- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਸਖ਼ਤ ਸੁਰੱਖਿਆ ਘੇਰੇ 'ਚ ਰੂਸੀ ਰਾਸ਼ਟਰਪਤੀ, ਪੁਤਿਨ ਦੇ ਮਹਿਲ ਦੀ ਰਾਖੀ ਕਰਨਗੇ 27 ਅਤਿ-ਆਧੁਨਿਕ ਐਂਟੀ-ਮਿਜ਼ਾਈਲ ਸਿਸਟਮ
ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਦੀ ਸੁਰੱਖਿਆ ਨੂੰ ਲੈ ਕੇ ਰੂਸ ਕੋਈ ਵੀ ਕਸਰ ਬਾਕੀ ਨਹੀਂ ਛੱਡ ਰਿਹਾ। ਤਾਜ਼ਾ ਰਿਪੋਰਟਾਂ ਅਨੁਸਾਰ, ਪੁਤਿਨ ਦੇ ਪਸੰਦੀਦਾ ਮਹਿਲ ਦੀ ਸੁਰੱਖਿਆ ਲਈ ਸੱਤ ਨਵੇਂ ਏਅਰ ਡਿਫੈਂਸ ਟਾਵਰ ਲਗਾਏ ਗਏ ਹਨ। 'ਰੇਡੀਓ ਸਵੋਬੋਡਾ' ਦੀ ਇੱਕ ਜਾਂਚ ਮੁਤਾਬਕ, ਵਲਦਾਈ ਝੀਲ 'ਤੇ ਸਥਿਤ ਪੁਤਿਨ ਦੇ ਆਲੀਸ਼ਾਨ ਘਰ ਦੇ ਆਲੇ-ਦੁਆਲੇ ਹੁਣ ਕੁੱਲ 27 ਟਾਵਰ ਹਨ, ਜੋ ਐਂਟੀ-ਏਅਰਕ੍ਰਾਫਟ ਸਿਸਟਮ ਨਾਲ ਲੈਸ ਹਨ।
Posted By alisha
Publish Date: Tue, 14 Apr 2026 10:54 AM (IST)
Updated Date: Tue, 14 Apr 2026 11:11 AM (IST)
ਨਵੀਂ ਦਿੱਲੀ : ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਦੀ ਸੁਰੱਖਿਆ ਨੂੰ ਲੈ ਕੇ ਰੂਸ ਕੋਈ ਵੀ ਕਸਰ ਬਾਕੀ ਨਹੀਂ ਛੱਡ ਰਿਹਾ। ਤਾਜ਼ਾ ਰਿਪੋਰਟਾਂ ਅਨੁਸਾਰ, ਪੁਤਿਨ ਦੇ ਪਸੰਦੀਦਾ ਮਹਿਲ ਦੀ ਸੁਰੱਖਿਆ ਲਈ ਸੱਤ ਨਵੇਂ ਏਅਰ ਡਿਫੈਂਸ ਟਾਵਰ ਲਗਾਏ ਗਏ ਹਨ। 'ਰੇਡੀਓ ਸਵੋਬੋਡਾ' ਦੀ ਇੱਕ ਜਾਂਚ ਮੁਤਾਬਕ, ਵਲਦਾਈ ਝੀਲ 'ਤੇ ਸਥਿਤ ਪੁਤਿਨ ਦੇ ਆਲੀਸ਼ਾਨ ਘਰ ਦੇ ਆਲੇ-ਦੁਆਲੇ ਹੁਣ ਕੁੱਲ 27 ਟਾਵਰ ਹਨ, ਜੋ ਐਂਟੀ-ਏਅਰਕ੍ਰਾਫਟ ਸਿਸਟਮ ਨਾਲ ਲੈਸ ਹਨ।
ਡਰੋਨਾਂ ਦਾ ਕਾਲ ਹਨ ਇਹ ਸਿਸਟਮ
ਇਹ 'ਡਰੋਨ ਕਿਲਰ' ਸਿਸਟਮ ਘੱਟ ਉਚਾਈ 'ਤੇ ਤੇਜ਼ੀ ਨਾਲ ਉੱਡਣ ਵਾਲੇ ਖ਼ਤਰਿਆਂ ਨੂੰ ਮਾਰ ਗਿਰਾਉਣ ਵਿੱਚ ਮਾਹਰ ਮੰਨੇ ਜਾਂਦੇ ਹਨ। ਯੂਕਰੇਨ ਦੀ ਸਰਹੱਦ ਤੋਂ ਲਗਭਗ 185 ਮੀਲ ਦੂਰ ਸਥਿਤ ਇਸ ਰਿਹਾਇਸ਼ ਦੀ ਸੁਰੱਖਿਆ ਵਿੱਚ ਭਾਰੀ ਵਾਧਾ ਕੀਤਾ ਗਿਆ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਸਾਲ 2024 ਦੀ ਸ਼ੁਰੂਆਤ ਵਿੱਚ ਇੱਥੇ ਸਿਰਫ਼ 7 ਟਾਵਰ ਸਨ, ਜਿਨ੍ਹਾਂ ਦੀ ਗਿਣਤੀ ਹੁਣ ਵਧਾ ਕੇ 27 ਕਰ ਦਿੱਤੀ ਗਈ ਹੈ।
ਵਲਦਾਈ: ਪੁਤਿਨ ਦਾ ਗੁਪਤ ਤੇ ਪਸੰਦੀਦਾ ਟਿਕਾਣਾ
ਪੁਤਿਨ ਪਿਛਲੇ ਕੁਝ ਸਮੇਂ ਤੋਂ ਵਲਦਾਈ ਦੇ ਇਸ ਇਕਾਂਤ ਮਹਿਲ ਵਿੱਚ ਰਹਿਣਾ ਜ਼ਿਆਦਾ ਪਸੰਦ ਕਰ ਰਹੇ ਹਨ। ਮੰਨਿਆ ਜਾਂਦਾ ਹੈ ਕਿ ਇੱਥੇ ਉਨ੍ਹਾਂ ਦੀ ਸਾਥੀ ਅਲੀਨਾ ਕਾਬੇਵਾ ਅਤੇ ਉਨ੍ਹਾਂ ਦੇ ਦੋ ਬੇਟੇ ਰਹਿੰਦੇ ਹਨ। ਇਹ ਮਹਿਲ ਦੋ ਝੀਲਾਂ ਦੇ ਵਿਚਕਾਰ ਅਤੇ ਸੰਘਣੇ ਜੰਗਲਾਂ ਨਾਲ ਘਿਰਿਆ ਹੋਇਆ ਹੈ, ਜੋ ਇਸਨੂੰ ਦੁਸ਼ਮਣ ਦੇ ਡਰੋਨਾਂ ਦੀ ਨਜ਼ਰ ਤੋਂ ਬਚਾਉਂਦਾ ਹੈ। ਚਰਚਾ ਇਹ ਵੀ ਹੈ ਕਿ ਇਸ ਮਹਿਲ ਦੇ ਅੰਦਰ ਇੱਕ ਬੰਕਰ ਅਤੇ ਕ੍ਰੇਮਲਿਨ (ਰਾਸ਼ਟਰਪਤੀ ਦਫ਼ਤਰ) ਦੀ ਹੂਬਹੂ ਨਕਲ ਤਿਆਰ ਕੀਤੀ ਗਈ ਹੈ, ਤਾਂ ਜੋ ਵੀਡੀਓ ਕਾਲਾਂ ਦੌਰਾਨ ਪੁਤਿਨ ਦੀ ਅਸਲ ਲੋਕੇਸ਼ਨ ਦਾ ਪਤਾ ਨਾ ਲੱਗ ਸਕੇ।
ਹੋਰ ਰਿਹਾਇਸ਼ਾਂ 'ਤੇ ਵੀ ਸੁਰੱਖਿਆ ਸਖ਼ਤ
ਸਿਰਫ਼ ਵਲਦਾਈ ਹੀ ਨਹੀਂ, ਸੋਚੀ ਸਥਿਤ 'ਬੋਚਾਰੋਵ ਰੂਚੇ' ਰਿਹਾਇਸ਼ ਦੇ ਆਲੇ-ਦੁਆਲੇ ਵੀ ਸੁਰੱਖਿਆ ਦਾ ਘੇਰਾ ਵਧਾ ਦਿੱਤਾ ਗਿਆ ਹੈ। ਫੈਡਰਲ ਪ੍ਰੋਟੈਕਟਿਵ ਸਰਵਿਸ ਨੇ ਇਸ ਇਲਾਕੇ ਦੇ 1.2 ਵਰਗ ਮੀਲ ਖੇਤਰ ਨੂੰ 'ਨੋ-ਗੋ ਜ਼ੋਨ' ਬਣਾਉਣ ਦਾ ਪ੍ਰਸਤਾਵ ਦਿੱਤਾ ਹੈ, ਜਿੱਥੇ ਡਰੋਨ ਉਡਾਉਣ, ਜਹਾਜ਼ ਖੜ੍ਹੇ ਕਰਨ ਜਾਂ ਕਿਸੇ ਵੀ ਤਰ੍ਹਾਂ ਦੀ ਮੁਰੰਮਤ ਦੇ ਕੰਮ 'ਤੇ ਪਾਬੰਦੀ ਹੋਵੇਗੀ।
ਡਰੋਨ ਫੈਕਟਰੀ ਦੀ ਰਾਖੀ ਲਈ ਵੀ ਵਿਸ਼ੇਸ਼ ਪ੍ਰਬੰਧ
ਤਤਾਰਸਤਾਨ ਦੇ ਅਲਾਬੁਗਾ ਖੇਤਰ ਵਿੱਚ, ਜਿੱਥੇ ਈਰਾਨੀ ਡਿਜ਼ਾਈਨ ਵਾਲੇ 'ਸ਼ਾਹੇਦ-136' ਡਰੋਨ ਬਣਾਏ ਜਾਂਦੇ ਹਨ, ਉੱਥੇ ਵੀ 20 ਏਅਰ ਡਿਫੈਂਸ ਟਾਵਰ ਲਗਾਏ ਗਏ ਹਨ। ਹਾਲਾਂਕਿ, ਯੂਕਰੇਨ ਦਾ ਦਾਅਵਾ ਹੈ ਕਿ ਉਨ੍ਹਾਂ ਨੇ ਰੂਸ ਦੇ ਕਈ 'ਪੈਂਟਸਿਰ' ਸਿਸਟਮਾਂ ਨੂੰ ਤਬਾਹ ਕਰ ਦਿੱਤਾ ਹੈ, ਪਰ ਫਿਰ ਵੀ ਪੁਤਿਨ ਦੀ ਨਿੱਜੀ ਸੁਰੱਖਿਆ ਲਈ ਰੂਸ ਨੇ ਪੂਰੀ ਤਾਕਤ ਝੋਕ ਦਿੱਤੀ ਹੈ।