ਗੈਸ ਫੀਲਡ 'ਤੇ ਹਮਲੇ ਨੂੰ ਲੈ ਕੇ ਟਰੰਪ-ਨੇਤਨਯਾਹੂ ਵਿਚਾਲੇ ਦਰਾਰ, ਅਮਰੀਕੀ ਰਾਸ਼ਟਰਪਤੀ ਬੋਲੇ- ਮੈਂ ਅਜਿਹਾ ਕਰਨ ਲਈ ਨਹੀਂ ਕਿਹਾ ਸੀ

"ਮੈਂ ਅਜਿਹਾ ਨਾ ਕਰਨ ਲਈ ਕਿਹਾ ਸੀ" - ਡੋਨਾਲਡ ਟਰੰਪ

ਦਰਅਸਲ, ਈਰਾਨ ਦੇ ਸਾਊਥ ਪਾਰਸ ਗੈਸ ਖੇਤਰ 'ਤੇ ਇਜ਼ਰਾਈਲ ਵੱਲੋਂ ਕੀਤੇ ਗਏ ਹਮਲੇ ਤੋਂ ਬਾਅਦ ਈਰਾਨ ਵੀ ਹੁਣ ਖਾੜੀ ਦੇਸ਼ਾਂ ਦੇ ਈਂਧਨ ਕੇਂਦਰਾਂ ਨੂੰ ਨਿਸ਼ਾਨਾ ਬਣਾ ਰਿਹਾ ਹੈ। ਇਸ ਬਾਰੇ ਅਮਰੀਕੀ ਰਾਸ਼ਟਰਪਤੀ ਟਰੰਪ ਦਾ ਕਹਿਣਾ ਹੈ ਕਿ ਉਹ ਈਰਾਨ ਦੀ ਸਭ ਤੋਂ ਮਹੱਤਵਪੂਰਨ ਊਰਜਾ ਸੰਪਤੀ 'ਤੇ ਇਜ਼ਰਾਈਲ ਦੇ ਹਮਲੇ ਦਾ ਸਮਰਥਨ ਨਹੀਂ ਕਰਦੇ। ਟਰੰਪ ਨੇ ਸਪੱਸ਼ਟ ਕਿਹਾ, "ਮੈਂ ਇਜ਼ਰਾਈਲ ਨੂੰ ਅਜਿਹਾ ਨਾ ਕਰਨ ਲਈ ਕਿਹਾ ਸੀ।"

ਜ਼ਿਕਰਯੋਗ ਹੈ ਕਿ ਇਜ਼ਰਾਈਲ ਦੇ ਇਸ ਕਦਮ ਕਾਰਨ ਵਿਸ਼ਵ ਪੱਧਰ 'ਤੇ ਊਰਜਾ ਦੀਆਂ ਕੀਮਤਾਂ ਵਿੱਚ ਭਾਰੀ ਉਛਾਲ ਆਇਆ ਹੈ। ਈਰਾਨ ਦੀ ਜਵਾਬੀ ਕਾਰਵਾਈ ਨੂੰ ਰੋਕਣ ਲਈ ਖਾੜੀ ਦੇਸ਼ਾਂ ਨੇ ਟਰੰਪ ਨੂੰ ਅਪੀਲ ਕੀਤੀ ਹੈ ਕਿ ਉਹ ਨੇਤਨਯਾਹੂ 'ਤੇ ਲਗਾਮ ਲਗਾਉਣ।

"ਕਦੇ-ਕਦੇ ਉਹ ਅਜਿਹਾ ਕੁਝ ਕਰ ਦਿੰਦੇ ਹਨ ਜੋ ਮੈਨੂੰ ਪਸੰਦ ਨਹੀਂ ਆਉਂਦਾ..."

ਓਵਲ ਆਫਿਸ ਵਿੱਚ ਜਾਪਾਨੀ ਪ੍ਰਧਾਨ ਮੰਤਰੀ ਸਨਾਏ ਤਾਕਾਇਚੀ ਨਾਲ ਹੋਈ ਮੁਲਾਕਾਤ ਦੌਰਾਨ ਟਰੰਪ ਨੇ ਨੇਤਨਯਾਹੂ ਦੇ ਫੈਸਲੇ ਬਾਰੇ ਕਿਹਾ, "ਮੈਂ ਉਨ੍ਹਾਂ ਨੂੰ ਕਿਹਾ ਸੀ - ਅਜਿਹਾ ਨਾ ਕਰੋ। ਸਾਡਾ ਤਾਲਮੇਲ ਬਹੁਤ ਵਧੀਆ ਹੈ, ਸਭ ਕੁਝ ਸਲਾਹ-ਮਸ਼ਵਰੇ ਨਾਲ ਹੁੰਦਾ ਹੈ, ਪਰ ਕਦੇ-ਕਦੇ ਉਹ ਅਜਿਹਾ ਕੁਝ ਕਰ ਦਿੰਦੇ ਹਨ ਜੋ ਮੈਨੂੰ ਪਸੰਦ ਨਹੀਂ ਆਉਂਦਾ। ਅਤੇ ਜੇਕਰ ਮੈਨੂੰ ਉਹ ਪਸੰਦ ਨਹੀਂ, ਤਾਂ ਅਸੀਂ ਹੁਣ ਅਜਿਹਾ ਨਹੀਂ ਕਰਦੇ।"

ਨੇਤਨਯਾਹੂ ਨੇ ਮਤਭੇਦਾਂ ਨੂੰ ਨਕਾਰਿਆ

ਦੂਜੇ ਪਾਸੇ, ਇਜ਼ਰਾਈਲੀ ਪੀਐਮ ਨੇਤਨਯਾਹੂ ਨੇ ਟਰੰਪ ਨਾਲ ਕਿਸੇ ਵੀ ਤਰ੍ਹਾਂ ਦੇ ਮਤਭੇਦ ਦੀਆਂ ਗੱਲਾਂ ਨੂੰ ਖਾਰਜ ਕਰ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਇਜ਼ਰਾਈਲ ਨੇ ਈਰਾਨ ਦੇ ਗੈਸ ਖੇਤਰਾਂ 'ਤੇ ਅਗਲੇ ਹਮਲਿਆਂ ਤੋਂ ਬਚਣ ਲਈ ਟਰੰਪ ਦੀ ਬੇਨਤੀ ਨੂੰ ਪ੍ਰਵਾਨ ਕਰ ਲਿਆ ਹੈ।