੁਸ਼ਤ ਦਿੱਤਾ ਜਾਵੇਗਾ।

RBI: ਸਰਕਾਰ ਨੇ ਰਿਜ਼ਰਵ ਬੈਂਕ ਦੇ ਸੇਵਾਮੁਕਤ ਕਰਮਚਾਰੀਆਂ ਦੀ ਪੈਨਸ਼ਨ ਵਿੱਚ 10 ਫੀਸਦੀ ਵਾਧੇ ਨੂੰ ਮਨਜ਼ੂਰੀ ਦਿੱਤੀ ਹੈ।

ਨਵੰਬਰ 2022 ਤੋਂ ਲਾਗੂ ਹੋਵੇਗਾ ਵਾਧਾ

ਪ੍ਰਵਾਨਿਤ ਸੋਧ ਤਹਿਤ 1 ਨਵੰਬਰ 2022 ਤੋਂ ਮੂਲ ਪੈਨਸ਼ਨ ਅਤੇ ਮਹਿੰਗਾਈ ਭੱਤੇ ਵਿੱਚ 10 ਪ੍ਰਤੀਸ਼ਤ ਦਾ ਵਾਧਾ ਕੀਤਾ ਜਾਵੇਗਾ। ਇਸ ਨਾਲ ਕੁੱਲ ਵਿੱਤੀ ਬੋਝ 2,696.82 ਕਰੋੜ ਰੁਪਏ ਅੰਕਿਆ ਗਿਆ ਹੈ, ਜਿਸ ਵਿੱਚ ਬਕਾਏ ਵਜੋਂ 2,485.02 ਕਰੋੜ ਰੁਪਏ ਦਾ ਇੱਕਮੁਸ਼ਤ ਭੁਗਤਾਨ ਸ਼ਾਮਲ ਹੈ।